Read KO E TOH TAPU KATOA TONGA KO ‘ISIKELI 39 Bible Online

KO ‘ISIKELI 39 - KO E TOH TAPU KATOA TONGA bible

KO ‘ISIKELI 39

¹SIINI, Hako‘i-tangata, fai ha palofisai kia Koki, pea ke pehē, Ko e folofola ‘eni ‘a ‘Ātonai Sihova: Ko au ‘eni ‘oku ou fai mo koe, ‘e Koki, ‘eiki ‘o Losi, Mēseke, pea mo Tūpale:

²te u hele ‘aki koe mo taki atu, ‘o ‘ai ke ke ‘alu hake mei he tuliki ‘o e noate; pea te u ‘omi koe ki he ngaahi mo‘unga ‘o ‘Isileli:

³pea te u taa‘i ho‘o kaufana mei ho nima to‘ohema, pea te u ai ke mokulu ho‘o ngaahi ngahau mei ho nima to‘omata‘u.

⁴Te ke tō ‘i he ngaahi mo‘unga ‘o ‘Isileli, ‘a koe mo ho ngaahi kongakau, mo e ngaahi kakai ‘oku kau mo koe: te u tuku koe ke me‘akai ‘aki ‘a e manupuna fekai fulufulu kehekehe, mo e manu ‘o e vao.

⁵Te ke fola ‘i he tuku‘uta: he ko au ia kuo u tala — ko ‘Ātonai Sihova mei he Ta‘ehāmai.

⁶Pea te u tuku atu ha afi ki Mēkoki, pea kiate kinautolu ‘oku nofo nonga ‘i he ngaahi motu: pea te nau ‘ilo ko Sihova au.

⁷Pea te u ‘ai ke ‘ilonga hoku hingoa tāpuhā ‘i he lotolotonga ‘o hoku kakai ‘Isileli; pea ‘e ‘ikai te u toe tuku hoku hingoa tāpuhā ke talakaa‘i; pea ‘e ‘ilo ‘a e ngaahi pule‘anga ko Sihova au, ko e Tāpuhā ‘o ‘Isileli.

⁸Vakai, ‘oku ha‘u, ‘io, ‘oku hoko mai — ko ‘Ātonai Sihova ia mei he Ta‘ehāmai; ko eni ia ‘a e ‘aho na‘a ku lau ki ai.

⁹Pea ‘e toki ‘alu atu ‘a e nofo ‘i he ngaahi kolo ‘Isileli, pea te nau tutu mo tafu afi ‘aki ‘a e kofu tau, mo e pā, mo e fakaū, ‘aki ‘a e kaufana, mo e ngahau, mo e mātā, mo e tao; ‘io, te nau fefie ‘aki ‘o fitu ta‘u.

¹⁰Pea ‘e ‘ikai te nau okooko mei he vao, pea ‘e ‘ikai te nau fahi ‘akau mei he vao tātā; ka te nau fefie‘aki ‘a e mahafu; pea te nau vete ‘a kinautolu na‘e fai honau vete, pea te nau fa‘ao me‘a meiate kinautolu na‘e fa‘ao ‘enau me‘a — ko ‘Ātonai Sihova ia mei he Ta‘ehāmai.

¹¹Pea ‘e hoko ‘i he ‘aho ko ia, te u ‘atu kia Koki ha potu ‘i ‘Isileli ke tanu ai, ko e tele‘a ‘o e kau fononga, ‘i he tou‘ao ‘o e tahi: pea ‘e tāpuni ‘a e hala ai, ‘a e hala ki he kau fononga: pea te nau tanu ai ‘a Koki mo hono fu‘u uōuōtu‘u, pea te nau ui ia ko Ki-Hāmoni-Koki (Ko e Tele‘a-‘o-e-Uōuōtu‘u-‘o-Koki).

¹²Pea ‘e fai honau tanu ‘e he fale ‘o ‘Isileli ‘o fitu māhina, koe‘uhi ke fakama‘a ‘a e fonua.

¹³‘Io, ‘e fai honau tanu ‘e he kakai kotoa ‘o e fonua; pea ko e me‘a ko ia te nau ongoongo ai ‘i he ‘aho te u fakalāngilangi‘i ai au — ko ‘Ātonai Sihova ia mei he Ta‘ehāmai.

¹⁴Pea te nau vahe‘i ha kau tangata ke nau ngāue ma‘u pē ki ai, ke fai honau tanu, ‘o kau ai ‘a e kau fononga,[119] ‘io, ke tanu ‘a kinautolu ‘oku toe ‘i he funga fonua, ke fakama‘a ia: hili ha māhina ‘e fitu te nau hakule ia.

