Read KO E TOH TAPU KATOA TONGA KO ‘ISIKELI 38 Bible Online

KO ‘ISIKELI 38 - KO E TOH TAPU KATOA TONGA bible

KO ‘ISIKELI 38

¹PEA na‘e hoko ‘a e folofola ‘a Sihova kiate au, ‘o pehē,

²Hako‘i-tangata, ‘ai ho mata kia Koki ‘o e fonua ko Mēkoki, ko e ‘eiki ‘o Losi, Mēseke, mo Tūpale, pea ke fai ha palofisai ki ai.

³Pea te ke pehē ki ai, Ko e folofola ‘eni ‘a ‘Ātonai Sihova: Ko au ‘eni te u fai mo koe, ‘e Koki, ‘eiki ‘o Losi, Mēseke, mo Tūpale:

⁴pea te u hele ‘aki koe, pea te u ‘ai ha ngaahi māta‘u ki ho kaungao, pea te u fakahū koe ki tu‘a, mo ho‘o fu‘u hōsitē foki, ‘a e hoosi mo e tau heka hoosi, kuo kofu fungani honau kotoa, ko e fu‘u fakataha ‘oku nau ma‘u ‘a e fakaū mo e pā, ‘oku nau to‘o heletā kotoa pē;

⁵ko e Pēsia, ko e Kusa,[115] mo e Futi,[116] ‘oku ō mo kinautolu, ‘oku nau fakapā kotoa pē mo ‘ai tatā tau:

⁶ko Kōmela mo hono ngaahi vāhenga tau kotoa; fale ‘o Toka‘ama ‘i he tuliki ‘o e noate, mo hono ngaahi vāhenga tau kotoa: ‘ani kakai lahi ‘oku ō mo koe.

⁷Fai ho‘o teu ke mateu, ‘a koe mo ho‘o fakataha kotoa, ‘a kinautolu kuo fakatahataha mai kiate koe, pea te ke hoko ko honau angi.

⁸Hili ‘a e ‘aho lahi, ‘e fai ha ‘a‘ahi kiate koe: ‘i he ‘osi ‘a e ngaahi ta‘u te ke ha‘u ki he fonua kuo fakafoki mei he heletā, kuo tānaki mei he ngaahi kakai lahi, te ke ha‘elea ‘a e ngaahi mo‘unga ‘o ‘Isileli, ‘a ia kuo nofo maumau ai pē: ka ko eni kuo fakahū ki tu‘a mei he ngaahi kakai, pea ‘oku nau nofo nonga pē honau kotoa.

⁹Pea te ke ‘alu hake, ‘o tatau mo e afā ho‘o ha‘u, te ke hangē ha ‘ao ke ‘ufi‘ufi ‘a e fonua, ‘a koe mo ho ngaahi vāhenga tau, pea ‘e ō mo koe ha ngaahi kakai lahi.

¹⁰Ko e folofola ‘eni ‘a ‘Ātonai Sihova: ‘e hoko ‘i he ‘aho ko ia ‘a e ‘alu hake ‘a e ngaahi me‘a ‘i ho loto, pea te ke fakakaukau‘i ha fakakaukau kovi:

¹¹‘io, te ke pehē, Ka u ‘alu hake ki he fonua tuku‘uta, ‘O a‘u ki he kakai nofo noa; ‘A kinautolu ‘oku nofo nonga honau kotoa: ‘Oku nofo ta‘ehanau ‘ā, ‘O ‘ikai hanau songo pe lau matapā;

¹²Ke u ma‘u ha vete ‘o fa‘ao me‘a — ko e toe ‘ai ho nima ki he ngaahi potu maumau kuo nofo‘ia, pea ki ke kakai kuo tānaki mei he ngaahi pule‘anga, kuo nau ma‘u monumanu mo e koloa, ‘oku nau nofo ‘i he pito ‘o māmani.

