Read KO E TOH TAPU KATOA TONGA KO ‘ISIKELI 23 Bible Online

KO ‘ISIKELI 23 - KO E TOH TAPU KATOA TONGA bible

KO ‘ISIKELI 23

¹PEA na‘e hoko ‘a e folofola ‘a Sihova kiate au, ‘o pehē,

²Hako‘i-tangata, na‘e ‘i ai ha ongo fafine na‘e fa‘ē taha.

³Pea na‘a na fai fe‘auaki ‘i ‘Isipite; na‘a na fai fe‘auaki ‘i he‘ena finemui: ko e potu ko ia na‘e fakavili ai hona huhu, ‘io, ko e potu ko ia na‘e ngaohia ai ‘a e mata‘i huhu ‘o ‘ena tāupo‘ou.

⁴Pea ko hona hingoa ko ‘Ōhola ‘a e lahi, pea ko hono tokoua ko ‘Oholipa.[66] Pea na‘e faifai pea ‘o‘oku kinaua, pea na‘a na fā‘ele‘i ha fānau tangata mo e fānau fefine. Pea ko e me‘a ki hona hingoa, ko ‘Ōhola ko Samēlia ia, pea ko ‘Oholipa ko Selusalema.

⁵Pea fai fe‘auaki ‘a ‘Ōhola ‘i hoku funga; pea na‘a ne holi ki hono kau ‘ofa‘anga, ‘io, ki ‘Āsilia ko si‘enau tu‘u ofi mai.

⁶Si‘enau kofu lanu langi, ko e hou‘eiki kōvana mo e kau pule, ko e kau mānumanumelie kotoa pē, ko e kau heka hoosi kuo heka ki he‘enau hoosi.

⁷Pea ne foaki ia kiate kinautolu ke fe‘auaki, ki he mānumanumelie ‘o e kau ‘Āsilia, honau kotoa: ‘io, mo ia fuli pē na‘a ne holi ki ai, na‘a ne ‘uli‘i ia ‘aki ‘enau ngaahi ‘aitoli kotoa.

⁸Pea na‘e ‘ikai te ne tuku ‘ene fe‘auaki na‘e kamata ‘i ‘Isipite; he kuo nau mohe mo ia ‘i he‘ene finemui, pea ko kinautolu na‘e ngaohi ‘a e mata‘i huhu ‘o ‘ene tāupo‘ou: pea kuo nau hua‘i ‘enau fe‘auaki kiate ia.

⁹Ko ia kuo u tuku ia ki he nima ‘o hono kau ‘ofa‘anga, ki he nima ‘o e kau ‘Āsilia ‘a ia na‘a ne holi ki ai.

¹⁰Na‘e tatala ‘e he fa‘ahinga ko ia hono telefua: na‘a nau ‘ave ‘ene kau tama mo ‘ene kau ta‘ahine, pea ko e finemotu‘a na‘a nau tāmate‘i ‘aki ‘a e heletā: pea ne hoko ko e taungalea ki he kau fefine; he kuo nau fakaai hono tautea.

¹¹Pea sio ki ai ‘e hono tokoua ko ‘Oholipa, ‘o ne hulu ‘i he toko taha ko ē he‘ene fai fakalielia ‘ene holi, pea ko ‘ene fe‘auaki na‘e hulu ‘i he fe‘auaki ‘a hono tokoua.

¹²Na‘a ne holi ki he kau ‘Āsilia, ko e hou‘eiki kōvana mo e kau pule, si‘enau tu‘u ofi mai, si‘enau kofu fungani, ko e kau heka hoosi ‘oku heka ki he‘enau hoosi, ko e kau mānumanumelie honau kotoa.

¹³Pea u vakai kuo ne ‘uli‘i ia; kuo na ‘alunga taha fakatou‘osi.

¹⁴Pea ne mōia atu ‘ene fai fe‘auaki; he na‘a ne mamata ki ha kau tangata kuo vali‘i pe ‘aofi, ko e fakatātā ‘o e kau Kalitia kuo vali kulokula —

¹⁵si‘i ngaahi no‘o ‘i honau kongaloto, si‘i ngaahi ao pulepule ‘i honau ‘ulu, ngali ko e kau laulōtaha honau kotoa, tatau mo e ha‘a Pāpilone, ‘a ia ko Kalitia, ko e fonua na‘a nau tutupu ai.

¹⁶Pea ne holi kiate kinautolu ‘i he sio ki ai hono mata, ‘o ne tuku atu ha kau talafekau ki ai, ki Kalitia.

¹⁷Toki ha‘u ki ai ‘a e ha‘a Pāpilone ki he mohenga ‘ofa‘anga, ‘o nau ‘uli‘i ia ‘aki ‘enau fai fe‘auaki; pea hili hono ‘uli‘i ‘iate kinautolu, na‘a ne fakatalatala meiate kinautolu ‘ene tokanga.

