Read KO E TOH TAPU KATOA TONGA KONI TANGILĀULAU 3 Bible Online

KONI TANGILĀULAU 3 - KO E TOH TAPU KATOA TONGA bible

KONI TANGILĀULAU 3

¹a KO E tangata au kuo mata mamahi ‘I he me‘a tā ‘o ‘ene ‘ita.

²a Kuo ne taki au, ‘o ‘ai ke u fou he po‘uli, ‘O ‘ikai ‘i he maama.

³a ‘Ā, ko au pē ‘oku ne tā mo foki ki ai, ‘O ‘osi ‘a e ‘aho.

⁴b Kuo ne ‘ai ke motu‘a hoku kakano; Kuo ne fesi‘i hoku ngaahi hui.

⁵b Kuo ne langa mo ‘ākolo‘i au ‘Aki ‘a e kona‘ī‘ī mo e ongosia.

⁶b Kuo ne ‘ai ke u nofo he po‘uli lōlō, Hangē ko e kakai kuo mate fuoloa.

⁷g Kuo ne ‘aa‘i takai au, kuo ‘ikai te u mahū ki tu‘a; Kuo ne ‘ai ke mamafa ‘eku seini.

⁸g Ka u ka tautapa foki, mo tangi atu, ‘Oku ne ta‘ofi ‘eku lotu.

⁹g Kuo ne songo hoku hala ‘aki ‘a e ngaahi maka hele, Kuo ne piko‘i hoku ngaahi ‘alunga.

¹⁰d Ko e pea ia ‘oku tokamalumu kiate au, Ko ha laione ‘i he lilo.

¹¹d ‘Oku ne ‘ave hoku ngaahi hala, ‘o hae fakaikiiki au; Kuo ne ‘ai ke u nofo ko e maumau‘ia.

¹²d Kuo ne teke ‘ene kaufana, Pea kuo ne fokotu‘u au ko e polo ki he ngahau.

¹³h Kuo ne ‘ai ke ‘asi ‘i hoku kofuua ‘a e fānganga ‘o ‘ene hōfangahau.

¹⁴h Kuo u hoko ko e luma‘anga ki hoku kakai kotoa; ‘Oku nau ta‘anga ‘aki au ke ‘osi ‘a e ‘aho.

¹⁵h ‘Oku ne ‘ai ke u pito ‘i he ngaahi ifo tamala, ‘Oku ne fakakonaa‘i au he inu teve.

¹⁶w ‘Oku ne pakipaki hoku nifo ‘i he kai me‘a ‘one‘onea, ‘Oku ne ha‘aki au ki he efuefu.

¹⁷w Pea kuo ne keu‘i ‘eku mo‘ui mei he tu‘umālie; Kuo ngalo ‘iate au ‘a e lelei.

¹⁸w Pea u pehē, Kuo ka‘anga hoku ivi, Mo ‘eku ‘amanaki kia Sihova.

¹⁹z Manatu ki he‘eku mamahi, mo ‘eku ifo-tamala‘ia, Ki he teve mo e kona‘ī‘ī.

²⁰z ‘Oku mātu‘aki manatu ki ai ‘e hoku laumālie, Pea ‘oku mapelu hifo ‘i loto ‘iate au.

²¹z ‘Oku ou fakahake ‘i hoku loto ‘a e me‘a ko eni, Ko ia ai, ‘oku ‘i ai ha‘aku ‘amanaki.

²²x Ko e ‘ū ‘ofa pē ‘a Sihova, ‘a ia ‘oku ‘ikai te tau ‘auha ai; Koe‘uhi ‘oku ‘ikai ke ‘osi ‘ene fai faka‘atu‘i.

²³t ‘Oku nau fo‘ou ‘i he pongipongi kotoa; Ko e me‘a lahi ho‘o fai mo‘oni.

²⁴x Ko hoku ‘inasi ‘a Sihova — ko e lau ia ‘a hoku laumālie- Ko ia ai, te u ‘amanaki kiate ia.

²⁵x ‘Oku lelei ‘a Sihova kiate kinautolu ‘oku tatali kiate ia, Ki he laumālie ‘oku kumi ki He‘ene ‘Afio.

²⁶t ‘Oku lelei ke te ‘amanaki mo tali fakalongo pē Ki he fakamo‘ui ‘a Sihova ka fai.

²⁷x ‘Oku lelei ki he tangata ke ne fua ‘a e ‘ioke Lolotonga ‘ene kei talavou.

²⁸y Ke ne nofo toko taha, ‘o fakalongo, He kuo hili ia kiate ia ‘e He‘ene ‘Afio.

²⁹y Ke ne ‘ai hono ngutu ki he efu; Na‘a ‘oku ‘i ai ha ‘amanaki.

³⁰y Ke ne tuku hono kou‘ahe kiate ia na‘e taa‘i ia; Ke ne ‘ai ke kakato hono manukia.

³¹k Koe‘uhi ‘e ‘ikai li‘aki ‘o ta‘engata ‘E ‘Ātonai.

³²k He neongo ‘oku ne fakamamahi, ‘Oku ne faka‘atu‘i foki, ‘O taau mo e lahi ‘o ‘ene ‘alo‘ofa.

³³k He tala‘ehai ‘oku ne fai fiefie fai ‘Ene ngaohikovia mo fakamamahi ‘a e hako‘itangata.

