Read KO E TOH TAPU KATOA TONGA KO TĀNIELA 10 Bible Online

KO TĀNIELA 10 - KO E TOH TAPU KATOA TONGA bible

KO TĀNIELA 10

¹‘I HONO tolu ta‘u ‘o Kōlesi ko e Tu‘i Pēsia, na‘e tatala ha me‘a kia Tāniela, ‘a e toko taha na‘e fakahingoa ko Pelitisasa; pea ‘oku kau ‘a e me‘a ki he “mo‘oni” mo e “hōsitē” lahi:[33] pea na‘e mahino ‘a e me‘a, pea ne ma‘u hono ‘uhinga mei he me‘a na‘e hā.

²‘I he taimi ko ia ko au Tāniela ne u fakamamahi ‘o uike ‘e tolu mālō.

³Ko e me‘akai vovo na‘e ‘ikai te u kai, pea na‘e ‘ikai hū ki hoku ngutu ha kanomate, pe uaine; pea na‘e ‘ikai te u momo‘i pani, kae‘oua ke kakato ha tolu‘i uike mālō.

⁴Pea ‘i hono ‘aho uofulu mā fā ‘o e ‘uluaki māhina, ‘oku ou tu‘u ‘i he ve‘e vaitafe lahi, ‘a ia ko Hitikeli:[34]

⁵‘Iloange na‘a ku tāngaki hoku mata, ‘o u fakasio, pea tā ko e taha‘i tangata ena, ‘oku kofu tupenu hinehina, pea na‘e no‘o hono kongaloto ‘aki ‘a e koula ‘asinisini mei ‘Āfasi;

⁶pea ko hono sino na‘e hangē ko e kalisolaite, pea ko hono fōtunga na‘e hangē ko e ‘uhila, pea ko hono ongo fo‘i fofonga na‘e hangē ko e ongo maama afi, pea ko hono ongo nima mo hono to‘ukupu na‘e hangē ko e palasa ‘afu hina, pea ko e ongo mai ‘ene lea na‘e hangē ko e lea ‘a ha fu‘ufu‘unga kakai.

⁷Pea ko au Tāniela toko taha na‘e mamata ki he vīsone; he ko e tu‘unga me‘a na‘e ‘iate au na‘e ‘ikai te nau sio ki ai, ka na‘e tō kiate kinautolu ha fu‘u tete, pea nau hola ke toi.

⁸Ko ia, na‘a ku toe toko taha ke mamata ki he vīsone lahi ko ē; pea na‘e ‘ikai toe haku ivi, pea na‘e liliu hoku pahapaha ‘o hangē kuo ohi, pea na‘e ‘ikai te u mata‘ofi mai ha ivi.

⁹Pea u ongo‘i ‘a e le‘o ‘o ‘ene ngaahi lea; pea ‘i he‘eku ongo‘i ‘a e le‘o ‘o ‘ene ngaahi lea na‘a ku mo‘u matea, ‘o fo‘ohifo, ‘io, ‘o fo‘ohifo ki he kelekele.

¹⁰Pea ‘iloange na‘e lave kiate au ha nima, ‘o hiki au ki hoku mata‘ulutui mo ‘aofi nima, ‘o u punou tete pē.

¹¹Pea ne folofola mai, ‘E Tāniela, si‘i tangata ‘ofeina lahi, ke ‘uhinga kiate koe ‘a e ngaahi lea ‘oku ou fai atu, pea ke tu‘u totonu; he ko e ālonga mai eni hoku fekau kiate koe. Pea ‘i he‘ene talanoa pehē mo au, na‘a ku tu‘u, kae tete pē.

¹²Pea ne folofola mai, Si‘i Tāniela, ‘oua te ke manavahē; he talu e ‘uluaki ‘aho ‘o ho‘o tuku ho loto ke kumi hono ‘uhinga, pea ke fakavaivai koe ‘i he ‘ao ‘o ho ‘Otua, mo e ongona ho‘o ngaahi lea; pea ko au eni kuo u a‘u mai koe‘uhi ko ho‘o ngaahi lea.

¹³Ka ko e ‘eiki ‘o e pule‘anga ‘o Pēsia na‘e tu‘u ke ta‘ofi au, ‘o ‘aho ‘e uofulu mā taha: kae ‘iloange na‘e ha‘u ‘a Maikeli, ko e taha ‘i he hou‘eiki tu‘umu‘a, ‘o tokoni au; ko ia na‘a ku mālohi ‘i he potu ko ia, ‘a e ha‘oha‘onga ‘o e ngaahi Tu‘i Pēsia.[35]

¹⁴Pea kuo u ha‘u ke fakamahino kiate koe ‘a e me‘a ‘e hoko ki ho kakai ‘i he ngaahi ‘aho ‘amui; he ‘oku kau ‘a e vīsone ki ha taimi mama‘o.

¹⁵Pea ‘i he‘ene talanoa pehē mo au, na‘a ku ‘ai hoku mata ki he kelekele, ‘o u longomate.

¹⁶Pea ‘iloange ko e taha na‘e fōtunga tatau mo e hako‘i tangata, na‘a ne ala ki hoku loungutu, pea u mafa‘a hoku ngutu, ‘o u fakatau folofola hake, ‘o u pehē kiate ia na‘e tu‘u ‘i hoku ‘ao, ‘Ēī, ko e me‘a ‘i he vīsone kuo langa ai ‘eku mamahi, pea ‘oku ‘ikai te u kei mata‘ofi ha ivi.

¹⁷Pea lava fēfē ‘a kita me‘avale ange fau kiate koe, ke talanoa mo ha ‘eiki hangē ko koe; he ko e me‘a kiate au na‘e ‘ikai leva kei toe ‘iate au ha ivi, pea na‘e ‘ikai toe ‘iate au ha mānava.

¹⁸Pea toe ala kiate au ha taha na‘e matamata ko e tangata, ‘o ne ‘omi ha ivi kiate au.

¹⁹Pea ne folofola, ‘Oua te ke manavahē, si‘i tangata ‘ofeina lahi, fiemālie pē; nasi, ‘io, nasi hifo ho‘o tu‘u. Pea ‘i he‘ene lea kiate au, na‘a ku ma‘u mālohi, pea u fakalea hake, ‘Ēī, fai mai ho‘o folofola; he kuo ke ‘omi ha ivi kiate au.

²⁰Pea ne pehē, ‘Oku ke ‘ilo pe ko e hā kuo u ha‘u ai kiate koe, pea ko e taimi ni te u foki ke fai tau ki he ‘eiki ‘o Pēsia; pea lolotonga ‘eku ‘alu atu, tā ko e ‘eiki ‘o Kalisi ena ‘oku ha‘u.[36]

²¹Ka u fakahā mu‘a kiate koe ‘a e me‘a kuo tongi ‘i he tohi ‘o e mo‘oni; pea ‘oku ‘ikai ha taha ‘oku pukepuke au ‘i he fai kiate kinautolu na, ko Maikeli pē ko e ‘eiki ‘omoutolu. Ko au foki na‘a ku tu‘u ke pukepuke ia, mo poupou ki ai, ‘i he ‘uluaki ta‘u ‘o Talaiasi ko e Mītia.