¹⁸Pea ‘i he‘ene fakae‘a ‘ene fe‘auaki, mo fakae‘a hono telefua, na‘e toki fakatalatala ‘eku tokanga meiate ia, ‘o hangē ko e fakatalatala ‘eku tokanga mei hono tokoua.

¹⁹Pea ne mōia atu ‘ene fai fe‘auaki, ‘i he‘ene manatu ki he taimi ‘o ‘ene finemui, ‘a ia na‘a ne fai pa‘umutu ai ‘i he fonua ‘o ‘Isipite.

²⁰Pea na‘a ne holi ki honau kau tangata muitau, ‘a ia ‘oku hangē ko e ‘asi ‘a kita ni, pea ko ‘enau fai ko e fai ‘a ha hoosi.

²¹‘Io, na‘a ke kumi ki he mousa‘a ho‘o finemui, ‘a ia na‘e ngaohia ai ‘e he kau ‘Isipite ho mata‘i huhu, koe‘uhi ko e huhu ‘o ho‘o tāupo‘ou.

²²Ko ia, ‘e ‘Oholipa — ko e folofola ‘eni ‘a ‘Ātonai Sihova — Ko au ‘eni ‘oku ou langa‘i ho kau ‘ofa‘anga, ‘a ia kuo fakatalatala mei ai ho‘o tokanga, ke nau ngaohi koe; pea ‘oku ou ‘omi kinautolu kiate koe mei he potu kotoa pē;

²³ko e ha‘a Pāpilone mo e kau Kalitia kotoa, ‘a Pēkoti mo Soa mo Koa;[67] omi mo ha‘a ‘Āsilia kotoa, ko e kau mānumanumelie, ko e hou‘eiki kōvana mo e kau pule, honau kotoa, ko e kau laulōtaha, mo e kau fakafofonga, ‘oku nau heka hoosi kotoa pē.

²⁴Pea te nau ha‘u kiate koe[68] mo e toki, mo e sāliote, mo e me‘a teka, pea mo e fu‘ufu‘unga kakai; te nau ‘ākilotoa koe ‘aki ‘a e fakaū, mo e pā, mo e tatā tau: pea te u tuku kiate kinautolu ‘a e fakamaau, pea te nau fakamaau koe ‘o taau mo ‘enau lao.

²⁵Pea te u tuku atu ‘eku fua‘a kiate koe, pea te nau fai kakaha kiate koe; te nau hu‘i ho ihu mo ho telinga; pea ko ho toenga ‘e tō ‘i he heletā: ‘e ‘ave ‘e he fa‘ahinga ko ia ho‘o fānau tangata mo fānau fefine, pea ko ho toenga ‘e keina ‘e he afi.

²⁶Pea te nau to‘o ho kofu meiate koe, pea te nau ‘ave ‘a e nāunau na‘a ke teu ‘aki.

²⁷Pea te u ‘ai ke ‘osi ho‘o fai fakamousa‘a, mo ho‘o fai fe‘auaki na‘e kamata ‘i ‘Isipite: ko ia, ‘e ‘ikai te ke tāngaki hake ho mata kiate kinautolu, pea ‘e ‘ikai te ke manatua ‘a ‘Isipite.

²⁸He ko e folofola ‘eni ‘a ‘Ātonai Sihova: Ko au ‘eni ‘oku ou tuku koe ki he nima ‘o e kakai ‘oku ke fehi‘a ki ai, ki he nima ‘o e kakai kuo fakatalatala mei ai ho‘o tokanga:

²⁹pea te nau fai kiate koe mo e fehi‘a, pea te nau ‘ave ‘a e me‘a kotoa kuo ke ma‘u ‘i ho‘o ngāue, pea te nau tuku li‘aki koe ‘oku ke telefua mo molemole: pea ‘e fakae‘a ‘a e fakalielia ‘o ho‘o fe‘auaki, mo ho anga mousa‘a, mo ho‘o fai pa‘umutu.

³⁰‘E fai ‘eni kiate koe, koe‘uhi ko ho‘o tuli ki he ngaahi pule‘anga, ke fe‘auaki mo kinautolu, koe‘uhi kuo ke ‘uli‘i koe ‘aki ‘enau ngaahi ‘aitoli.

³¹Ko e ‘alunga ‘o ho tokoua kuo ke fou ai; ko ia ‘oku ou ‘atu ki ho nima ‘a e ipu na‘a ne inu ai ‘e ia.

³²Ko e folofola ‘eni ‘a ‘Ātonai Sihova: Te ke inu ‘i he ipu ‘a ho tokoua, ‘a e ipu takulokulo mo laulahi; ‘e hoko ia ko e me‘a ke luma‘aki mo taukae‘i, ko e lahi ‘o e me‘a ‘oku ne fakataetae.

³³‘E fakafonu koe ‘aki ‘a e kona mo e fakamamahi, ko e ipu ‘a ho tokoua ko Samēlia, ko e ipu fakaka‘anga mo fakalala.

