Read KO E TOH TAPU KATOA TONGA KO SELEMAIA 34 Bible Online

KO SELEMAIA 34 - KO E TOH TAPU KATOA TONGA bible

KO SELEMAIA 34

¹KO E folofola na‘e hoko kia Selemaia meia Sihova, lolotonga ‘oku fai tau ki Selusalema mo hono ngaahi kolo ‘e Nepukanesa ko e Tu‘i Pāpilone, mo ‘ene tau kotoa, mo e ngaahi pule‘anga ‘o māmani na‘e fakaongo kiate ia, mo e ngaahi kakai —

²Ko e folofola eni ‘a Sihova ko e ‘Otua ‘o ‘Isileli, ‘Alu, ‘o lea kia Setekaia ko e Tu‘i Siuta, ‘o ke pehē ki ai, Ko e folofola eni ‘a Sihova, Ko au eni te u tuku ‘a e kolo ni ki he nima ‘o e Tu‘i Pāpilone, pea te ne tutu ia ‘aki ‘a e afi.

³Pea ‘e ‘ikai te ke hao koe mei hono nima, ka kuo pau ke puke koe, ‘o tuku ki hono nima; pea ko ho mata ‘e sio ki he mata ‘o e Tu‘i Pāpilone, pea ko hono ngutu ‘e lea ki ho ngutu, pea te ke ‘alu ki Pāpilone.

⁴Ka ke fanongo pē ki he folofola ‘a Sihova, ‘e Setekaia ko e Tu‘i Siuta: Ko e folofola eni ‘a Sihova kiate koe, ‘E ‘ikai te ke mate ‘i he heletā; te ke pekia melino pē;

⁵pea ‘e ai ha fu‘u takipō kakala, hangē ko ho‘o ngaahi kui, ‘a e ngaahi tu‘i mu‘a na‘e holomu‘a ‘iate koe: ‘e pehē ‘enau fai ha takipō kiate koe; pea te nau tēngihia koe, ‘o nau pehē, ‘Ēī ‘oiauē! — he ko e lea ni kuo u fai ‘e au; ko Sihova ia mei he Ta‘ehāmai.

⁶Pea hanga ‘a Selemaia ko e palōfita, ‘o ne ‘a‘au ‘a e ngaahi lea ko ia kotoa ki Selusalema, kia Setekaia ko e Tu‘i Siuta,

⁷lolotonga ‘oku fai tau ki Selusalema ‘e he tau ‘a e Tu‘i Pāpilone, pea ki he ngaahi kolo ‘o Siuta kātoa na‘e toe, ‘io, ki Lākisi mo ‘Āseka; he ko kinaua pē ‘i he ngaahi kolo ‘o Siuta na‘e toe ‘oku ‘aa‘i.

⁸Ko e folofola na‘e hoko kia Selemaia meia Sihova, hili ‘a e fai kovinānite ‘a Kingi Setekaia mo e kakai kotoa na‘e ‘i Selusalema, ke fanongonongo tau‘atāina ki he fa‘ahinga ko ē;

⁹ke takitaha tuku atu tau‘atāina pē ‘ene tamaio‘eiki mo ‘ene kaunanga, ‘a ia ‘oku tangata Hepelū pe fefine Hepelū; ‘o ‘oua te nau ngaohi ke hopoate ha taha ‘i he fa‘ahinga ko ē, he ko e Siu ko hono kāinga.

¹⁰Pea na‘e talangofua ‘a e hou‘eiki kotoa mo e kakai kotoa na‘e kau ‘i he fuakava, ko ‘enau takitaha tuku tau‘atāina ‘ene tamaio‘eiki mo ‘ene kaunanga, ke ‘oua te nau kei hopoate kiate kinautolu; ‘io, na‘a nau talangofua, ‘o tukuange pē.

¹¹Kae hili ‘enau fai pehē, pea nau momou, ‘o nau fakafoki mai ‘a e kau tamaio‘eiki mo e kau kaunanga kuo nau tuku atu ke tau‘atāina, ‘o nau fakamālohi‘i kinautolu ke nau toe tamaio‘eiki mo kau kaunanga.

