Read KO E TOH TAPU KATOA TONGA KO ‘ISIKELI 6 Bible Online

KO ‘ISIKELI 6 - KO E TOH TAPU KATOA TONGA bible

KO ‘ISIKELI 6

¹PEA na‘e hoko ‘a e folofola ‘a Sihova kiate au, ‘o pehē,

²Hako‘i-tangata, ‘ai ho mata ki he ngaahi mo‘unga ‘o ‘Isileli, pea fai palofisai ki ai; pea ke pehē, ‘A e ngaahi mo‘unga ‘o ‘Isileli, fanongo ki he folofola ‘a ‘Ātonai Sihova;

³Ko eni ‘a e folofola ‘a ‘Ātonai Sihova ki he ngaahi mo‘unga mo e ngaahi tafungofunga, ki he ngaahi halanga vai pea ki he ngaahi tele‘a: Ko au ‘eni ‘oku ou ‘omi ‘a e heletā kiate kimoutolu, pea te u maumau homou ngaahi ‘esi.

⁴Pea ‘e tuku li‘aki homou ngaahi ‘ōlita, pea ‘e maumau homou ngaahi ‘īmisi la‘ā. Pea te u ‘ai ke tō ‘i he ‘ao ‘o ho‘omou ngaahi tamapua homou kakai kuo tāmate‘i.

⁵‘Io, te u tuku ‘a e ngaahi ‘anga‘anga ‘o ha‘a ‘Isileli ‘i he ‘ao ‘o ‘enau ngaahi tamapua; pea te u tuku movetevete homou ngaahi hui takatakai ki homou ngaahi ‘ōlita.

⁶‘I he potu kotoa ‘oku mou nofo ki ai ‘e fakalala ‘a e ngaahi kolo, pea fakalīlī‘aki ‘a e ngaahi ‘esi, koe‘uhi ke li‘aki mo tukunoa homou ngaahi ‘ōlita, pea maumau mo laiki ho‘omou ngaahi tamapua, pea tā homou ngaahi ‘īmisi la‘ā, pea fakaka‘anga ‘a e ngaahi me‘a kuo mou ngaohi.

⁷Pea ‘e tō ‘i homou lotolotonga ‘a e kakai kuo tāmate‘i, ke mou ‘ilo ko Sihova au.

⁸Ka te u fakatoe pē; ‘e ai hamou ni‘ihi ‘i he ngaahi pule‘anga kuo hao mei he heletā, ‘i ho‘omou movete ka fai ki he ngaahi fonua.

⁹Pea ko kimoutolu kuo hao te mou manatu kiate au ‘i he ngaahi pule‘anga kuo taki kinautolu ki ai, ‘oka kuo u fesi‘i ma‘aku honau loto fie tango,[13] ‘a ia kuo afe meiate au, mo ngaohi honau mata fie tango ki he‘enau ngaahi tamapua: pea te nau fakalili‘a kiate kinautolu, koe‘uhi ko e kovi kuo nau fai ‘i he‘enau ngaahi fu‘u fakalielia.

¹⁰Pea te nau toki ‘ilo ko Sihova au: tala‘ehai ko e laufanō ‘eku tala ke fai ‘a e kovi ni kiate kinautolu.

¹¹Ko e folofola ‘eni ‘a ‘Ātonai Sihova; Pasi nima mo tūva‘e, mo ke pehē, ‘Oi ‘a e ngaahi fu‘u fakalielia pango ‘o e fale ‘o ‘Isileli! ‘a e pau ai ke nau tō ‘i he heletā mo e honge mo e mahaki faka‘auha.

¹²Ko ia, ‘oku mama‘o e mate ‘i he mahaki faka‘auha, pea ko ia ‘oku ofi ‘e tō ‘i he heletā; pea ko e toe ‘oku fakahao te nau mate ‘i he honge: ko ia te u faka‘osi ‘eku ‘ita kiate kinautolu.

¹³Pea te mou ‘ilo ko Sihova au, ‘oka ‘i ai honau kakai kuo tāmate‘i ‘oku nau lotolotoi ‘i he‘enau ngaahi ‘aitoli, ‘o takatakai ‘enau ngaahi ‘ōlita, ‘i he ngaahi fo‘i mā‘olunga ‘oku hopo hake, ‘i he ngaahi tumutumu‘i mo‘unga, pea ‘i he lolo ‘akau mata fua pē, mo e ngaahi lolo ‘oke lau tafu‘ufu‘u, ‘a e potu na‘a nau ‘atu ai ‘a e ngangatu fakahōifua ki he‘enau ‘aitoli kehekehe.

¹⁴Pea te u hiki tā hoku nima kiate kinautolu, pea te u ngaohi ‘a e fonua ke lala mo ka‘anga, ‘o hulu atu ‘i he toafa ‘o Tīpila, ‘i he potu kotoa pē ‘oku nau nofo ai — pea te nau ‘ilo ko Sihova au.