Read KO E TOH TAPU KATOA TONGA KO ‘ISIKELI 20 Bible Online

KO ‘ISIKELI 20 - KO E TOH TAPU KATOA TONGA bible

KO ‘ISIKELI 20

¹PEA ‘i hono fitu ta‘u, mo hono nima ‘o e māhina, mo hono ‘aho hongofulu ‘o e māhina, ‘iloange na‘e omi ha ni‘ihi ‘o e mātu‘a ‘Isileli ke huhū kia Sihova: pea na‘a nau nofo ‘i hoku ‘ao.

²Pea hoko ‘a e folofola ‘a Sihova kiate au, ‘o pehē,

³Hako‘i-tangata, lea ki he mātu‘a ‘Isileli, tala kiate kinautolu, Ko e folofola ‘eni ‘a ‘Ātonai Sihova: Kuo mou omi koā ke huhū kiate au? Tangi ‘eku mo‘ui ha‘aku tuku ke mou huhū kiate au — ko ‘Ātonai Sihova ia mei he Ta‘ehāmai.

⁴Te ke fakamaau kinautolu, ‘inē? te ke fai ‘a e fakamaau, Hako‘i-tangata, ‘o? Faka‘ilo kiate kinautolu ‘a e ngaahi fakalielia ‘a ‘enau ngaahi kui.

⁵‘Io, ke ke pehē kiate kinautolu, Ko e folofola ‘eni ‘a ‘Ātonai Sihova; Ko e taimi na‘a ku fili ai ‘a ‘Isileli, ‘io na‘a ku hiki hoku nima ma‘a e hako ‘o e fale ‘o Sēkope, ‘o u faka‘ilo au kiate kinautolu ‘i he fonua ko ‘Isipite, ‘io, na‘a ku hiki hoku nima kiate kinautolu, ‘o u pehē, Ko Sihova au ko homou ‘Otua.

⁶‘I he ‘aho ko ia na‘a ku hiki hoku nima ma‘anautolu, ke ‘omi kinautolu mei ‘Isipite ki ha fonua kuo u mataki‘i ma‘anautolu, ‘oku mahutafea ‘i he hu‘akau mo e honi, ko e mata ia ‘o e ngaahi fonua kotoa.

⁷Pea na‘a ku pehē, kiate kinautolu, Mou takitaha li‘aki ‘a e ngaahi me‘a mousa‘a ‘oku ne hanga ki ai, pea ‘oua te mou ‘uli‘i kimoutolu ‘aki ‘a e ngaahi ‘aitoli ‘o ‘Isipite: ko Sihova au ko homou ‘Otua.

⁸Ka na‘a nau angatu‘u kiate au, pea na‘e ‘ikai te nau fie fanongo kiate au; na‘e ‘ikai hanau taha ‘e fie si‘aki ‘a e ngaahi me‘a mousa‘a na‘a ne hanga ki ai, pea na‘e ‘ikai te nau li‘aki ‘a e ngaahi ‘aitoli ‘o ‘Isipite: pea u fakakaukau ke lilingi ‘eku kakaha kiate kinautolu, ‘o ‘osiki ‘eku ‘ita kiate kinautolu ‘i he loto fonua ‘o ‘Isipite.

⁹Ka ko e me‘a na‘a ku fai, na‘a ku fai telia hoku hingoa, ke ‘oua na‘a pua‘a ia ‘i he ‘ao ‘o e ngaahi pule‘anga, ‘a ia na‘a nau nofo ‘i honau lotolotonga, ‘a ia foki na‘a nau mamata ‘i he‘eku faka‘ilo au kiate kinautolu, ke ‘omi kinautolu mei ‘Isipite.

¹⁰Ko ia na‘a ku fakahū kinautolu ki tu‘a mei ‘Isipite, pea na‘a ku ‘omi kinautolu ki he Toafa.

¹¹Pea na‘a ku ‘ange kiate kinautolu ‘eku ngaahi tu‘utu‘uni, pea na‘a ku faka‘ilo kiate kinautolu ‘eku ngaahi kupu‘i konisitūtone, ‘a ia ka fai ‘e ha tangata, te ne mo‘ui ai.

¹²Pea na‘a ku ‘ange ‘eku ngaahi Sāpate foki, ke hoko ko e faka‘ilonga ‘i hoku vaha‘a mo kinautolu; ke nau ‘ilo ko au Sihova ‘oku ou fai honau fakatāpui.

