Read KO E TOH TAPU KATOA TONGA KO SELEMAIA 38 Bible Online

KO SELEMAIA 38 - KO E TOH TAPU KATOA TONGA bible

KO SELEMAIA 38

¹PEA ‘i he fanongo ‘e Sefataia foha ‘o Mātani, mo Ketalaia foha ‘o Pāsua, mo Sūkali foha ‘o Silimaia, mo Pāsua foha ‘o Malakaia, ki he ngaahi lea na‘e fai ma‘u pē ‘e Selemaia ki he kakai kehekehe, ‘o pehē,

²Ko e folofola eni ‘a Sihova, Ko ia ‘oku nofo ‘i he kolo ni te ne mate ‘i he heletā, ‘i he honge, pea ‘i he mahaki faka‘auha: ka ko ia te ne hū ki tu‘a ki he kau Kalitia, te ne mo‘ui, ‘io, te ne ‘ave ‘ene mo‘ui ma‘ane vete, pea te ne hao.

³Ko e folofola eni ‘a Sihova, Kuo pau ke tuku ‘a e kolo ni ki he nima ‘o e tau ‘a e Tu‘i Pāpilone, pea te ne hamu ia.

⁴Ko ia, na‘e fakatau folofola ‘a e hou‘eiki ki he tu‘i, Ke tāmate‘i mu‘a ‘a e tangata ni; he ka ne ta‘e‘oua ia ‘oku malūmaea ai ‘a e nima ‘o e kau tangata tau ‘oku toe ‘i he kolo ni, pea mo e nima ‘a e kakai kotoa, ko ‘ene fai kiate kinautolu ha ‘alā lea pehē; he ko e tangata ni ‘oku ‘ikai te ne mamahi‘i ha tu‘umālie ‘o e kakai ni, ka ko e kovi pē.

⁵Pea folofola ‘a Kingi Setekaia, Ko ena ia ke mou fa‘iteliha ki ai: he ko e hā ‘a e tu‘i te ne mata‘ofi ha‘amou me‘a?

⁶Ko ia na‘a nau puke ‘a Selemaia, ‘o nau tuku ia ki he lepa ‘o Malakaia foha ‘o e tu‘i, ‘a ia ‘oku ‘i he loto‘ā ‘o e ka‘ate: ‘io, na‘a nau tuku ia ki ai ‘aki ‘a e ngaahi maea. Pea na‘e ‘ikai ha vai ‘i he lepa, ko e pelepela pē: pea ngalo ‘a Selemaia ‘i he pela.

⁷Pea ko ‘Ēpetimeleki, ko e matāpule ‘Itiopea[62] na‘e ‘iunoke, pea ko e toko taha na‘e nofo ‘i he fale ‘o e tu‘i, na‘a ne fanongo kuo tuku ‘a Selemaia ki he lepa; ka ko e tu‘i ‘oku ne ‘afio ‘i he matanikolo ‘o Penisimani:

⁸ko ia, na‘e hū ki tu‘a ‘a ‘Ēpetimeleki mei he fale ‘o e tu‘i, pea ne fakatau folofola ki he tu‘i, ‘o pehē,

⁹‘Ēī ‘a e ‘afiona, ko e ngāue kovi ‘a e kau tangata na, ‘a e fu‘u me‘a kuo nau fai kia Selemaia ko e palōfita, ‘a ‘enau tuku ia ki he lepa; pea te ne mate ‘i he potu ko ia koe‘uhi ko e honge: he ‘oku ‘ikai ha kei me‘akai ‘i he kolo.

¹⁰Ko ia na‘e fekau ‘e he tu‘i ‘a e ‘Itiopea ko ‘Ēpetimeleki, ‘o pehē, ‘Ave mei heni ha kau tangata ‘e toko tolungofulu ke ke ngāue‘aki, pea ‘ohake ‘a Selemaia mei he lepa te‘eki ke ne pekia.

¹¹Ko ia, na‘e ‘ave ‘e ‘Ēpetimeleki ‘a e kau tangata ke ne ngāue‘aki, pea ne hū ki he fale ‘o e tu‘i, ki ha potu ‘i he lalo fale pa‘anga, ‘o ne to‘o mei ai ‘a e ngaahi kongokonga kofu mahaehae mo ‘osi‘osi, ‘o ne tuku hifo ‘aki ha ngaahi maea kia Selemaia ‘i he lepa.

¹²Pea lea ‘a ‘Ēpetimeleki, ‘a e matāpule ‘Itiopea, kia Selemaia, ‘Ai mu‘a ‘a e ngaahi kongokonga kofu mahaehae mo ‘osi‘osi ki ho fā‘ifine, ‘i hono vaha‘a mo e maea. Pea fai pehē ‘e Selemaia.

¹³Pea nau toki toho mai ‘a Selemaia ‘aki ‘a e ngaahi maea, ‘o ‘ohake ia mei he lepa: pea na‘e nofo ‘a Selemaia ‘i he loto‘ā ‘o e ka‘ate.

