Read KO E TOH TAPU KATOA TONGA KO SELEMAIA 5 Bible Online

KO SELEMAIA 5 - KO E TOH TAPU KATOA TONGA bible

KO SELEMAIA 5

¹MOU lele holo ‘i he ngaahi hala ‘o Selusalema, ‘o mou vakai mu‘a mo ‘ilo, ‘o kumi ‘i hono ngaahi mala‘e, pe te mou ma‘u ha taha, pe ‘oku ai ha taha ‘oku fai ‘o taau mo e lao, ha taha ‘oku feinga ke fai tōnunga; ka pehē, te u fakamolemole ‘a e kolo.

²Pea kapau ‘oku nau pehē, Tangi ‘a e mo‘ui ‘a Sihova; tala atu ko ‘enau fuakava ki ha loi.

³‘E Sihova, ‘ikai ‘oku ke hanga ki he fai tōnunga? Kuo ke taa‘i kinautolu, ka ‘oku ‘ikai te nau ongo‘i mamahi ai; ‘oku ke ‘ai ke nau ‘osi, ka ‘oku ‘ikai te nau fie tali ‘a e akonaki: ‘oku nau ngaohi honau mata ke fefeka ange ‘i he maka; ‘oku ‘ikai te nau loto ke foki.

⁴Pea u pehē, ‘Ā, ko lāuvale pē kinautolu: ‘oku nau fai vale; he ‘oku ‘ikai te nau ‘ilo ‘a e ‘alunga ‘o Sihova, ‘a e konisitūtone ‘o honau ‘Otua:

⁵ka u ‘alu mu‘a ki ha hou‘eiki, ‘o alea mo kinautolu; he ko e fa‘ahinga ko ia ‘oku nau ‘ilo ‘a e ‘alunga ‘o Sihova, ‘a e konisitūtone ‘a honau ‘Otua. ‘Ā, ‘oku nau tatau mo ē ‘i he maumau ‘o e ‘ioke: kuo nau motuhi ‘a e ngaahi ha‘i.

⁶Ko hono ‘ō ia ‘e taa‘i kinautolu ‘e ha laione mei he vao, ‘e maumau kinautolu ‘e ha ulofi mei he ngaahi fonua mamate; ‘oku le‘o ha lēpati ‘i honau ngaahi tu‘a kolo; ‘ilonga ha taha ‘oku hū kitu‘a mei ai, ‘e hae: koe‘uhi ‘oku lahi ‘enau ngaahi talangata‘a, ‘oku kaukaua ‘enau ngaahi holomui.

⁷Te u fakamolemole fēfē koe? kuo li‘aki au ‘e ho‘o fānau, pea kuo nau fuakava ‘i ha ngaahi ‘ata‘i ‘otua: na‘a ku fakafuakava kinautolu, ka na‘a nau maumau ‘enau alafianga, pea na‘a nau lolofi ki he fale ‘o e pa‘umutu.

⁸Ko e fanga hoosi tangata tofu pē kuo puta ‘i he kai: ‘oku nau fakahongi holo; ‘oku takitaha tangi ki he uaifi ‘o hono kaungā‘api.

⁹Pea ‘ikai koā te u ‘eke ‘a e ngaahi me‘a pehē — ko Sihova ia mei he Ta‘ehāmai; pea ‘ikai koā fai sauni ‘e hoku laumālie ki ha pule‘anga ‘oku hangē ko ia?

¹⁰Kaka hake he sino ‘o e ‘akau,[7] ‘o maumau; kae‘oua ‘e fai ke ‘osi: ‘ave hono ngaahi va‘a: he ‘oku ‘ikai kau kia Sihova ia.

¹¹He kuo mātu‘aki fai kākā kiate au ‘a e fale ‘o ‘Isileli, mo e fale ‘o Siuta — ko Sihova ia mei he Ta‘ehāmai.

¹²Kuo nau faka‘ikai‘i ‘a Sihova, ‘o nau pehē, ‘Oku ‘ikai ‘i ai ia;[8] pea ‘e ‘ikai hoko ‘a e kovi kiate kitautolu; pea ko e heletā mo e honge ‘e ‘ikai te tau sio ki ai.

¹³‘Ā, ko e kau palōfita ko ē te nau hoko ko e matangi, he ‘oku ‘ikai ‘iate kinautolu ‘a ia ‘oku folofola: ke pehē ‘ene hoko kiate kinautolu.

¹⁴Ko ia ko eni ‘a e folofola ‘a Sihova, ‘a e ‘Otua Mohu Hōsitē, Ko e me‘a ‘i ho‘omou fai ‘a e lea ni, ko au eni ‘oku ou ngaohi ‘eku ngaahi lea ‘i ho ngutu ko e afi, pea ko e kakai ni ko e ‘akau, pea te ne keina kinautolu.

¹⁵Ko au eni ‘oku ou ‘omi kiate kimoutolu ha pule‘anga mei he mama‘o, si‘i fale ‘o ‘Isileli — ko Sihova ia mei he Ta‘ehāmai: ko e pule‘anga kaukaua ia, ko e pule‘anga tupu‘a ia, ko e pule‘anga ‘oku ‘ikai te ke ‘ilo ‘enau lea, pea ‘oku ‘ikai te ke ongo‘i ‘a e me‘a ‘oku nau lau.

