Read KO E TOH TAPU KATOA TONGA KONI TANGILĀULAU 2 Bible Online

KONI TANGILĀULAU 2 - KO E TOH TAPU KATOA TONGA bible

KONI TANGILĀULAU 2

¹‘OIAUĒ ‘a e ‘ufi‘ufi ‘e ‘Ātonai ‘aki ha ‘ao ‘i he‘ene houhau a ‘A si‘i ta‘ahine ko Saione! ‘Ene lī mei langi ki māmani ‘a e lāngilangi ‘o ‘Isileli, Pea kuo ‘ikai te ne manatu ki hono tu‘ungava‘e ‘I he ‘aho ‘o ‘ene houhau.

²b Kuo folofua ‘e ‘Ātonai, ta‘eha‘ane mamae, ‘A e nofo‘anga kotoa ‘o Sēkope; Kuo ne holoki he‘ene matua mai ‘a e ngaahi talitau‘anga ‘o e ta‘ahine ko Siuta; Kuo ne holoki ki he kelekele, Kuo ne fakame‘avale‘i ‘a e pule‘anga mo hono hou‘eiki.

³g Kuo ne paki‘i ‘i he vela hono houhau ‘a e nifo kotoa ‘o ‘Isileli; Kuo ne momou hono to‘omata‘u ‘I he fepaki mo e fili: Pea ‘oku ne fakapuho ‘i Sēkope hangē ha afi ulo, ‘A ia ‘oku ne keina takatakai.

⁴d Kuo ne teke ‘ene kaufana hangē ha fili, Kuo ne tu‘u ‘oku hiki tā mai hono to‘omata‘u, Kuo ne tāmate‘i kotoa ‘a e ngaahi me‘a ‘oku holi ki ai ‘a e mata; Kuo ne lilingi ‘ene tafulu hangē ha afi ‘I he tēniti ‘o e ta‘ahine ko Saione.

⁵h Kuo hoko ‘a ‘Ātonai hangē ko ha fili, Kuo ne folofua ‘a ‘Isileli; Kuo ne folofua hono ngaahi palasi, Kuo ne faka‘auha hono ngaahi talitau‘anga: Pea kuo ne fakalahi ‘i he ta‘ahine ko Siuta ‘a e to‘e mo e māpuhoi.

⁶w Pea kuo ne ngaohikovi‘i hono loto‘ā, ‘o hangē ko ha ngouetapu pē; Kuo ne faka‘auha hono potu fe‘iloaki‘anga; Kuo ‘ai ‘e Sihova ke ngalo ‘i Saione ‘a e kātoanga tapu mo e Sāpate; Pea ‘i he kakaha ‘ene tuputāmaki Kuo ne keu‘i ‘a e tu‘i mo e taula‘eiki.

⁷z Kuo li‘aki ‘e ‘Ātonai ‘ene ‘ōlita ‘a‘ana, Kuo ne fakalili‘a ki hono potu tapu, Kuo ne tukuange ki he nima ‘o e fili ‘a e holisi ‘o hono ngaahi palasi: ‘Oku nau tukuna atu ha longoa‘a ‘i he fale ‘o Sihova, ‘O hangē ko ha ‘aho kātoanga.

⁸x Kuo tu‘utu‘uni ‘e Sihova ke faka‘auha ‘a e ‘ā ‘o e ta‘ahine ko Saione; Kuo ne falō atu ‘a e kafa, Kuo te‘eki momou hono nima mei he faka‘auha: Pea kuo ne ‘ai ke tangimahū ‘a e keli mo e ‘ā; ‘Oku na faka‘au hifo fakataha.

⁹t Kuo ngoto ‘i he kelekele hono ngaahi matanikolo; Kuo ne maumau‘i mo laiki hono ‘akau fakama‘u: Ko hono tu‘i mo hono hou‘eiki ‘oku ‘i he lotolotonga ‘o e ngaahi kakai, ‘A ia ‘oku ‘ikai ‘i ai ‘a e Lao; Mo hono kau palōfita foki, ‘Oku ‘ikai te nau ma‘u ha vīsone meia Sihova.

¹⁰y Ko e mātu‘a ‘o e ta‘ahine ko Saione ‘Oku nau nofo ‘i he kelekele, ‘oku nau fakalongo pē; ‘Oku nau laku ‘a e efu ki honau ‘ulu; Kuo nau no‘o ‘aki ‘a e tauanga‘a; Ko e kau finemui ‘o Selusalema Kuo nau vilitaki honau ‘ulu ki he kelekele.

