Read KO E TOH TAPU KATOA TONGA KO ‘ISIKELI 34 Bible Online

KO ‘ISIKELI 34 - KO E TOH TAPU KATOA TONGA bible

KO ‘ISIKELI 34

¹PEA hoko ‘a e folofola ‘a Sihova kiate au, ‘o pehē,

²Hako‘i-tangata, fai ha palofisai ki he kau tauhi ‘o ‘Isileli, palofisai mo ke lea kiate kinautolu, ‘io, ki he kau tauhi sipi, ‘o pehē, Ko e folofola ‘eni ‘a ‘Ātonai Sihova: ‘Oiauē ‘a e kau tauhi[110] ‘o ‘Isileli, ‘a ia ‘oku nau fafanga kinautolu pē!

³‘Ikai ko e taau ‘o e tauhi sipi ke nau fafanga ‘a e tākanga? Ko e ngako ‘oku mou kai, pea ko e fulufulu ‘oku mou kofu ‘aki, ko e manu sino ‘oku mou tāmate‘i; ka ko e fanga sipi ‘oku ‘ikai te mou fafanga.

⁴Tala‘ehai ‘oku mou ‘ai ke mālohi ‘a e vaivai, pea tala‘ehai ‘oku mou faito‘o ‘a ia ‘oku mahaki, pea tala‘ehai ‘oku mou ha‘iha‘i ha lavea, pea tala‘ehai ‘oku mou fakafoki ‘a ia ne sese‘e, pea tala‘ehai ‘oku mou kumi ha taha kuo mole; pea ko ho‘omou pule‘i kinautolu ‘oku fai mo e fefeka mo e laiki noa.

⁵Ko ia na‘a nau movete ai, koe‘uhi na‘e ‘ikai fai honau tauhi: ‘o nau hoko ai ko e me‘akai ki he fanga manu kehekehe ‘o e vao, ‘o nau movetevete pē.

⁶‘Oku hē noa si‘eku fanga sipi ‘i he ngaahi mo‘unga kehekehe, pea ‘i he ngaahi funga potu mā‘olunga: ‘io, kuo veteki ‘eku fanga sipi ‘i he funga kotoa ‘o e fonua; pea ‘oku ‘ikai ha taha ‘oku fehu‘i pe ‘oku nau ‘i fē, pea ‘oku ‘ikai ha taha ‘oku kumi ki ai.

⁷Ko ia, mou fanongo ki he folofola ‘a Sihova, ‘a e kau tauhi na;

⁸Tangi ‘eku mo‘ui — ko ‘Ātonai Sihova ia mei he Ta‘ehāmai — ko e me‘a ‘i he hoko ‘eku tākanga ko e me‘a ke vetea, ‘io, kuo hoko ‘eku fanga sipi ko e me‘akai ‘a e manu kehekehe ‘o e vao, ko e ‘ikai ha taha ‘oku fai honau tauhi, pea ‘oku ‘ikai ‘eke ki he‘eku fanga sipi ‘e he kau tauhi ‘a‘aku, pea kuo fafanga kinautolu pē ‘e he kau tauhi, ka ‘oku ‘ikai te nau fafanga ‘eku tākanga —

⁹ko ia, fanongo ki he folofola ‘a Sihova, ‘a e kau tauhi na.

¹⁰Ko e folofola ‘eni ‘a ‘Ātonai Sihova; Ko au ‘eni te u fai mo e kau tauhi; pea te u ‘eke ‘eku fanga sipi mei honau nima, pea te u hifo kinautolu mei he tauhi ‘o e tākanga; ke ‘oua na‘a toe fafanga ‘e he kau tauhi ‘a kinautolu ‘e kinautolu; ‘io, te u fakahaofi ‘eku fanga sipi mei honau ngutu, ke ‘oua te nau toe me‘akai ‘aki.

¹¹Tala atu, ko eni ‘a e folofola ‘a ‘Ātonai Sihova: Ko au ‘eni te u ‘eke ‘e au ‘eku fanga sipi, pea te u tokanga‘i kinautolu ‘e au.

¹²Hangē ko e tokanga ‘a e tauhi ki he‘ene tākanga ‘i he ‘aho ‘oku ne hoko ai ki he lotolotonga ‘o ‘ene fanga sipi kuo movete, ‘e pehē ‘eku tokanga‘i ‘eku fanga sipi; pea te u fakahaofi kinautolu mei he ngaahi potu kehekehe ne veteki kinautolu ki ai ‘i he ‘aho na‘e ‘ao‘aofia mo fakapo‘uli tu‘u.

¹³Pea te u fakahū kinautolu ki tu‘a mei he ngaahi kakai, pea te u tānaki kinautolu mei he ngaahi fonua, pea te u ‘omi kinautolu ki honau kelekele, pea te u fafanga kinautolu ‘i he ngaahi mo‘unga ‘o ‘Isileli, ‘i he ngaahi tele‘a, pea ‘i he potu fonua kotoa pē ‘oku nofo‘anga.

¹⁴Te u fafanga ‘a kinautolu ‘i ha potu me‘akai lelei, ‘io, ‘i he ngaahi mo‘unga mā‘olunga ‘o ‘Isileli ‘e tu‘u ai honau kaikai‘anga: ko e potu ko ia te nau tākoto ai ‘i ha kaikai‘anga lelei, ‘io, ko e potu mahu te nau kaikai ai ‘i he ngaahi mo‘unga ‘o ‘Isileli.

