Read KO E TOH TAPU KATOA TONGA KO ‘ISIKELI 28 Bible Online

KO ‘ISIKELI 28 - KO E TOH TAPU KATOA TONGA bible

KO ‘ISIKELI 28

¹PEA na‘e hoko ‘a e folofola ‘a Sihova kiate au, ‘o pehē,

²Hako‘i-tangata, ke ke lea ki he ‘eiki ‘o Taia, ‘o pehē, Ko e folofola ‘eni ‘a ‘Ātonai Sihova: Ko e me‘a ‘i he mahiki ho loto, ‘o ke pehē, “Ko ha ‘otua au; ‘oku ou nofo ‘i ha nofo‘anga faka‘otua ‘i loto tahi;” ‘osi, ko e tangata koe ‘o ‘ikai ko e ‘otua; ka ‘oku ke ‘ai pē ho loto ke hangē ko e finangalo ‘o e ‘Otua —

³tokua ‘oku ke poto hake ‘ia Tāniela;[88] ‘oku ‘ikai ha me‘a fufū ‘oku ke ta‘etāea.

⁴‘I he fai‘aki ho poto, mo ho‘o fakakaukau, kuo ma‘u ho nima, pea kuo ke fokotu‘utu‘u ‘a e siliva mo e koula ‘i ho ngaahi fale koloa.

⁵‘I ho‘o fai fakapotopoto lahi ‘i he fai ‘o ho‘o fakatau, kuo ke fakalahi ho ivi, pea ‘oku mahiki ho loto koe‘uhi ko ho ivi.

⁶Ko ia, ko e folofola ‘eni ‘a ‘Ātonai Sihova: Ko e me‘a ‘i ho‘o tuku ho loto, tokua ‘oku tatau mo e finangalo ‘o e ‘Otua;

⁷ko ia, ko au ‘eni ‘oku ou ‘omi kiate koe ha kau muli, ko e fa‘ahinga fakamālohi ‘i he ngaahi pule‘anga: pea te nau unuhi ‘enau heletā ki he faka‘ofo‘ofa kuo fakatupu ‘e ho poto, pea te nau fakapalakuu‘i ho lāngilangi.

⁸Te nau ‘ohifo koe ki he luo; pea te ke mate ‘i he fu‘u mate‘anga ‘o e kakai kuo tāmate‘i ‘i he loto moana.

⁹Te ke momo‘i lau, Ko e ‘otua au, ‘i ho‘o ‘i he ‘ao ‘o ia ‘oku fakapoongi koe? ‘osi ko e tangata koe, ‘o ‘ikai ko e ‘otua, ‘i he nima ‘o ia ‘oku tāmate‘i koe.

¹⁰Te ke mate ‘i he mate‘anga ‘o e ta‘ekamu ‘i he nima ‘o ha kau muli: he ko au ia kuo u tala — ko ‘Ātonai Sihova ia mei he Ta‘ehāmai.

¹¹Pea hoko ‘a e folofola ‘a Sihova kiate au, ‘o pehē,

¹²Hako‘i-tangata, ofa‘aki ha tangilāulau ki he Tu‘i Taia, pea ke pehē ki ai: Ko e folofola ‘eni ‘a ‘Ātonai Sihova: Ko koe ko e sila ‘o e kakato na; ko e fonu ‘i he poto, mo e fungani ‘i he faka‘ofo‘ofa.

¹³Ko ‘Īteni tofu pē na‘a ke ‘i ai, ko ha ngouetapu ‘a e ‘Otua: ‘ilonga ha makakoloa na‘e ‘ufi‘ufi ‘aki koe — ko e sātio, ko e tōpasi, mo e pelili, ko e kalisolaite, ko e maka ‘onike, mo e siasipa, ko e sāfaia, ko e kapukeli, mo e ‘emalata, mo e koula. Na‘e ‘iate koe hao ngaahi nafa, mo hao kau fefine ke fekau;[89] ‘i he ‘aho na‘e ngaohi koe kuo ‘osi teu kinautolu.

¹⁴Ko ha selupimi pani ‘oku fakamalumalu;[90] pea na‘a ku ngaohi koe ke pehē: ko ha mo‘unga tapu faka‘otua na‘a ke ‘i ai; na‘a ke hā‘ele ‘i he lotolotonga ‘o e ngaahi maka maama.