¹⁵Pea ‘e laka atu ha kau fononga ‘i he fonua; pea ka sio ‘e ha taha ki ha hui ‘o ha tangata, te ne fokotu‘u ha me‘a ‘i he tafa‘aki ke faka‘ilonga ‘aki, kae‘oua ke tanu ia ‘e he kau tanu ‘i Ki-Hāmoni-Koki.

¹⁶‘E fakahingoa foki ‘a e kolo ko Hāmona (Uōuōtu‘u). Pea ko ia te nau fakama‘a ‘a e fonua.

¹⁷Siini, Hako‘i-tangata, ko e folofola ‘eni ‘a ‘Ātonai Sihova: Lea ki he fanga manupuna, ‘a e fa‘ahinga fulufulu kotoa, pea ki he manu kehekehe ‘o e vao, Mou fakatefua mai, ‘o ha‘u: tānaki mai mei he ngaahi potu takatakai ki he feilaulau ‘a‘aku, ‘a ia kuo u tāmate‘i ma‘amoutolu, ko e feilaulau lahi ia ‘i he ngaahi mo‘unga ‘o ‘Isileli, pea mou kai kakano mo inu toto.

¹⁸Te mou kai ‘a e kakano ‘o e kau helo, pea te mou inu ‘a e toto ‘o e hou‘eiki ‘o māmani, ko e fanga sipi tangata, ko e fanga lami, mo e fanga kosi tangata, koni fanga pulu, ko e sino faka-Pēsani honau kotoa.

¹⁹Pea te mou kai ngako ke fatufā‘ia, pea te mou inu toto ke mou konā, mei he feilaulau kuo u tāmate‘i ma‘amoutolu.

²⁰‘Io, te mou fakamākona kimoutolu ‘i hoku tēpile ‘aki ‘a e fanga hoosi, mo e kau heka ai, ‘aki ‘a e kau helo, mo e fa‘ahinga sōtia kehekehe — ko ‘Ātonai Sihova ia mei he Ta‘ehāmai.

²¹Pea te u tuku hoku lāngilangi ‘i he ngaahi pule‘anga, pea ‘e sio ‘e he ngaahi pule‘anga kotoa ki he fakamaau kuo u fai, mo e anga ‘o hoku nima te u ‘ai kiate kinautolu.

²²Pea ‘e ‘ilo ‘e he fale ‘o ‘Isileli ko Sihova au ko honau ‘Otua mei he ‘aho ko ia ‘o fai atu.

²³Pea ‘e ‘ilo ‘e he ngaahi pule‘anga, na‘e taki pōpula ‘a ‘Isileli koe‘uhi ko ‘enau faikovi, na‘a ku hanga kehe meiate kinautolu koe‘uhi ko ‘enau fai kākā kiate au: pea u tuku kinautolu ki he nima ‘o ha kakai na‘e fakamamahi kinautolu, pea nau tō ‘i he heletā honau kotoa.

²⁴Na‘a ku fai kiate kinautolu ‘o taau mo ‘enau ta‘ema‘a, mo ‘enau ngaahi talangata‘a; ‘o u hanga kehe meiate kinautolu.

²⁵Ko ia, ko e folofola ‘eni ‘a ‘Ātonai Sihova. Ko e taimi ni te u fakafoki ‘a e pōpula ‘a Sēkope, pea te u faka‘atu‘i ‘a e fale kotoa ‘o ‘Isileli; pea te u fua‘a telia hoku hingoa tāpuhā.

²⁶Pea te nau toki ongo‘i ‘a e mamafa ‘o honau fakamaa‘i, mo ‘enau fu‘u kākā na‘a nau fai kiate au, ‘oka nau ka nofo nonga ‘i honau kelekele, ‘o ‘ikai ha taha ke ilifia ki ai;

²⁷‘oka u ka fakafoki kinautolu mei he ngaahi kakai, mo tānaki kinautolu mei he ngaahi fonua ‘o honau ngaahi fili, mo ‘ai ke u hā tāpuhā ‘iate kinautolu, kae sio ki ai ‘a e ngaahi pule‘anga lahi.

²⁸Pea te nau ‘ilo ko Sihova au ko honau ‘Otua, he‘eku ‘ave pōpula kinautolu ki he ngaahi pule‘anga, ‘o toki tānaki mai ki honau kelekele; ‘o ‘ikai te u kei fakatoe hanau ni‘ihi ‘i he potu ko ia:

²⁹pea ‘ikai te u toe hanga kehe meiate kinautolu: koe‘uhi kuo u hua‘i hoku laumālie ki he fale ‘o ‘Isileli — ko ‘Ātonai Sihova ia mei he Ta‘ehāmai.