Read KO E TOH TAPU KATOA TONGA KONI TANGILĀULAU 4 Bible Online

KONI TANGILĀULAU 4 - KO E TOH TAPU KATOA TONGA bible

KONI TANGILĀULAU 4

¹a ‘OIAUĒ ‘a e hoko ‘a e koula ‘o nenefu! ‘a e liliu ‘a e koula tafesino‘ivai! ‘a e malingi noa ‘a e ngaahi maka tapu ‘I he tuliki ‘o e hala kotoa!

²b Si‘i ngaahi foha mahu‘inga ‘o Saione, Ko e fa‘ahinga ke fua mo e koula fungani, Hono kuo lau kinautolu ‘o tatau mo e ipu ‘umea, Ko e ngāue ‘a e nima ‘o e tufunga ‘umea!

³g Na‘a mo e fanga siakali ‘oku nau humaki ange ‘a e huhu ‘Oku nau fakahuhu honau fānganga; Ko e ‘ōfefine ‘o hoku kakai kuo hoko ‘o ta‘e‘ofa, Hangē ko e fanga ‘ositalesi ‘o e toafa.

⁴d ‘Oku piki ‘a e ‘elelo ‘o si‘i valevale ki hono ‘ao‘ingutu Ko ‘ene fie inu: ‘Oku kole mā e tamaiki iiki, ‘Oku ‘ikai ha taha ‘e paki‘i mai ha‘anau me‘a.

⁵h Ko kinautolu na‘e kai ma‘anga ngako ‘Oku nau nofo tuēnoa ‘i he ngaahi hala: Ko kinautolu na‘e hapai ‘i he funga kula ‘aho‘aho ‘Oku nau pipiki mai ki he ngaahi tu‘unga veve.

⁶w Tā kuo hopo hake ‘a e faikovi ‘a e ‘ōfefine ‘o hoku kakai ‘I he angahala ‘a Sōtoma, ‘A ia na‘e mafuli ‘i ha fo‘i kemo, Pea na‘e ‘ikai kuku ia ‘e ha ngaahi nima.

⁷z Na‘e ma‘a ange hono hou‘eiki ‘i he sinou, Na‘a nau kili ‘atā ange ‘i he hu‘akau, Na‘e momoho ange honau sino ‘i he makakula koloa, Ko e sāfaia honau kau langanga.”[5]

⁸x Ko honau fōtunga ‘oku ‘uli‘uli ange ‘i he malala; ‘Oku ‘ikai ‘iloa kinautolu ka nau ka ‘i hala: ‘Oku piki honau kili ki honau ngaahi hui; Kuo mōmoa, kuo hoko ‘o tātāfefie.

⁹t ‘Oku ngutuhua ange ‘a e mate ‘i he heletā ‘Iate kinautolu ‘oku mate ‘i he honge; He ‘oku faka‘au‘ausino ‘a e fa‘ahinga ko ē hangē ha kau veloi, Ko e ta‘e te nau ma‘u ‘a e fua ‘o e ngoue‘anga.

¹⁰y Ko e nima ‘o si‘i kau fefine manava‘ofa Kuo nau haka ‘a e fānau ‘anautolu; Kuo nau me‘akai ‘aki kinautolu ‘I he maumau ‘o e ‘ōfefine ‘o hoku kakai.

¹¹k Kuo ‘osiki ‘e Sihova ‘ene tuputāmaki, Kuo ne lilingi ‘a e kakaha ‘o ‘ene houhau; Pea kuo ne tafu ha afi ‘i Saione, ‘A ia kuo ne keina hono ngaahi tu‘unga.

¹²l Tala‘ehai na‘e tui ‘a e ngaahi tu‘i ‘o e fonua, Pe ko e fu‘u nofo māmani, ‘E hū ha taha fakamamahi mo ha fili ‘I he ngaahi matanikolo ‘o Selusalema.

¹³m Koe‘uhi ā pē ko e ngaahi hia ‘a ‘ene kau palōfita, ‘A e ngaahi kovi ‘a ‘ene kau taula‘eiki, ‘A ia na‘a nau lilingi ‘a e toto ‘o e kau mā‘oni‘oni ‘I loto kolo.

¹⁴n ‘Oku nau ‘alu taupō ‘i he ngaahi hala, Hangē ni kui; Kuo pani toto kinautolu, Ko ia ‘oku ‘ikai ke lava ha taha ke ala ki honau kofu.

¹⁵s “Afe atu — ta‘ema‘a” — na‘e pehē ‘enau kalanga ange — “Afe atu, afe atu — ‘oua ‘e lave mai!” ‘I he‘enau hola, na‘a nau ō ai pē; Ko e lau na‘e fai ‘e he ngaahi pule‘anga, ‘E ‘ikai te nau toe ‘āunofo heni.

¹⁶‘ Kuo vete kinautolu ‘e he fofonga ‘o Sihova; ‘Oku ‘ikai te ne kei tokanga‘i kinautolu: Ko e fōtunga ‘o e kau taula‘eiki ‘oku ‘ikai toka‘i ‘e he fa‘ahinga ko ē; ‘Oku ‘ikai te nau ‘ofa‘i ‘a e mātu‘a.

¹⁷p ‘Oku fai atu ‘a e ‘osi‘osi ‘o hotau mata He fakasio atu ki hatau tokoni muna: ‘I he‘etau fakasio kuo fai, Ko e fakasio ki ha kakai ‘e ‘ikai fakahaofi.

¹⁸c ‘Oku nau lama ‘a e taulaka, Ko ia ‘oku ‘ikai te tau lava ke ‘alu ‘i he ngaahi mala‘e. ‘Oku panaki hotau ngata‘anga, kuo kakato hotau taimi; Seuke, ko hotau ngata‘anga kuo a‘u mai.

¹⁹q Na‘e vave ange hotau kau tuli ‘I he fanga ‘īkale ‘o e ‘atā: ‘I he ngaahi mo‘unga na‘a nau tuli tā mai, ‘I he toafa na‘a nau tokamalumu mai.

²⁰r Ko si‘i mānava ‘a hotau ihu, ko e Pani ‘a Sihova, Na‘e pō ‘i he‘enau ngaahi luo tō; ‘A e ‘afio na‘a tau lau ki ai, Ko hono malu te tau mo‘ui atu ai ‘i he ngaahi pule‘anga.

²¹s Fai ‘a ho‘o fiefia mo ho‘o nēkeneka, ta‘ahine ‘Ītomi; ‘A e nofo ‘i he fonua ko ‘Usa: ‘E ‘alu atu ‘a e ipu kiate koe foki, Te ke konā ai, pea te ke ‘ai ke ke telefua.

²²t Kuo lato ho‘o kovi, ta‘ahine Saione; ‘E ‘ikai te ne toe ‘ave pōpula koe: Te ne ‘eke ho‘o kovi ‘au, ta‘ahine ‘Ītomi; Te ne tatala ho‘o ngaahi angahala.