¹⁵Na‘a ke taka haohaoa pē mei he ‘aho na‘e ngaohi ai koe, ‘o a‘u ki he taimi na‘e ‘ilo ai ‘a e kovi ‘iate koe.

¹⁶Ko e me‘a ‘i he lahi ‘o ho‘o fai fakatau na‘a ke fonu loto ‘i he fakamālohi, pea na‘a ke fai angahala: ko ia te u to‘o ho‘o tapu, ‘o hifo mei he mo‘unga faka‘otua; pea te u ‘omi koe mei he lotolotonga ‘o e ngaahi maka maama, si‘i selupimi fakamalumalu, ‘o u maumau‘i koe.

¹⁷Kuo mahiki ho loto koe‘uhi ko ho‘o faka‘ofo‘ofa; na‘a ke fakalusa ho poto ‘i he funga ‘o ho lāngilangi: ‘oku ou lī hifo koe ki he kelekele, kuo u tuku koe ‘i he ‘ao ‘o e ngaahi tu‘i, ke nau vakai koe.

¹⁸Ko e me‘a ‘i he lahi ho‘o kovi, ‘i he fai ta‘etotonu ho‘o fakatau, kuo ke maumau ai ‘a e tapu ‘o ho ngaahi potu tapu: ko ia kuo u ngaohi ha afi ke ‘alu atu mei ho lotolotonga; ko ia ia te ne keina koe, pea te u liliu koe ko e efuefu ‘i he kelekele; ‘o mamata tonu ki ai ‘a e kakai kotoa ‘oku vakai koe.

¹⁹Ko kinautolu fuli pē ‘i he ngaahi kakai ‘oku ‘ilo koe te nau mo‘u tāfu‘ua ‘i he me‘a kuo hoko atu: na‘a ke hoko ko e me‘a fakatupu ilifia, pea te ke ‘ikai ‘o ta‘engata.

²⁰Pea hoko ‘a e folofola ‘a Sihova kiate au, ‘o pehē,

²¹Hako‘i-tangata, ‘Ai ho mata ki Saitoni, pea fai ha palofisai ki ai,

²²pea ke pehē, Ko e folofola ‘eni ‘a ‘Ātonai Sihova: Ko au ‘eni te u fai mo koe, Saitoni; pea te u lāngilangi‘ia ‘i ho loto kolo: pea te nau ‘ilo ko Sihova au, ‘oka u ka fai ai ha ngaahi tautea, ‘o u hā tāpuhā ‘i ai.

²³Pea te u tuku atu ki ai ‘a e mahaki faka‘auha mo e tāmate ‘i hono ngaahi hala; pea ‘e tō ‘i loto kolo ‘a e kakai kuo mate ‘i he heletā, ‘a ia ‘oku hoko kiate ia mei he ngaahi potu takatakai; pea te nau ‘ilo ko Sihova au.

²⁴Pea ‘e ‘ikai toe ma‘u ‘e he fale ‘o ‘Isileli ha ‘akau vali kona, pe ha talatala huhu mamahi, ‘i he kakai ‘o e tukui feitu‘u takatakai, ‘a ia ‘oku nau fakasīkaka‘i kinautolu; pea te nau ‘ilo ko ‘Ātonai Sihova au.

²⁵Ko e folofola ‘eni ‘a ‘Ātonai Sihova: Ka u ka tānaki ‘a e fale ‘o ‘Isileli mei he ngaahi kakai ‘oku nau nofo movete ki ai, ‘o u hā tāpuhā ‘iate kinautolu ‘i he ‘ao ‘o e ngaahi pule‘anga, te nau toki nofo ‘i honau kelekele, ‘a ia na‘a ku foaki ki he‘eku tamaio‘eiki ko Sēkope.

²⁶Pea te nau nofo nonga ai, pea te nau langa fale, mo tō ngoue vaine, ‘io te nau nofo nonga; ‘oka u ka fai ‘a e ngaahi tautea ki he kakai ‘oku fakasīkaka‘i kinautolu ‘i he ngaahi fa‘ahinga ‘oku nofo takatakai; pea te nau ‘ilo ko Sihova au ko honau ‘Otua.