Read KO E TOH TAPU KATOA TONGA KO SELEMAIA 33 Bible Online

KO SELEMAIA 33 - KO E TOH TAPU KATOA TONGA bible

KO SELEMAIA 33

¹PEA lolotonga ‘oku kei nofo tāpuni ‘a Selemaia ‘i he loto‘ā ‘o e ka‘ate mo e hoko mai ‘a e folofola ‘a Sihova kiate ia ko hono tu‘o ua, ‘o pehē,

²Ko e folofola eni ‘a Sihova, ‘a e ‘Afio ‘oku ne ngaohi ha me‘a, ‘a Sihova ‘oku ne fakakaukau‘i ia ke fokotu‘u; ko Sihova hono huafa:

³Ui kiate au, pea te u tali koe, pea te u fakahā kiate koe ‘a e ngaahi me‘a lalahi mo ma‘ungata‘a, ‘oku ‘ikai te ke lava ke ‘ilo ia.

⁴He ko e folofola eni ‘a Sihova, ko e ‘Otua ‘o ‘Isileli, ‘o kau ki he ngaahi fale ‘o e kolo ni, mo e ngaahi fale ‘o e ngaahi Tu‘i Siuta, ‘a ia na‘e holoki ke ta‘ofi ‘a e ngaahi puke mo e heletā:[60]

⁵Si‘i omi ē ke fai tau mo e kau Kalitia! ka ko e fai ke fakafonu ‘a e ngaahi potu[61] ko ē ‘aki ‘a e ‘anga‘anga ‘o e kakai, ‘a ia kuo u tāmate‘i ‘i he‘eku ‘ita mo ‘eku kakaha, ‘io, ko e kakai ‘a ia ko ‘enau fu‘u kovi kuo u hanga kehe ai mei he kolo ni.

⁶Ko au ē te u fakakili mai ia, ‘o ‘ai hono faito‘o, pea te u fakamo‘ui kinautolu: pea te u tatala kiate kinautolu ha fu‘ufu‘unga fakatu‘umālie mo fakaai.

⁷Pea te u fakafoki ‘a e pōpula ‘o Siuta, mo e pōpula ‘o ‘Isileli, pea te u langa hake kinautolu hangē ko ia ‘i he kamata‘anga.

⁸Pea te u fakama‘a kinautolu mei he ngaahi kovi kotoa pē, ‘a ia kuo nau hia ai kiate au; pea te u fakamolemole ‘enau ngaahi kovi kotoa pē, ‘a ia kuo nau hia ai kiate au, mo ia kuo nau angatu‘u ai kiate au.

⁹Pea ‘e hoko ‘a e kolo ni kiate au ko e hingoa fakatupu fiefia, ko e fakamālō mo e lāngilangi‘anga ‘i he ngaahi pule‘anga kotoa pē ‘o māmani, ‘a ia te nau fanongo ki he fu‘u lelei ‘oku ou fai kiate kinautolu, pea te nau manavahē mo tete koe‘uhi ko e fu‘u lelei, pea koe‘uhi ko e fu‘u tu‘umālie ‘oku ou ngaohi ma‘ana.

¹⁰Ko e folofola eni ‘a Sihova: ‘E toe ongo‘i ‘i he potu ni, ‘a ia ‘oku mou pehē, Ko e lala ia, ta‘e‘i ai ha tangata, pea ta‘e‘i ai ha manu, ‘io, ‘i he ngaahi kolo ‘o Siuta mo e ngaahi hala ‘o Selusalema, ‘a ia kuo ka‘anga, ta‘e‘i ai ha tangata, pea ta‘e‘i ai ha nofo, pea ta‘e‘i ai ha manu —

¹¹‘io, ‘e toe ongo‘i ai ‘a e le‘o ‘o e fiefia mo e le‘o ‘o e mavava, ‘a e le‘o ‘o e ‘eiki ta‘ane mo e le‘a ‘o e ta‘ahine, ‘a e le‘o ‘o e fa‘ahinga ‘oku nau pehē, Mou fakafeta‘i kia Sihova Sāpaoti, “he ‘oku lelei ‘a Sihova; he ‘oku tolonga ‘o ta‘engata ‘ene ‘alo‘ofa;” mo e fa‘ahinga ‘oku ‘omi feilaulau-fakafeta‘i ki he fale ‘o Sihova. He te u fakafoki ‘a e pōpula ‘o e fonua ke hangē ko ia ‘i he kamata‘anga — ko e folofola ia ‘a Sihova.

