Read KO E TOH TAPU KATOA TONGA KO SELEMAIA 48 Bible Online

KO SELEMAIA 48 - KO E TOH TAPU KATOA TONGA bible

KO SELEMAIA 48

¹KO E me‘a ‘oku kau ki Moape. Ko e folofola eni ‘a Sihova Sāpaoti, ko e ‘Otua ‘o ‘Isileli: ‘Oiauē ‘a Nipo! he kuo maumau; ko Kiliataimi kuo fakamaa‘i, kuo kapa: kuo fakamaa‘i ‘a e palatou, pea kuo mo‘utāfu‘ua.

²‘Oku ‘ikai kei ‘i ai ‘a e lāngilangi ‘o Moape; ‘i Hesiponi ‘oku nau fakakaukau kovi ke fai kiate ia: Tau ō ‘o tu‘usi ia mei he‘ene pule‘anga. Ko koe foki, Matameni, ‘e fakasīlongo‘i; ‘e tuli ‘a e heletā kiate koe.

³Sī! ko e kaila ē mei Holonaimi, Ko e maumau mo e faka‘auha ko e me‘a lahi!

⁴Kuo ‘auha ‘a Moape; Kuo nau fakaongo atu ‘enau tangi ‘o a‘u ki Soa.[78]

⁵He ‘oku nau hake ‘i he hakenga ‘o Lūhiti, Mo e tangi pē, tangi pē; He ‘i he hifonga ‘o Holonaimi, Na‘a nau fanongo ki he fakamamahi ‘o e tangi ‘i he maumau.

⁶Hola, fakahaofi ho‘omou mo‘ui; Ka mou hoko ‘o hangē ko e ‘āunoa ‘i he toafa.

⁷He ko e me‘a ‘i he tu‘u ho‘o falala ‘i ho‘o ngaahi ngāue, pea ‘i ho‘o ngaahi fokotu‘unga koloa, ko ia ‘e puke mo koe foki; pea ‘e ‘alu pōpula ‘a Kīmosi, fakataha mo hono kau taula‘eiki mo hono hou‘eiki.

⁸Pea ‘e ha‘u ‘a e tama vete ki he ngaahi kolo kotoa, pea ‘e ‘ikai ha kolo ‘e hao; pea ‘e ‘auha ‘a e talalo, pea ‘e maumau ‘a e tafangafanga, hangē ko e folofola ‘a Sihova.

⁹‘Ange kapakau ki Moape, he kuo pau ke ne hola ‘o ‘alu: pea ko hono ngaahi kolo ‘e hoko ko e lala, ‘o ‘ikai ha taha ‘e nofo ai.

¹⁰Mala‘ia ā ka ko ia ‘oku fakamu‘omu‘a nima ‘a e ngāue ‘a Sihova, Mala‘ia ā ka ko ia ‘oku ne ta‘ofi ‘ene heletā mei he toto.

¹¹Kuo nofo fiemālie ‘a Moape talu ‘ene talavou, pea ‘oku ne nofo mo hono totoka ta‘eue‘i, pea na‘e ‘ikai felingiaki mei he hina ki he hina, pea na‘e ‘ikai ‘alu pōpula: ko ia ‘oku tu‘u ma‘u hono ifo, pea kuo ‘ikai liliu hono nanamu.

¹²Ko ia, vakai, ‘oku ha‘u ha taimi — ko Sihova ia mei he Ta‘ehāmai — te u fekau ai kiate ia ha kau lilingi, pea te nau lilingi ia; pea te nau fakamaha ‘ene ngaahi ipu, mo laiki ‘enau ngaahi hina.

¹³Pea ‘e maa‘i ‘e Moape ‘a Kīmosi, hangē na‘e maa‘i ‘e ha‘a ‘Isileli ‘a Pēteli ko honau falala‘anga.

¹⁴‘Oku mou lava fēfē ke lau, Ko e kau mafi kimautolu, pea ko e kakai fita ‘i he fai tau?

¹⁵Ko Moape ē kuo faka‘auha, pea ‘oku kapa hono ngaahi kolo, pea ko e lelei ‘o hono kau talavou kuo ‘alu hifo ki he tāmate‘i — ko e Hau ia mei he Ta‘ehāmai; ko Sihova Sāpaoti hono huafa.