¹¹k Kuo ‘osi‘osi hoku mata ‘i he tangi lo‘imata, ‘Oku hangatāmakia hoku to‘oto‘onga, ‘Oku malingi hoku ‘ate ki he kelekele, Koe‘uhi ko e lavea ‘a e ‘ōfefine ‘o hoku kakai; He pongia ‘a e tamaiki iiki mo e valevale ‘I he ngaahi mala‘e ‘o e kolo.

¹²l Si‘enau lau ki he‘enau fa‘ē, “Kofa‘ā ha koane mo ha uaine?” Si‘enau pōngingia hangē ha kafo ‘i he ngaahi mala‘e ‘o e kolo! Si‘enau hua‘i ‘enau mo‘ui Ki he fatafata ‘o ‘enau fa‘ē!

¹³m Ta‘ahine Selusalema, ko e hā ‘eku lau ‘e fai atu? Te u fakatatau koe ki he hā? Ta‘ahine Saione na‘e tāupo‘ou, ko e hā hao tuha te u lau, Ke u fai‘aki atu ha fakalelu? Ko ho maumau ko e me‘a hulu hangē ko e tahi: Ko hai ‘e lava ho faito‘o?

¹⁴n Ko ho kau palōfita kuo mata vīsone ma‘au, ‘A ia ko e koto nge‘esi mo e vale; Pea na‘e ‘ikai te nau tatala ho‘o kovi Ke fakafoki ho pōpula: Ka ko ‘enau ngaahi vīsone na‘a nau sio ma‘au Ko e ngaahi kavenga nge‘esi pē, mo e tupu‘anga fakahē.

¹⁵s ‘Oku pasipasi nima kiate koe ‘a e fononga kotoa ‘i he hala; ‘Oku nau faka‘ise‘isa, mo kalo ‘ulu, Ki he ta‘ahine ko Selusalema: “Ko eni ia koā ‘a e kolo na‘e lau ko e fungani he faka‘ofo‘ofa, Fakaholomamata‘anga ‘o māmani kātoa?”

¹⁶‘ Kuo fakamanga honau ngutu kiate koe ‘E ho fili fua pē; ‘Oku nau faka‘ise‘isa, pea ‘oku nau ‘ūtaki kaunifo; ‘Oku nau lau, “Kuo tau folofua ia, ‘Āua, ko e ‘aho eni na‘a tau ‘amanaki ki ai; Kuo tau ma‘u ia, kuo tau sio ki ai.”

¹⁷p Kuo fai ‘e Sihova ‘a e me‘a na‘a ne fakakaukau‘i; Kuo ne faka‘osi ‘ene folofola na‘a ne tu‘utu‘uni he taimi mu‘a; Kuo ne holoki, Pea kuo ‘ikai ha‘ane mamae: Pea kuo ne tuku ‘a e fili ke fiefia ‘iate koe, Kuo ne fakamā‘olunga ‘a e nifo ‘o ho kau fakamamahi.

¹⁸c Kuo tangi honau loto kia ‘Ātonai. Si‘i ‘ā ‘o e ta‘ahine ko Saione, Ke tafe hifo ‘a e lo‘imata hangē ha vaitafe, ‘Aho mo e pō; ‘Oua na‘a ai ha‘o tuku, ‘Oua na‘a mālōlō ho tama‘imata.

¹⁹q Tu‘u, vālau po‘uli, ‘I he fokotu‘u ‘a e ngaahi le‘o; Lilingi ho loto hangē ko e vai ‘i he hanga‘anga ‘o ‘Ātonai; Hiki ho nima ki ai, Koe‘uhi ko e mo‘ui ‘a si‘o tamaiki ‘oku pongia ‘i he honge, ‘I he tuliki ‘o e ngaahi hala.

²⁰r Me‘a mai, Sihova, ‘o tokanga, Pe ko hai kuo ke fai pehē ki ai! ‘E kai koā ‘e he kau fefine honau fua, ‘A e tamaiki ‘oku nau kei hapahapai? ‘E fakapoongi ‘i he potu tapu ‘o ‘Ātonai ‘a e taula‘eiki mo e palōfita?

²¹s ‘Oku fetākoto‘i ‘i he kelekele ‘a e talavou mo e motu‘a, ‘I he ngaahi hala; Ko si‘eku kau finemui mo talavou Kuo tō ‘i he heletā: Kuo ke fakapoongi kinautolu ‘i he ‘aho ‘o e houhau; Kuo ke tāmate‘i ta‘eha‘o mamae.

²²t ‘Oku ke fanongonongo ‘eku ngaahi ilifia Ke ha‘u mei he potu kotoa pē, ‘O hangē ko ha ‘aho kātoanga; Pea ‘i he ‘aho ‘o e houhau ‘o Sihova Na‘e ‘ikai ha toe pe hao: Ko kinautolu kuo u hapahapai mo tauhi, Kuo faka‘osi kinautolu ‘e hoku fili.