Read KO E TOH TAPU KATOA TONGA KO ‘ISIKELI 9 Bible Online

KO ‘ISIKELI 9 - KO E TOH TAPU KATOA TONGA bible

KO ‘ISIKELI 9

¹PEA ne kalanga le‘o lahi ‘i hoku telinga ni, ‘o pehē, ‘Unu‘unu mai, ‘a e kau tauhi ‘o e kolo, ‘o takitaha to‘o ‘ene nāunau faka‘auha.[24]

²Pea tā ko e tu‘unga tangata ‘e toko ono ‘ena ‘oku fou mai ‘i he hala ‘o e matapā ‘olunga, ‘a ia ‘oku hanga ki he tokelau, ‘oku nau takitaha to‘o ‘ene nāunau laiki; pea ‘oku lotolotoi ‘iate kinautolu ha tangata ‘e taha na‘e kofu tupenu hinehina, pea ‘i hono kongaloto ha ‘ainga vaitohi faka-tangatatohi.

³Pea na‘a nau omi, ‘o tu‘u ofi ki he ‘ōlita. Pea ko e Sikaina ‘o e ‘Otua ‘o ‘Isileli na‘e ma‘ama‘a hake mei he funga selupimi,[25] ‘a ia kuo ne ‘afio ai, ki he tu‘unga matapā ‘o e fale, ‘o ne ui ki he tangata kofu tupenu hinehina, ‘a ia na‘e ‘i hono kongaloto ha ‘ainga vaitohi faka-tangatatohi.

⁴Pea folofola ‘a Sihova kiate ia, Laka atu ‘i he loto kolo, ‘i loto Selusalema, ‘o tā ha kolosi ‘i he la‘e ‘o e kau tangata ‘oku māpuhoi mo to‘e koe‘uhi ko e ngaahi fakalielia ‘oku fai ‘i loto kolo.

⁵Pea ki he tu‘unga me‘a ko ē na‘a ne folofola, ‘o u ongo‘i, Laka atu ‘i he kolo, ‘o muimui kiate ia, ‘o tā: ‘oua ‘e mamae ‘e homou mata, pea ‘oua te mou fai ha ‘ofa.

⁶‘a e motu‘a, ‘a e talavou, mo e finemui mo e tamaiki mo e finemātu‘a, mou have‘i ke nau ‘auha: kae ‘ikai te mou ala ki ha taha ‘oku ‘iate ia ‘a e kolosi; pea kamata mei hoku potu tapu. Ko ia na‘a nau kamata ‘i he tu‘unga mātu‘a na‘e ‘i he matafale.

⁷Pea ne folofola kiate kinautolu, Mou ‘uli‘i ‘a e fale, pea fakafonu ‘anga‘anga ‘a e ngaahi loto‘ā: pea toki hū ki tu‘a. Pea nau hū ki tu‘a, ‘o tā atu ‘i he kolo.[26]

⁸Pea ‘i he fai atu ‘enau tā, ka u toe pē au, na‘a ku tō fo‘ohifo ‘o tautapa hake, pea u pehē, ‘Oiauē, ‘Ātonai Sihova ē! te ke faka‘auha ‘a e toenga kotoa ‘o ‘Isileli ‘i ho‘o huhua ho‘o kakaha ki Selusalema?

⁹Pea ne folofola kiate au, Ko e kovi ‘o e fale ‘o ‘Isileli mo Siuta ko e me‘a lahi ‘i he lahi ange fau, pea kuo fonu ‘a e fonua ‘i he hia fakapō, pea ‘oku fonu ‘a e kolo ‘i he piko‘i fakamaau; he ‘oku nau pehē kuo li‘aki ‘e Sihova ‘a e fonua, pea ‘oku ‘ikai mea‘i ha me‘a ‘e Sihova.

¹⁰Ko ia na‘a mo au ‘e ‘ikai mamae hoku mata, pea ‘e ‘ikai ha‘aku ‘ofa ‘e fai; te u tuku honau ‘alunga ke tō ki honau tumu‘aki.

¹¹Pea ‘iloange ko e tangata na‘e kofu tupenu hinehina, ‘a ‘ena na‘e ‘i hono kongaloto ‘a e ‘ainga vaitohi, na‘a ne foki mai mo e fakamatala, ‘o pehē, Kuo u fai ‘o tatau mo ho‘o fekau kiate au.