¹⁶Ko e mala ‘o Moape ‘oku panaki mai, pea ‘oku fakalili ‘aupito hono kovi.

¹⁷Mou fakamamahi koe‘uhi ko ia, ‘a e ngaahi feitu‘u takatakai ki ai, ko kimoutolu kotoa ‘oku ‘ilo hono hingoa, mou pehē, Hono kuo maumau ‘a e mātā mālohi, ‘A e sēpita faka‘ofo‘ofa!

¹⁸Si‘i ta‘ahine Tīponi ‘oku nofo fonua, ‘Alu hifo mei ho lāngilangi na, ‘o nofo he fie inua; He kuo ‘alu hake kiate koe ‘a e tama vete ‘o Moape, Kuo ne maumau ho ngaahi talitau‘anga.

¹⁹Si‘i nofo ‘Aloeli, tu‘u ‘i he hala, ‘o lama: Fehu‘i ki he hola mai, mo e fefine kuo hao; Lea ki ai, Ko e hā ‘a e me‘a kuo hoko?

²⁰Kuo fakamaa‘i ‘a Moape, he kuo li‘aki: Tangi ‘oiauē, mo ‘ioho; Tala ‘i ‘Alanoni kuo vete ‘a Moape.

²¹Pea kuo hoko ‘a e tautea totonu ki he fonua palatou, Ki Hōloni, pea ki Siahasa, pea ki Mefa‘ati.

²²Pea ki Tīponi, pea ki Nipo, pea ki Petetipilataimi.

²³Pea ki Kiliataimi, pea ki Petekamuli pea ki Petemeoni.

²⁴Pea ki Kilioti, pea ki Posila, Pea ki he ngaahi kolo ‘o e fonua ko Moape, ‘a e mama‘o mo e ofi.

²⁵Kuo motuhi ‘a e nifo ‘o Moape, pea kuo fasi hono nima ko Sihova ia mei he Ta‘ehāmai.

²⁶Mou ‘ai ke ne konā, he kuo ne fakafuofuolahi kia Sihova: koe‘uhi ke fālai ‘a Moape ‘i he‘ene lua, ‘o ne hoko mo ia foki ko e manukia.

²⁷He ‘ikai na‘e nofo ‘a ‘Isileli ko e me‘a ‘oku ke manuki ki ai? na‘e ‘ilo ia koā ‘oku ne ō mo e kau kaiha‘a? he ka ai ha‘o lau ki ai, ‘oku ke kalo ‘ulu.

²⁸‘a e kau nofo Moape, li‘aki ‘a e ngaahi kolo, ‘O nofo ‘i he makatu‘u; Pea mou hoko ‘o hangē ko e lupe ‘Oku ngaohi hono pununga ‘i he potu ki kō ‘o e ngutu luo.

²⁹Kuo tau fanongo ki he mahiki ‘a Moape, ‘O fu‘u fakatuputupulangi; ‘Ene fielahi, mo ‘ene mahiki, mo ‘ene pupula, Mo ‘ene loto hīkisia.

³⁰‘Oku ou ‘ilo ‘e au — ko Sihova eni mei he Ta‘ehāmai — ‘ene fa‘a ‘ita, mo ‘ene lea‘aki ‘a e ngaahi me‘a ‘oku ‘ikai ko ia; ‘oku nau fai ‘a e ngaahi ngāue ‘oku ‘ikai mo‘oni.

³¹Ko ia, te u tangi ‘oiauē koe‘uhi ko Moape, ‘Io, te u ‘ioho koe‘uhi ko Moape kātoa; ‘Oku nau hanu koe‘uhi ko e kakai ‘o Kilihelesi.

³²Ko ia, te u tangi ma‘au, si‘i vaine ‘o Sīpima, ‘O hulu ‘i he tangi ‘o Siasea: ‘A koe kuo laka ki tu‘a tahi ho ta‘otupu, ‘Io, kuo nau a‘u ki he tahi ‘o Siasea: Kuo tō kovi ‘a e tama vete ki he toli ‘o e to‘ukai fua‘i‘akau, Mo e to‘ukai kālepi.

³³Pea kuo ‘ave ‘a e fiefia mo e tome‘e Mei he tokanga ngoue, pea mei he fonua ‘o Moape; Pea kuo u ‘ai ke ‘ikai ha uaine ‘i he ngaahi tata‘o‘anga: ‘E ‘ikai te nau malaki mo e tau‘a‘alo; Ko e tau‘a‘alo ‘oku ongo mai ‘oku ‘ikai ko e tau‘a‘alo ko ē.

