Read KO E TOH TAPU KATOA TONGA KONI TANGILĀULAU 1 Bible Online

KONI TANGILĀULAU 1 - KO E TOH TAPU KATOA TONGA bible

KONI TANGILĀULAU 1

¹a ‘OIAUĒ si‘i nofo li‘aki ‘a e fefine ni, ‘A e kolo na‘e fonu kakai! Si‘ene hoko ko e uitou tofu pē! ‘A ia na‘e fotu ‘i he ngaahi pule‘anga, Si‘i toko taha na‘e fine‘eiki ‘aki ‘e he ngaahi vahefonua, Kuo ne hoko ko e tali fatongia!

²b Ko ‘ene tangi po‘uli ko e me‘a lahi, Pea ‘oku fetafei hono kou‘ahe ‘i hono lo‘imata; ‘Oku ‘ikai ha taha ‘i hono kau ‘ofa‘anga ‘E fai ha fakalelu ki ai: Kuo kākaa‘i ia ‘e hono ngaahi kaume‘a, Kuo nau hoko ko hono fili.

³g Kuo ‘alu fakahee‘i ‘a Siuta koe‘uhi ko e kovi, Pea koe‘uhi ko e lahi ‘o e fatongia; ‘Oku ne nofo he lotolotonga ‘o e ngaahi pule‘anga Ta‘e te ne ma‘u ha nonga: Ne a‘u ki ai hono kau tuli Fe‘unga mo e ngaahi potu pokosi‘i.

⁴d ‘Oku nofo mamahi ‘a e ngaahi hala ki Saione, Ko e ‘ikai ‘alu ai ha ni‘ihi ki he kātoanga tu‘utu‘uni; ‘Oku lala hono ngaahi matanikolo, Koni kau taula‘eiki ē ‘oku māpuhoi: Ko ‘ene kau finemui ‘oku mamahi, Pea ko si‘i kolo foki ‘oku kona hono loto.

⁵h Ko hono kau fakamamahi kuo hoko ‘o tau‘olunga, Ko hono ngaahi fili ‘oku nau tu‘umālie; He ko Sihova kuo ne fakamamahi ia Koe‘uhi ko e lahi ‘o ‘ene fai hala: Kuo ‘alu pōpula ‘ene longolonga‘i tamaiki, He fakateka kinautolu ‘e he fili.

⁶w Pea kuo mahu‘i mei he ta‘ahine ko Saione Hono fu‘u lāngilangi; Kuo hoko hono hou‘eiki hangē ko e fanga tia Kuo ‘ikai ‘ilo ha kaikai‘anga, Pea ‘oku nau ‘alu ta‘eha ivi ‘I he fakateka kinautolu ‘e he tuli.

⁷z ‘Oku fakamanatu ‘e Selusalema ‘i he taimi ‘o ‘ene kovi mo fakafe‘ātungia ‘A hono ngaahi mālie kotoa talu mei mu‘a: Si‘i tō ‘e hono kakai ki he nima ‘o e fili, ‘O ‘ikai ha taha ke tokoni mai: Ko e fefine ka kuo sio kiate ia ‘e hono ngaahi fili, Kuo manuki‘i ‘ene ngaahi fakataputapu.[1]

⁸x Kuo mātu‘aki hia ‘a Selusalema; Ko ia, kuo ne hoko ko e me‘a ke fakalili‘a ki ai: Ko kinautolu kotoa na‘e fakahīkihiki‘i ia ‘Oku nau va‘inga‘aki, He kuo nau mamata ki hono telefua: ‘Io, na‘a mo ia ‘oku ne māpuhoi, Pea ‘oku ne fulitu‘a.

⁹t Ko hono fakalielia ‘oku ‘i hono kapa‘i kāuni; Na‘e ‘ikai te ne manatu ki he me‘a ‘e iku ki ai; Ko ia, ‘oku fakaofo ‘ene ‘alu hifo; ‘Oku ‘ikai ha taha ke fai ha fakalelulelu ki ai: “Sihova ē, ‘afio mai ki he‘eku kovi; He kuo fakata‘emālū‘ia ‘a e fili.”

¹⁰y Kuo ala noa ‘a e fili Ki he‘ene ngaahi me‘a mālie: Seuke, kuo ne mamata ki he hīteni Kuo nau hū ki hono fale tapu! ‘a e fa‘ahinga na‘a ke tu‘utu‘uni ‘Oku tapu ‘enau hū ki ho siasi.[2]

¹¹k ‘Oku māpuhoi hono kakai kotoa, Si‘enau kumi me‘akai; Kuo nau ‘atu ‘enau ngaahi me‘a mālie ki ha mā‘anga, Ke nau mānava hake ai: “Me‘a mai, Sihova, ‘o tokanga‘i He kuo u hoko ko e me‘a ke va‘inga‘aki.”

