Read KO E TOH TAPU KATOA TONGA KO ‘ISIKELI 18 Bible Online

KO ‘ISIKELI 18 - KO E TOH TAPU KATOA TONGA bible

KO ‘ISIKELI 18

¹PEA hoko ‘a e folofola ‘a Sihova kiate au, ‘o pehē,

²Sī, ko ho‘omou ha ‘oku fai, ho‘omou ngāue‘aki ‘a e paloveepi ko eni ‘i he kelekele ‘o ‘Isileli? Tokua Mātu‘a ‘oku kai kālepi mahi, Ka ko e nifo ‘o e fānau ‘oku maninia.

³Tangi ‘eku mo‘ui — ko ‘Ātonai Sihova ia mei he Ta‘ehāmai — ha‘amou toe ngāue‘aki ‘a e paloveepi ko ia ‘i ‘Isileli.

⁴Vakai, ‘oku, ‘o‘oku ‘a e laumālie fuli pe; ‘o‘oku tatau ‘a e laumālie ‘o e tamai mo e laumālie ‘o e foha: ko e laumālie ‘oku fai angahala ko ia ia ‘e mate.

⁵Ka ko e tangata ‘oku mā‘oni‘oni, pea ‘oku ne fai ‘a e fakalao mo e totonu;

⁶‘oku ‘ikai te ne kai ‘i he ngaahi funga. mo‘unga na, pe tāngaki hono mata ki he ngaahi ‘aitoli ‘o e fale ‘o ‘Isileli, pea kuo ‘ikai te ne ‘uli‘i ‘a e uaifi ‘o ha taha kehe, pea ‘oku ‘ikai te ne ‘unu‘unu ki hono uaifi ‘o‘ona lolotonga ‘ene fakakelekele:

⁷pea ‘oku ‘ikai te ne fakaehaua ha taha; ‘oku ne fakafoki ‘a e talifaki mo‘ua; ‘oku ‘ikai te ne momo‘i fa‘ao ha me‘a; ‘oku ne ‘ange ‘ene me‘akai ki he fiekaia, pea ‘oku ne fakakofu ‘a e telefua;

⁸kuo ‘ikai te ne tali ha nō ke totongi hulu, pea ‘oku ‘ikai te ne ‘eke toloi; ‘oku ne ta‘ofi hono nima mei he kovi; ‘oku ne fai ‘a e fakamaau totonu ‘i he vaha‘a ‘o e tangata mo e tangata;

⁹‘oku ne fou ‘i he‘eku ngaahi tu‘utu‘uni, pea ‘oku ne tauhi ‘eku ngaahi kupu‘i konisitūtone he fai mo‘oni; ko e mā‘oni‘oni ia, te ne mo‘ui pē — ko ‘Ātonai Sihova ia mei he Ta‘ehāmai.

¹⁰Ka ‘o kapau ‘oku ne ma‘u ha foha anga mālohi, ha taha ‘oku lingi toto, ‘io, ‘oku ne fai ha taha pē[48] ‘o e ngaahi me‘a ko ia

¹¹(Ka ko e tangata‘eiki na‘e ‘atā ‘aupito mei he ngaahi me‘a ko ia), ka ‘o kapau foki kuo ne kai ‘i he ngaahi mo‘unga na, mo ‘uli‘i ‘a e uaifi ‘o ha taha kehe;

¹²‘oku ne fakaehaua ‘a e tu‘utāmaki mo e masiva; ‘oku ne fa‘ao me‘a; ‘oku ‘ikai te ne fakafoki ‘a e talifaki, pea ‘oku ne tāngaki hono mata ki he ngaahi ‘aitoli; ‘oku ne fai me‘a fakalielia;

¹³‘oku ne tali nō ke totongi hulu, pea ‘oku ne ‘eke toloi: pea ‘oku totonu ke ne mo‘ui koā? ‘E ‘ikai te ne mo‘ui: kuo ne fai ‘a e ngaahi fakalielia ko ē, kuo pau ke tāmate‘i ia: ‘e ‘i hono tumu‘aki hono toto ‘o‘ona.

¹⁴Kae vakai ‘oku ma‘u ha foha ‘e he tangata ko ē, ‘a ia ‘oku ne sio ki he ngaahi fu‘u angahala ‘oku fai ‘e he‘ene tamai; ‘io, ‘oku ne sio, ki ai, ka ‘oku ‘ikai te ne fai hangē ko ia:

¹⁵‘oku ‘ikai te ne kai ‘i he ngaahi funga mo‘unga na, pea ‘oku ‘ikai te ne tāngaki hake hono mata ki he ngaahi ‘aitoli ‘o e fale ‘o ‘Isileli;

¹⁶‘oku ‘ikai te ne ‘uli‘i ‘a e uaifi ‘o ha taha kehe, pea ‘oku ‘ikai te ne fakaehaua ha taha; ‘oku ‘ikai te ne ta‘ofi ‘a e talifaki, ‘oku ‘ikai te ne fa‘ao ha me‘a; ‘oku ne ‘ange ‘ene me‘akai ki he fiekaia, pea ‘oku ne fakakofu ‘a e telefua;

¹⁷‘oku ne ta‘ofi hono nima mei si‘i tu‘utāmaki;[49] ‘oku ‘ikai te ne ‘eke ‘a e hulu mo e toloi; ‘oku ne fai ‘eku ngaahi kupu‘i konisitūtone, ‘oku ne fou ‘i he‘eku ngaahi tu‘utu‘uni: ko e toko taha ko ia ‘e ‘ikai te ne mate koe‘uhi ko e kovi ‘a ‘ene tamai: ‘e mo‘ui pē ia.

