Read KO E TOH TAPU KATOA TONGA KO ‘ISIKELI 4 Bible Online

KO ‘ISIKELI 4 - KO E TOH TAPU KATOA TONGA bible

KO ‘ISIKELI 4

¹PEA ko koe, Hako‘i-tangata, to‘o ha‘o maka ‘umea tohi‘anga, ‘o tuku ‘i ho ‘ao, pea tongi ai ha kolo, ko Selusalema:

²pea te ke ‘ai mo hano ‘ākolo‘i, ‘o ke langa taua ki ai, mo ke tanu puke ki ai; mo ke ‘ai ki ai ‘a e ngaahi ‘apitanga tau, ‘o fokotu‘u takatakai ki ai ha ngaahi sipi tangata.

³Pea, Sī ni, te ke to‘o ha fakapaku ‘aione, pea ke tuku ia ko e ‘ā ‘aione ‘i homo vaha‘a mo e kolo: pea te ke ‘ai ke ma‘u ho mata ki he kolo ke ‘ākolo‘i ia, ‘io, te ke fai tau ki ai. Ko e taipe ia ma‘a e fale ‘o ‘Isileli.

⁴Ko eni foki te ke tokoto ki ho vakavaka to‘ohema, pea te ke[10] ‘ai ki ai ‘a e kovi ‘o e fale ‘o ‘Isileli: ko ho‘o fakakakato ‘a e ngaahi ‘aho ‘o ho‘o tokoto ki hē, ko ho‘o fua ia ‘enau kovi.

⁵Pea ko au ‘oku ou tuku atu ‘a e ngaahi ta‘u ‘o ‘enau kovi ke lau ‘aho pē; ko e ‘aho ‘e tolungeau mā hivangofulu, ‘a ia te ke fua ai ‘a e kovi ‘o e fale ‘o ‘Isileli.

⁶Pea kuo ke lava ia, pea te ke toe tokoto ki ho vakavaka to‘omata‘u, ka ke fua ‘a e kovi ‘o e fale ‘o Siuta ‘o fāngofulu‘i ‘aho: ko e ‘aho ki he ta‘u takitaha, ko ‘eku tuku ia ma‘au.

⁷Pea te ke ‘ai ma‘u ho mata ki he ‘ākolo‘i ‘o Selusalema, mo ho nima kuo mulu; pea te ke fai palofisai ki ai.

⁸Pea vakai, ‘oku ou ‘ai kiate koe ‘ani ha‘i, pea ‘e ‘ikai te ke lava ke tafoki mei he vakavaka ko ē ki he vakavaka ko ē, kae‘oua ke ‘osi ‘a e ngaahi ‘aho ‘o ho‘o ‘ākolo‘i.

⁹Pea te ke to‘o foki ma‘au ha uite, mo e pa‘ale, mo e piini, mo e lētili, mo e mīleti, mo e kūsemi, pea te ke tuku ki ha ‘ainga pē taha, pea te ke ngaohi ‘aki ha‘o me‘akai, ‘o fakatatau ki he fuoloa ‘o ho‘o tokoto ki ho vakavaka na, ko e ‘aho ‘e tolungeau mā hivangofulu te ke kai ai.

¹⁰Pea ko e me‘akai te ke kai ‘e fua, ko e sikeli ‘e uofulu ki he ‘aho: te ke kai mavahevahe pē ‘i hono taimi.

¹¹Pea ko ho‘o inu vai ‘e fua pē, ko e vahe ono ‘o e hini: te ke inu mavahevahe pē ‘i hono taimi.

¹²Pea ko ho‘o me‘akai ‘e ngaohi ‘o hangē ko e keke pa‘ale, pea te ke tunu ia ‘i honau ‘ao ‘aki ‘a e me‘a kovi ‘oku ‘alu atu mei he tangata.

¹³Pea na‘e folofola ‘a Sihova, Hangē ko ia, ‘e pehē ‘a e kai ‘e ha‘a ‘Isileli ‘enau me‘akai ta‘ema‘a,[11] ‘i he ngaahi pule‘anga te u fakateka kinautolu ki ai.

¹⁴Pea u pehē, ‘Oiauē ‘Ātonai Sihova ē! vakai kuo te‘eki ke ‘uli‘i ‘eku mo‘ui; pea talu ‘eku tamasi‘i ‘o fai mai, kuo te‘eki te u kai ha ‘anga‘anga, pe ha me‘a kuo hae ‘e ha manu; pea kuo te‘eki ke hū ki hoku ngutu ha kakano namukū.

¹⁵Toki folofola ia kiate au; Vakai, ‘oku ou tuku atu ‘a e te‘e pulu ke fetongi ‘aki ‘a e me‘a kovi ‘a e tangata, pea ke ngaohi ‘aki ia ho‘o me‘akai.

¹⁶Na‘a ne folofola foki kiate au, Hako‘i-tangata, ko au eni ‘oku ou maumau ‘a e falala‘anga kai ‘o Selusalema, pea te nau kai ‘enau me‘akai kuo fua, ‘o kai mo e hoha‘a; pea te nau fai ‘enau inu kuo fua, pea te nau inu mo ofoofo:

¹⁷koe‘uhiā ‘e ‘osi ‘a e me‘akai mo e vai, pea te nau feofo‘aki ‘a ē ki hē, mo ē ki hē pea te nau faka‘a‘au kimui ‘i he‘enau kovi.