¹⁴Pea fekau ‘e Kingi Setekaia ke ‘omi ‘a Selemaia ko e palōfita kiate ia, ki hono tolu ‘o e hū‘anga ‘oku ‘i he fale ‘o Sihova. Pea folofola ‘a e tu‘i kia Selemaia, ‘Oku ou fie fehu‘i kiate koe ‘i ha me‘a; ‘oua te ke momo‘i fufū meiate au ha me‘a ‘e taha.

¹⁵Pea tali ‘a Selemaia kia Setekaia, kapau ā te u fakahā ha me‘a kiate koe, ‘ikai kuo pau te ke tāmate‘i au? pea kapau te u fale‘i koe, tala‘ehai te ke tokanga kiate au.

¹⁶Pea fuakava ‘a Kingi Setekaia, kae fakaekinaua pē, ‘o pehē, Tangi ‘a e mo‘ui ‘a Sihova, ‘a ia na‘a ne ngaohi ma‘atautolu ‘a e laumālie[63] ni, ‘e ‘ikai te u tāmate‘i koe, pea ‘e ‘ikai te u tuku koe ki he nima ‘o e tu‘unga me‘a ko ena, ‘a ia ‘oku nau kumi ki ho‘o mo‘ui.

¹⁷Pea fakatau folofola ‘a Selemaia kia Setekaia, Ko e folofola eni ‘a Sihova, ko e ‘Otua Mohu Hōsitē, ko e ‘Otua ‘o ‘Isileli: Kapau te ke hū ki tu‘a mo‘oni ki he hou‘eiki ‘o e Tu‘i Pāpilone, pea ‘e hao ho‘o mo‘ui ‘a‘au, pea ko e kolo ni ‘e ‘ikai fakamomofi ‘aki ‘a e afi: ‘io, te ke mo‘ui ‘e koe mo ho fale.

¹⁸Ka ‘o kapau ‘e ‘ikai te ke hū ki tu‘a ki he hou‘eiki ‘o e Tu‘i Pāpilone, ‘e toki tuku ‘a e kolo ni ki he nima ‘o e kau Kalitia, pea te nau fakamomofi ‘aki ‘a e afi, pea ‘e ‘ikai hao ‘a e ‘afiona, ka te nau puke pē.

¹⁹Pea folofola ‘a Kingi Setekaia kia Selemaia, ‘Oku ou manavahē telia ‘a e kau Siu kuo tō ki he kau Kalitia, na‘a tukuange au ki honau nima, pea nau fakatakataka ‘aki au.

²⁰Pea tali ‘e Selemaia, ‘E ‘ikai te nau tukuange koe. Tauange mo e ‘afiona ke ke fakaongo ki he le‘o ‘o Sihova, ‘i he me‘a ‘oku ou tala atu; kae hoko lelei kiate koe, pea hao si‘i mo‘ui ‘a e ‘afiona.

²¹Ka ‘o kapau te ke fakafisi ke hū ki tu‘a, ko eni ‘a e folofola kuo fakahā mai ‘e Sihova:

²²Vakai, ko e kau fefine kotoa ‘oku toe ‘i he fale ‘o e Tu‘i Siuta ‘e ‘omi ki tu‘a ki he hou‘eiki ‘o e Tu‘i Pāpilone, pea ko e kau fefine ko ia te nau pehē, ‘Uē! na‘e o‘i mo fakamālohia koe ‘a e kaume‘a fafale ‘o‘ou: Pikisia leva ho va‘e ‘i he pelepela, pea nau hola kinautolu.

²³Pea ko ho ngaahi uaifi mo ho‘o fānau ‘e ‘ave ki tu‘a ki he kau Kalitia; pea ‘e ‘ikai hao ‘a e ‘afiona mei honau nima, ka ‘e puke koe ‘e he nima ‘o e Tu‘i Pāpilone: pea te ke fakamomofi ‘a e kolo ni ‘aki ‘a e afi.

²⁴Pea folofola ‘a Setekaia kia Selemaia, Ke ‘oua na‘a ‘ilo ha taha ki he ngaahi lea ni, pea ‘e ‘ikai te ke mate.

²⁵Pea kapau ‘e fanongo ‘a e hou‘eiki kuo ta alea kitaua, pea nau omi kiate koe, ‘o lea atu, Fakahā mai mu‘a pe ko e hā ho‘o lea na‘e fai ki he tu‘i; ‘oua ‘e fufū meiate kimautolu, pea ‘e ‘ikai te mau tāmate‘i koe: mo e hā fua ‘a e lea na‘e fai ‘e he tui kiate koe.

²⁶Pea te ke tali kiate kinautolu, Ko si‘eku fai ‘eku kole ki he tu‘i, ke ‘oua na‘a ne fakafoki au ki he fale ‘o Sionatane, ke u mate ai.

²⁷Pea na‘e omi ‘a e hou‘eiki kātoa kia Selemaia, ‘o fehu‘i kiate ia: pea ne fakamatala kiate kinautolu ‘aki ‘a e ngaahi lea tofu pē na‘e tu‘utu‘uni ‘e he tu‘i, Ko ia na‘a nau tuku ‘enau lea kiate ia; he na‘e ‘ikai talanoa‘ia ‘a e me‘a.

²⁸Pea na‘e nofo ‘a Selemaia ‘i he loto‘ā ‘o e ka‘ate, ‘o a‘u ki he ‘aho na‘e hamu ai ‘a Selusalema.