Read KO E TOH TAPU KATOA TONGA KO ‘ISIKELI 33 Bible Online

KO ‘ISIKELI 33 - KO E TOH TAPU KATOA TONGA bible

KO ‘ISIKELI 33

¹PEA hoko ‘a e folofola ‘a Sihova kiate au, ‘o pehē,

²Hako‘i-tangata, lea ki he hako ‘a ho kakai, mo ke pehē kiate kinautolu, Ka u ka ‘omi ‘a e heletā ki ha fonua, pea to‘o ‘e he kakai ‘o e fonua ha taha meiate kinautolu, ‘o fokotu‘u ma‘anau tama le‘o:

³pea ka vakai ia ko e heletā ‘ena ‘oku ha‘u ki he fonua, ‘o ne ifi ‘a e talupite ke valoki ‘a e kakai;

⁴pea ka mātu‘aki fanongo ‘e ha taha ki he le‘o ‘o e talupite, ‘o ‘ikai mavalokia ai, pea ha‘u ‘a e heletā ‘o ‘ave ia, ko hono toto ‘oku ‘i hono ‘ulu ‘o‘ona.

⁵Na‘a ne ongo‘i ‘a e le‘o ‘o e talupite, ka na‘e ‘ikai mavalokia ai; ‘e ‘iate ia pē ‘a hono toto: he ka ne tokanga ki he valoki, kuo ne fakahaofi ‘ene mo‘ui.

⁶Ka ‘o kapau ‘oku vakai ‘e he taulama ko e heletā ‘ena ‘oku ha‘u, ‘o ‘ikai te ne ifi ‘a e talupite, pea ‘ikai valokia ‘a e kakai, pea ha‘u ‘a e heletā ‘o ‘ave ‘a e mo‘ui ‘a honau taha; ‘oku mole ‘a e toko taha ko ia ko ‘ene kovi, ka ko hono toto te u ‘eke ki he nima ‘o e tama le‘o.

⁷Pea ko koe, Hako‘i-tangata, kuo u tuku koe ko e taulama ki he fale ‘o ‘Isileli; pea te ke ma‘u mei hoku ngutu ‘a e lea, pea te ke valoki kinautolu meiate au.

⁸Kapau te u lea ki he angahala, Angahala, te ke mātu‘aki mate; pea ‘oku ‘ikai te ke lea ke valoki ‘a e angahala ke sese‘e mei hono ‘alunga; ‘e mate ‘a e angahala ko ia ‘i he‘ene kovi, ka ko hono toto te u ‘eke ki ho‘ou nima.

⁹Ka ‘o kapau ‘oku ke valoki ‘e koe ‘a e angahala, ke sese‘e mei hono ‘alunga, ke tafoki mei ai, ka ‘oku ‘ikai te ne tafoki mei hono ‘alunga; ‘e mate ‘a e toko taha ko ia ‘i he‘ene kovi, ka kuo ke hamusi ‘e koe ho laumālie.

¹⁰Siini, Hako‘i-tangata, lea ki he fale ‘o ‘Isileli, ‘o pehē, Ko e anga ‘eni ‘o ho‘omou lea, Tū ‘oku taupunga‘i kitautolu ‘e he‘etau ngaahi talangata‘a mo ‘etau ngaahi angahala, pea ‘oku tau faka‘au ki mui ai: pea te tau mo‘ui fēfē?

¹¹Ke ke lea kiate kinautolu, Ko ‘Ātonai Sihova ‘eni mei he Ta‘ehāmai, Tangi ‘eku mo‘ui ha‘aku fiefia ‘i he pekia ‘a e angahala; ka ‘i he tafoki ‘a e angahala mei hono ‘alunga ke ne mo‘ui. Tafoki, tafoki mei homou ngaahi ‘alunga kovi; he koe‘uma‘ā ho‘omou mate, si‘i fale ‘o ‘Isileli?

¹²Siini, Hako‘i-tangata, ke ke lea ki he hako ‘a ho kakai, ‘o pehē, Ko e faitotonu ‘a e mā‘oni‘oni ‘e ‘ikai fakahaofi ia ‘i he ‘aho ‘oku ne fai hala ai; pea ko e faikovi ‘a e angahala ‘e ‘ikai te ne hinga ai ‘i he ‘aho kuo ne tafoki ai mei he‘ene angahala: pea neongo ko ha faitotonu, ka ‘e ‘ikai te ne lava ke mo‘ui ai he ‘aho ‘o ‘ene fai angahala.

¹³Kapau te u tala ki ha mā‘oni‘oni te ne mātu‘aki mo‘ui; ka ka falala ia ki he‘ene mā‘oni‘oni ko ē, ‘o ne fai kovi, ‘e ‘ikai ha lau ki he‘ene fu‘u mā‘oni‘oni ko ē: ka ko e me‘a ‘i he kovi kuo ne fai te ne mate ai.

¹⁴Pea ka u ka tala ki he angahala, Te ke mātu‘aki mate; ka ‘oka ne ka tafoki mei he‘ene angahala ko ē, ‘o ne fai ki he lao mo e totonu;

¹⁵‘o pehē, ‘oku fakafoki ‘e he angahala ha talifaki mo‘ua, ‘oku ne fakaai ‘a e me‘a na‘e kaiha‘asi, ‘oku ne fou ‘i he ngaahi tu‘utu‘uni ‘a ia ko e koto mo‘ui, ‘o ‘oua te ne fai ha kovi; ‘e mātu‘aki mo‘ui, ‘e ‘ikai mate.

