Read KO E TOH TAPU KATOA TONGA KO SELEMAIA 49 Bible Online

KO SELEMAIA 49 - KO E TOH TAPU KATOA TONGA bible

KO SELEMAIA 49

¹KO E me‘a ki ha‘a ‘Āmoni. Ko e folofola eni ‘a Sihova, ‘Oku ‘ikai koā ha hako ‘o ‘Isileli? ‘O ‘ikai koā ha ‘ea kiate ia? Pea ko e hā ai ‘oku ‘ea ‘a Milikomi kia Kata, pea ‘oku nofo hono kakai ‘i hono ngaahi kolo?

²Ko ia, vakai, ‘oku hoko mai ha taimi — ko Sihova eni mei he Ta‘ehāmai — te u tuku ke ongo mai ha kailatau ki Lapa ‘a Ha‘a ‘Āmoni; pea te ne hoko ko e tuva maumau, pea ko hono ngaahi kolo fakaongo ‘e tutu ‘aki ‘a e afi: pea ‘e ‘ea ‘a ‘Isileli kiate kinautolu na‘e ‘ea kiate ia — ko Sihova ia mei he Ta‘ehāmai.

³Tangi ‘oiauē, si‘i Hesiponi, he kuo vete ‘a ‘Ai; ‘Ioho, ‘a e fānau fefine ‘a Lapa, ‘Ai tauanga‘a: tangilāulau mo lele holo ‘i he ngaahi loto‘ā; He ‘oku ‘alu pōpula ‘a Milikomi, Fakataha mo hono kau taula‘eiki mo hono hou‘eiki.

⁴Ko e hā ‘oku ke pōlepole ai ‘i he ngaahi lautoka? ‘oku ‘auhia atu ho lautoka ‘o‘ou, si‘i ta‘ahine fakaholomui; ‘a koe na‘e falala ki ho‘o ngaahi fokotu‘unga koloa, ‘o ke pehē, Ko hai ‘e a‘u kiate au?

⁵Ko au eni ‘oku ou ‘omi kiate koe ha ilifia ki he kakai kotoa ‘oku nofo takatakai kiate koe — ko e folofola ia mei he Ta‘ehāmai ‘a ‘Ātonai Sihova Sāpaoti — pea ‘e fakateka hakefua kimoutolu tāutaha, pea ‘e ‘ikai ha taha ke tānaki ‘a e kau hola.

⁶Kae hili ‘ene pehē, te u fakafoki ‘a e pōpula ‘a Ha‘a ‘Āmoni — ko Sihova ia mei he Ta‘ehāmai.

⁷Ko e me‘a ki ‘Ītomi. Ko e folofola eni ‘a Sihova Sāpaoti. ‘oku ‘ikai koā ha poto ‘i Tīmani? Kuo ‘osi koā ‘a e fale‘i mei he kau ‘atamai? Kuo mahua ‘enau poto?

⁸Mou hola, mou tafoki atu, foa hamou tafu, ‘a e nofo Tētani; he ‘oku ou ‘omi kiate ia ‘a e mala ‘o ‘Īsoa, ‘a e taimi ‘o hono ‘a‘ahi.

⁹Kapau ‘e ha‘u ‘a e kau toli kālepi kiate koe, ‘ikai te nau fakatoe ha moveve? Ka ko ha kaiha‘a he po‘uli, te nau ‘ave pē ‘o fe‘unga pē mo kinautolu.

¹⁰Ka ko au[81] kuo u tū‘ulu ‘a ‘Īsoa, kuo u tatala hono ngaahi toitoi‘anga, pea te ne toitoi ai, ‘o ‘ikai lava ke fufū: kuo maumau hono hako, mo hono kāinga, mo hono kau nofo‘anga, pea ‘oku ‘ikai ia.

¹¹Tuku li‘aki pē ho‘o fānau tamai mate, te u tauhi ‘enau mo‘ui ‘e au; pea ke falala kiate au ‘e ho‘o kau uitou.

¹²He ko e folofola eni ‘a Sihova: Vakai, ko e fa‘ahinga ko ē na‘e ‘ikai hoa mo honau konisitūtone ke inu ‘i he ipu, ka kuo pau te nau inu ia; pea ko e taha koe ke ‘alu ta‘etautea ‘aupito? ‘e ‘ikai te ke ‘alu ta‘etautea, ka te ke mātu‘aki inu pē.