¹²Ko e folofola eni ‘a Sihova Sāpaoti: ‘E toe ai ‘i he potu ni, ‘a e lala ni ta‘eha tangata pe ha manu, ‘io, mo hono ngaahi kolo kotoa, ‘e toe ai ha nofo‘anga tauhi sipi, ‘oku nau fakatākoto ai ‘enau fanga sipi.

¹³‘I he ngaahi kolo mo‘unga, ‘i he ngaahi kolo ‘i Sēfela‘a, pea ‘i he ngaahi kolo ‘o e Tonga, pea ‘i he fonua ‘o Penisimani, pea ‘i he ngaahi tua‘ā ‘o Selusalema, pea ‘i he ngaahi kolo ‘o Siuta, ‘e toe laka ‘a e fanga sipi ‘i he lalo nima ‘o ia ‘oku ne lau — ko e folofola ia ‘a Sihova.

¹⁴Vakai, ‘oku hoko mai ha taimi — ko Sihova ia mei he Ta‘ehāmai — ‘a ia te u fakaai ai ‘a e tala‘ofa, ‘a ia na‘a ku fai ki he fale ‘o ‘Isileli mo e fale ‘o Siuta.

¹⁵‘I he ngaahi ‘aho ko ia, ‘io, ‘i he kuonga ko ena, te u ‘ai ke muka hake ‘ia Tēvita ha Huli mā‘oni‘oni, pea te ne feia ‘a e fakalao mo e totonu ‘i he fonua.

¹⁶‘I he ngaahi ‘aho ko ia ‘e tu‘umālie ‘a Siuta, pea ‘e nofo nonga ‘a Selusalema, pea ko eni ‘a e hingoa ‘e ui‘aki ‘a e kolo, ko Sihova Sitikenu (ko Sihova ko hotau mā‘oni‘oni‘anga).

¹⁷He ko e folofola eni ‘a Sihova, ‘E ‘ikai hala ha tangata ‘o Tēvita ‘oku nofo ‘i he taloni ‘o ha‘a ‘Isileli;

¹⁸‘e ‘ikai hala ha tangata ‘o ha‘a Līvai taula‘eiki ke tu‘u ‘i hoku ‘ao, ‘o feia ha feilaulau-mōifua, pea ke tutu ha feilaulau-me‘akai, pea ke fai ‘a e feilaulau ‘o e ‘aho kotoa pē.

¹⁹Pea na‘e hoko ‘a e folofola ‘a Sihova kia Selemaia, ‘o pehē,

²⁰Ko e folofola eni ‘a Sihova, Kapau te mou lava ke maumau ‘eku kovinānite ki he ‘aho, mo e kovinānite ki he pō, ke ‘oua na‘a hokohoko totonu ‘a e ‘aho mo e pō;

²¹‘e toki lava ke maumau foki ‘eku kovinānite mo ‘eku tamaio‘eiki ko Tēvita, ‘o ‘oua ai hano foha ‘oku ‘afio ko e tu‘i ‘i hono taloni; mo ‘eku kovinānite mo e kau Līvai, ‘a e kau taula‘eiki ‘oku tauhi kiate au.

²²Hangē ‘oku ‘ikai malau ‘a e hōsitē ‘o langi, pea ‘oku ‘ikai mafua ‘a e ‘one‘one ‘o e tahi, pehē te u fakalahi ‘a e hako ‘o ‘eku tamaio‘eiki ko Tēvita, mo e kau Līvai ‘oku tauhi kiate au.

²³Pea na‘e hoko ‘a e folofola ‘a Sihova kia Selemaia, ‘o pehē, ‘Ikai kuo ke vakai ‘a e me‘a ‘oku lau ‘e he kakai ni, ‘o pehē,

²⁴Ko e ongo fāmili na‘e fili ki ai ‘e Sihova kuo ne li‘aki fakatou‘osi? pea kuo nau fakasīkaka‘i hoku kakai, tokua ‘oku ‘ikai te nau kei ko e pule‘anga.

²⁵Ko e folofola eni ‘a Sihova: Kapau ‘oku ‘ikai ‘i ai ‘eku kovinānite ki he ‘aho mo e pō, kapau kuo ‘ikai te u fokotu‘u ha ngaahi tu‘utu‘uni ki he langi mo e fonua;

²⁶te u toki li‘aki foki ‘a e hako ‘o Sēkope, mo ‘eku tamaio‘eiki ko Tēvita, ‘o ‘oua ‘e to‘o mei hono hako ha ni‘ihi ke pule ki he hako ‘o ‘Epalahame, ‘Aisake, mo Sēkope: tala atu, te u fakafoki ‘enau pōpula, pea te u ‘alo‘ofa kiate kinautolu,