Read KO E TOH TAPU KATOA TONGA KO ‘ISIKELI 44 Bible Online

KO ‘ISIKELI 44 - KO E TOH TAPU KATOA TONGA bible

KO ‘ISIKELI 44

¹PEA ne fakafoki au ‘i he hala na‘e ‘alu ki he matapā tu‘a ‘o e potu tapu, ‘a ia na‘e hanga ki hahake; pea tā kuo tāpuni.

²Pea folofola ‘a Sihova kiate au, Ko e matapā ni kuo tāpuni; ‘e ‘ikai toe to‘o, pea ‘e ‘ikai toe hū ai ha taha; he ne hū ai ‘a Sihova ko e Tu‘i ‘Isileli; ko ia ‘e mo‘u tāpunia ai.

³Ko e me‘a ki he ‘eiki, ko e ‘eiki ia; ko ia te ne nofo ai ke kai me‘akai ‘i he ‘ao ‘o Sihova; te ne hū ki ai ‘i he hala ‘o e hū‘anga ‘o e matanikolo, pea te ne hū ki tu‘a ‘i hono hala ko ia.

⁴Pea ne ‘ave au ‘i he hala ‘o e matapā tokelau ki he matafale; pea u vakai, pea tā ‘oku fonu ‘a e fale ‘o Sihova ‘i he Sikaina ‘o Sihova; pea u tō fo‘ohifo.

⁵Pea folofola mai ‘a Sihova, Hako‘i-tangata, ‘ai ho loto, pea tokanga ho mata, pea fanongo ho telinga ki he ngaahi me‘a ‘oku ou alea ai mo koe, ‘o kau ki he ngaahi tu‘utu‘uni ‘o e fale ‘o Sihova, mo hono ngaahi lao kehekehe; pea tokanga ho loto ki he hū‘anga ki fale ‘i he ngaahi hū‘anga ki tu‘a ‘o e potu tapu.

⁶Pea lea ki he fa‘ahinga pau‘u, ki he fale ‘o ‘Isileli, Ko e folofola ‘eni ‘a ‘Ātonai Sihova: ‘a e fale ‘o ‘Isileli, ma‘u ā mu‘a ho‘omou ngaahi fai fakalielia;

⁷‘a ho‘omou fakahū mai ke nofo ‘i hoku potu tapu ‘a e hako‘i kehe ‘oku ta‘ekamu honau loto, pea ta‘ekamu honau kakano, ke nau maumau hono tapu, ‘io, ‘a e tapu ‘o hoku fale, ‘i ho‘omou ‘atu ‘eku me‘akai, ‘a e ngako mo e toto; ko ia na‘a nau maumau ‘eku kovinānite, ‘o kanoni ‘aki ho‘omou ngaahi fakalielia ‘amoutolu.

⁸Ko ia, na‘e ‘ikai te mou fai ‘e kimoutolu ‘a e tauhi ‘o ‘eku ngaahi me‘a tapu, ka mou fokotu‘u kinautolu ke fai ma‘amoutolu ‘a e tauhi ‘o e ngaahi me‘a tu‘utu‘uni ‘o hoku potu tapu.

⁹Ko e folofola ‘eni ‘a ‘Ātonai Sihova: ‘Oku tapu ke hū ki hoku potu tapu ha hako‘i kehe ‘oku ta‘ekamu hono loto, pea ta‘ekamu hono kakano, ha taha ‘o e hako‘i kehe ‘oku nofo ‘i he lotolotonga ‘o ha‘a ‘Isileli.

¹⁰‘Io, na‘a mo e kau Līvai na‘e hiki meiate au ‘i he afe ‘a ‘Isileli, ‘a ia na‘a nau afe meiate au ke muimui ki honau ngaahi ‘aitoli, te nau fua ‘enau kovi.

¹¹Te nau ngāue tauhi pē ‘i hoku potu tapu, ko e kau le‘o ‘i he ngaahi matapā ‘o e fale, pea ko e kau sevāniti ‘i he fale: ko e fa‘ahinga ia te nau tāmate‘i ‘a e feilaulau-mōifua, mo e feilaulau kehe, ma‘a e kakai, ‘io, ko e fa‘ahinga ia te nau tu‘u ‘i he ‘ao ‘o e kakai ke ngāue kiate kinautolu.

¹²Ko e me‘a ‘i he‘enau ngāue ma‘anautolu ‘i he ‘ao ‘o honau ngaahi ‘aitoli, ‘o nau hoko ai ki he fale ‘o ‘Isileli ko e humu‘anga ki he kovi, ko hono ō ia kuo u hiki ai hoku nima te nau kovi ai — ko ‘Ātonai Sihova ia mei he Ta‘ehāmai — te nau fua ‘enau kovi.

¹³‘E ‘ikai te nau ‘unu‘unu mai ke fai kiate au ‘a e ngāue fakataula‘eiki, pe ke ofi ki he‘eku ngaahi me‘a tapu, ‘a e ngaahi me‘a ‘oku toputapu; ka te nau fua ‘enau mā, mo e ngaahi fakalielia kuo nau fai.

¹⁴Ka te u tuku kinautolu ko e kau tauhi ‘o e ngāue ‘o e fale, ‘a hono fatongia kehekehe, mo e me‘a kehekehe ‘oku fai ai.

