Read KO E TOH TAPU KATOA TONGA KO SELEMAIA 43 Bible Online

KO SELEMAIA 43 - KO E TOH TAPU KATOA TONGA bible

KO SELEMAIA 43

¹PEA kuo ‘osi leva ‘e Selemaia ‘ene tala ki he kakai kotoa ‘a e ngaahi folofola ‘a Sihova ko honau ‘Otua, ‘a ia na‘e fekau ai ia kiate kinautolu ‘e Sihova ko honau ‘Otua, ‘io, ‘a e ngaahi folofola ko ē,

²pea tali kia Selemaia ‘e ‘Asalaia foha ‘o Hosaia, mo Siohanani foha ‘o Kalea, mo e fu‘u kau tangata fielahi, ‘o pehē, Ko e loi ho‘o lea kuo fai: na‘e ‘ikai fekau koe ‘e Sihova ko hotau ‘Otua ke ke tala, ‘Oua te mou ‘alu ki ‘Isipite ke nofo ai:

³ka ko Paluki foha ‘o Nelaia ‘oku ne o‘i koe ke fai ha kovi kiate kimautolu, koe‘uhi ke tukuange kimautolu ki he nima ‘o e kau Kalitia, koe‘uhi ke nau tāmate‘i kimautolu, pe ‘ave pōpula ki Pāpilone.

⁴Ko ia na‘e ‘ikai fakaongo ‘e Siohanani foha ‘o Kalea, mo e hou‘eiki ‘o e ngaahi vāhenga tau, mo e kakai, ki he le‘o ‘o Sihova, ke nofo ‘i he fonua ‘o Siuta.

⁵Ka ka hanga ai ‘e Siohanani foha ‘o Kolea, mo e hou‘eiki kotoa ‘o e ngaahi vāhenga tau, ‘o nau ‘ave ‘a e toenga ‘o Siuta, kuo foki mei he ngaahi pule‘anga na‘e sese‘e kinautolu ki ai, ‘o nofo ‘i he fonua ‘o Siuta;

⁶‘a e kau to‘a, mo e kau fefine, pea mo e tamaiki, mo e hako fefine ‘o e tu‘i, ‘io, ‘a e toe ‘o e kakai na‘e tuku ‘e Nēpusa-‘ātani ko e ‘eiki ‘o e ka‘ate kia Ketalaia foha ‘o ‘Ahikami foha ‘o Sāfani, pea mo Selemaia ko e palōfita, mo Pāluki foha ‘o Nelaia;

⁷pea nau a‘u ki ‘Isipite — he na‘e ‘ikai te nau fakaongo ki he le‘o ‘o Sihova — pea nau fai atu, ‘o a‘u ki Tapanesi.

⁸Pea hoko ‘a e folofola ‘a Sihova kia Selemaia ‘i Tapanesi, ‘o pehē, To‘o ha ngaahi maka lalahi, ‘o fufū ‘i he sima,

⁹‘i he ngoto‘umu maka ‘umea,[69] ‘a ia ‘oku ‘i he hū‘anga ‘o e fale ‘o Felo ‘i Tapanesi, ‘o fai ke sio ki ai ‘a e kau tangata Siuta.

¹⁰Pea te ke pehē kiate kinautolu, Ko e folofola eni ‘a Sihova Sāpaoti, ko e ‘Otua ‘o ‘Isileli: Ko au eni te u fekau ‘o ‘omi ‘a hoku sevāniti, ko Nepukanesa ko e Tu‘i Pāpilone, pea te u[70] ‘ai hono taloni ‘i he funga ‘o e ngaahi maka ko ena, ‘a ia kuo u[71] fufū: pea te ne folahi ‘i ai hono aku fakamalumalu.

¹¹‘Io, te ne hū, ‘o taa‘i ‘a e fonua ko ‘Isipite; ko ia kuo tuku ki he mahaki faka‘auha te ne mate ‘i he mahaki faka‘auha, pea ko ia kuo tuku ke ‘ave pōpula, ‘e ‘ave pōpula, pea ko ia kuo tuku ke tō ‘i he heletā te ne tō ‘i he heletā.

¹²Pea te u tafu ha afi ‘i he ngaahi fale ‘o e ngaahi ‘otua ‘o ‘Isipite; pea te ne tutu kinautolu, ‘o ‘ave pōpula: pea te ne pulupulu‘i ‘a e fonua ko ‘Isipite, hangē ko e ‘ai ‘e he tauhi sipi hono kofu tu‘a; pea te ne hā‘ele atu mei ai kuo toka ‘a e fonua.

¹³Pea te ne maumau‘i ‘a e ngaahi pou ‘o Pete-semesi[72] ‘a ia ‘oku ‘i he fonua ko ‘Isipite; pea ko e ngaahi fale ‘o e ngaahi ‘otua ‘o ‘Isipite te ne fakamomofi ‘aki ‘a e afi.