Read KO E TOH TAPU KATOA TONGA KO ‘ISIKELI 42 Bible Online

KO ‘ISIKELI 42 - KO E TOH TAPU KATOA TONGA bible

KO ‘ISIKELI 42

¹PEA ne fakahū au ki tu‘a ki he Loto‘ā Tu‘afale, ‘i he hala ki he tokelau; pea ne ‘ave au ki he fale loki, ‘a ia na‘e fehangahangai mo e Potu Mavahe, ‘io, na‘e fehangahangai mo hono holisi na‘e hanga ki he tokelau.

²Na‘e hanga ki he tapa lōloa na‘e kiupite ‘e teau; ko hono matapā na‘e hanga ki he tokelau, pea ko hono māukupu ko e kiupite ‘e nimangofulu.

³Na‘e fehangahangai ia mo e uofulu‘i kiupite ko ē ‘i he Loto‘ā Loto, pea fehangahangai mo e faliki ‘i he Loto‘ā Tu‘afale: na‘e ai ha fale tolo na‘e tau atu ki he fale tolo ‘e taha, ‘i he ngaahi potu ‘o hono tolu ‘o e fata.

⁴Pea ‘i he mata fale loki na‘e ai ha hala na‘e kiupite ‘e hongofulu hono laulahi: na‘e fou ia ki he Loto‘ā Loto: ko e hala ia na‘e kiupite ‘e teau.[140] Pea ko e ngaahi matapā ‘o ē na‘e hanga ki he tokelau.

⁵Pea ko e ‘otu loki ki ‘olunga na‘e nounou ange ‘i he fata ki lalo mo loto, he na‘e tosi kinautolu ‘e he ngaahi fale tolo.

⁶He na‘e tu‘u fata tolu ‘ena, pea na‘e ‘ikai hanau pou ‘o hangē ko e ngaahi pou ‘o e ongo loto‘ā; ko ia, na‘e fakahilihili‘i ia ‘i he fata lalo mo loto ‘i he fai hake.

⁷Pea na‘e ai ha ‘ā mā‘ulalo, ‘a ia na‘e ‘alu ‘i tu‘a, ‘o palāleli mo e ngaahi loki, ‘o hanga ki he Loto‘ā Tu‘a na‘e fehangahangai mo e ngaahi loki: ko hono lōloa ko e kiupite ‘e nimangofulu.

⁸He ko e lōloa ‘o e ngaahi loki na‘e hanga ki he Loto‘ā Tu‘afale ko e kiupite ‘e nimangofulu; kae vakai, ko e lōloa ‘o e hāngai ki he Temipale ko e kiupite ‘e teau.

⁹Pea na‘e fakapuli ‘e he ‘ā ‘a e potu lalo ‘o e ngaahi loki; ko ia, ko e[141] hū‘anga ki ai na‘e tu‘u mei hahake ‘i ho‘o ‘alu ki ai mei he Loto‘ā Tu‘afale.

¹⁰Fakamāukupu ‘i he ‘ā mā‘ulalo ‘o e loto‘ā ki he saute,[142] pea fehangahangai ki he Potu Mavahe, pea fehangahangai ki he holisi, na‘e tu‘u ha ngaahi loki.

¹¹Pea ai ha hala ‘i honau mata, tatau mo e ngaahi loki na‘e tu‘u ‘i he potu noate; tatau honau lōloa, tatau honau māukupu, mo honau ngaahi hū‘anga, pea tatau honau ngaahi tu‘utu‘uni.

¹²Pea tatau mo e ngaahi matapā ko ē ‘a e ngaahi matapā ‘o e ngaahi loki ‘i he potu saute: na‘e ai ha matapā ‘i he ngata‘anga ‘o e hala, ‘a e hala na‘e ‘alu atu ki he ‘ā mā‘ulalo, ‘o lave ki ai, ‘i ho‘o ‘alu ki he ngaahi loki mei hahake.[143]

¹³Pea ne pehē mai kiate au, Ko e ngaahi loki tokelau mo e ngaahi loki tonga, ‘a ia ‘oku fehangahangai mo e Potu Mavahe, ko e ngaahi loki tapu ia, ‘a ia ‘e kai ai ‘a e ngaahi me‘a toputapu ‘e he kau taula‘eiki ‘oku taka ofi kia Sihova; ko e potu ko ia te nau tuku ai ‘a e ngaahi me‘a toputapu, ‘a e feilaulau-me‘akai, mo e feilaulau-angahala, mo e feilaulau-halaia: he ‘oku tapu ‘a e potu ko ia.

¹⁴Ka nau ka hū ki loto, ‘a e kau taula‘eiki, ‘e ‘ikai te nau ‘alu mei he potu tapu ki he Loto‘ā Tu‘afale, ka te nau tuku ‘i he potu ko ia honau kofu, ‘a ia ‘oku nau fai ai ‘enau ngāue; he ko e ngaahi kofu ‘oku tapu: te nau tui ‘a e ngaahi kofu kehe, pea te nau toki ‘unu‘unu atu ki he potu ‘oku kau ki he kakai.

¹⁵Pea kuo ‘osi ‘ene fai ‘a e fua ‘o e fale loto, na‘a ne fakahū au ki tu‘a ‘i he matanikolo ‘oku hanga ki hahake, pea ne fua ‘a e potu ko ia takatakai.

¹⁶Na‘a ne fua ‘a e tapa fakahahake ‘aki ‘a e kaho fua, ko e kaho ‘e nimangeau; ko e fua kotoa ia ‘aki ‘a e kaho.

¹⁷Na‘a ne fua ‘a e tapa fakatokelau, ko e kaho ‘e nimangeau; ko e fua kotoa ia ‘aki e kaho.

¹⁸Ko e tapa fakatonga na‘a ne fua ko e kaho ‘e nimangeau; ko e fua fakakaho ia.

¹⁹Na‘a ne afe ki he tapa fakalulunga; na‘a ne fua ai ha kaho ‘e nimangeau; ko e fua fakakaho ia.[144]

²⁰Na‘e fai ‘ene fua ki he matangi ‘e fā. Na‘e ai ha ‘ā takatakai ki he me‘a ko ē, ko hono lōloa ko e nimangeau, pea ko hono māukupu ko e nimangeau, mo vahevahe ‘a e potu tapu mei he potu noa.