Read KO E TOH TAPU KATOA TONGA KO SELEMAIA 39 Bible Online

KO SELEMAIA 39 - KO E TOH TAPU KATOA TONGA bible

KO SELEMAIA 39

¹PEA ‘i he faifai pea hamu ‘a Selusalema: (ko hono hiva ‘o e ta‘u ‘o Setekaia ko e Tu‘i Siuta, mo hono hongofulu ‘o e māhina, na‘e ha‘u ai ‘a Nepukanesa ko e Tu‘i Pāpilone mo ‘ene tau kātoa ki Selusalema, ‘o nau kapui ia;

²pea ‘i hono hongofulu mā taha ta‘u ‘o Setekaia, ‘i hono māhina fā, mo hono ‘aho hiva ‘o e māhina, na‘e foa ‘a e ‘ā ‘o e kolo):

³na‘e toki hū mai ‘a e hou‘eiki kātoa ‘a e Tu‘i Pāpilone, pea na‘a nau nofo ‘i he matapā ‘i loto kolo, ‘io, ‘a Nelikalasalesa, ‘a Sāmika-Nipo, ‘a Sa‘asekimi ko e Lapisalisi, ‘a Nelikala-sālesa ko e Lapi-maki,[64] mo hono toe ‘o e hou‘eiki ‘a e Tu‘i Pāpilone.

⁴Pea ‘i he ‘iloange na‘e sio kiate kinautolu ‘e Setekaia ko e Tu‘i Siuta, mo e kau sōtia kotoa, na‘a nau hola; pea nau hū kitu‘a po‘uli mei he kolo, ‘i he hala ‘o e ngouetapu ‘a e tu‘i, ‘i he matanikolo ‘i he vaha‘a ‘o e ongo ‘ā: pea ‘alu atu ia ‘i he hala ki he ‘Alapā.

⁵Pea tuli kiate kinautolu ‘a e tau Kalitia, ‘o nau ma‘u ‘a Setekaia ‘i he ‘Alapā ‘o Sielikō: pea, kuo nau puke ia, na‘a nau ‘ohake ia kia Nepukanesa ko e Tu‘i Pāpilone, ki Līpila ‘i he fonua ‘o Hēmati, ‘o ne fakamāu‘i ia.

⁶Pea tāmate‘i ‘e he Tu‘i Pāpilone ‘a e ngaahi foha ‘o Setekaia ‘i Līpila, ‘oku ne mamata ki ai: na‘e tāmate‘i foki ‘e he Tu‘i Pāpilone ‘a e hou‘eiki Siuta kotoa.

⁷Pea na‘e toki kuihi ‘a Setekaia, pea nau ha‘i ‘aki ha ongo seini palasa ke ‘ave ia ki Pāpilone.

⁸Pea na‘e fakamomofi ‘e he kau Kalitia ‘a e fale ‘o e tu‘i, mo e fale ‘o e kakai, pea nau holoki ‘a e ngaahi ‘ā ‘o Selusalema.

⁹Pea ko e toenga kakai na‘e toe ‘i he kolo, mo e kakai kuo tō kiate ia, ‘io, ‘a e toenga ‘o e kakai na‘e toe, na‘e taki pōpula kinautolu ki Pāpilone ‘e Nēpusa-‘ātani ko e ‘eiki ‘o e ka‘ate.

¹⁰Ka na‘e tuku ‘e Nēpusa-‘ātani ko e ‘eiki ‘o e ka‘ate ha ni‘ihi ‘i he kakai taupotu ki lalo, ‘a ia na‘e ‘ikai ha‘anau momo‘i me‘a, ke nofo ‘i he fonua ko Siuta, ‘o ne ‘ange kiate kinautolu ‘i he taimi ko ia ha‘anau ngoue vaine mo hanau ngoue‘anga.

¹¹Pea kuo fai tu‘utu‘uni ‘e Nepukanesa ko e Tu‘i Pāpilone ‘ia Selemaia kia Nēpusa-‘ātani ko e ‘eiki ‘o e ka‘ate ‘o pehē,

¹²Puke ia, pea ke vakai lelei ki ai, pea ‘oua ‘e momo‘i fai kiate ia ha kovi; kaekehe, ‘ilonga ha me‘a te ne tala kiate koe, fai pehē ma‘ana.

¹³Ko ia, na‘e fekau ‘a Nēpusa-‘ātani ko e ‘eiki ‘o e ka‘ate, mo Nēpusa-sēpani ko e Lapisalisi, mo Nelikala-sālesa ko e Lapi-maki, ‘io, ‘a e kau tāimu‘a kotoa ‘a e Tu‘i Pāpilone;

¹⁴‘io, na‘a nau fekau, ‘o ‘omi ‘a Selemaia mei he loto‘ā ‘o e ka‘ate, ‘o nau tuku ia kia Ketalaia foha ‘o ‘Ahikami, foha ‘o Sāfani, ke ‘ave ia ki tu‘a ki ‘api: ko ia na‘a ne nofo ‘i he lotolotonga ‘o e kakai.

¹⁵Pea lolotonga na‘e mo‘u tāpunia ‘a Selemaia ‘i he loto‘ā ‘o e ka‘ate, na‘e hoko ‘a e folofola ‘a Sihova kiate ia, ‘o pehē,

¹⁶‘Alu, ‘o lea ki he ‘Itiopea[65] ko ‘Ēpetimeleki, ‘o pehē, Ko e folofola eni ‘a Sihova Sāpaoti, ko e ‘Otua ‘o ‘Isileli: Ko au eni te u fakaai ‘eku ngaahi lea ki he kolo ni, ke kovi ‘o ‘ikai ke lelei; pea te ke mātu‘aki sio ki ai ‘i he ‘aho ko ia.

¹⁷Ka te u fakahaofi koe ‘i he ‘aho ko ia — ko Sihova ia mei he Ta‘ehāmai — pea ‘e ‘ikai tuku koe ki he nima ‘o e kau tangata ‘oku ke teki ki ai.

¹⁸Tala atu, te u hamusi koe, pea ‘e ‘ikai te ke tō ‘i he heletā, ka te ke ‘ave ho‘o mo‘ui mo‘ao vete, koe‘uhi na‘a ke tui kiate au — ko Sihova ia mei he Ta‘ehāmai.