¹²l Ko e me‘a noa koā kiate kimoutolu, ‘A e kau fononga ‘i he hala? Tokanga, ‘o vakai pe ‘oku ai ha mamahi ‘oku tatau mo ‘eku mamahi, ‘A e me‘a ‘oku fai kiate au, Hoku fakamamahi ‘oku fai ‘e Sihova ‘I he ‘aho ‘o ‘ene houhau kakaha.

¹³m Mei Taukakapa kuo ne tuku mai ha afi ki hoku ngaahi hui, Pea ‘oku ne ikuna kinautolu: Kuo ne fola ha kupenga ki hoku va‘e, Kuo ne fakafoki ki mui au; Kuo ne tuku au ke u nofo maumau‘ia, ‘O vaivai ‘i he ‘aho kotoa.

¹⁴n Ko e ‘ioke ‘o ‘eku ngaahi angahala kuo fī ‘e hono nima; ‘Oku nau fefihitaki, Kuo nau heka ki hoku kia; ‘Oku fakahumu ai hoku ivi: Kuo tuku au ‘e ‘Ātonai ki he nima ‘o e ni‘ihi, ‘A ia ‘oku ‘ikai te u lava ke tu‘u ki ai.

¹⁵s Kuo va‘inga‘aki ‘e ‘Ātonai ‘eku kau mafi kotoa, Lolotonga ‘enau ‘i loto kolo; Kuo ne fanongonongo ha fakataha ke fai kiate au, Ke laiki ‘eku kau talavou: Kuo fai ‘e ‘Ātonai ha malaki ‘i he tata‘o‘anga ‘O e ta‘ahine Siuta ne tāupo‘ou.

¹⁶‘ Koe‘uhi ko e ngaahi me‘a ko ia ‘oku ou tangi pē au; Ko hoku mata ni, ko hoku mata ni ‘oku fetafei ai ‘a e vai; He ‘oku mama‘o meiate au ha taha fakalelu, Ha taha ke fakamānava hake au: ‘Oku nofo ‘eku fānau ko e maumau‘ia, He kuo mālohi ‘a e fili.

¹⁷p ‘Oku fola nima ‘a Saione; ‘Oku ‘ikai ha taha ke fakalelu ki ai: Kuo fai tu‘utu‘uni ‘e Sihova koe‘uhi ko Sēkope, Ke fili ‘aki ia ‘e he nofo takatakai: Ko ‘enau vakai ‘a Selusalema, Ko e me‘a ke fakalili‘a ki ai.

¹⁸c ‘Oku tonuhia pē ‘a Sihova; He kuo u angatu‘u ki he me‘a na‘e tō mei hono fofonga: Fanongo mu‘a, ‘a e ngaahi kakai, Mou vakai ‘eku mamahi: Ko si‘eku kau finemui mo kau talavou, Kuo nau ‘alu pōpula.

¹⁹q Na‘a ku ui mai hoku kau ‘ofa‘anga, Kuo fai kākā kiate au ‘e he fa‘ahinga ko ia: Ko ‘eku kau taula‘eiki mo ‘eku kau mātu‘a Na‘a nau hokotaki ‘i he kolo, Lolotonga si‘enau kumi ha‘anau ma‘anga Ke fakamānava hake ‘aki kinautolu.

²⁰r Me‘a mai, Sihova; he ‘oku ou ‘efihia; ‘Oku hangatāmaki hoku to‘oto‘onga; Kuo mafuli hoku loto ‘iate au; He ko ‘eku angatu‘u ko e me‘a lahi: ‘I tu‘a, ‘oku ‘ave ‘eku fānau ‘e he heletā; Ko fale, ‘oku tatau ai pē mo e mate.

²¹s Kuo nau fanongo ‘oku ou māpuhoi au; ‘Oku ‘ikai haku fakalelu; Kuo fanongo ‘eku ngaahi fili ki he‘eku kovi; ‘Oku nau fiefia ‘i ho‘o fai pehē: Te ke ‘omi pē ‘a e ‘aho kuo ke fanongonongo, Pea te nau hangē ko au.

²²t Ke a‘u ki ho ‘ao na ‘Enau ngaahi kovi kotoa; Pea ke fai kiate kinautolu, hangē ko ho‘o fai kiate au, Koe‘uhi ko ‘eku ngaahi fu‘u angahala: He ‘oku lahi ‘eku māpuhoi, Pea ko hoku loto ‘oku vaivai.