³⁴Pea te ke inumia ia, ‘o mihi ke maha; pea te ke ngau ‘a e ngaahi mafoa‘i ipu, pea te ke hae ‘aki ho ongo huhu: he ko au ia kuo u lea — ko ‘Ātonai Sihova ia mei he Ta‘ehāmai.

³⁵Ko ia, ko e folofola ‘eni ‘a ‘Ātonai Sihova: Ko e me‘a ‘i ho‘o fakangalo‘i au, mo ke sī au ki ho tu‘a, ko ia ko koe foki te ke fua ho mousa‘a mo ho‘o fai pa‘umutu.

³⁶Na‘e folofola foki ‘a Sihova kiate au, ‘o pehē, Hako‘i-tangata, ke ke fakamaau ‘a ‘Ōhola mo ‘Oholipa, ‘inē? pe‘i fakahā kiate kinaua ‘ena ngaahi fakalielia.

³⁷He kuo na afe mei he‘ena alafianga, pea ‘oku toto‘ia hona nima, pea kuo na fe‘auaki mo ‘ena ngaahi ‘aitoli; pea ko e fānau na‘a na fā‘ele‘i kiate au kuo na fakalaka atu kiate kinautolu ke keina.

³⁸Mo eni foki kuo nau fai kiate au; na‘a nau ‘uli‘i hoku potu tapu ‘i he ‘aho pē ko ia, pea nau maumau ‘a e tapu ‘o ‘eku ngaahi Sāpate.

³⁹‘Io, na‘a nau tāmate‘i ‘enau fānau ma‘a ‘enau ngaahi ‘aitoli, ka nau ha‘u leva ‘i he ‘aho ko ia ki hoku potu tapu ko e ngaohi ia ko e me‘a noa: ‘io, tala atu, kuo nau fai pehē ‘i hoku loto fale!

⁴⁰Kae‘uma‘ā, ‘a e me‘a tēpū ni, na‘e ‘alu ‘ena fekau ki he kau tangata ‘oku omi mei he mama‘o; ‘io, na‘e tuku atu ha talafekau ki ai, pea ‘iloange na‘a nau omi; pea ke fai ai ho‘o kaukau, koe‘uhi ko kinautolu;

⁴¹na‘a ke polo ho mata, pea ke ‘ai ho teunga; pea ke nofo ki ha sofa lāngilangi‘ia, pea teu ha tēpile ‘i he ‘ao ‘o e sofa, pea ke hilifaki ki ai ‘a e ‘inisēnisi ‘a‘aku, mo e lolo ‘a‘aku.

⁴²Pea ko e ongoonga‘a ‘o e uōuōtu‘u na‘e nonga ai;[69] pea na‘e fakalahi ‘aki ‘a e kau tangata lāuvale, ha kau Sapa[70] mei he toafa, ‘a ia na‘a nau ‘ai vesa ‘i honau nima, mo e kalauni lāngilangi ‘i honau ‘ulu.

⁴³Pea u fakakaukau ki he fefine kuo ‘osi hono ivi ki he tango, ko e taimi ni ‘e pa‘umutu ‘a hono pa‘umutu‘anga ‘iate ia; pea te nau ‘alu kiate ia ‘o hangē ko e ‘alu ki ha fefine pa‘umutu:[71]

⁴⁴pea na‘e pehē ‘enau ‘alu kia ‘Ōhola mo ‘Oholipa, kuo na fefine pa‘umutu.

⁴⁵Pea ko ha tu‘unga me‘a faitotonu ko kinautolu ia te nau fakamaau kinaua, ‘o fai ki he tautea ‘o e fefine maumau alafianga, mo e tautea ‘o e fefine lingi toto; he ko e ongo fefine maumau alafianga kinaua, pea ‘oku toto‘ia hona nima.

⁴⁶He ko e folofola ‘eni ‘a ‘Ātonai Sihova: Te u ‘omi ha fakataha ke fai mo kinaua, pea ‘e tukuange kinaua ke tekatali ‘aki, pea ke vetea.

⁴⁷Pea ‘e tolomaka‘i kinaua ‘e he fakataha, pea te nau havehave kinaua ‘aki ‘enau heletā; te nau tāmate‘i ‘ena fānau tangata mo fānau fefine, pea te nau tutu hona ngaahi fale ‘aki ‘a e afi.

⁴⁸Ko ia, te u fakangata ‘a e mousa‘a mei he fonua, ke valokia ai ‘a e fefine kotoa pē, ‘o ‘oua te nau fa‘ifa‘itaki ki ho‘omo mousa‘a na.

⁴⁹Pea te nau tuku ho‘omo mousa‘a ke tō kiate kimoua, pea te mo fua ‘a e ngaahi hia ‘a ho‘omo ngaahi ‘aitoli: pea te mo ‘ilo ko ‘Ātonai Sihova au.