Read KO E TOH TAPU KATOA TONGA KO SELEMAIA 42 Bible Online

KO SELEMAIA 42 - KO E TOH TAPU KATOA TONGA bible

KO SELEMAIA 42

¹PEA ‘unu‘unu mai ‘a e hou‘eiki kotoa ‘o e ngaahi vāhenga tau, mo Siohanani foha ‘o Kalea, mo Sisanaia[66] foha ‘o Hosaia, mo e kakai kotoa, ‘a e si‘i mo e lahi,

²pea nau lea kia Selemaia ko e palōfita, ‘o pehē, Ke a‘u mu‘a ‘emau kole ki he feitu‘u na, pea ke ke hufekina kimautolu kia Sihova ko ho ‘Otua, ‘io, ‘a kimautolu kotoa ‘a e toenga ni: (he ko e ki‘i toe kimautolu ‘o e tokolahi, hangē ko ia ‘oku ke mea‘i):

³ke hīnoi‘i kimautolu ‘e Sihova, ko ho ‘Otua, ‘a e hala te mau fou ai, mo e me‘a te mau fai.

⁴Pea tali kiate kinautolu ‘e Selemaia ko e palōfita, Kuo u ongo‘i kimoutolu; ko au eni te u hū kia Sihova ko homou ‘Otua, ‘o hangē ko ho‘omou lea; pea ‘ilonga ha tali ‘e fai ‘e Sihova ‘o kau kiate kimoutolu, te u fakahā atu: ‘e ‘ikai te u ta‘ofi meiate kimoutolu ha momo‘i lea.

⁵Pea na‘a nau lea kia Selemaia, Kapau ‘e ‘ikai te mau fai ‘o tatau tofu pē mo e tala ‘e fou mai ‘iate koe meia Sihova, ko ho ‘Otua, pea ko Sihova ē te ne fakamo‘oni totonu mo pau ki he‘emau kovi.

⁶Pe lelei, pe kovi, te mau fakaongo ki he le‘o ‘o Sihova ko hotau ‘Otua, ‘a ia kuo mau tuku atu koe ki ai; koe‘uhi ke mau tu‘umālie ‘i he‘emau fakaongo ki he le‘o ‘o Sihova ko hotau ‘Otua.

⁷Pea ‘i he faifai pea ‘osi ‘a e ‘aho ‘e hongofulu, na‘e hoko ‘a e folofola ‘a Sihova kia Selemaia.

⁸Pea ne ui mai ‘a Siohanani foha ‘o Kalea, mo e hou‘eiki kotoa ‘o e ngaahi vāhenga tau na‘e ‘iate ia, mo e kakai kotoa, ‘a e iiki mo e lalahi, pea ne pehē kiate kinautolu,

⁹Ko e folofola eni ‘a Sihova, ko e ‘Otua ‘o ‘Isileli, ‘a ia na‘e fekau au ki ai, ke fakahoko ho‘omou hū kiate ia:

¹⁰Kapau te mou nofo mo‘oni ‘i he fonua ni, pea te u toki langa hake kimoutolu, ‘o ‘ikai te u holoki, pea te u hunuki kimoutolu, ‘o ‘ikai te u ta‘aki: he kuo u fakatomala ‘i he kovi kuo u fai kiate kimoutolu.

¹¹‘Oua te mou manavahē telia ‘a e Tu‘i Pāpilone, ‘o hangē ko ia ‘oku mou lolotonga fai ni; ‘oua te mou manavahē kiate ia — ko Sihova ia mei he Ta‘ehāmai: he ‘oku ou ‘iate kimoutolu ‘e au ke fakahaofi kimoutolu, pea ke hamusi kimoutolu mei hono nima.

¹²Pea te u tuku ke mou ‘ofeina, ‘io, te ne ‘ofeina kimoutolu, ‘o tuku ke mou nofo ‘i[67] homou kelekele.

¹³Ka ‘o kapau te mou pehē, ‘E ‘ikai te mau nofo‘i he fonua ni, ‘o ‘ikai te mou fakaongo ki he le‘o ‘o Sihova, ko homou ‘Otua;

¹⁴ka mou pehē, ‘Ikai; ka ko ‘Isipite te mau ‘alu ki ai, ‘a ia ‘e ‘ikai te mau sio ai ki ha tau, pea ‘e ‘ikai te mau fanongo ai ki ha ifi talupite, pea ‘e ‘ikai te mau ongo‘i ‘a e honge me‘akai; ko ia te mau nofo ki he potu ko ia.

¹⁵Kapau ‘oku pehē, pea mou fanongo mu‘a ki he folofola ‘a Sihova, si‘i toenga ‘o Siuta: ko e folofola eni ‘a Sihova Sāpaoti, ko e ‘Otua ‘o ‘Isileli, Kapau te mou hanga ‘o ai pē ke a‘u ki ‘Isipite, ‘o nofo ai;

¹⁶pea ko eni ‘a e me‘a ‘e hoko, ko e heletā ‘oku mou manavahē ki ai, te ne tuli ‘o ma‘u kimoutolu ‘i ai, ‘i ‘Isipite; pea ko e honge ‘oku mou teki ki ai, te ne tulituli ofi kiate kimoutolu ‘i ai, ‘i ‘Isipite; pea te mou mate ‘i he potu ko ia.

¹⁷Pea ko e kau tangata kotoa ‘oku hanga ō pē ke a‘u ki ‘Isipite ke nofo ai; te nau mate ‘i he heletā, ‘i he honge, pea mo e mahaki faka‘auha: pea ‘e ‘ikai hanau ni‘ihi ‘e toe pe hao mei he kovi ‘oku ou ‘omi kiate kinautolu.

¹⁸‘Io, ko e folofola eni ‘a Sihova Sāpaoti, ko e ‘Otua ‘o ‘Isileli; Hangē na‘e lilingi ‘eku houhau mo ‘eku kakaha ki he nofo Selusalema, ‘e pehē ‘a e malingi ‘eku kakaha kiate kimoutolu ‘i ho‘omou a‘u ki ‘Isipite; pea te mou hoko ko e me‘a ke fai ai ha kape, mo ha ofo, mo ha lea kovi, mo ha manukia; pea ‘e ‘ikai te mou toe mamata ki he potu ni.

¹⁹Kuo folofola ‘a Sihova kiate kimoutolu, si‘i toenga ‘o Siuta, ‘Oua te mou ‘alu ki ‘Isipite; ke mou mātu‘aki ‘ilo kuo u fakahā ‘a e totonu kiate kimoutolu he ‘aho ni.

²⁰He kuo mou fai ha kākā ‘e tō ki ho‘omou mo‘ui ‘amoutolu;[68] he na‘a mou fekau au kia Sihova ko homou ‘Otua, ‘o mou pehē, Hū kia Sihova ko hotau ‘Otua koe‘uhi ko kimautolu; pea ‘ilonga ha me‘a ‘e tala ‘e Sihova ko hotau ‘Otua, fakahā totonu kiate kimautolu, pea te mau fai.

²¹Pea kuo u fakahā kiate kimoutolu he ‘aho ni, ka kuo ‘ikai te mou fakaongo ki he le‘o ‘o Sihova ko homou ‘Otua, ‘io, ‘i he me‘a kehekehe na‘a ne fekau ai au kiate kimoutolu.

²²Pea ko eni, ke mou mātu‘aki ‘ilo, te mou mate ‘i he heletā, ‘i he honge, pea ‘i he mahaki faka‘auha, ‘i he potu ‘oku mou manako ke ‘alu ki ai ke nofo.