Read KO E TOH TAPU KATOA TONGA KO SELEMAIA 50 Bible Online

KO SELEMAIA 50 - KO E TOH TAPU KATOA TONGA bible

KO SELEMAIA 50

¹KO E folofola na‘e fai ‘e Sihova, ‘o kau ki Pāpilone, ki he fonua ‘o e kau Kalitia, ‘o ne fakafai ia ‘ia Selemaia ko e palōfita.

²Mou fakahā ‘i he ngaahi pule‘anga, ‘O fanongonongo, ‘o fokotu‘u ha fuka; ‘Ai ke ongo atu, ‘oua ‘e fufū: Mou tala pē kuo puke ‘a Pāpilone, Kuo fakamaa‘i ‘a Peli, Kuo mo‘utāfu‘ua ‘a Melotaki; Kuo fakamaa‘i ‘ene ngaahi tamapua, Kuo mo‘utāfu‘ua ‘ene ngaahi ‘īmisi.

³He ‘alu hake ki ai ha pule‘anga mei he tokelau, Te ne ngaohi hono fonua ko e lala, Pea ‘ikai ha nofo ai: mei he tangata ki he manu, Kuo nau hola, kuo nau ‘osi.

⁴‘I he ngaahi ‘aho ko ē, mo e kuonga ko ia — ko Sihova ia mei he Ta‘ehāmai — ‘e ha‘u ‘a ha‘a ‘Isileli, ‘a kinautolu mo ha‘a Siuta fakataha; te nau ‘alu tangi ‘i he‘enau ‘alu, pea te nau kumi kia Sihova ko honau ‘Otua.

⁵Te nau fehu‘i pe ko e fē ‘a Saione, te nau hanga fononga mai ki heni, he‘enau pehē, Tau ō, pea tau fakahoko kitautolu kia Sihova ‘aki ha kovinānite ta‘engata, ‘a ia ‘e ‘ikai ngalo.

⁶Ko hoku kakai ko e tākanga sipi na‘e mole: ko ‘enau kau tauhi na‘e takihee‘i kinautolu ‘i he ngaahi mo‘unga fakahē:[84] na‘a nau ‘alu mei he mo‘unga ko ē ki he tafungofunga ko ē, na‘e ngalo honau tokoto‘anga.

⁷Ka ma‘u kinautolu ‘e ha ni‘ihi, na‘a nau keina kinautolu: pea na‘e lau ‘e honau ngaahi fili, “Tala‘ehai kuo tau fai hala; ko hono ‘ātunga ia ‘o ‘enau hia kia Sihova, ko e nofo‘anga ‘o e faitotonu, ‘io, ‘a Sihova ko e falala‘anga ‘o honau tupu‘anga.”

⁸Mou hola mei he lotolotonga ‘o Pāpilone, pea hū kitu‘a mei he fonua ‘o e kau Kalitia, pea mou hoko ‘o hangē ko e fanga manu tangata ‘i he ‘ao ‘o e tākanga.

⁹He vakai, ko au te u ue‘i mo ‘omi ki Pāpilone ha fu‘ufu‘unga pule‘anga lalahi mei he fonua tokelau: pea te nau fakatē tau ki ai; mei he potu ko ia ‘e fai hono hamu. Ko ‘enau ngaahi ngahau ‘oku hangē ko ha ngaahi ngahau ‘a ha mafi poto; ‘oku ‘ikai te ne foki ta‘elava.

¹⁰Pea ‘e hoko ‘a e kau Kalitia ko e vetea: ‘e mākona ‘a e kakai ‘e vete ia — ko Sihova ia mei he Ta‘ehāmai.

¹¹He kuo mou fakafiefia, he kuo mou tome‘e, ‘a e kau pāpani ‘i hoku tofi‘a, he kuo mou mofuta hangē ha pulu ‘au‘au koane, pea kuo mou tangitau, ‘o hangē ko e fanga manu tangata.

¹²Ko ia, ‘e mātu‘aki mā ho‘omou fa‘ē; ‘e kula ia na‘a ne fā‘ele‘i kimoutolu; vakai ko e kimui ia ‘o e ngaahi pule‘anga, kuo ne hoko ko e toafa, ko e fonua mōmoa, pea ko e potu mamate.

¹³Ko e me‘a ‘i he houhau ‘a Sihova, ‘e ‘ikai nofo‘ia, pea te ne hoko ko e koto lala: ‘ilonga ha taha ‘e laka ofi ki Pāpilone te ne ofo mo faka‘ise‘isa ‘i he ngaahi fu‘u tā kuo fai kiate ia.

¹⁴Mou fakatē takatakai ki Pāpilone, ‘A e kau fakakaufana fua pē; Fana ki ai, ‘oua ‘e mamae ki he ngahau; He kuo ne hia kia Sihova.

¹⁵Fai ‘a e kailatau ki ai takatakai; Kuo ne tukulolo; Kuo holo hono ngaahi taua ‘i he funga ‘ā; Kuo tulaki hono ngaahi ‘ā;[85] He ko e sauni ‘a Sihova ia; Mou fai sauni ki ai; Hangē ko ‘ene fai, mou fai pehē kiate ia.

