Read KO E TOH TAPU KATOA TONGA KO ‘ISIKELI 17 Bible Online

KO ‘ISIKELI 17 - KO E TOH TAPU KATOA TONGA bible

KO ‘ISIKELI 17

¹PEA hoko ‘a e folofola ‘a Sihova kiate au, ‘o pehē,

²Hako‘i-tangata, ‘atu ha tupu‘a, pea fokotu‘u ha lea fakatātā ki he fale ‘o ‘Isileli;

³pea te ke pehē, Ko e folofola ‘eni ‘a ‘Ātonai Sihova, Ko ha ‘īkale lahi, kapakau lalahi, mo fulufulu loloa, ‘a ia kuo tofu ‘i he fulufulu ‘ingo‘ingo, na‘e ha‘u ia ki Lepanoni, ‘o ne tosi‘i ‘a e huli ‘o e sita.

⁴Na‘a ne tu‘usi ‘a e lito taupotu ki ‘olunga, ‘o ne ‘ave ki he fonua ‘o mesianiti; na‘a ne tō ia ‘i ha kolo ‘o e kau fakatau.

⁵‘Io, na‘a ne to‘o ha me‘a mei he tenga ‘o e fonua, ‘o ne ‘ai ‘i ha vao tōkanga;[46] na‘a ne ‘ave ki he ve‘e vai lahi, ‘o ne tō ia hangē ko e tō ‘o e uilou.

⁶Pea na‘e tupu ia, ‘o hoko ko e vaine holoholofa kae pukupuku pē, koe‘uhi kae hanga hono ngaahi va‘a ki he manu ko ē, pea ‘alu hono ngaahi aka ki he lalo manu ko ē: ko ia na‘e hoko ko e vaine, ‘o ne fakava‘ava‘a, ‘o ne fu‘u to‘ulu.

⁷Ka na‘e ai mo e fu‘u ‘īkale ‘e taha, kapakau lalahi, pea fulufulua ‘aupito: pea uoke, ko e vaine ko ē na‘e peluki mai hono akaaka mei he kauutu ko ē na‘e tō ai ki he manu ko eni, ‘o ne tuku atu ki ai hono ngaahi va‘a ke ne fakaviviku ki ai.[47]

⁸Ka na‘e hunuki ia ‘i ha ngoue‘anga lelei, ofi ki he vai lahi, koe‘uhi ke ne fai va‘a, mo fakatupu fua, ‘o hoko ko e vaine fungani.

⁹Lea ‘e koe, ‘o pehē, Ko e folofola ‘eni ‘a ‘Ātonai Sihova: Te ne tu‘umālie koā? ‘ikai te ne ta‘aki hono ngaahi aka, mo hu‘i fuhi hono fua ke ne mae; kae mae hono ngaahi muka kātoa? pea neongo ‘e fai‘aki ‘a e nima mālohi mo ha kakai tokolahi, kae ‘ikai lava ke toe langa hake ia mei hono aka.

¹⁰Pea vakai, neongo kuo hunuki, ka te ne tu‘umālie? ‘ikai te ne mae ‘aupito ‘oka lave ki ai ‘a e matangi hahake? Te ne mae pē ‘i he kauutu na‘a ne tupu ai.

¹¹Pea hoko ‘a e folofola ‘a Sihova kiate au, ‘o pehē,

¹²Lea mu‘a ki he fāmili pau‘u na, ‘Oku ‘ikai ‘uhinga koā kiate kimoutolu ‘a e me‘a ko ia? Ke ke tala, Siini, na‘e ha‘u ‘a e Tu‘i Pāpilone ki Selusalema, na‘a ne puke hono tu‘i, mo hono hou‘eiki, ‘o ne ‘ave ki hono nofo‘anga ki Pāpilone.

