Read KO E TOH TAPU KATOA TONGA KO SELEMAIA 46 Bible Online

KO SELEMAIA 46 - KO E TOH TAPU KATOA TONGA bible

KO SELEMAIA 46

¹KO E me‘a na‘e hoko kia Selemaia ko e palōfita, ko e folofola ‘a Sihova na‘e kau ki he ngaahi pule‘anga.

²Ko e me‘a ki ‘Isipite: ‘o kau ki he tau ‘a Felo-Neko ko e Tu‘i ‘Isipite, ‘a ia ‘oku ‘i he ve‘e vaitafe ko ‘Eufaletesi, ‘i Kalikimisi, ‘a ia na‘e taa‘i ‘e Nepukanesa ko e Tu‘i Pāpilone, ‘i hono ta‘u fā ‘o Sihoiakimi foha ‘o Siosaia, ko e Tu‘i Siuta.

³To‘o pā mo e fakaū, pea faka‘otu, pea fakaofi ki he tau.

⁴No‘otaki ‘a e fanga hoosi, pea heka ‘a e kau heka hoosi, Pea faka‘otu mai mo e tatā tau: Fakamata tao; tui kofu tau,

⁵Ko e hā ‘oku hā pehē ai ki he‘eku sio? ‘Oku ‘ohovale ‘a e fa‘ahinga ko ē, ‘Oku nau sītu‘a, pea ko honau kau to‘a kuo laiki, Pea ‘oku nau hola makifu, ‘O ‘ikai te nau toe hanga tau: ‘Oku ha‘o kinautolu ‘e he ilifia — Ko Sihova ia mei he Ta‘ehāmai.

⁶‘Oua ‘e hola ‘a e matakiva‘e, Pea ‘oua ‘e fakapuke ‘a e to‘a: ‘I he potu noate, ‘i he ve‘e vai ko ‘Eufaletesi, Kuo nau humu, pea tō.

⁷Ko hai ena ‘oku hake hangē ko Naila? ‘Oku peau tā hono ngaahi vai hangē ni ngaahi vaitafe?

⁸Ko ‘Isipite ia ‘oku hake mai hangē ko Naila, Pea peau tā hono vai hangē ni ngaahi vaitafe; Pea ‘oku ne lau, Te u ‘alu hake, te u ‘ufi‘ufi ‘a e fonua, Te u laiki ‘a e kolo mo e nofo ai.

⁹‘Alu hake pē, fanga hoosi; Pea tatele atu, ‘a e ngaahi sāliote; Pea mou hū kitu‘a, ‘a e kau to‘a: Kau ‘Itiopea[74] ē, mo e kau Futi ‘oku to‘o fakaū, Mo e kau Luti ‘oku puke mo teke kaufana.

¹⁰Ka ko e ‘aho ko ia ‘oku ‘a ‘Ātonai Sihova Sāpaoti, Ko e ‘aho sauni, ke ne fai sauni ki hono ngaahi fili: Pea ‘e keina ‘e he heletā, ‘o mākona, Pea te ne inu fakaputa honau toto: He ‘oku ai ha feilaulau ‘a ‘Ātonai Sihova Sāpaoti ‘I he fonua tokelau, ‘i he vaitafe ko ‘Eufaletesi.

¹¹‘Alu hake ki Kiliati,[75] ‘o ma‘u paame, Si‘i ta‘ahine ‘Isipite na‘e tāupo‘ou: Ko e kulanoa ho‘o fakalahi faito‘o, ‘Oku ‘ikai ha feau ma‘au.

¹²Kuo fanongo ‘e he ngaahi pule‘anga ki ho fakamaa‘i, Pea ‘oku ongoonga‘a ho‘o tangi ‘oiauē ki māmani kātoa: He ‘oku fehumuhumuki ‘a e to‘a mo e to‘a, ‘O na fakatou tō.

¹³Ko e folofola na‘e fai ‘e Sihova kia Selemaia ko e palōfita ki he ha‘u ‘a Nepukanesa ko e Tu‘i Pāpilone ke taa‘i ‘a ‘Isipite:

¹⁴Tala ‘i ‘Isipite, pea fanongonongo ‘i Mikitoli, ‘Io, fanongonongo ‘i Nofi mo Tapanesi: Mou lau ‘o pehē, Fokotu‘u mai, ‘o teuteu; He ‘oku keina ‘e he heletā, ‘o takatakai koe.

¹⁵Ko e hā kuo lingina ai ho‘o kau mafi? Na‘e ‘ikai te nau lava ke tu‘u, He kuo fai hono fakateki‘i ‘e Sihova.