¹³Ko Sipa, mo Tētani, mo e kau mesianiti ‘o Tāsisi, ‘io, ‘a hono manu hau kotoa te nau pehē kiate koe, Ko ho‘o ha‘u koā ke ma‘u ha vete? kuo ke tānaki ho‘o fu‘ufu‘unga kakai ke fa‘ao me‘a? Ko ho‘o fai ke fetuku siliva mo e koula, ke to‘o fanga manu mo e koloa, ke ma‘u ha fu‘u vete?

¹⁴Ko ia, ke ke fai ha palofisai, si‘i Hako‘i-tangata, pea ke lea kia Koki, Ko e folofola ‘eni ‘a ‘Ātonai Sihova: ‘Ikai ko ia? ‘i he ‘aho ko ē ka nofo nonga hoku kakai ‘Isileli, te ke ‘ilo ki ai?[117]

¹⁵Pea te ke ha‘u mei ho feitu‘u ‘i he tuliki ‘o e tokelau, ‘a koe mo e ngaahi kakai lahi fakataha, ‘oku nau heka hoosi kotoa pē, ko e fu‘ufu‘unga kakai mo e tau lahi.

¹⁶Pea te ke ‘alu hake ki hoku kakai ‘Isileli, ke ‘ufi‘ufi ‘a e fonua hangē ha ‘ao; ‘i he faka‘osi ‘o e taimi ‘e hoko, ‘io, te u toki taki koe ki hoku fonua, koe‘uhi ke ‘ilo au ‘e he ngaahi pule‘anga, ‘oka u ka fakatāpuhaa‘i au ‘iate koe, ‘e Koki, ka nau sio ki ai.

¹⁷Ko e folofola ‘eni ‘a ‘Ātonai Sihova: Ko koe ia koā na‘e kau ki ai ‘eku lea ‘i he ngaahi taimi mu‘a, ‘o fakafai ‘i he‘eku kau tamaio‘eiki ko e kau palōfita ‘o ‘Isileli, ‘a ia na‘e lahi ta‘u ‘enau palofisai ‘i he ngaahi taimi ko ia, ko e pehē te u ‘omi koe kiate kinautolu?

¹⁸Pea ko e me‘a ‘e hoko ‘i he taimi ko ia, ‘a e taimi ‘oku ‘alu ai ‘a Koki ki he kelekele ‘o ‘Isileli — ko ‘Ātonai Sihova ia mei he Ta‘ehāmai — ‘e toki pupū hake ‘eku ‘ita ‘i hoku ihu.

¹⁹‘Io, kuo u lea ‘i he‘eku fua‘a, ‘i he kakaha ‘o ‘eku houhau: ‘Ilo ‘e au kae hoko ‘i he ‘aho ko ia ‘a e tete lahi ki he kelekele ‘o ‘Isileli;

²⁰‘io, ko e ika ‘o e tahi, mo e manupuna ‘o e ‘atā, mo e manu ‘o e vao, mo e ngaahi fa‘ahinga ‘oku totolo ‘i he kelekele, mo e kakai kotoa ‘oku ‘i he funga kelekele, te nau tete ‘i hoku ‘ao; pea ‘e holoki ‘a e ngaahi mo‘unga, pea matule ‘a e ngaahi lilifa, pea holo ki he kelekele ‘a e ngaahi ‘ā kotoa.

²¹Pea te u ui mai ‘a e heletā ki hoku ngaahi mo‘unga ke fai mo ia[118] — ko ‘Ātonai Sihova ia mei he Ta‘ehāmai: ‘e fepātoosi ‘a e heletā ‘a ē mo ē.

²²Pea te u hopo mo ia ‘i he mahaki faka‘auha mo e lingi toto, mo e lōvai mo e ‘uha maka; te u faka‘uha ‘a e afi mo e maka vela kiate ia mo hono ngaahi vāhenga tau, pea mo e ngaahi kakai lahi ‘oku kau mo ia.

²³Pea te u ‘ai ke u hā lahi mo tāpuhā; ‘io, te u ‘ai ke u ‘ilonga ‘i he vakai ‘a e ngaahi pule‘anga lahi; pea te nau ‘ilo ko Sihova au.