¹⁶Tu‘usi mei Pāpilone ‘a e tangata tūtuu‘i, Mo ia ‘oku fai‘aki ‘a e hele tu‘usi ‘i he ututa‘u: He ‘e hanga takitaha ki hono fa‘ahinga, Pea ‘e hola takitaha ki hono fonua ‘o‘ona, Telia ‘a e heletā lolololo.

¹⁷Ko e sipi vetekina ‘a ‘Isileli; na‘e fakafe‘ātungia ia ‘e he fanga laione: ko e Tu‘i ‘Āsilia na‘e fuofua keina ia, pea kimui kuo fesifesi hui ki ai ‘e he Tu‘i Pāpilone ni ko Nepukanesa.

¹⁸Ko ia ko e folofola eni ‘a Sihova Sāpaoti, ko e ‘Otua ‘o ‘Isileli: Ko au eni te u tautea ‘a e Tu‘i Pāpilone, pea mo hono fonua, hangē ko ‘eku tautea ‘a e Tu‘i ‘Āsilia.

¹⁹Pea te u fakafoki ‘a ‘Isileli ki hono kaikai‘anga, pea te ne kaikai ‘i Kāmeli mo Pēsani, pea ‘e topono ‘ene holi ‘i Mo‘unga ‘Ifalemi mo Kiliati.

²⁰‘I he taimi ko ia mo e kuonga ko ia — ko Sihova eni mei he Ta‘ehāmai — ‘e kumi ki he kovi ‘a ‘Isileli, ka kuo ‘ikai; pea ki he ngaahi hia ‘a Siuta, kae ‘ikai ma‘u: he te u fakamolemole ‘a kinautolu ‘oku ou fakatoe.

²¹‘Alu hake ki ai, ki he fonua ko Melataimi (Angatu‘u-lōua), pea ki he nofo Pēkoti (‘Eke), ke tuli kiate kinautolu ‘a e faka‘auha mo e mōifua[86] — ko Sihova ia mei he Ta‘ehāmai — pea fai ‘o tatau tofu pē mo e me‘a kuo u tu‘utu‘uni atu.

²²Sī! ‘oku ongoonga‘a mai ‘a e tau ‘i he fonua, Mo e maumau lahi.

²³Uoke, kuo fesi‘i mo maumau ‘a e hāmala ‘o māmani kātoa! Uoke, kuo hoko ‘a Pāpilone ko e lala ‘i he ngaahi pule‘anga!

²⁴Na‘a ku fanga hele kiate koe, Pāpilone, ‘io, pea na‘e pō koe foki, ka na‘e ‘ikai te ke ‘ilo ki ai: na‘e faifai pea ma‘u koe, pea puke foki, he na‘a ke faka‘uketau kia Sihova.

²⁵Kuo fakaava ‘e Sihova hono fale-mahafu, pea kuo ne fakahū kitu‘a ‘a e ouau ‘o ‘ene tuputāmaki; he ‘oku ai ha ngāue ‘a ‘Ātonai Sihova Sāpaoti ke fai ‘i he fonua ‘o e kau Kalitia.

²⁶Mou omi ki ai mei he potu kotoa pē, Fakaava hono ngaahi feleoko; Fokotu‘u hangē ni puke uite, pea mōifua ia: ‘Oua ai hano toenga.

²⁷Tāmate‘i ‘ene fanga pulu kotoa; Ke nau ‘alu hifo ki he fale tāmate: ‘Oiauē kinautolu! he kuo hoko honau ‘aho, ‘A e taimi ‘o hanau ‘a‘ahi.

²⁸Sī! ko e patatū ‘a e kau hola, Mo e hao mei he fonua ko Pāpilone, Ko ‘enau ‘alu ke tala ki Saione ‘a e sauni ‘a Sihova ko hotau ‘Otua, ‘Ene sauni ‘a e maumau hono temipale.

²⁹Fanongonongo ki he kau fakakaufana ke ha‘u ki Pāpilone, ‘A kinautolu kotoa ‘oku teke ‘a e kaufana; ‘Apitanga takatakai ki ai; Ke ‘oua ai ha‘ane hola: Totongi kiate ia ‘o fakatatau ki he‘ene ngāue; Fai kiate ia ‘o tatau tofu pē mo ‘ene fai ‘a‘ana: He kuo ne fielahi kia Sihova, Ki he Tāpuhā ‘o ‘Isileli.

³⁰Ko ia ‘e tō ‘ene kau talavou ‘i he ngaahi mala‘e, pea ‘e fakalongo hono kau tangata tau ‘i he ‘aho ko ia — ko Sihova ia mei he Ta‘ehāmai.

³¹Ko au eni ko e fili kiate koe, ‘a koe ko Fielahi — ko e folofola ia mei he Ta‘ehāmai ‘a ‘Ātonai Sihova Sāpaoti — he kuo hoko mai ho ‘aho, ko e taimi ‘o ‘eku ‘a‘ahi kiate koe.