¹³Ka na‘e angatu‘u kiate au ‘a e fale ‘o ‘Isileli ‘i he Toafa: na‘e ‘ikai te nau fou ‘i he‘eku ngaahi tu‘utu‘uni, pea na‘a nau fakatale‘i ‘eku ngaahi kupu‘i konisitūtone, ‘a ia ka fai ‘e ha tangata, te ne mo‘ui ai; pea ko ‘eku ngaahi Sāpate na‘a nau mātu‘aki maumau‘i. Pea u fakakaukau ke lilingi ‘eku kakaha kiate kinautolu ‘i he Toafa, ke nau ‘osi ai.

¹⁴Ka na‘a ku fai ‘a e me‘a na‘a ku fai telia hoku hingoa, ke ‘oua na‘a pua‘a ia ‘i he ‘ao ‘o e ngaahi pule‘anga, ‘a ia na‘a nau sio ki he‘eku fakahū mai kinautolu.

¹⁵Ka na‘a mo au ka ‘oku hiki tā hoku nima kiate kinautolu ‘i he Toafa, ke ‘oua na‘a ku ‘omi kinautolu ki he fonua kuo u foaki, ‘a ia ‘oku mahutafea ‘i he hu‘akau mo e honi, ko e mata ia ‘o e ngaahi fonua kotoa;

¹⁶koe‘uhi ko ‘enau fakatale‘i ‘eku ngaahi kupu‘i konisitūtone, mo e ‘ikai te nau fou ‘i he‘eku ngaahi tu‘utu‘uni, mo ‘enau maumau ‘eku ngaahi Sāpate: he na‘e muimui honau loto ki honau ngaahi ‘aitoli.

¹⁷Ka na‘a ku mata mamae kiate kinautolu, ‘o ‘ikai te u faka‘auha kinautolu; ‘io, na‘e ‘ikai te u ‘ai ke nau ‘osi ‘i he Toafa.

¹⁸Pea u lea ki he‘enau fānau ‘i he Toafa, ‘Oua te mou fou ‘i he ngaahi tu‘utu‘uni ‘a ho‘omou ngaahi kui, pea ‘oua te mou tauhi ‘enau ngaahi kupu‘i konisitūtone, pea ‘oua te mou ‘uli‘i kimoutolu ‘aki honau ngaahi ‘aitoli.

¹⁹Ko Sihova au ko homou ‘Otua; mou fou ‘i he ngaahi tu‘utu‘uni ‘a‘aku, pea tauhi ‘eku ngaahi kupu‘i konisitūtone ‘a‘aku, ‘o fai ki ai.

²⁰Pea ‘ai ke tapu ‘eku ngaahi Sāpate, ke nau hoko ko e faka‘ilonga ‘i hoku vaha‘a mo kimoutolu, ke mou ‘ilo ko Sihova au ko homou ‘Otua.

²¹Ka ka angatu‘u ‘a e fānau kiate au; ko ‘eku ngaahi tu‘utu‘uni na‘e ‘ikai te nau fou ai, pea ko ‘eku ngaahi kupu‘i konisitūtone na‘e ‘ikai te nau tauhi, mo fai ki ai; ‘osi, ko e me‘a ia ka fai ‘e ha tangata, te ne mo‘ui ai; na‘a nau maumau‘i ‘a e tapu ‘o ‘eku ngaahi Sāpate. Pea u fakakaukau ke lilingi ‘eku kakaha kiate kinautolu, ‘o ‘osiki ‘eku ‘ita kiate kinautolu ‘i he Toafa.

²²Ka na‘a ku fakafoki pē hoku nima, pea na‘a ku fai ‘a e me‘a na‘a ku fai telia hoku hingoa, ke ‘oua na‘a pua‘a ia ‘i he ‘ao ‘o e ngaahi pule‘anga, ‘a ia na‘a nau sio ki ai ‘i he‘eku fakahū mai kinautolu.

²³Na‘a ku hiki tā foki hoku nima kiate kinautolu ‘i he Toafa, ke veteki kinautolu ‘i he ngaahi pule‘anga, mo tūtuu‘i kinautolu ‘i he ngaahi fonua;

²⁴koe‘uhi na‘e ‘ikai te nau fai ki he‘eku ngaahi kupu‘i konisitūtone, mo nau fakatale‘i ‘eku ngaahi tu‘utu‘uni, mo nau maumau‘i ‘a e tapu ‘o ‘eku ngaahi Sāpate, pea muimui honau mata ki he ‘aitoli ‘a ‘enau mātu‘a.