¹³Pea ne to‘o ha taha mei he hako ‘o e tu‘i, ‘o ne fai kovinānite mo ia; ‘io, na‘a ne fakafuakava‘i ia, pea ko e kau mālohi ‘o e fonua na‘a ne ‘ave:

¹⁴koe‘uhi ke hoko ia ko e pule‘anga mā‘ulalo, ‘o ‘oua na‘a anga hiki ia, kae tauhi ‘e ia ‘ene kovinānite, kae tu‘u ma‘u ‘a e fonua.

¹⁵Ka ka angatu‘u ia ki ai, ‘ene tuku atu ha kau talafekau ki ‘Isipite, ke nau ‘omi hoosi kiate ia mo e kakai tokolahi, Te ne tu‘umālie koā? ‘e hao ‘a e toko taha kuo ne fai ‘a e me‘a ko ia? kuo ne maumau ‘a e fuakava, pea ‘oku totonu ke ne hao?

¹⁶Tangi ‘eku mo‘ui — ko ‘Ātonai Sihova ia mei he Ta‘ehāmai — ‘o kapau ‘e ‘ikai te ne mate ‘i he potu ‘o e tu‘i na‘a ne fakanofo ia, ‘a ia na‘a ne ta‘etoka‘i ‘eni fuakava ka ne maumau ‘ene kovinānite, ‘io, ‘i loto Pāpilone te ne mate ai.

¹⁷Pea ka nau ka tanu puke mo langa taua, ke tu‘usi ‘a e mo‘ui ‘a e tokolahi, tala‘ehai ko e tau mālohi, pe ko e kakai lahi, ‘e fai‘aki ‘e Felo ‘ene tapa ki ai.

¹⁸‘Io, kuo ne va‘inga‘aki ‘a e fuakava he‘ene maumau ‘a e kovinānite; ‘io, na‘a ne ‘atu hono nima, kae fai ‘a e fu‘u me‘a ko ē; ‘e ‘ikai hao ia.

¹⁹Ko ia ko e folofola ‘eni ‘a ‘Ātonai Sihova, Tangi ‘eku mo‘ui ‘o kapau ‘e ‘ikai te u ‘ai ke tō ki hono tumu‘aki ‘a ‘eku fakafuakava kuo ne va‘inga‘aki, mo ‘eku kovinānite kuo ne maumau‘i.

²⁰Pea te u fola hoku kupenga kiate ia, pea ‘e pō ia ‘e he‘eku hele, pea te u ‘ave ia ki Pāpilone, pea te u hopo mo ia ‘i he potu ko ia, koe‘uhi ko e kākā kuo ne fai kiate au.

²¹Pea ko e me‘a ki he kau hola ‘i he ngaahi vāhenga tau, te nau tō ‘i he heletā, pea ko kinautolu ‘oku toe ‘e fakamovetevete ki he matangi fua pē: pea te mou ‘ilo ko Sihova ia na‘e lea.

²²Ko e folofola ‘eni ‘a ‘Ātonai Sihova, Ko au foki te u to‘o ha me‘a mei he huli ‘o e sita mā‘olunga, pea te u tō ia; mei hono ngaahi ‘elito taupotu hake te u to‘o ha taha kei litolito, pea te u hunuki ia ‘e au ‘i ha funga mo‘unga mā‘olunga mo hopo hake.

²³‘I he mo‘unga taukakapa ‘o ‘Isileli te u hunuki ia, pea te ne fakava‘ava‘a atu, mo fai fua, pea te ne hoko ko e fu‘u sita lāngilangi‘ia, pea ‘e nofo ‘i hono malu ‘a e ngaahi manupuna fulufulu kehekehe; ‘io, ko e fu‘u malumalu ‘o hono ngaahi va‘a te nau nofo ai.

²⁴Kae ‘ilo ‘e he ‘akau fua pē ‘o e vao ko au Sihova kuo u fakamo‘ulaloa‘i ‘a e ‘akau mā‘olunga, kuo u fakamā‘olunga ‘a e ‘akau mā‘ulalo, kuo u fakamōmoa ‘a e ‘akau mata, pea kuo u fakamuka ‘a e ‘akau mōmoa: ko au Sihova kuo u lea pea kuo u fai.