Read KO E TOH TAPU KATOA TONGA KO ‘ISIKELI 45 Bible Online

KO ‘ISIKELI 45 - KO E TOH TAPU KATOA TONGA bible

KO ‘ISIKELI 45

¹PEA ka mou ka vahe talotalo ‘a e fonua ke tofi‘a, te mou hapai ha ‘inasi mo‘o Sihova, ko ha kelekele tapu: ‘i he fai fakalōloa ko e kaho ‘e ua mano mā nima afe; ko hono lōloa ia, pea ko hono māukupu ko e ua mano.[150]

²Ko e potu ia ‘e tapu hono feitu‘u kotoa takatakai. ‘E lau mei ai ki he potu tapu ha kaho ‘e nimangeau; ko e nimangeau tapafā ia ‘i he potu kotoa pē; pea ai mo ha kiupite ‘e nimangofulu takatakai ki ai, ko e potu mavahe.

³Pea mei he potu ko ia na‘e fua, te ke vahe‘i ha me‘a, ko hono lōloa ko e kaho ‘e ua mano mā nima afe, pea ko hono māukupu ko e taha mano: pea ‘e tu‘u ‘i he potu ko ia ‘a e potu tapu: ko e me‘a toputapu ia.

⁴Ko e konga fonua ia ‘e tapu; ‘e ‘o e kau taula‘eiki ia, ‘a kinautolu ‘oku fai ‘a e ngāue ‘o e potu tapu, ‘a e fa‘ahinga ‘oku taka ofi kia Sihova ke tauhi ia; ‘io, te nau ma‘u ia ko e potu ke tu‘u ai honau ngaahi fale, pea ko e potu mavahe ke tu‘u ai ‘a e potu tapu.

⁵Pea ko hano potu, fe‘unga mo e kaho ‘e ua mano mā nima afe hono lōloa, mo e taha mano hono māukupu, ‘e ma‘u ‘e he kau Līvai, ko e kau tauhi ‘o e fale; ko honau ‘api tō mo‘o kolo nofo‘anga.[151]

⁶Pea te mou tuku ha potu, fe‘unga mo e kaho ‘e nima afe hono māukupu mo e ua mano mā nima afe hono lōloa, ko e kelekele ‘o e kolo; ‘e palāleli ia mo e me‘a na‘e hapai ke tapu: ‘e kau ia ki he fale kotoa ‘o ‘Isileli.

⁷Pea te mou ‘atu ki he ‘eiki ‘o e kakai, ‘i he potu ko ē mo ē ‘o e me‘a na‘e hapai ke tapu, pea mo e kelekele ‘o e kolo, ‘io, ‘e lave ki he potu na‘e hapai ke tapu, pea ‘e lave ki he kelekele ‘o e kolo, ‘o kamata mei he tafa‘aki ki lulunga ‘o fai ki lulunga, pea mei he tafa‘aki ki hahake ‘o fai ki hahake: pea ko hono tapa mei hihifo ki hahake ‘e hu‘ufataha mo ha taha ‘o e ngaahi vahefonua.

⁸‘E ‘atu ia ki he ‘eiki na mōno kelekele, ko hono ‘api tō ‘i ‘Isileli: koe‘uhi ke ‘oua na‘a toe fakaehaua hoku kakai ‘e hoku hou‘eiki; ka te nau tuku ‘a e kelekele ki he fale ‘o ‘Isileli ke ma‘u ‘e honau ngaahi matakali.

⁹Ko e folofola ‘eni ‘a ‘Ātonai Sihova: ‘a e hou‘eiki ‘Isileli, ma‘u ā mu‘a, ‘o tuku ho‘omou fai fakamālohi, mo fakaehaua, pea mou fai ki he konisitūtone mo e totonu; faka‘atā hoku kakai mei ho‘omou fa‘a kapusi kinautolu mei honau tofi‘a — ko ‘Ātonai Sihova ia mei he Ta‘ehāmai.

¹⁰‘E totonu ho‘omou fuatautau, ‘e totonu ho‘omou ‘efa, pea totonu ho‘omou pate.

¹¹Ko e ‘efa mo e pate ‘e ngaohi ke tatau, ‘e ngaohi ‘a e pate ke hao ai ‘a e vahehongofulu ‘o e homa, pea ko e ‘efa ko e vahehongofulu ‘o e homa:[152] ko e fua ‘oku na tefito ki ai ko e homa.

¹²Pea ko e sikeli ‘e fe‘unga mo e kela ‘e uofulu: ko e uofulu‘i sikeli,[153] ko e uofulu mā nima‘i sikeli, ko e hongofulu mā nima‘i sikeli, ko ho‘omou mina ia.