¹³He kuo u fuakava ‘iate au — ko Sihova eni mei he Ta‘ehāmai — ‘e hoko ‘a Pōsila ko e me‘a ke fai ai ha ofo, mo ha manuki, ‘e hoko ko e ka‘anga, ko e me‘a ke fai ai ha kape; pea ko hono ngaahi kolo kotoa ‘e hoko ko e koto ka‘anga ‘o ta‘engata.

¹⁴Kuo u ma‘u ha ongoongo meia Sihova, Pea kuo tuku atu ha talafekau ki he ngaahi pule‘anga, Mou tānaki fakataha, pea ‘alu hake kiate ia; ‘Io, mou tu‘u pē ke fai ha tau.

¹⁵He vakai kuo u ngaohi koe ko e momo‘i me‘a ki he ngaahi pule‘anga, Ko e ta‘etoka‘i ‘e he tangata.

¹⁶Ko e tu‘u ho nofo‘anga ‘i lelenga Ko ia kuo takihee‘i koe ‘e ho lotolahi, ‘A koe ‘oku nofo ‘i he ngaahi ava‘i maka ‘o Sela, ‘A koe ‘oku puke ‘a e ngaahi talitau‘anga ‘o e mo‘unga: Neongo ho‘o ngaohi ho pununga ke mā‘olunga hangē ko e ‘īkale, Te u ‘ohifo koe mei ai — Ko Sihova ia mei he Ta‘ehāmai.

¹⁷Pea ‘e hoko ‘a ‘Ītomi ko e me‘a ke fai ai ha ofo; ‘ilonga ha taha ‘e laka ofi ai te ne ofo, mo faka‘ise‘isa ‘i he ngaahi fu‘u tā kuo fai kiate ia.

¹⁸Hangē ko e fulihi ‘o Sōtoma mo Kōmola, mo e ongo kolo na‘a na kaungā nonofo — ko Sihova eni ‘oku folofola mai — ‘e ‘ikai nofo ai ha taha, pea ‘e ‘ikai ‘āunofo ki ai ha hako‘i tangata.

¹⁹Vakai, te ne ‘alu hake hangē ha laione mei he lāngilangi ‘o Soatani ki ha kaikai‘anga tu‘u ma‘u: ka ko e kemo te u fakalili ia mei ai, pea ‘ilonga ha taha kuo fili, te u fokotu‘u ia ke pule ki ai: he ko hai ‘oku tatau mo au? Pea ko hai te ne tu‘utu‘uni ha taimi ke u hopo? Pea ko hai tū ha tauhi manu te ne tu‘u kiate au?

²⁰Ko ia, fanongo ā ki he fakakaukau ‘a Sihova, ‘A ia kuo ne fakakaukau ke fai ki ‘Ītomi; Pea mo ‘ene ngaahi tu‘utu‘uni Kuo ne tu‘utu‘uni ke fai ki he nofo Tīmani: Kuo pau te nau fehae kinautolu, ‘a e fanga ki‘i me‘a ‘o e tākanga; Kuo pau te ne ‘ai ke ofo honau kaikai‘anga ‘iate kinautolu.

²¹‘Oku tete ‘a māmani ‘i he longoa‘a ‘o ‘enau tō; ‘Oku ai ha ‘ioho ‘oku ongo mai ki he Tahi Kulokula.

²²Vakai, te ne ‘alu hake ‘o puna hangē ha ‘īkale, Pea te ne folahi hono kapakau ki Pōsila: Pea ko e loto ‘o e kau mafi ‘o ‘Ītomi ‘oku hoko ‘i he ‘aho ko ia, ‘O hangē ko e loto ‘o ha fefine ‘oku langā.

²³Ko e me‘a ki Tāmasikusi, Kuo fakamaa‘i ‘a Hēmati mo ‘Āpati; He kuo nau fanongo ki ha ongoongokovi, Kuo nau hoko ‘o vai: Ko e hoha‘a hangē ko e tahi ‘Oku ‘ikai ke manonga.[82]

²⁴‘Oku malūmaea ‘a Tāmasikusi, Kuo tafoki ia ke hola, Ka ‘oku puke ia ‘i he tete; Kuo ma‘u ia ‘e he mamahi mo e langa, Hangē ha fefine fā‘ele.

²⁵Fēfē ‘a e ‘ikai li‘aki ‘a e kolo fakamālō‘ia, ‘a e kolo ‘o ‘eku fiefia?[83]

²⁶Ko ia, ‘e tō ‘ene kau talavou ‘i he ngaahi mala‘e, pea ‘e fakalongo hono kau tangata tau ‘i he ‘aho ko ia — ko e folofola ia mei he Ta‘ehāmai ‘a Sihova Sāpaoti.