¹⁶Na‘a ne fakalahi ‘a e humu,[76] Na‘e feta‘ota‘omi foki ‘a e taha ‘i he taha. Ko ia, ‘oku nau pehē, Tu‘u, ka tau foki ki hotau kakai, Pea ki he fonua na‘e fanau‘i ai kitautolu, Telia ‘a e heletā lolololo.

¹⁷Na‘a nau kalanga ‘i he potu ko ia, “Ko Felo ko e Tu‘i ‘Isipite ko e longoa‘a pē: Kuo ne tuku ke mole ‘a e taimi tu‘utu‘uni.”

¹⁸Tangi ‘eku mo‘ui — ko e folofola ia mei he Ta‘ehāmai ‘a e Hau, ko Sihova Sāpaoti hono huafa — hangē ko e fotu ‘a Tepoa ‘i he ngaahi mo‘unga, pea hangē ko e fotu ‘a Kāmeli ‘i he tahi, ‘e pehē ‘ene nga‘eke mai.

¹⁹Ngaohi mai ha‘o nāunau ki he taki pōpula, Si‘i ta‘ahine ‘Isipite ‘oku nofo fonua: He ko Nofi ‘e hoko ko e lala, Pea ‘e tutu ke ‘osi, ‘o ‘oua ‘e kei nofo ai ha taha.

²⁰Ko ‘Isipite ko e kau mui faka‘ofo‘ofa ‘aupito: Ko e lango u‘u mei he tokelau kuo ha‘u ki ai.

²¹Ko ‘ene kau tau unga foki ‘oku nofo ‘i hono lotolotonga, Ko e fanga pulu pusiaki tofu pē, Pea ko kinautolu foki kuo tafoki atu, Na‘a nau hola fakataha, Na‘e ‘ikai te nau tu‘u: He kuo hoko kiate kinautolu ‘a e ‘aho ‘o ‘enau mala, ‘A e taimi ‘o honau ‘a‘ahi.

²²Ko ‘ene taulaka ‘e hangē ko e ‘alu ‘a ha ngata; Seuke, te nau laka mai mo e tau, Pea te nau ha‘u ki ai mo e ngaahi toki, ‘O hangē ha kau tā ‘akau.

²³Te nau tā hono vao — ko Sihova ia mei he Ta‘ehāmai — he ‘oku ‘ikai ke matui atu ha hala ai; he ‘oku nau tokolahi ange ‘i he fanga he‘e, pea ‘oku ‘ikai lava hanau lau.

²⁴‘E fakamaa‘i ‘a e ta‘ahine ko ‘Isipite; ‘e tukuange ki he nima ‘o e kakai tokelau.

²⁵‘Oku folofola mai ‘a Sihova Sāpaoti, ko e ‘Otua ‘o ‘Isileli: Ko au eni te u tautea ‘a ‘Āmoni ‘o nō, pea mo Felo, pea mo ‘Isipite, pea mo hono ngaahi ‘otua, pea mo hono ngaahi tu‘i; ‘io, ‘a Felo mo kinautolu ‘oku falala kiate ia;

²⁶pea te u tuku kinautolu ki he nima ‘o e kakai ‘oku kumi ki he‘enau mo‘ui, ‘io, ki he nima ‘o Nepukanesa ko e Tu‘i Pāpilone, pea ki he nima ‘o ‘ene kau tamaio‘eiki: pea hili ia, ‘e toe nofo‘ia ‘o hangē ko e taimi mu‘a — ko Sihova ia mei he Ta‘ehāmai.

²⁷Ka ko koe, ‘e Sēkope, si‘eku sevāniti, ‘oua te ke manavahē, pea ‘oua te ke mo‘utāfu‘ua, si‘i ‘Isileli: he ko au eni te u fakahaofi koe mei he potu mama‘o na, pea mo ho hako mei he fonua ‘oku nau pōpula ai, pea ‘e foki ‘a Sēkope, ‘o nonga, ‘o nofo falala, ‘o ‘ikai ha taha ke ne ilifia ai.

²⁸‘Oua foki te ke manavahē, si‘eku sevāniti ko Sēkope — ko Sihova ia mei he Ta‘ehāmai — he ‘oku ou ‘iate koe ‘e au; pea te u faka‘auha ‘a e ngaahi pule‘anga ne u vetekina kimoutolu ki ai, ka ‘e ‘ikai te u faka‘osi koe; ka te u tautea koe ke fe‘unga, ‘o ‘ikai te u tuku koe ke ‘alu ta‘etautea ‘aupito.