¹³Ko eni ‘a e feilaulau hapai te mou hapai; ko ha‘amou homa uite te mou vahe‘i mei ai ‘a e vahe ono ‘o e ‘efa, pea ko ha‘amou homa pa‘ale te mou vahe‘i mei ai ‘a e vahe ono ‘o e ‘efa.

¹⁴Pea ko e tu‘utu‘uni ki he lolo, ko ha‘amou pate lolo ‘e vahe mei ai fe‘unga mo e vahehongofulu ‘o e pate mei he koa (ko e pate ‘e hongofulu ia, tatau mo e homa; he ko e pate ‘e hongofulu ko e homa ia).

¹⁵Pea ko e manu ‘e taha mei he tākanga sipi pe kosi ‘oku toko uangeau, ha ni‘ihi kuo kakai ‘i ha potu ‘o ‘Isileli ‘oku mohu vai; ‘e ‘omi ia ki he feilaulau-me‘akai, mo e feilaulau-mōifua, mo e feilaulau-‘ofa, ke fai‘aki ha fakahōifua ma‘anautolu — ko ‘Ātonai Sihova ia mei he Ta‘ehāmai.

¹⁶Ko e ngāue ‘a e kakai kotoa ‘o e fonua ‘a e feilaulau hapai ni, ke ‘omi[154] ki he ‘eiki ‘o e kakai ‘Isileli.

¹⁷Pea ko e me‘a ‘a e ‘eiki ko ia ke ‘atu ‘a e ngaahi feilaulau-mōifua, mo e ngaahi feilaulau-me‘akai, mo e ngaahi feilaulau-kava, ‘i he ngaahi kātoanga, mo e ngaahi fakamāhina fo‘ou, mo e ngaahi Sāpate; ‘io, ‘i he ngaahi ‘aho tu‘utu‘uni kotoa ‘o e fale ‘o ‘Isileli; ko ia ia te ne teu ‘a e feilaulau-angahala, mo e feilaulau-me‘akai, mo e feilaulau-mōifua, mo e feilaulau-‘ofa, ke fai ha fakahōifua ma‘a e fale ‘o ‘Isileli.

¹⁸Ko e folofola ‘eni ‘a ‘Ātonai Sihova: ‘I he ‘uluaki ‘aho ‘o e ‘uluaki māhina te ke to‘o ha pulu mui ta‘ehano mele, ‘o fai ‘a e tatafi hia ‘o e potu tapu.

¹⁹Pea ‘e to‘o ‘e he taula‘eiki ha me‘a mei he toto ‘o e feilaulau-angahala, pea te ne ‘ai ki he ngaahi pou matapā ‘o e fale, pea ki he faa‘i tuliki ‘o e puha ‘o e ‘ōlita, pea ki he ngaahi pou ‘o e matanikolo ‘o e Loto‘ā Loto.

²⁰Pea te ke fai pehē foki ‘i hono ‘aho fitu ‘o e māhina, telia ha ni‘ihi kuo afe, mo e hehemangofua: pea ke fai ai ha fakahōifua ma‘a e fale.

²¹‘I he ‘uluaki māhina, ‘i hono ‘aho hongofulu mā fā, ‘e hoko ‘a e Pāsova ma‘amoutolu, ko e kātoanga ‘oku ‘aho fitu; ko e mā ta‘elēvani ‘e kai.

²²Pea ‘e teu ‘i he ‘aho ko ia ‘e he ‘eiki pule, ma‘ana mo e kakai kotoa ‘o e fonua, ha pulu mo‘o feilaulau-angahala.

²³Pea ‘i he fitu‘i ‘aho ‘o e kātoanga te ne teu feilaulau-mōifua kia Sihova, ko e pulu ‘e fitu mo e sipi tangata ‘e fitu, ko e manu ta‘emele kotoa pē, ki he fitu‘i ‘aho takitaha; pea mo ha kosi tangata ‘i he ‘aho kotoa pē mo‘o feilaulau-angahala.

²⁴‘Ai mo e feilaulau-me‘akai, te ne teu ha ‘efa ‘e taha ki ha pulu, mo e efa ‘e taha ki ha sipi tangata, mo e hini lolo ki he efa.

²⁵Pea ‘i hono māhina fitu, ‘i hono hongofulu mā nima ‘o e ‘aho, ‘i he fai ‘o e kātoanga te ne fai pehē pē ‘o ‘aho fitu; tatau ‘a e feilaulau-angahala, tatau ‘a e feilaulau-mōifua, pea tatau ‘a e feilaulau-me‘akai, pea tatau ‘a e lolo.