²⁷Pea te u tutu ha afi ‘i he ‘ā ‘o Tāmasikusi, pea te ne keina ‘a e ngaahi palasi ‘o Penihētati.

²⁸Ko e me‘a ki Keta mo e ngaahi pule‘anga ‘o Hasoa, ‘A ia na‘e taa‘i ‘e Nepukanesa ko e Tu‘i Pāpilone. Ko e folofola eni ‘a Sihova, Mou tu‘u, ‘alu hake ki Keta, Pea vete ‘a e kakai Hahake.

²⁹Ko honau ngaahi tēniti, mo ‘enau fanga sipi mo kosi te nau puke ki ai, ko honau tapoleni mo ‘enau nāunau kotoa mo ‘enau fanga kāmeli te nau fetuku ma‘anautolu: pea te nau kalanga kiate kinautolu, Ha‘o ‘aki ‘a e ilifia!

³⁰Mou hola, hē ke mama‘o. Foa hamou tafu, ‘a e nofo Hasoa — ko Sihova ia mei he Ta‘ehāmai — he ‘oku ai ha fakakaukau ‘a Nepukanesa ko e Tu‘i Pāpilone ke fai kiate kimoutolu, ‘io, kuo ne tu‘utu‘uni ha tu‘utu‘uni kiate kimoutolu.

³¹Mou tu‘u, ‘alu hake ki ha pule‘anga nofo fiemālie mo nofo falala — Ko e fa‘ahinga ‘oku ‘ikai hanau matapā, pe ‘akau fakama‘u; ‘Oku nau nofo fakaekinautolu — ko Sihova ia mei he Ta‘ehāmai.

³²Pea ko ‘enau fanga kāmeli ē te mou fa‘ao, pea ko ‘enau fu‘ufu‘unga monumanu ē ma‘amou vete; pea te u punakaki kinautolu ki he feitu‘u matangi kotoa pē, ‘a e ha‘a kosi fakatuliki; pea te u ‘omi honau mala mei honau ngaahi tafa‘aki kotoa — ko Sihova ia mei he Ta‘ehāmai.

³³Pea ‘e hoko ‘a Hasoa ko e nofo‘anga ‘o e fanga siakali, ko e lala ‘o ta‘engata: ‘e ‘ikai nofo ai ha taha, pea ‘e ‘ikai ‘āunofo ki ai ‘a e hako‘i tangata.

³⁴Ko e me‘a na‘e hoko kia Selemaia ko e palōfita, ko e folofola ‘a Sihova na‘e kau ki ‘Īlami, ‘i he taimi ki mu‘a ‘o e pule ‘a Setekaia ko e Tu‘i Siuta, ‘o pehē,

³⁵Ko e folofola eni ‘a Sihova Sāpaoti, Ko au eni ‘oku ou maumau‘i ‘a e kaufana ‘a ‘Īlami, ko e mata ‘o honau mālohinga.

³⁶Pea te u ‘omi ki ‘Īlami ha matangi ‘e fā mei he tapa ‘e fā ‘o e langi, pea te u punakaki kinautolu ‘i he ngaahi matangi ko ia kotoa; pea ‘e ‘ikai ha pule‘anga ‘e ta‘ea‘u ki ai ha ni‘ihi ‘Īlami kuo sese‘e.

³⁷Pea te u fakamo‘utāfu‘ua ‘a ‘Īlami ‘i he ‘ao ‘o honau ngaahi fili, pea ‘i he ‘ao ‘o e kakai ‘oku kumi ‘enau mo‘ui: pea te u ‘omi kiate kinautolu ha kovi, ko e kakaha ‘o ‘eku ‘ita — ko Sihova ia mei he Ta‘ehāmai — pea te u fekau atu ‘a e heletā ke tuli kiate kinautolu kae‘oua ke nau ‘osi.

³⁸Pea te u fokotu‘u ‘eku taloni ‘i ‘Īlami, pea te u fai mei ai ‘eku faka‘auha tu‘i mo hou‘eiki — ko Sihova ia mei he Ta‘ehāmai.

³⁹Ka ‘oka faifai pea ‘osi hono taimi, te u fakafoki ‘a e pōpula ‘o ‘Īlami — ko Sihova ia mei he Ta‘ehāmai.