³²Pea ‘e humu ‘o tō ‘a Fielahi, pea ‘ikai ha taha ke fokotu‘u ia: pea te u tafu ha afi ‘i he‘ene ngaahi kolo, pea te ne keina ‘a e ngaahi potu takatakai kiate ia.

³³Ko e folofola eni ‘a Sihova Sāpaoti; ko ha‘a ‘Isileli mo ha‘a Siuta ‘oku fakaehaua fakataha: pea ko kinautolu kotoa na‘e taki pōpula kinautolu ‘oku nau puke ma‘u ia: na‘e ‘ikai te nau fie tukuange.

³⁴Ko honau koeli ko e taha mālohi, ko Sihova Sāpaoti hono huafa: te ne mātu‘aki taukapo‘i ‘enau me‘a koe‘uhi ke ne fakamālōlō ‘a māmani, kae fakahoha‘a ‘a e nofo Pāpilone.

³⁵‘Oku tu‘u mai ha heletā ki he kau Kalitia — ko Sihova ia mei he Ta‘ehāmai — pea ki he nofo Pāpilone, pea ki hono hou‘eiki, pea ki hono kau poto.

³⁶‘Oku tu‘u mai ha heletā ki he fa‘ahinga launoa, pea te nau vale: ‘oku tu‘u mai ha heletā ki hono kau helo, pea te nau tāfu‘ua.

³⁷‘Oku tu‘u mai ha heletā ki he‘ene fanga hoosi, pea ki he‘ene ngaahi sāliote, pea ki he ngaahi fa‘ahinga ‘oku fefiofi, ‘a ia ‘oku nofo ‘i kolo, pea te nau hoko ko e kau fefine: ‘oku tu‘u mai ha heletā ki he‘ene ngaahi fokotu‘unga koloa, pea ‘e vete ia.

³⁸‘Oku tu‘u mai ha la‘ala‘ā ki hono ngaahi vai, pea te nau mātu‘u: he ko e fonua fonu ‘īmisi ia, pea ‘oku nau valelau ‘i he tauhi ‘enau ngaahi me‘a fakalilifu.

³⁹Ko ia, ‘e nofo mai ‘a e manu ‘o e lala mo e manu ‘o e matāfonua,[87] pea ‘e nofo ai ‘a e fanga ‘ositalesi: pea ‘e ‘ikai toe nofo‘ia ‘o lauikuonga; pea ‘e ‘ikai nofo‘anga ‘e ha to‘utangata mo ha to‘utangata.

⁴⁰Hangē ko e fulihi ‘e he ‘Otua ‘a Sōtoma mo Komola, mo e ongo kolo na‘a nau kaungā nonofo — ko Sihova ia mei he Ta‘ehāmai — ‘e ‘ikai nofo ai ha taha, pea ‘e ‘ikai ‘āunofo ki ai ha hako‘i tangata.

⁴¹Vakai, ‘oku ha‘u ha kakai mei he tokelau; ‘Io, ko e pule‘anga lahi, Pea ‘e ue‘i hake ‘ani tu‘i tokolahi Mei he ngaahi ngata‘anga ‘o e fonua;

⁴²‘Oku nau to‘o kaufana mo e tao; Ko e fa‘ahinga manako fakamamahi kinautolu, Pea ‘oku ‘ikai ha‘anau manava‘ofa; ‘Oku ‘u‘ulu honau le‘o hangē ko e tahi, Pea ‘oku nau heka hoosi; Kuo teu‘i hangē ha to‘a Ke tau‘i koe, ta‘ahine Pāpilone,

⁴³Kuo fanongo ‘e he Tu‘i Pāpilone ki honau ongoongo, Pea ‘oku vaivai hono nima: Kuo puke ia ‘e he mamahi, Ko e langa hangē ko e fefine fā‘ele.

⁴⁴Vakai, te ne ‘alu hake hangē ha laione mei he lāngilangi ‘o Soatani ki ha kaikai‘anga tu‘u ma‘u: ka ko e kemo te u fakalele kinautolu mei ai; pea ‘ilonga ha taha kuo fili, te u fokotu‘u ia ke pule ki ai: he ko hai ‘oku tatau mo au? Pea ko hai te ne tu‘utu‘uni ha taimi ke u hopo? Pea ko hai tū ha tauhimanu te ne tu‘u kiate au?

⁴⁵Ko ia fanongo ā ki he fakakaukau ‘a Sihova, ‘A ia kuo ne fakakaukau ke fai ki Pāpilone, Pea mo ‘ene ngaahi tu‘utu‘uni, Kuo ne tu‘utu‘uni ke fai ki he fonua ‘o e kau Kalitia: Kuo pau te nau fehae kinautolu, ‘A e fanga ki‘i me‘a ‘o e tākanga; Kuo pau te ne ‘ai ke ofo ‘iate kinautolu ‘a e kaikai‘anga.

⁴⁶‘Oku tete ‘a māmani ‘i he longoa‘a ‘o e hamu ‘o Pāpilone, Pea ‘oku ai ha ‘ioho ‘oku ongo ki he ngaahi pule‘anga.