³⁴Ko e tangi ‘a Hesiponi ‘oku a‘u ki ‘Eleale,[79] ‘Oku nau tukuna hake ke a‘u ki Siahasa, ‘Io, ke a‘u mei Soa ki Holonaimi, ki ‘Ekilati Tu‘otolu: He na‘a mo e vai ‘o Nimilimi kuo pau ke koto ‘āngoa.

³⁵Pea te u ‘ai ke ‘ikai kei toe ‘i Moape ha taha ‘oku fai feilaulau ‘i he sia, pe ha taha ‘oku tutu ‘inisēnisi ki hono ngaahi ‘otua — ko Sihova ia mei he Ta‘ehāmai.

³⁶Ko ia, ‘oku tokomohū hoku loto hangē ni fangufangu, Koe‘uhi ko Moape, ‘Io, ‘oku tokomohū hoku loto hangē ni fangufangu, Koe‘uhi ko e kau tangata ‘o Kilihelesi, Koe‘uhi ā foki ko e toe ‘o e me‘a na‘a ne ma‘u kuo mole.

³⁷He ko e ‘ulu kātoa ko e koto tekefua, Pea ko e kava kotoa kuo kosi: ‘I he nima kotoa ‘oku hā ‘a e koto matu‘utu‘u, Pea ‘i he kongaloto ‘a e tauanga‘a.

³⁸‘I he ngaahi tu‘a fale ‘o Moape mo hono ngaahi mala‘e, Ko e koto tēngihia pē. He kuo u maumau‘i ‘a Moape hangē ha ipu ‘oku ‘ikai ha manako ai — Ko Sihova ia mei he Ta‘ehāmai.

³⁹Hono kuo laiki! ‘oku nau tangi ‘oiauē. Hono kuo sītu‘a ‘a Moape ko ene mā! Pea kuo hoko ‘a Moape ko e me‘a ke manukia Mo mo‘utāfu‘ua ai ‘a e kakai ‘oku nofo takatakai.

⁴⁰He ko e folofola eni ‘a Sihova, Vakai, te ne puna hangē ha ‘īkale, ‘o folahi hono kapakau ‘i Moape.

⁴¹Kuo kapa ‘a Kilioti, Pea kuo puke ‘a e ngaahi talitau‘anga, Pea ko e loto ‘o e kau mafi ‘o Moape ‘i he ‘aho ko ia ‘Oku hangē ko e loto ‘o ha fefine ‘oku langā.

⁴²Pea kuo ‘auha ‘a Moape mei he‘ene nofo ko e kakai, he kuo ne fakafuofuolahi kia Sihova.

⁴³‘Oku tu‘unuku kiate koe, ‘a e nofo Moape, ‘a e fakalilifu mo e luo mo e hele — ko Sihova ia mei he Ta‘ehāmai.

⁴⁴Ko ia ‘oku hola telia ‘a e fakalilifu, ‘e tō ia ki he luo; pea ko ia ‘oku lava hake mei he luo, ‘e ma‘u ‘e he hele: he ‘oku ou ‘omi kiate ia, ‘io, ki Moape, ‘a honau ta‘u ‘eke — ko Sihova ia mei he Ta‘ehāmai.

⁴⁵‘Oku mo‘utu‘ua ‘a e kau hola ‘i tua‘ā Hesiponi kuo ‘osi honau ivi: He ‘oku ‘alu atu ha afi mei Hesiponi, Mo ha maama mei he ‘ao ‘o Sīhoni,[80] Pea te ne keina ‘a e tuliki ‘o Moape, Mo e tumu‘aki ‘o ha‘a anga makaka.

⁴⁶‘Oiauē koe, Moape! Kuo ‘auha ‘a e kainanga ‘o Kīmosi; He kuo ‘ave pōpula ho‘o fānau tangata, Pea kuo pōpula ho‘o fānau fefine.

⁴⁷Ka te u fakafoki ‘a e pōpula ‘o Moape ‘oka ‘osi ‘a e taimi — ko Sihova ia mei he Ta‘ehāmai. Ngata ai ‘a e fakamaau ‘o Moape.