¹⁶‘E ‘ikai lau kiate ia ha taha ‘o e ngaahi angahala kuo ne fai; kuo ne fai ki he lao mo e totonu, te ne mo‘ui pē.

¹⁷Ka ‘oku lau ‘e he hako ‘a ho kakai, Tokua ‘oku ‘ikai fakafuofua ‘a e ‘alunga ‘o ‘Ātonai: ka ko kinautolu pē ia — ko honau ‘alunga pē ‘oku ‘ikai fakafuofua.

¹⁸Kapau ‘e tafoki ‘a e mā‘oni‘oni mei he‘ene faitotonu, ‘o ne faikovi, te ne mate ai.

¹⁹Ka ‘oka tafoki ‘a e angahala mei he‘ene angahala, ‘o ne fai ‘a e me‘a ‘oku fakalao mo totonu te ne mo‘ui ‘i he ngaahi me‘a ko ia.

²⁰Pea ‘oku mou lau koā, ‘Oku ‘ikai ke fakafuofua ‘a e ‘alunga ‘o ‘Ātonai? ‘E fale ‘o ‘Isileli, te u fakamaau kimoutolu takitaha ‘o taau mo hono ‘alunga.

²¹Pea ‘i hono hongofulu mā ua ta‘u ‘o ‘emau nofo pōpula, ‘i hono hongofulu māhina mo hono ‘aho nima, ‘iloange na‘e a‘u mai kiate au ha taha kuo hola mei Selusalema, ‘o ne pehē, Kuo taa‘i ‘a e kolo.

²²Ka kuo ‘iate au ‘a e nima ‘o Sihova efiafi, te‘eki a‘u mai ‘a e tama hola; pea kuo ne fakamafa‘a hoku ngutu, ‘o fai ai pē ki he‘ene a‘u kiate au pongipongi; ‘io, na‘e mafa‘a hoku ngutu, ‘o ‘ikai te u toe noa.

²³Pea hoko kiate au ‘a e folofola ‘a Sihova, ‘o pehē,

²⁴Hako‘i-tangata, ko e kau nofo ‘i he ngaahi potu maumau ko ē ‘i he kelekele ‘o ‘Isileli, ‘oku nau lau, ‘o pehē, Ko e toko taha pē ‘a ‘Epalahame, ka na‘a ne ma‘u ‘a e fonua mōno tofi‘a; ka ko e tokolahi kitautolu; kuo tuku mai ‘a e fonua mo‘otau tofi‘a.

²⁵Ko ia ke ke lea kiate kinautolu, Ko e folofola ‘eni ‘a ‘Ātonai Sihova: ‘Oku mou kai mo e toto, pea ‘oku mou tāngaki hake homou mata ki homou ngaahi ‘aitoli, pea ‘oku mou lilingi toto: pea te mou ma‘u koā ‘a e fonua?

²⁶‘Oku mou fuataki ‘aki ho‘omou heletā, ‘oku mou fai me‘a fakalielia, pea ‘oku ‘uli‘i ‘e ē ‘a e uaifi ‘o ē: te mou tofi‘a ‘aki ‘a e fonua?

²⁷Ke ke lea pehē kiate kinautolu, Ko e folofola ‘eni ‘a ‘Ātonai Sihova: Tangi ‘eku mo‘ui, ‘ilonga ‘a e nofo ‘i he ngaahi potu maumau, te nau tō ‘i he heletā, pea ‘ilonga ‘a e nofo ‘i he tuku‘uta, te u tuku ki he fanga manu ke nau keina, pea ‘ilonga kinautolu ‘oku ‘i he ngaahi talitau‘anga mo e ngaahi ‘ana, te nau mate ‘i he mahaki faka‘auha.

²⁸Pea te u ngaohi ‘a e fonua ko e maumau ‘o e maumau, pea ‘e fakangata hono ivi na‘a ne pōlepole ai: pea ‘e lala ‘a e ngaahi mo‘unga ‘o ‘Isileli, ‘o ‘ikai ha taha ‘e laka ai.

²⁹Pea te nau ‘ilo ko Sihova au, ‘oka u ka ngaohi ‘a e fonua ko e maumau ‘o e maumau, koe‘uhi ko e ngaahi me‘a fakalielia kuo nau fai.

³⁰Pea ko e me‘a kiate koe, Hako‘i-tangata, ‘oku talanoa kiate koe ‘e he hako ‘a ho kakai ‘i he ngaahi ve‘e ‘ā, pea ‘i he ngaahi matafale; ‘io, ‘oku talanoa ‘a e taha mo e taha, ‘a e tangata ko ē mo ē, ‘o pehē, Ta ō mu‘a, ‘o fanongo pe ‘oku fēfē ‘a e folofola ‘oku tō mai meia Sihova.

³¹Pea te nau omi kiate koe, hangē ko e omi ‘a ha kakai, pea te nau nofo ‘i ho ‘ao tokua ko hoku kakai, pea te nau fanongo ki ho‘o ngaahi lea, kae ‘ikai te nau fai ki ai; ngata pē ha me‘a ‘oku melie ki honau ngutu, te nau fai ia: ‘oku muimui honau loto ki he ma‘u koloa.

³²Seuke, ‘oku ke hā kiate kinautolu ko e taha hiva mālie, le‘o haohaoa, pea tā lelei: pea te nau fanongo ki ho‘o ngaahi lea, ka ko e fai ki ai ‘oku ‘ikai.

³³Ka ‘oka hoko ia — tala atu ‘oku ha‘u — te nau toki ‘ilo na‘e ai ha palōfita na‘e hoko kiate kinautolu.