¹²Pea hoko ‘a e folofola ‘a Sihova kia Selemaia meia Sihova, ‘o pehē,

¹³Ko e folofola eni ‘a Sihova, ko e ‘Otua ‘o ‘Isileli: Na‘a ku fai kovinānite au mo ho‘omou ngaahi kui ‘i he taimi na‘a ku ‘ohake ai kinautolu mei ‘Isipite, mei he fale pōpula, ‘o pehē,

¹⁴‘I he ‘osi ha fitu‘i ta‘u, te mou tukuange takitaha hono kāinga, ‘a e Hepelū kuo ne fakatau ia kiate koe, ‘io, te ne ngāue kiate koe ‘o ta‘u ono, pea te ke toki tukuange ke ‘alu tau‘atāina: ka na‘e ‘ikai tokanga kiate au ‘e ho‘omou ngaahi kui, pea na‘e ‘ikai te nau fokotu‘u telinga mai.

¹⁵Ka ko kimoutolu na‘a mou tafoki ‘i he ‘aho ko ē, pea mou fai ‘a e me‘a na‘a ku matamatatotonu‘ia ai; he na‘a mou takitaha tala ‘a e tau‘atāina ki hono kaungā nonofo; pea na‘a mou fai ha fuakava ‘i hoku ‘ao, ‘i he fale ‘oku ui‘aki hoku hingoa.

¹⁶Ka na‘a mou toe liliu, ‘o mou va‘inga‘aki hoku hingoa, pea mou takitaha fakafoki mai ‘ene tamaio‘eiki mo ‘ene kaunanga, ‘a ia kuo mou tukuange ke tau‘atāina ke fai ‘enau fa‘iteliha; pea na‘a mou fakamālohia kinautolu, ke nofo tamaio‘eiki mo kaunanga kiate kimoutolu.

¹⁷Ko ia, ko e folofola eni ‘a Sihova, Ko kimoutolu kuo ‘ikai te mou talangofua kiate au, ke tala tau‘atāina takitaha ki hono kāinga pe kaungā nonofo: ka ko au eni ‘oku ou tala ‘oku mou tau‘atāina — ko Sihova ia mei he Ta‘ehāmai — ‘oku mou ‘atā ki he heletā, mo e mahaki faka‘auha, mo e honge; pea te u tuku kimoutolu ko e me‘a ke tekatali ‘aki ‘e he ngaahi pule‘anga kotoa ‘o māmani.

¹⁸Pea te u ngaohi ‘a e kau tangata na‘e laka kehe mo ‘etau kovinānite, ‘a kinautolu kuo ‘ikai te nau tauhi ‘a e lea ‘o e kovinānite na‘a nau fai ‘i hoku ‘ao — ‘io, te u ngaohi kinautolu ke hangē ko e kafi na‘a nau fahi ua ‘o laka ‘i he vaha‘a ‘o hono ngaahi konga;

¹⁹‘a e hou‘eiki Siuta, mo e hou‘eiki Selusalema, ‘a e kau ‘iunoke, mo e kau taula‘eiki, mo e kakai kotoa ‘o e fonua, ‘a kinautolu na‘e laka ‘i he vaha‘a ‘o e ngaahi konga kafi;

²⁰pea te u tuku kinautolu ki he nima ‘o honau ngaahi fili, pea ki he nima ‘o e kakai ‘oku kumi ki he‘enau mo‘ui: pea ko honau ngaahi ‘anga‘anga ‘e hoko ‘o me‘akai ‘aki ‘e he manupuna ‘o e ‘atā, mo e manu ‘o e fonua.

²¹Pea ko Setekaia ko e Tu‘i Siuta mo hono hou‘eiki te u tuku ki he nima ‘o honau ngaahi fili, pea ki he nima ‘o e kakai ‘oku kumi ki he‘enau mo‘ui, pea ki he nima ‘o e tau ‘o e Tu‘i Pāpilone, ‘a ia kuo mātuku atu meiate kimoutolu.

²²Ko au eni ‘oku ou fai tu‘utu‘uni — ko Sihova ia mei he Ta‘ehāmai — pea te u fakafoki kinautolu ki he kolo ni; pea te nau fai tau ki ai, ‘o hamu, pea te nau tutu ia ‘aki ‘a e afi: pea ko e ngaahi kolo ‘o Siuta te u tuku ke lala, ‘o ‘ikai ha nofo ai.