²⁵Pea na‘a mo au na‘a ku ‘atu kiate kinautolu ‘a e ngaahi tu‘utu‘uni na‘e ‘ikai lelei, mo e ngaahi kupu‘i konisitūtone ‘e ‘ikai te nau mo‘ui ai;

²⁶pea na‘a ku ‘ai ke nau ‘uli ‘i he‘enau ngaahi me‘a foaki, ‘i he fakatāpui ‘o e ‘olopo‘ou,[53] koe‘uhi ke u ‘ai ke nau fu‘u ofo, kae iku ki he‘enau ‘ilo ko Sihova au.

²⁷Ko ia ke ke lea ki he fale ‘o ‘Isileli, si‘i Hako‘i-tangata, pea ke pehē kiate kinautolu, Ko e folofola ‘eni ‘a ‘Ātonai Sihova, Na‘e mōia atu ‘a ho‘omou ngaahi kui, ‘enau ta‘etoka‘i au, ko ‘enau fai kākā kiate au.

²⁸Hili ‘eku ‘omi kinautolu ki he fonua, ‘a ia kuo u hiki hoku nima ke foaki kiate kinautolu, na‘a nau toki kumi ‘a e ngaahi mā‘olunga na‘e hopo hake, mo e ngaahi ‘akau lau fakatafu‘ufu‘u, pea nau fai ai ‘enau ngaahi feilaulau, pea nau ‘atu ai ‘enau ngaahi kōpano fakatupu houhau, ‘o nau ‘ai ai ‘enau ngangatu fakahōifua, pea nau lilingi ai ‘enau ngaahi feilaulau kava.

²⁹Pea u pehē kiate kinautolu, ‘Oku hā ‘a e pama (sia)[54] ‘oku mou ‘alu ki ai? Tā ne‘ine‘i ui ‘o a‘u ki he ‘aho ni ko Pama (‘Alu ki he hā?).

³⁰Ko ia, ke ke lea ki he fale ‘o ‘Isileli, Ko e folofola ‘eni ‘a ‘Ātonai Sihova: ‘Oku mou ‘uli‘i kimoutolu koā ‘i he anga ‘o e fai ‘a ho‘omou ngaahi kui, ‘o mou tango ange ki he ngaahi me‘a mousa‘a ‘anautolu?

³¹‘o mou ‘uli‘i kimoutolu ‘aki ho‘omou ngaahi ‘aitoli kehekehe ‘o a‘u ki he ‘aho ni, he hapai hake ho‘omou ngaahi me‘a‘ofa, mo fakalaka ho‘omou fānau ‘i he afi? pea te u tuku koā ke mou huhū kiate au, ‘a e fale ‘o ‘Isileli? Tangi ‘eku mo‘ui — ko ‘Ātonai Sihova ia mei he Ta‘ehāmai — ha‘aku tali ho‘omou huhū kiate au!

³²Pea ko e me‘a ‘oku ake ‘i homou laumālie, mole ke mama‘o ‘ene hoko — ‘a ho‘omou lau, Te tau hangē ko e ngaahi pule‘anga ko ē, ngaahi fonua, ‘o tauhi ‘a e ‘akau mo e maka.

³³Tangi ‘eku mo‘ui — ko ‘Ātonai Sihova ia mei he Ta‘ehāmai — ka te u pule kiate kimoutolu ‘aki ha nima mālohi, mo e nima kuo hiki tā, mo e kakaha kuo malingi:

³⁴pea te u fakahū kitu‘a kimoutolu mei he ngaahi kakai, pea te u tānaki kimoutolu mei he ngaahi fonua kuo veteki kimoutolu ki ai, ‘aki ha nima mālohi, mo e nima kuo hiki tā, mo e kakaha kuo malingi.

³⁵Pea te u ‘omi kimoutolu ki he toafa ko e ngaahi kakai, pea te u hopo mo kimoutolu ‘i ai, ‘o femātaaki.

³⁶Hangē ko ‘emau hopo mo ho‘omou ngaahi kui ‘i he toafa ‘o e fonua ko ‘Isipite, ‘e pehē ‘eku hopo mo kimoutolu — ko ‘Ātonai Sihova ia mei he Ta‘ehāmai.