¹⁵Ko ia te u fafanga ‘eku tākanga ‘e au, pea ko au te u fakatākoto kinautolu — ko ‘Ātonai Sihova ia mei he Ta‘ehāmai.

¹⁶Ko ia kuo mole te u kumia, pea ko ia ne sese‘e te u fakafoki mai, pea ko ia kuo lavea te u ha‘iha‘i, pea ko ia kuo vaivai te u ‘ai ke mālohi: ka ko ia ‘oku sisino mo mālohi te u tāmate‘i; te u fai fakalao ‘eku tauhi ‘aku.

¹⁷Pea ko e me‘a kiate kimoutolu, si‘eku tākanga, ko e folofola ‘eni ‘a ‘Ātonai Sihova: Ko au ‘eni te u fakatonutonu ‘a e vaha‘a ‘o e sipi ko ē mo e sipi ko ena, ‘a e fanga sipi tangata mo e fanga kosi tangata.

¹⁸Koloto ā ke mou topono ‘i he kaikai ‘i he potu mahu; pea ‘oku mou malaki koā hono toe ‘o e kaikai‘anga? pea ‘oku mou inu koā ‘a e vai tasilo, pea toki kele‘i hono toe ‘aki homou va‘e?

¹⁹Pea ko si‘eku fanga sipi, kuo pau ke nau kai ‘a e me‘a kuo mou malaki, pea ke inu ‘a e me‘a kuo mou kele‘i ‘aki homou va‘e.

²⁰Ko ia ko e folofola ‘eni ‘a ‘Ātonai Sihova kiate kinautolu: Ko au ‘eni te u fakatonutonu ‘e au ‘a e vaha‘a ‘o e sipi sino mo e sipi tutue.

²¹Ko e me‘a ‘i ho‘omou tua‘i ‘aki ‘a e vakavaka mo e uma, mo tui‘i ‘aki homou nifo ‘a e vaivai fua pē, kae‘oua ke ‘osi honau kapusi ki tu‘a;

²²ko ia te u tokoni ki he‘eku fanga sipi, pea ‘e ‘ikai te nau toe hoko ko e me‘a ke vetea; pea te u fakatonutonu ‘a e vaha‘a ‘o e sipi mo e sipi.

²³Pea te u fokotu‘u ke pule kiate kinautolu ha taha‘i tauhi, ‘a ia te ne fafanga kinautolu; ‘io, ‘a ‘eku sevāniti ko Tēvita; ko e toko taha ko ia te ne fafanga kinautolu, ‘io, ‘e nofo ia ko honau tauhi.

²⁴Pea ko au Sihova te u nofo atu ko honau ‘Otua, pea ko ‘eku sevāniti ko Tēvita te ne ‘eiki ‘i honau lotolotonga: ko au Sihova kuo u tala ia.

²⁵Pea te u fai ha kovinānite melino mo kinautolu, pea te u ‘ai ke ngata mei he fonua ‘a e manu kovi: pea te nau nofo nonga ‘i he toafa, pea te nau mohe ‘i he ngaahi vao.

²⁶Pea te u ngaohi kinautolu, pea mo e ngaahi potu takatakai ki hoku mo‘unga,[111] ko e tāpuaki‘anga: pea te u tuku ke tō ha ‘uha ‘i hono taimi totonu: ‘e lolo ha ngaahi ‘uha tāpuaki.

²⁷Pea ‘e tuku hake hono fua ‘e he ‘akau ‘o e vao, pea ‘e tuku atu ‘e he fonua hono mahu, pea te nau nofo nonga pē ‘i honau kelekele: pea te nau ‘ilo ko Sihova au, ‘oka u ka fesi‘i ‘a e ‘akau ‘o honau ‘ioke, mo fakahaofi kinautolu mei he nima ‘o e fa‘ahinga na‘e tamaio‘eiki ‘aki kinautolu.

²⁸‘E ‘ikai te nau toe nofo ko e me‘a ke vete ‘e he ngaahi pule‘anga, pea ‘e ‘ikai keina kinautolu ‘e he manu ‘o e fonua; ka te nau nofo nonga pē, ‘o ‘ikai ha taha te nau ilifia ki ai.

²⁹Pea te u fokotu‘u ma‘anautolu ha ngoue ongoongoa; ko ia ‘e ‘ikai te nau toe tafia ‘i he honge ‘oku ‘i he fonua, pea ‘e ‘ikai te nau toe fua ‘a e manuki ‘a e ngaahi pule‘anga.

³⁰Pea te nau ‘ilo ko au Sihova ko honau ‘Otua ‘oku ou ‘iate kinautolu, pea ko hoku kakai kinautolu ‘a e fale ‘o ‘Isileli — ko ‘Ātonai Sihova ia mei he Ta‘ehāmai.

³¹Pea ko kimoutolu ko ‘eku fanga sipi, ko e sipi ‘oku ou fafanga, ko e kakai kimoutolu: ko homou ‘Otua au — ko ‘Ātonai Sihova ia mei he Ta‘ehāmai.