Read KO E TOH TAPU KATOA TONGA KO ‘ISIKELI 36 Bible Online

KO ‘ISIKELI 36 - KO E TOH TAPU KATOA TONGA bible

KO ‘ISIKELI 36

¹SIINI, Hako‘i-tangata, fai ha palofisai ki he ngaahi mo‘unga ‘o ‘Isileli, pea ke pehē, ‘A e ngaahi mo‘unga ‘o ‘Isileli, fanongo ki he folofola ‘a Sihova.

²Ko e folofola ‘eni ‘a ‘Ātonai Sihova: Ko e me‘a ‘i he lau ‘a e fili kiate koe, Uē! na‘a mo e ngaahi sia ta‘engata kuo hoko ko hotau tofi‘a:

³ko ia, ke ke palofisai, pea te ke pehē, Ko e folofola ‘eni ‘a ‘Ātonai Sihova: Ko e me‘a, ‘io, ko e me‘a ‘i he‘enau ngaohi koe ke lala, mo nau ‘oho u‘u kiate kimoutolu mei he potu kotoa pē, ka mou hoko ai ko e tofi‘a ‘o e toenga ‘o e ngaahi pule‘anga, pea taungalea kiate koe ‘a e tama lau, mo e kakai ‘i he‘enau talanoa:

⁴ko ia, fanongo ki he folofola ‘a ‘Ātonai Sihova, ‘a e ngaahi mo‘unga ‘o ‘Isileli; Ko e folofola ‘eni ‘a ‘Ātonai Sihova ki he ngaahi mo‘unga mo e ngaahi fo‘i mā‘olunga, ki he ngaahi halanga vai mo e ngaahi tele‘a, pea mo e ngaahi potu ‘oku maumau mo lala; pea ki he ngaahi kolo kuo li‘aki, ‘a ia kuo hoko ko e me‘a ke vetea mo e me‘a ke manukia ‘e he toenga ‘o e ngaahi pule‘anga takatakai — ko ia ko e folofola ‘eni ‘a ‘Ātonai Sihova.

⁵Ko au ē kuo u lea ‘i he kakaha ‘o ‘eku fua‘a, koe‘uhi ko e toenga ‘o e ngaahi pule‘anga, pea koe‘uhi ko ‘Ītomi kātoa, ‘a ia kuo nau ta‘ofi hoku fonua ko e tofi‘a mo‘onautolu, ‘o fai‘aki ‘a e loto ‘oku fu‘u fiefia, mo e fehi‘a ‘a honau laumālie, koe‘uhi ke tuku atu ia ke vetea.

⁶Ko ia, ke ke fai ‘a e palofisai ke kau ki he kelekele ‘o ‘Isileli; ‘io, ke ke lea ki he ngaahi mo‘unga, pea ki he ngaahi fo‘i mā‘olunga, pea ki he ngaahi halanga vai, pea ki he ngaahi tele‘a, ‘o pehē, Ko e folofola ‘eni ‘a ‘Ātonai Sihova: Ko au ‘eni kuo u lea ‘i he‘eku fua‘a, pea ‘i he‘eku kakaha, koe‘uhi kuo mou fuesia ‘a e tālalakulaku ‘a e ngaahi pule‘anga:

⁷ko ia ko e folofola ‘eni ‘a ‘Ātonai Sihova: Ko au ‘eni kuo u hiki hoku nima, ‘Ilo ‘e au ‘oka ‘ikai fua honau fakamaa‘i ‘e he ngaahi pule‘anga ‘oku takatakai kiate kimoutolu.

⁸Ka ko kimoutolu, si‘i ngaahi mo‘unga ‘o ‘Isileli, te mou fakava‘ava‘a atu, pea te mou fai fua ma‘a hoku kakai ‘Isileli; tala atu, ‘oku vave ‘a e hoko ‘a e ngaahi me‘a ko ia.

⁹He ko au ‘eni te u fai ma‘amoutolu; ‘io, te u hanga kiate kimoutolu, pea ‘e ngoue‘i kimoutolu, ‘o tōta‘u‘i kimoutolu;

¹⁰pea te u fakatokolahi kakai kiate kimoutolu, ‘a e fale kotoa ‘o ‘Isileli, ‘io, hono kotoa pea ‘e nofo‘ia ‘a e ngaahi kolo, pea ‘e langa ‘a e ngaahi potu kuo maumau;

¹¹‘io, te u fakatokolahi kiate kimoutolu ‘a e tangata mo e manu; pea te nau tupu ‘o fua: ‘io, te u ‘ai ke nofo‘ia kimoutolu, ‘o hangē ko homou ngaahi kuonga mu‘a, pea ‘e hulu ‘eku fai lelei kiate kimoutolu ‘i homou ngaahi ‘uluaki taimi: pea te mou ‘ilo ko Sihova au.