¹⁵Ka ko e kau Līvai taula‘eiki, ko e hako ‘o Sātoki, ‘a ia na‘a nau fai ‘a e tauhi ‘o hoku potu tapu ‘i he afe ‘a ha‘a ‘Isileli meiate au, ko e fa‘ahinga ko ia ‘e taka ofi mai ke tauhi au; pea te nau tu‘u ‘i hoku ‘ao ke ‘ohake kiate au ‘a e ngako mo e toto — ko ‘Ātonai Sihova ia mei he Ta‘ehāmai.

¹⁶Ko e fa‘ahinga ia ‘e hū mai ki hoku potu tapu, pea ko e fa‘ahinga ia ‘e ‘unu‘unu mai ki hoku tēpile, ke tauhi au; pea te nau tauhi ‘a e ngaahi me‘a tu‘utu‘uni ‘a‘aku.

¹⁷Pea ka ‘iloange te nau ‘alu ki he ngaahi matapā ‘o e Loto‘ā Loto, te nau tui ha ngaahi kofu līneni, pea ‘ē, ‘ikai lave kiate kinautolu ha sipi lolotonga ‘oku nau fai ngāue ‘i he ngaahi matanikolo ‘o e Loto‘ā Loto, ‘o tauhi ki he fale.

¹⁸Ko e ao līneni te nau tatā ‘aki, pea ko e talausese līneni ‘e ‘i honau kongaloto; ‘e ‘ikai te nau no‘o ‘aki ‘a e me‘a te nau ngali tauta‘a ai.

¹⁹Pea ka nau ka hū ki tu‘a ki he Loto‘ā Tu‘a, ‘io, ki he Loto‘ā Tu‘a ki he kakai, te nau hu‘i ‘a e ngaahi kofu kuo nau fai‘aki ‘enau ngāue, pea te nau tuku ia ‘i he ngaahi loki tapu ko ē; pea te nau tui ‘a e ngaahi kofu kehe, ke ‘oua na‘a ‘iloange ‘e tapu ‘a e kakai[149] he lave ki honau ngaahi kofu.

²⁰Pea ‘e ‘ikai te nau tele honau ‘ulu, pea ‘e ‘ikai te nau tuku honau lau ke loloa; te nau kosi pē honau lau.

²¹Pea ‘oku tapu ki he taula‘eiki ke inu uaine ‘i he‘ene ‘alu ki he Loto‘ā Loto.

²²Pea ‘e ‘ikai te nau mali mo ha uitou, pe ko ha fefine kuo vete: ka ko e fefine tāupo‘ou pē ‘i he hako ‘o ‘Isileli: kae ngofua ‘ene mali mo ha uitou ‘a ia na‘e nonofo mo ha taula‘eiki.

²³Pea te nau ako ki hoku kakai ‘a e me‘a ‘oku tapu mo e me‘a ‘oku ta‘etapu, pea ke nau ‘ilo ‘a e me‘a ‘oku ta‘ema‘a mo e me‘a ‘oku ma‘a.

²⁴Pea ka ai ha me‘a ‘oku fihi, ko e fa‘ahinga ia te nau tu‘u ke fai ‘a e fakamaau: te nau fakamaau ia ‘o taau mo ‘eku konisitūtone; pea ‘i he hoko ‘eku ngaahi kātoanga, te nau tauhi ‘eku ngaahi lao, mo ‘eku ngaahi tu‘utu‘uni; pea te nau tauhi ‘a e tapu ‘o ‘eku ngaahi Sāpate.

²⁵Pea ‘e ‘ikai te nau ‘alu ki ha taha kuo pekia mo e ta‘ema‘a: ngata pē ‘i he‘ene tamai, pe ko ‘ene fa‘ē, pe ko ha foha, pe ‘ōfefine, pe ko ha tokoua, pe ko ha tuofefine ‘oku ‘ikai mali, ‘oku ngofua ke nau ta‘ema‘a ai.

²⁶Pea hili hono fakama‘a, te nau toe lau ki ai mo e ‘aho ‘e fitu.

²⁷Pea ko e ‘aho ‘oku ne hū ai ki he Potu Tapu, ki he Loto‘ā Loto, ke fai ngāue ‘i he Potu Tapu, te ne ‘atu ha‘ane feilaulau-angahala — ko ‘Ātonai Sihova ia mei he Ta‘ehāmai.

²⁸Pea ko eni pē ‘a e me‘a te nau ma‘u moonau tofi‘a; ko au pē ‘a honau tofi‘a: pea ‘e ‘ikai te mou vahe hanau ‘api tō ‘i ‘Isileli: ko au pē honau ‘api tō.

²⁹Ko e feilaulau-me‘akai, mo e feilaulau-angahala, mo e feilaulau-halaia, ‘e kai ‘e he fa‘ahinga ko ia; mo e me‘a kotoa ‘o ‘Isileli ‘oku mōifua ‘e ‘anautolu ia.

³⁰Pea ko e polopolo ‘o e ngaahi ‘uluaki fua ‘o e me‘a kotoa, pea ko e ngaahi me‘a kotoa ‘oku hapai ‘i he fa‘ahinga kehekehe ‘oku mou hapai, ‘e ‘a e kau taula‘eiki ia; pea te mou ‘atu foki ki he kau taula‘eiki ha polopolo ‘o ho‘omou takaonga mā, kae toka ha tāpuaki ki ho fale.

³¹‘Oku tapu ki he kau taula‘eiki ke kai ha ‘anga‘anga, pe ko e me‘a kuo hae ‘e he manu; tatau ‘a e manupuna mo e manu ‘o e fonua.