Read KO E TOH TAPU KATOA TONGA KO ‘ISIKELI 32 Bible Online

KO ‘ISIKELI 32 - KO E TOH TAPU KATOA TONGA bible

KO ‘ISIKELI 32

¹PEA ‘i hono ta‘u hongofulu mā ua, mo hono māhina hongofulu mā ua, mo e ‘uluaki ‘aho ‘o e māhina, ‘iloange na‘e hoko ‘a e folofola ‘a Sihova kiate au, ‘o pehē,

²Hako‘i-tangata, ke ke ofa‘aki ha tangilāulau mo‘o Felo Tu‘i ‘Isipite, pea ke pehē ange, Na‘e fakatatau koe ki he manu hau ‘o e ngaahi pule‘anga: ka ko ho tuha totonu ko e tanini ‘i he ngaahi tahi: pea ‘oku ke fakapā hake ‘i ho ongo pupuhi,[103] pea ‘oku ke eke‘i ‘a e ngaahi vai ‘aki ho kauva‘e na, pea ‘oku ke hā‘elea[104] hono ngaahi manga.

³Ko e folofola ‘eni ‘a ‘Ātonai Sihova: Ko ia, te u fola hoku kupenga kiate koe, ‘i he kautaha ‘a e ngaahi kakai lahi; pea te nau tāva‘e koe ‘aki hoku kupenga.

⁴Pea te u li‘aki noa koe ki he fonua, te u laku ki he funga tuku‘uta, pea te u ‘ai ke nofo kiate koe ‘a e manupuna kehekehe ‘o e ‘atā, pea ke fakamākona kinautolu ‘iate koe ‘e he manu kehekehe ‘o e fonua kotoa.

⁵Pea te u ‘ai ho kakano ki he ngaahi mo‘unga, pea te u fakafonu ‘a e ngaahi tele‘a ‘aki ho toto.[105]

⁶Pea te u fakaviviku ‘a e kelekele ‘aki ho huhu‘a, ‘a e me‘a ‘oku tafe mei ho toto, ‘o a‘u ki he ngaahi mo‘unga; pea ‘e fonu ‘iate koe ‘a e ngaahi talalo.

⁷Pea ka u ka tāmate‘i ho‘o maama, te u ‘ufi‘ufi ‘a e langi, pea te u fakapo‘uli hono fetu‘u; ko e la‘ā, te u ‘ufi‘ufi ia ‘aki ha ‘ao; pea ko e māhina, ‘e ‘ikai te ne tuku atu ‘ene maama.

⁸Ko e ngaahi maama ngingila ‘o e langi te u ‘ai ke fakapo‘uli, koe‘uhi ko koe, ‘io, ‘oku ou tuku atu ‘a e po‘uli ki ho fonua — ko ‘Ātonai Sihova ia mei he Ta‘ehāmai.

⁹Pea te u fakahoha‘a ‘a e loto ‘o e ngaahi kakai lahi, ka u ka ‘omi ho maumau ki he ngaahi pule‘anga, ‘a ia ‘oku nau nofo ki he ngaahi fonua ‘oku ‘ikai te ke ‘ilo ki ai.

¹⁰‘Io, te u ngaohi ‘a e ngaahi kakai lahi ke ofo ‘iate koe, pea ko honau ngaahi tu‘i ‘e fu‘u līfusia ‘iate koe, ‘oka u ka tākalo ‘eku heletā ‘i honau mata; pea te nau tete he mōmeniti kotoa pē takitaha telia ‘ene mo‘ui, ‘i he ‘aho ‘o ho‘o hinga.

¹¹He ko e folofola ‘eni ‘a ‘Ātonai Sihova: Ko e heletā ‘a e Tu‘i Pāpilone ‘e hoko kiate koe.

¹²Te u ‘ai ke tō ho uōuōtu‘u ‘i he ngaahi heletā ‘a e kau helo; ko e kau fakamālohi ‘o e ngaahi pule‘anga honau kotoa: pea te nau maumau ‘a e me‘a ‘oku pōlepole ai ‘a ‘Isipite, pea ‘e faka‘auha kotoa hono uōuōtu‘u.

¹³Pea te u faka‘auha hono monumanu kotoa, ‘o ‘ikai ha‘anau kei ‘alu ki hono vai lahi; pea ‘ikai toe eke‘i ia ‘e he va‘e ‘o e tangata, pea ‘e ‘ikai toe eke‘i ia ‘e he pesipesi ‘o e manu.

¹⁴Te u toki ‘ai ke toka hono vai, pea te u ‘ai ke tafe hono ngaahi manga hangē ko e lolo — ko ‘Ātonai Sihova ia mei he Ta‘ehāmai.

¹⁵‘Oka u ka ngaohi ‘a e fonua ko ‘Isipite ko e lala, pea ‘oku mole mei he fonua hono mahu, koe‘uhi ko ‘eku taa‘i ‘a e kau nofo ai, te nau toki ‘ilo ko Sihova au.

¹⁶Ko e tangilāulau ‘eni, pea te nau fai mo e petetangi; ‘io, ‘e fai ia mo e petetangi ‘e he fānau fefine ‘o e ngaahi pule‘anga: te nau fai ia ko e tangilāulau ‘a ‘Isipite mo hono uōuōtu‘u kotoa — ko ‘Ātonai Sihova ia mei he Ta‘ehāmai.

¹⁷Pea ‘i hono hongofulu mā ua ta‘u, mo hono hongofulu mā nima ‘aho ‘o e māhina,[106] ‘iloange na‘e hoko ‘a e folofola ‘a Sihova kiate au, ‘o pehē,

¹⁸Hako‘i-tangata, fai ha tangilāulau ‘o e uōuōtu‘u ‘o ‘Isipite, pea ‘ohifo ia ki Lolofonua; ‘a ia mo e fānau fefine ‘o e ngaahi pule‘anga ongoongoa, ke nau fakataha mo e kakai ‘oku ‘alu hifo ki he luo.

