Read KO E TOH TAPU KATOA TONGA KONI TANGILĀULAU 5 Bible Online

KONI TANGILĀULAU 5 - KO E TOH TAPU KATOA TONGA bible

KONI TANGILĀULAU 5

¹a SIHOVA, manatu ki he anga ‘o e me‘a kuo hoko kiate kimautolu Tokanga‘i pea vakai ‘a e manuki ‘oku fai mai.

²Kuo tō homau tofi‘a ki ha ni‘ihi kehe, ‘A homau ngaahi fale ki ha kau muli.

³‘Oku mau nofo paea, ta‘eha tamai; Ko ‘emau ngaahi fa‘ē ko e kau uitou tofu pē.

⁴Ko e vai ‘omautolu ‘oku mau inu totongi pē; ‘Oku ‘omi totongi ‘a e fefie, ka ko ‘emau ‘akau.

⁵‘Oku mei ala ki homau kia ‘a e kau tuli: Kuo mau ongosia, ‘oku ‘ikai ha‘amau mālōlō.

⁶Kuo mau tukulolo ki ‘Isipite, ki ‘Āsilia; Koe‘uhi ke mau mākona ‘i he me‘akai.

⁷Na‘e fai angahala ‘emau ngaahi kui, ‘oku ‘ikai te nau kei ‘i ai: Ko kimautolu eni ‘oku fua ‘enau ngaahi kovi.

⁸‘Oku pule kiate kimautolu ‘eni tamaio‘eiki: ‘Oku ‘ikai ha taha ke hamusi mei honau nima.

⁹Ko ‘emau me‘akai ‘oku ‘omi ‘aki ‘emau mo‘ui, Koe‘uhi ko e heletā ‘o e toafa.

¹⁰Ko homau kili ‘oku ‘uli‘uli hangē ha ‘ōvani, Koe‘uhi ko e tauha‘a ‘o e honge.

¹¹Na‘a nau tohotoho finemātu‘a ‘i Saione, ‘Ani tāupo‘ou ‘i he ngaahi kolo ‘o Siuta.

¹²Na‘a nau tautau hou‘eiki ‘aki honau nima, Ko e mata ‘o e mātu‘a na‘e ‘ikai ha‘anau ‘a‘apa ki ai.

¹³Fua maka momosi ‘eni kau talavou, Pea ngaofe ‘ani tamaiki ‘i he fua fefie.

¹⁴Kuo tuku ‘e he mātu‘a ‘enau ‘alu ki he matanikolo; ‘A e kau talavou ‘enau tā me‘alea.

¹⁵Kuo tuku ‘a e fiefia ‘a homau loto; Kuo liliu ‘emau me‘e ko e tangilāulau.

¹⁶Kuo tō ‘a e kalauni mei homau ‘ulu; ‘Oiauē kimautolu! he kuo mau angahala.

¹⁷Koe‘uhi ko e me‘a ni kuo mahaki‘ia homau loto; Kuo fakapo‘uli homau mata koe‘uhi ko e ngaahi me‘a ko ia:

¹⁸Koe‘uhi ko Mo‘unga Saione, ‘a ia ‘oku lala; Ko e fanga fōkisi pē ‘oku ‘alu ai.

¹⁹Ko koe, ‘e Sihova, ‘oku ke ‘afio ‘o ta‘engata; Ko ho taloni ‘oku laui to‘utangata.

²⁰Ko e hā ‘oku ke fakangalo ai kimautolu ‘o ta‘engata? ‘Oku ke li‘aki kimautolu ‘o taimi fuoloa?

²¹‘E Sihova, fakafoki mai kimautolu ai ki he ‘Afiona, pea te mau foki ai; Fakafo‘ou homau taimi ke hangē ko e taimi mu‘a.

²²Ka na‘a kuo ke mātu‘aki li‘aki kimautolu, Na‘a kuo lahi ‘aupito ho‘o tuputāmaki mai.