Read KO E TOH TAPU KATOA TONGA KO SELEMAIA 35 Bible Online

KO SELEMAIA 35 - KO E TOH TAPU KATOA TONGA bible

KO SELEMAIA 35

¹KO E folofola na‘e hoko kia Selemaia meia Sihova ‘i he kuonga ‘o Sihoiakimi, foha ‘o Siosaia, ko e Tu‘i Siuta, ‘o pehē,

²‘Alu kia ha‘a Lēkapi, ‘o lea kiate kinautolu, ‘o ‘omi kinautolu ki he fale ‘o Sihova, ki ha taha ‘o e ngaahi loki; ‘o fakatau uaine kiate kinautolu.

³Pea u ma‘u mai ‘a Siasanaia foha ‘o Selemaia, foha ‘o Hapasinaia, pea mo hono kāinga, pea mo hono ngaahi foha kotoa, ‘io, mo e ha‘a Lēkapi fua pē.

⁴Pea u ‘omi kinautolu ki he fale ‘o Sihova, ki he loki ‘o e fānau ‘a Hānani foha ‘o ‘Iketalaia, ko e tangata ‘o ‘Elohimi, ‘a ia na‘e hoko mo e loki ‘o e hou‘eiki, ‘a ia na‘e tu‘u ‘i he funga loki ‘o Ma‘aseia foha ‘o Sālumi, ko e tauhi ‘o e hū‘anga.

⁵Pea u tuku ‘i he ‘ao ‘o e hako ‘o ha‘a Lēkapi ha ngaahi pēsoni kuo fonu uaine, mo ha ngaahi ipu, pea u pehē kiate kinautolu, Mou inu uaine.

⁶Pea nau tali mai, ‘E ‘ikai te mau inu uaine: he ko Sionatapi foha ‘o Lēkapi, ko si‘emau kui, na‘a ne tu‘utu‘uni kiate kimautolu ‘o pehē, ‘E ‘ikai te mou inu uaine, ‘a kimoutolu mo ho‘omou fānau, ‘o ta‘engata.

⁷Pea ‘e ‘ikai te mou langa fale, pea ‘e ‘ikai te mou tō ta‘u, pea ‘e ‘ikai te mou tō ha ngoue vaine, ‘io, ‘e ‘ikai ‘iate kimoutolu ha me‘a pehē; ka te mou nofo tēniti ma‘u ai pē; koe‘uhi ke mou mo‘ui fuoloa ‘i he funga ‘o e kelekele ‘oku mou ‘āunofo ai.

⁸Pea kuo mau fakaongo ki he le‘o ‘o ‘emau kui ko Sionatapi foha ‘o Lēkapi, ‘i he me‘a kotoa pē na‘a ne tu‘utu‘uni mai, ke ‘oua te mau inu uaine lolotonga ‘emau mo‘ui, ‘a kimautolu, ‘a homau ngaahi uaifi, ‘a ‘emau fānau tangata, mo ‘emau fānau fefine; pea ke ‘oua te mau langa fale ke nofo ai;

⁹pea ‘oku ‘ikai ‘iate kimautolu ha ngoue vaine, pe ha tokanga ngoue, pe ha pulopula:

¹⁰ka ‘oku mau nofo tēniti pē, ‘io, kuo mau talangofua, pea kuo mau fai tatau tofu pē mo e me‘a na‘e tu‘utu‘uni mai ‘e he‘emau kui ko Sionatapi.

¹¹Ka ‘i he ‘iloange na‘e hake mai ki he fonua ‘a Nepukanesa ko e Tu‘i Pāpilone, pea na‘a mau pehē, Ha‘u ā ke tau hū ki Selusalema telia ‘a e tau Kalitia, pea telia ‘a e tau Sīlia; ko ia, ‘oku mau nofo ‘i Selusalema.

¹²Pea hoko ‘a e folofola ‘a Sihova kia Selemaia, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli:

¹³‘Alu, ‘o lea ki he tangata Siuta, mo e nofo Selusalema, ‘O ‘ikai koā te mou tali akonaki, pea fanongo ki he‘eku ngaahi lea? — ko Sihova ia mei he Ta‘ehāmai.

¹⁴Ko e ngaahi lea ‘a Sionatapi foha ‘o Lēkapi, ‘a ‘ene tu‘utu‘uni ‘ene fānau ke ‘oua te nau inu uaine, ‘oku fai ia, pea ‘oku ‘ikai te nau inu ‘o a‘u ki he ‘aho ni, ka ‘oku nau fakaongo ki he tu‘utu‘uni ‘a ‘enau kui. Ka ko au kuo u lea kiate kimoutolu, ‘o u ‘ā hengihengi ke lea: ka ‘oku ‘ikai te mou tokanga kiate au.

¹⁵Pea u fekau atu kiate kimoutolu ‘eku kau sevāniti ko e kau palōfita, ‘o u ‘ā hengihengi, ‘o fekau kinautolu, he‘eku pehē, Mou tafoki mu‘a takitaha mei hono ‘alunga kovi, pea mou fai ‘a e ngaahi ngāue ‘oku lelei, pea ‘oua te mou muimui ‘otua kehe ke tauhi ki ai, pea te mou toki nofo ‘i he kelekele kuo u foaki kiate kimoutolu mo ho‘omou ngaahi kui: ka na‘e ‘ikai te mou fokotu‘u telinga mai, pea na‘e ‘ikai te mou tokanga kiate au.

¹⁶Seuke, kuo fai ‘e he hako ‘o Sionatapi foha ‘o Lēkapi ‘a e tu‘utu‘uni ‘a ‘enau kui, ‘a ia na‘a ne fai kiate kinautolu, ka ko e kakai ni ‘oku ‘ikai te nau fakaongo kiate au.

¹⁷Ko ia, ko e folofola eni ‘a Sihova ko e ‘Otua Mohu Hōsitē, ko e ‘Otua ‘o ‘Isileli: Ko au eni ‘oku ou ‘omi ki Siuta, pea ki he nofo Selusalema fua pē, ‘a e kovi kotoa na‘a ku lea ki ai ‘iate kinautolu: koe‘uhi na‘a ku lea kiate kinautolu, ka na‘e ‘ikai te nau tokanga; pea na‘a ku ui kinautolu, ka na‘e ‘ikai te nau tali.

¹⁸Pea lea ‘a Selemaia kia ha‘a Lēkapi, Ko e folofola eni ‘a Sihova Sāpaoti, ko e ‘Otua ‘o ‘Isileli: ko e me‘a ‘i ho‘omou fakaongo ki he tu‘utu‘uni ‘a Sionatapi ko ho‘omou kui, pea kuo mou tauhi ‘ene ngaahi fekau, mo fai tatau tofu pē mo e me‘a na‘a ne tu‘utu‘uni atu; ko ia ko e folofola eni ‘a Sihova Sāpaoti, ko e ‘Otua ‘o ‘Isileli:

¹⁹‘E ‘ikai hala ha tangata ‘o Sionatapi foha ‘o Lēkapi, ke tu‘u ‘i hoku ‘ao ‘o ta‘engata.