¹²Pea te u ‘ai ke ha‘elea kimoutolu ‘e ha kakai ‘io ‘a hoku kakai ‘Isileli; pea te nau ma‘u koe, pea te ke hoko ko honau tofi‘a, pea ‘e ‘ikai te ke toe faka-ta‘e-ha-fānau kinautolu.

¹³Ko e folofola ‘eni ‘a ‘Ātonai Sihova: Ko e me‘a ‘i he‘enau lau kiate kimoutolu, Tu ko e fonua keina kakai koe, pea kuo ke ngaohi ho pule‘anga ke ta‘e-ha-fānau:

¹⁴ko ia ‘e ‘ikai te ke toe keina kakai, pea ‘e ‘ikai te ke toe faka-ta‘e-ha-fānau ho pule‘anga — ko ‘Ātonai Sihova ia mei he Ta‘ehāmai.

¹⁵‘E ‘ikai te u toe ‘ai ke ongo mai ‘a e taukae ‘a e ngaahi pule‘anga, pea ko e manuki ‘a e ngaahi kakai ‘e ‘ikai te ke toe fua, pea ‘e ‘ikai te ke toe fakahumu ha pule‘anga — ko ‘Ātonai Sihova ia mei he Ta‘ehāmai.

¹⁶Pea hoko ‘a e folofola ‘a Sihova kiate au, ‘o pehē,

¹⁷Hako‘i-tangata, na‘e nofo ‘a e fale ‘o ‘Isileli ‘i honau kelekele, pea nau ‘uli‘i ia ‘aki honau ‘alunga mo ‘enau ngaahi fai anga: hangē ko e fakalielia ‘a ha fefine kuo mavahe,[113] na‘e pehē honau ‘alunga kiate au.

¹⁸Ko ia, na‘a ku huhua ‘eku ‘ita kiate kinautolu, koe‘uhi ko e toto kuo nau lilingi ‘i he fonua, pea koe‘uhi kuo nau ‘uli‘i ‘aki ‘enau ngaahi ‘aitoli: pea u veteki kinautolu ‘i he ngaahi pule‘anga,

¹⁹pea na‘e tūtuu‘i kinautolu ki he ngaahi fonua: na‘a ku hilifaki honau tautea ke hoa mo honau ‘alunga, mo ‘enau ngaahi fai anga.

²⁰Pea ‘i he‘enau a‘u ki he ngaahi pule‘anga na‘a nau ‘alu ki ai, na‘a nau maumau ‘a e tapu ‘o hoku hingoa; he ko e lau na‘e fai ki ai, Ko e kakai ‘eni ‘a Sihova, pea kuo nau ‘alu atu mei hono fonua.

²¹Ko ia, na‘a ku mamae ki hoku hingoa tapu, ‘a ia kuo fakalielia‘i ‘e he fale ‘o ‘Isileli ‘i he ngaahi pule‘anga kuo nau a‘u ki ai.

²²Ko ia, ke ke lea ki he fale ‘o ‘Isileli, Ko e folofola ‘eni ‘a ‘Ātonai Sihova: Tala‘ehai ‘oku ou ngāue koe‘uhi ko kimoutolu ‘a e fale ‘o ‘Isileli, ka koe‘uhi ko e hingoa tapu ‘o‘oku, ‘a ia kuo mou fakalielia‘i ‘i he ngaahi pule‘anga kuo mou a‘u ki ai.

²³Pea te u ‘ai ke tāpuhā hoku hingoa lahi, ‘a ia ‘oku va‘inga‘aki ‘e he ngaahi pule‘anga, ‘a ia kuo mou fakalielia‘i ‘i honau lotolotonga; koe‘uhi ke ‘ilo ‘e he ngaahi pule‘anga ko Sihova au, ‘oka u ka hā tāpuhā ‘iate kimoutolu, ‘o nau sio ki ai — ko ‘Ātonai Sihova ia mei he Ta‘ehāmai.