¹⁶Ko ‘enau hōfangahau ko e fa‘itoka kuo fakamanga, ko e kau helo fua pē.

¹⁷Pea te nau kai ho ta‘u mo ho‘o me‘akai, ‘a ia na‘e mei kai ‘e ho‘o fānau tangata mo fānau fefine, te nau kai ho‘o fanga sipi mo kosi mo ho‘o fanga pulu: te nau kai ho‘o vaine mo ho‘o fiki: te nau laiki ho ngaahi kolo talitau‘anga, ‘a ia ‘oku ke falala ki ai, ‘aki ‘a e heletā.

¹⁸Ka na‘a mo e taimi ko ia, ‘e ‘ikai te u ‘ai kimoutolu ke ‘osi — ko Sihova ia mei he Ta‘ehāmai.

¹⁹Pea ‘i he taimi ko ia, kapau te mou pehē, Koe‘uhi ko e hā nai kuo fai ‘e Sihova ko hotau ‘Otua ‘a e ngaahi fu‘u me‘a ni kiate kitautolu? Pea te ke pehē kiate kinautolu, Hangē ko ho‘omou li‘aki au, mo tauhi ‘otua kehe ‘i he fonua ‘omoutolu, pehē te mou tauhi ha kau muli ‘i ha fonua ‘oku ‘ikai ‘omoutolu.

²⁰Mou fakahā eni ki he fale ‘o Sēkope, pea fanongonongo ‘i Siuta, ‘o pehē, Fanongo mu‘a ki he me‘a ni, ‘a e kakai sesele pea ta‘ema‘u ‘atamai;

²¹‘oku mou mata ka ‘oku ‘ikai sio ‘aki; ‘oku mou telinga ka ‘oku ‘ikai fanongo ‘aki:

²²‘o ‘ikai koā te mou manavahē kiate au? — ko Sihova ia mei he Ta‘ehāmai — pea ‘ikai te mou tete ‘i hoku ‘ao, ‘a au kuo u ‘ai ‘a e ‘one‘one ko e kau‘ā ki he tahi, ko e laine ta‘engata, pea tapu ‘ene laka ai? pea ‘oku fakapupula hake hono ngaahi peau, ka ‘oku ‘ikai te nau lava; ‘io, ‘oku nau ‘u‘ulu, ka ‘oku ‘ikai te nau lava ke laka atu ai.

²³Ka ‘oku ‘i he kakai ni ha loto talangata‘a mo pau‘u; na‘a nau foki atu ‘o ‘alu.

²⁴Pea na‘e ‘ikai te nau pehē ‘i honau loto, Tau ‘apasia mu‘a kia Sihova ko hotau ‘Otua, ‘a ia ‘oku ne tuku ‘uha mai, ‘a e vaimu‘a mo e vaimui, ‘i hono taimi totonu; ‘oku ne ta‘ofi ma‘atautolu ‘a e ngaahi uike kuo tu‘utu‘uni ki he ututa‘u.

²⁵Kuo le‘ei atu ‘a e ngaahi me‘a ko ia ‘e ho‘omou ngaahi kovi, pea kuo tāpuni ‘a e lelei meiate kimoutolu ‘e ho‘omou ngaahi angahala.

²⁶He kuo ‘ilo ‘i hoku kakai ha kau pau‘u: ‘oku nau tokamalumu ‘o hangē ko e hanoku ‘a e hilimanu;[9] ‘oku nau kamosi ‘a e hele, ‘oku nau pō kakai.

²⁷Hangē ko e fīnaki ‘oku fonu ‘i he manupuna, pehē ‘oku fonu honau ngaahi fale ‘i he kākā: ko hono ō ia kuo nau hoko ‘o lahi, ‘o nau ma‘u koloa.

²⁸Kuo nau sino, kuo nau taleilei: tala atu, ko ‘enau ngaahi ngāue kovi ‘oku fu‘u hulu: ‘oku ‘ikai te nau momo‘i mamahi‘i ‘a e me‘a ‘a e tamai mate, ke ma‘u ‘e he fa‘ahinga ko ē hā tu‘umālie; pea ‘i he‘enau fakamaau ‘oku ‘ikai te nau fakaai ‘a e totonu ‘o e kau masiva.

²⁹Pea ‘ikai koā te u ‘eke ‘a e ngaahi me‘a pehē? — ko Sihova ia mei he Ta‘ehāmai — pea ‘ikai koā fai sauni ‘e hoku laumālie ki ha pule‘anga ‘oku hangē ko eni?

³⁰Kuo fai ‘i he fonua ha me‘a ‘oku ne to‘o hoku ivi, ‘o ne ‘ai ke u vavana.

³¹‘Oku palofisai loi ‘a e kau palōfita, pea ‘oku fai ‘e he kau taula‘eiki ‘enau pule ‘i he angi ‘a ē; pea ‘oku manako hoku kakai ke pehē: ka ko e hā ‘amoutolu ‘e fai ka hoko hono ngata‘anga?