³⁴l Ko e malaki ‘i hoto lalo va‘e ‘a e kau pōpula ‘o e fonua.

³⁵l Ko e piko‘i ‘a e totonu ‘a ha tangata ‘I he mātu‘aki ‘ao ‘o ‘Elioni,

³⁶l Ko e mio‘i ha tangata ‘i he‘ene hopo — ‘Ikai ko e ngaahi me‘a ia ‘e vakai ki ai ‘a ‘Ātonai?[3]

³⁷m Ko hai tū ha taha kuo fekau pea hoko, ‘Osi, na‘e ‘ikai ko e tu‘utu‘uni ‘a ‘Ātonai?

³⁸m ‘Ikai ‘oku tō mai mei he fofonga ‘o ‘Elioni ‘a e kovi mo e lelei fakatou‘osi?

³⁹m Koe‘uma‘ā ke māpuhoi ha tangata ‘oku kei mo‘ui? Ke māpuhoi pē ha taha koe‘uhi ko ‘ene ngaahi angahala.[4]

⁴⁰n Ke tau ‘eke mo hakule hotau ngaahi ‘alunga, Ka tau foki kia Sihova.

⁴¹n Ke tau hiki hotau loto ke ō mo hotau nima Kia ‘Ela ‘i langi.

⁴²n Kuo mau hia, pea kuo mau angatu‘u; Kuo ‘ikai fakamolemole ‘e he ‘Afiona.

⁴³s Kuo ke pulupulu ‘aki ha houhau, ‘o tuli kiate kimautolu; Kuo ke tāmate‘i, ‘o ‘ikai ha‘o mamae.

⁴⁴s Kuo ke pulupulu ‘aki ha ‘ao Ke ‘oua na‘a ‘asi ha hū.

⁴⁵s Kuo ke ngaohi kimautolu ko e veve mo e ‘uli ‘I he lotolotonga ‘o e ngaahi kakai.

⁴⁶‘ Kuo fakamanga honau ngutu kiate kitautolu ‘E hotau fili fua pē.

⁴⁷‘ Kuo hoko kiate kitautolu ‘a e fakalilifu mo e luo, Ko e fakalala mo e maumau.

⁴⁸‘ ‘Oku hangē ha tausi ‘a e vai hoku mata, Koe‘uhi ko e maumau ‘a e ‘ōfefine ‘o hoku kakai.

⁴⁹p ‘Oku matua atu hoku mata, ‘o ‘ikai tuku, ‘O ‘ikai me‘a mo mātu‘u;

⁵⁰p Ko e fai pē kae‘oua ke ‘afio hifo ‘a Sihova, ‘O vakai mai mei langi.

⁵¹p Ko hoku ongo mata ni ‘oku fakatupu mamahi ki hoku laumālie, Koe‘uhi ko e fu‘u fānau fefine ‘a hoku kolo.

⁵²c Ko hoku ngaahi fili tu‘unga‘a pē Na‘a nau tulitāupaua au, hangē ko e fai ki ha misi.

⁵³c Na‘a nau fai ke tu‘usi ‘eku mo‘ui ‘i he lepa, Na‘a nau lī ha maka kiate au.

⁵⁴c Na‘e fakapūlou hoku ‘ulu ‘e he vai; Na‘a ku pehē kuo tu‘usi au.

⁵⁵q Na‘a ku kalanga‘aki ho huafa, ‘e Sihova, Mei he takele ‘o e luo.

⁵⁶q Na‘e ongo atu hoku le‘o; ‘oua ‘e tāpuni ho telinga Ki he‘eku māpuhoi, ki he‘eku tautapa.

⁵⁷q Na‘a ke ‘unu ke ofi ‘i he ‘aho na‘a ku tautapa atu ai: Na‘a ke pehē, ‘Oua te ke manavahē.

⁵⁸r Kuo ke taukapo‘i, ‘e ‘Ātonai, ‘a e ngaahi me‘a ‘a hoku laumālie; Kuo ke fai ‘a e ngāue fakakoeli ma‘a ‘eku mo‘ui.

⁵⁹r Kuo ke mamata, ‘e Sihova, ki he ta‘etotonu ‘oku fai mai; Fakamaau ‘e koe ‘eku totonu.

⁶⁰r Kuo ke mamata ki he‘enau fu‘u sauni kuo fai, Ki he‘enau ngaahi fu‘u fakakaukau kiate au.

⁶¹s Kuo ke ongo‘i, ‘e Sihova, ‘enau manuki mai, ‘Enau ngaahi fu‘u fakakaukau kiate au;

⁶²s ‘a e me‘a ‘oku tō mei he ngutu ‘o e kakai ‘oku tu‘u kiate au, Mo ‘enau fakalaulauloto kiate au ke ‘osi ‘a e ‘aho.

⁶³s Me‘a mai ki he‘enau nofo hifo, mo tu‘u hake; ‘Oku nau ta‘anga ‘aki au.

⁶⁴t ‘E Sihova, te ke fakaai honau tuha, ‘O taau mo e ngāue ‘a honau nima.

⁶⁵t Te ke ‘ange kiate kinautolu ‘a e kui loto: Ko ho mala ia kiate kinautolu.

⁶⁶t Te ke tuli ‘ita kiate kinautolu, Pea te ke faka‘auha kinautolu mei he lalo langi ‘o Sihova.