Read KO E TOH TAPU KATOA TONGA KO ‘ISIKELI 15 Bible Online

KO ‘ISIKELI 15 - KO E TOH TAPU KATOA TONGA bible

KO ‘ISIKELI 15

¹PEA hoko ‘a e folofola ‘a Sihova kiate au, ‘o pehē,

²Hako‘i-tangata, ‘oku hulu fēfē ‘a e ‘akau ko e vaine ‘i he ngaahi ‘akau kehekehe, ‘a e va‘a vaine na‘e huluni ‘i he ngaahi ‘akau ‘o e vao tātā?

³‘Oku to‘o mei ai koā ha va‘akau ke ngāue‘aki ki ha me‘a? pe ‘oku ma‘u mei ai ha fa‘o ke tautau ki ai ‘a e nāunau kehekehe?

⁴‘Ā, ‘oku tuku pē ki he afi ke keina. Kapau kuo keina ‘e he afi ‘a e ongo potu fakatou‘osi, pea kuo ‘ohua ‘a loto, ‘e ‘aonga ki ha ngāue?

⁵Vakai, ‘i he‘ene kei haohaoa na‘e ‘ikai ngāue‘aki ki ha me‘a, huanoa ha kei ngāue‘aki ka kuo keina ‘e he afi, pea kuo ‘ohua.

⁶Ko ia ko e folofola ‘eni ‘a ‘Ātonai Sihova: Hangē ko e ‘akau ko e vaine ‘oku huluni ‘i he ngaahi ‘akau ‘o e vao tātā, ‘a ia ‘oku te tuku ki he afi ke keina, ‘oku pehē ‘eku tuku ‘a e nofo Selusalema.

⁷Pea ‘oku ou ‘ai foki hoku mata kiate kinautolu: kuo nau ‘alu atu mei he afi, ka ‘e keina kinautolu ‘e he afi; pea te mou ‘ilo ko Sihova au, ‘oka u ka ‘ai hoku mata kiate kinautolu.

⁸Pea te u ngaohi ‘a e fonua ko e lala, koe‘uhi ko ‘enau ngāue kākā — ko ‘Ātonai Sihova ia mei he Ta‘ehāmai.