²⁴He te u to‘o kimoutolu mei he ngaahi pule‘anga, pea te u tānaki kimoutolu mei he ngaahi fonua, pea te u ‘omi kimoutolu ki homou kelekele.

²⁵Pea te u luluku kimoutolu ‘aki ‘a e vai fakama‘a, pea te mou ma‘a: ‘io, te u fakama‘a kimoutolu mei ho‘omou ta‘ema‘a fua pē, pea mei homou ngaahi ‘aitoli kotoa.

²⁶Te u ‘atu foki kiate kimoutolu ha loto fo‘ou, pea te u tuku ha laumālie fo‘ou ke huluni ‘iate kimoutolu: pea te u to‘o ‘a e loto maka mei homou kakano, pea te u ‘atu kiate kimoutolu ha loto kakano.

²⁷‘Io, ko e laumālie ‘o‘oku te u tuku ke huluni ‘iate kimoutolu, pea te u ‘ai ke mou fou ‘i he‘eku ngaahi tu‘utu‘uni, pea ke tauhi ‘eku ngaahi kupu‘i konisitūtone, ‘o fai ki ai.

²⁸Pea te mou nofo ‘i he fonua na‘a ku ‘atu ki ho‘omou ngaahi kui; pea te mou nofo mai ko hoku kakai, pea te u nofo atu au ko homou ‘Otua.

²⁹Pea te u fakahaofi kimoutolu mei ho‘omou ta‘ema‘a fua pē: pea te u ui mai ‘a e uite, pea te u ‘ai ke fu‘u lahi ia, pea ‘e ‘ikai te u toe tuku atu ‘a e honge.

³⁰Pea te u ‘ai ke fu‘u lahi ‘a e fua‘i ‘akau, mo e tupu ‘o e ngoue‘anga, koe‘uhi ke ‘oua na‘a tō kiate kimoutolu ‘a e manuki ‘a e ngaahi pule‘anga koe‘uhi ko e honge.

³¹Pea te mou manatu ki homou ngaahi ‘alunga kovi, mo ho‘omou ngaahi fai anga na‘e ‘ikai lelei; pea te mou fakalili‘a kiate kimoutolu koe‘uhi ko ho‘omou ngaahi kovi, pea koe‘uhi ko ho‘omou ngaahi fakalielia.

³²Ke mou ‘ilo mu‘a ‘oku ‘ikai koe‘uhi ko kimoutolu ‘oku ou ngāue — ko ‘Ātonai Sihova ia mei he Ta‘ehāmai: mou mā pē, ‘a e fale ‘o ‘Isileli, pea mou laea koe‘uhi ko homou ngaahi ‘alunga.

³³Ko e folofola ‘eni ‘a ‘Ātonai Sihova; ‘I he taimi te u fakama‘a kimoutolu mei ho‘omou ngaahi kovi fua pē, te u toki ‘ai ke nofo‘ia ‘a e ngaahi kolo, pea ‘e langa ‘a e ngaahi potu ‘oku maumau.

³⁴Pea ko e fonua ‘o e lala ‘e ngoue‘i, ‘o ‘ikai hā kiate ia ‘oku laka ange ko e koto lala.

³⁵Pea te nau lau, Ko e fonua ko ē na‘e lala, kuo hoko hangē ko e ngouetapu ko ‘Īteni; pea ko e ngaahi kolo na‘e maumau mo lusa mo have‘i kuo ‘aa‘i mo nofo‘ia.

³⁶Pea ko e ngaahi pule‘anga na‘e toe takatakai kiate kimoutolu te nau ‘ilo, ko au Sihova ‘oku ou langa hake ‘a e ngaahi potu na‘e have‘i, ‘oku ou ngoue‘i ‘a e ngaahi potu na‘e fakalala: ko au Sihova kuo u lea, pea te u fai.

³⁷Ko e folofola ‘eni ‘a ‘Ātonai Sihova: Te u toe tuku ke fai ha huhū kiate au ‘e he fale ‘o ‘Isileli ‘i he me‘a ni, ke u fai ia ma‘anautolu; te u ‘ai honau kakai ke tupu hangē ha tākanga.

³⁸Hangē ko e tākanga me‘a tapu, hangē ko e tākanga ‘i Selusalema ‘i he ngaahi kātoanga, ‘e pehē ‘a e ngaahi kolo na‘e koto maumau, te nau fonu ‘i he ngaahi tākanga ‘a kakai: pea te nau ‘ilo ko Sihova au.