³⁷Pea te u fakalaka atu kimoutolu ‘i he lalo tokotoko, pea te u ‘omi kimoutolu ki he no‘o ‘a e kovinānite;

³⁸pea te u fakama‘a meiate kimoutolu ‘a e kau angatu‘u, mo e fa‘ahinga ‘oku talangata‘a kiate au; pea te u fakahū kitu‘a kinautolu mei he fonua ‘oku nau ‘āunofo ai, kae ‘ikai te nau hū ki he kelekele ‘o ‘Isileli; pea te mou ‘ilo ko Sihova au.

³⁹Pe‘i ‘alu kimoutolu, fale ‘o ‘Isileli — ko e folofola ia ‘a ‘Ātonai Sihova — ‘o takitaha tauhi ‘ene ‘aitoli; ka ‘amui, tala atu, te mou fakaongo kiate au, ‘o ‘ikai te mou toe talakaa‘i hoku hingoa tāpuhā ‘aki ho‘omou ngaahi me‘a‘ofa, pea ‘aki ho‘omou ngaahi ‘aitoli.

⁴⁰He ‘i hoku mo‘unga tapu,[55] ‘i he mo‘unga taukakapa ‘o ‘Isileli — ko ‘Ātonai Sihova ia mei he Ta‘ehāmai — ko e potu ko ia ‘e tauhi kiate au ‘e he fu‘u fale ‘o ‘Isileli, hono kotoa, ‘i he fonua: ko e potu ko ia te u tali ai kinautolu, pea ko e potu ko ia te u tala ke mou ‘omi feilaulau-hapai ai, mo e polopolo ‘o homou ngaahi ‘inasi ‘i he me‘a kehekehe ‘oku mou tapui.

⁴¹Te u tali kimoutolu hangē ha ngangatu fakahōifua, ‘oka u ka ‘omi kimoutolu mei he ngaahi kakai, mo tānaki kimoutolu mei he ngaahi fonua, ‘a ia kuo veteki kimoutolu ki ai: pea te u hā tāpuhā ‘iate kimoutolu ‘i he ‘ao ‘o e ngaahi pule‘anga.

⁴²Pea te mou ‘ilo ko Sihova au, ‘oka u ka ‘omi kimoutolu ki he kelekele ‘o ‘Isileli, ki he fonua na‘a ku hiki ai hoku nima te u ‘atu ki ho‘omou ngaahi kui.

⁴³Pea te mou manatu ai ki homou ngaahi ‘alunga, pea mo ho‘omou ngaahi fai anga kehekehe, ‘a ia kuo mou ‘uli‘i ai kimoutolu: pea fe‘ao mo kimoutolu ho‘omou fakalielia, koe‘uhi ko e ngaahi kovi kehekehe kuo mou fai.

⁴⁴Pea te mou ‘ilo ko Sihova au, ‘oka u ka fai kiate kimoutolu ‘a e me‘a te u fai telia pē hoku hingoa, tala‘ehai ko e tuha ia ‘o homou ngaahi ‘alunga kovi, si‘i fale ‘o ‘Isileli, pe ko e tuha ‘o ho‘omou fai anga pango — ko ‘Ātonai Sihova ia mei he Ta‘ehāmai.

⁴⁵Pea hoko ‘a e folofola ‘a Sihova kiate au, ‘o pehē,

⁴⁶Hako‘i-tangata, ‘ai ho mata ke hanga ki he tonga, pea ke mokulu ha lea ki he saute, ‘io, ke ke palofisai ki he vao tātā ‘o e Tonga;

⁴⁷pea ke lea ki he vao ‘o e Tonga ‘e pehē, Fanongo ki he tala ‘a Sihova; Ko e folofola ‘eni ‘a ‘Ātonai Sihova: Ko au ‘eni te u tutu ha afi ‘iate koe, ‘a ia te ne keina ‘a e ngaahi ‘akau mata kotoa, mo e ‘akau kotoa ‘oku mōmoa: ‘e ‘ikai tāmate‘i hono ulo kakaha, pea ‘e velehia ai ‘a e mata kotoa mei he tonga ki he tokelau.

⁴⁸Pea ‘e vakai ‘e he kakano kotoa ko au Sihova kuo u tafu ia: ‘e ‘ikai tāmate‘i ia.

⁴⁹Pea u pehē, ‘Oiauē ‘Ātonai Sihova! ‘oku lau ‘a e fa‘ahinga ni kiate au, Hono ‘ikai ko e tangata lea fakatātā pē ia?