¹⁸Ko ‘ene tamai, ko e me‘a ‘i he‘ene fai fakamālohi, ‘ene fa‘ao me‘a mei hono kāinga,[50] mo fai me‘a ‘oku ‘ikai lelei ‘i he lotolotonga ‘o hono kakai, vakai, ‘e mate ia koe‘uhi ko ‘ene kovi.

¹⁹Pea ‘oku mou pehē koā, Ko e hā ‘oku ‘ikai ke kau ai ‘a e foha ke fua ‘a e kovi ‘a ‘ene tamai? Ka ko e foha kuo ne fai ‘a e fakalao mo e totonu, kuo ne tauhi ‘eku ngaahi tu‘utu‘uni mo fai ki ai, ‘e mo‘ui pē ia.

²⁰Ko e laumālie ‘oku angahala ko ia ia ‘e mate; ‘e ‘ikai kau ‘a e foha ‘i he fua ‘a e kovi ‘a ‘ene tamai, pea ‘e ‘ikai kau ‘a e tamai ‘i he fua ‘a e kovi ‘a hono foha: ko e mā‘oni‘oni ‘a si‘i mā‘oni‘oni ‘e hoko kiate ia, pea ko e pau‘u ‘a e pau‘u ‘e hoko kiate ia.

²¹‘Oka tafoki ‘a e angakovi mei he angakovi kehekehe kuo ne feia, ‘o ne tauhi ‘eku ngaahi tu‘utu‘uni, ‘o ne fai ki he lao mo e totonu, ‘e mo‘ui pē ‘a e toko taha ko ia, ‘o ‘ikai mate.

²²Ko e ngaahi angahala kehekehe kuo ne fai, ‘e ‘ikai lau kiate ia: te ne mo‘ui koe‘uhi ko e totonu kuo ne fai.

²³He ‘oku ou momo‘i manako ki he pekia ‘a e angahala? — ko ‘Ātonai Sihova ia mei he Ta‘ehāmai — kaekehe ke ne tafoki mei hono ngaahi ‘alunga, ‘o mo‘ui.

²⁴Ka ‘o kapau ‘e foki ‘a e mā‘oni‘oni mei he‘ene faitotonu, ‘o ne fai kovi, ‘o ne feia ‘a e ngaahi fakalielia kuo fai ‘e he angahala na, pea te ne mo‘ui? Ko e me‘a totonu kuo ne fai ‘e ‘ikai ha lau ki ai; ko e kākā kuo ne fai, mo e angahala kuo ne angahala ‘aki ko e ngaahi me‘a ko ia te ne mate ai.

²⁵Ka ‘oku mou pehē, ‘Oku ‘ikai fakafuofua ‘a e ‘alunga ‘o ‘Ātonai. ‘A e fale ‘o ‘Isileli, mou fanongo mu‘a, ko ho‘oku ia ‘alunga koā ‘oku ‘ikai ke fakafuofua? ‘ikai ko ho‘omoutolu pē ‘alunga ‘oku ‘ikai ke fakafuofua?

²⁶Ka foki ‘a e mā‘oni‘oni mei he‘ene mā‘oni‘oni, ‘o ne faikovi, ‘o mate ai; koe‘uhi pē ko e kovi ‘oku ne fai ‘a ia ‘oku ne mate ai.

²⁷Pea ‘oka tafoki ‘a e angakovi mei he angakovi kuo ne feia, ‘o ne fai ki he lao mo e totonu, ‘e fakamo‘ui hono laumālie ‘e he toko taha ko ia.

²⁸Kapau te ne sio ki he ngaahi fu‘u angahala kuo ne fai, ‘o ne tafoki mei ai, te ne mo‘ui pē, ‘e ‘ikai te ne mate.

²⁹Ka ‘oku lau ‘e he fale ‘o ‘Isileli, tokua ‘oku ‘ikai fakafuofua ‘a e ‘alunga ‘o ‘Ātonai. ‘Io, ko ia! ‘oku ‘ikai fakafuofua hoku ngaahi ‘alunga, fale ‘o ‘Isileli ē! Na‘a ko ho‘omoutolu ngaahi ‘alunga ‘a ia ‘oku ‘ikai totonu?

³⁰Ko ia, ‘e fale ‘o ‘Isileli, te u fakamaau kimoutolu ‘o fakatatau ki homou ‘alunga takitaha — ko ‘Ātonai Sihova ia mei he Ta‘ehāmai. Mou tafoki, ‘o liliu mei ho‘omou ngaahi fu‘u angahala na, ke ‘oua na‘a hoko ia ko e tūkia‘anga ke mou kovi ai.

³¹Li‘aki atu ‘a e ngaahi angahala kuo mou hia ai, ‘o ngaohi mo‘omoutolu ha loto fo‘ou mo ha laumālie fo‘ou: he koe‘uma‘ā ho‘omou mate, si‘i fale ‘o ‘Isileli?

³²He tala‘ehai ‘oku ou hōhō‘ia ‘i he pekia ‘a e pekia — ko ‘Ātonai Sihova ia mei he Ta‘ehāmai — ko ia mou tafoki ka mou mo‘ui.