¹⁹‘Oku ke hulu ‘ia hai ‘i he toulekeleka?

²⁰‘Alu hifo, ‘o tokoto mo e kau ta‘ekamu na. Te nau tō ‘i he lotolotonga ‘o e kakai kuo mate ‘i he heletā: kuo tuku atu ‘a e heletā ki hē; toho pē ia mo hono uōuōtu‘u kotoa.

²¹Ko e kau mafi ‘o e kau helo ‘i loto Hētesi, mo hono kau tokoni, ‘oku nau talanoa ki ai, ‘o pehē, Kuo nau ‘alu hifo, ‘Oku nau tokoto hena, ‘A e kau ta‘ekamu Kuo tāmate‘i ‘aki ‘a e heletā.[107]

²²‘Oku ‘i hena ‘a ‘Āsilia mo hono kaungā kau: Ko honau ngaahi fa‘itoka ‘oku takatakai kiate ia: Ko e kau tāmatea kotoa pē, Ko e kau tō ‘i he heletā:

²³‘A ia kuo tuku honau ngaahi fa‘itoka ki he tuliki ‘o e luo, Pea ko hono kaungā kau ‘oku takatakai ki hono fonualoto; Ko e kau tāmatea honau kotoa, Ko e kau tō ‘i he heletā, ‘A e fa‘ahinga na‘a nau fakatupu ilifia ‘i he fonua ‘o e mo‘ui.

²⁴‘Oku ‘i hena ‘a ‘Īlami, Pea ko hono uōuōtu‘u kotoa ‘oku takatakai ki hono fonualoto: Ko e kau tāmatea honau kotoa, Ko e kau tō ‘i he heletā, ‘A ia kuo nau hifo ta‘ekamu ki Lolofonua, ‘A e fa‘ahinga na‘e tuku atu honau ngeia ki he fonua ‘o e mo‘ui; Pea kuo nau ‘alu mo kinautolu ‘enau mā, Fakataha mo ha‘a hifo ki he luo.

²⁵Kuo nau tuku mo‘ona ha mohenga ‘I he lotolotonga ‘o e kau tāmatea, Fakataha mo hono uōuōtu‘u kotoa: Ko hono ngaahi fonualoto ‘oku takatakai ki ai, Ko e kau ta‘ekamu honau kotoa, Ko e kau mate ‘i he heletā. He na‘e tuku atu honau ngeia ‘i he fonua ‘o e mo‘ui, Pea ‘oku ‘alu mo kinautolu ‘enau mā, Fakataha mo e ha‘a hifo ki he luo; ‘Oku toka ia ‘i he lotolotonga ‘o e kau tāmatea.

²⁶‘Oku ‘i hena ‘a Mēseke mo Tūpale, Mo hona uōuōtu‘u kotoa: Ko hona ngaahi fa‘itoka ‘oku takatakai ki ai: Ko e kau ta‘ekamu honau kotoa, Ko e fa‘ahinga na‘e tāmate‘i ‘aki ‘a e heletā; He na‘a nau tuku atu honau ngeia ‘i he fonua ‘o e mo‘ui.

²⁷Kae ‘ikai te nau tokoto mo e kau helo ‘I he fa‘ahinga ta‘ekamu[108] kuo tō? ‘A ia na‘a nau hifo mo kinautolu ki Hētesi ‘enau mahafu tau, Pea kuo nau ‘olunga ‘aki ‘enau heletā, Ko ia kuo hoko ‘enau kovi ki honau ‘anga‘anga:[109] He ko e manavahē‘anga kinautolu ‘o e kau helo ‘I he fonua ‘o e mo‘ui.

²⁸Ko koe foki ‘e laiki ‘i he lotolotonga ‘o e kau ta‘ekamu, Pea te ke tokoto mo e kakai kuo tāmate‘i ‘e he heletā.

²⁹Kuo ‘i hena ‘a ‘Ītomi, ‘A hono ngaahi tu‘i mo hono hou‘eiki kotoa, ‘A ia neongo ‘enau to‘a, Ka ‘oku fakataha kinautolu mo e kau mate ‘i he heletā: ‘Oku nau fetākoto‘i mo e kau ta‘ekamu, Mo e ha‘a hifo ki he luo.

³⁰Kuo ‘i hena ‘a e kau pule ‘o e tokelau, Honau kotoa, Mo e kau Saitoni, Kuo ‘alu hifo ki he kau tāmatea; Neongo ko e manavahē‘ia koe‘uhi ko ‘enau to‘a, Ka ‘oku nau laea ‘eni, Pea ‘oku nau tokoto ko e ta‘ekamu, Fakataha mo e kau mate ‘i he heletā, Pea ‘oku nau fua ‘enau mā, Fakataha mo ha‘a hifo ki he luo.

³¹‘E sio kiate kinautolu ‘a Felo, Pea te ne ma‘u ai ha nonga, Koe‘uhi ko hono fu‘u uōuōtu‘u ‘o‘ona: Ko e kau mate ‘i he heletā, ‘A Felo mo ‘ene fu‘u tau — Ko ‘Ātonai Sihova ia mei he Ta‘ehāmai.

³²He na‘a ku ngaohi ia ke ne fakatupu ilifia ‘i he fonua ‘o e mo‘ui: Ko ia, ‘e fakatokoto ia ‘i he lotolotonga ‘o e kau ta‘ekamu, Fakataha mo e kau mate ‘i he heletā: ‘Io, ‘a Felo mo hono uōuōtu‘u kotoa — Ko ‘Ātonai Sihova ia mei he Ta‘ehāmai.