Read KO E TOH TAPU KATOA TONGA KO TĀNIELA 11 Bible Online

KO TĀNIELA 11 - KO E TOH TAPU KATOA TONGA bible

KO TĀNIELA 11

¹PEA ko eni te u tala atu ‘a e mo‘oni, Vakai ‘e hokohoko atu ha tu‘i ‘e toko tolu ki Pēsia; pea ko hono toko fā ‘e koloa‘ia ange noa ‘iate kinautolu kotoa.

²Pea ‘i he‘ene hoko ‘o kaukaua, ko ene koloa‘ia, te ne ue‘i ‘a e kotoa ‘o e pule‘anga ke fai mo e pule‘anga Kalisi.

³Pea ‘e hoko ha tu‘i helo, pea te ne pule ‘aki ha pule kaukaua, pea te ne mātu‘aki fa‘iteliha.

⁴Pea ‘i he‘ene tu‘u ‘ana, ‘e maumau hono pule‘anga, pea ‘e vahevahe ki he matangi ‘e fā ‘o e langi; kae ‘ikai ki hono hako, ‘o ‘ikai tatau mo e pule na‘a ne fai ‘e ia; he ‘e ta‘aki hono pule‘anga, pea tō ki ha ni‘ihi kehe, ‘o lakai kinautolu.

⁵Pea ‘e mālohi ‘a e tu‘i ‘o e feitu‘u tonga, pea pehē ha taha ‘o e hou‘eiki ‘o ē; pea ‘e mālohi ange ia ‘i hē, pea te ne ma‘u pule‘anga; ko hono pule‘anga ko e pule‘anga lahi.

⁶Pea hili ha ngaahi ta‘u te na fakakautaha; pea ko e ‘ōfefine ‘o e tu‘i tonga te ne ‘alu ki he tu‘i tokelau ke feia ‘a e melino:[37] kae ‘ikai mata‘ofi ‘e he fefine ‘a e mālohi ‘o hono nima; pea ‘e ‘ikai tu‘u ‘a e tu‘i, pe ko hono nima; pea ‘e tukuange ‘a e fefine, mo kinautolu na‘e ‘omi ia, mo ia na‘e fakatupu ia,[38] mo ia na‘a ne pukepuke ia, ‘o fai ‘i he ngaahi taimi.[39]

⁷Pea ‘e tu‘u hake ha taha ‘i hono tu‘unga mei ha huli ‘o ha aka ‘o e fefine, pea te ne ‘alu ki he hōsitē, pea te ne hū ki he talitau‘anga ‘o e tu‘i tokelau, pea te ne fai mo kinautolu, pea te ne mālohi.

⁸Pea ko honau ngaahi ‘otua foki fakataha mo ‘enau ngaahi ‘īmisi, mo ‘enau ngaahi nāunau mahu‘inga ko e siliva mo e koula, te ne ‘ave he taki pōpula ki ‘Isipite; ka ka vātau pē ia mo e tu‘i tokelau ‘i he ngaahi ta‘u ni‘ihi.[40]

⁹Pea ‘e ha‘u pē ki he pule‘anga ‘o e tu‘i tonga, ka te ne foki ki hono fonua ‘o‘ona.

¹⁰Pea fai tau ‘e he‘ene fānau, pea te nau tānaki ha ngaahi matatau lahi, ko e fu‘u hōsitē, ‘a ia ‘e ‘alu mo ‘alu, mo tafe atu, mo ‘asi ki tu‘a, pea ‘e foki, pea te nau fai tau ‘o a‘u ki he tali tau‘anga ‘o ē.

¹¹Pea ‘e lili ‘a e tu‘i tonga, pea te ne ‘alu atu ‘o fai tau mo ia, ‘io, mo e tu‘i tokelau: pea neongo ‘e fokotu‘u ‘e ē ha hōsitē lahi, ka ‘e tuku ‘a e hōsitē ko ia ki he nima ‘o ē.

¹²Pea ‘i he ‘ave ‘a e hōsitē ko ē, ‘e hīkisia ‘a e loto ‘o ē: pea neongo ‘ene tulaki ha ngaahi mano, ka ‘e ‘ikai te ne ikuna.

¹³Pea ‘e foki ‘a e tu‘i tokelau, pea te ne fokotu‘u ha hōsitē ‘oku lahi ‘i he ‘uluaki; ‘io, te ne ha‘u ‘i he faka‘osi ‘o e ngaahi taimi, ha taimi lau ta‘u, te ne ha‘u mo ha tau lahi, mo ha fu‘u tau.

¹⁴Pea ‘i he ngaahi taimi ko ia ‘e tu‘u hake ha tokolahi ke fai mo e tu‘i tonga; pea ko e kau anga fīta‘a ‘o ho kakai te nau mālanga hake ke fakaai ‘a e vīsone; ka te nau humu pē.

¹⁵Pea ‘e ha‘u ‘a e tu‘i tokelau, pea te ne tanu ha puke, pea te ne hamu ha kolo[41] talitau‘anga, pea ‘e ‘ikai matu‘uaki ‘e he ngaahi matatau[42] ‘o e saute; na‘a mo hono kakai fili ‘e ‘ikai; pea ‘e ‘ikai ha ivi ke talitu‘u ‘aki.

¹⁶Pea ko ia ‘oku ha‘u ki ai, te ne fai ‘ene fa‘iteliha, pea ‘e ‘ikai ha taha ‘e matu‘u ki ai: pea te ne tu‘u ‘i he Fonua Siueli ‘oku ‘i hono nima ‘a e faka‘auha.

¹⁷Pea te ne ‘ai hono mata ke ha‘u mo e ivi ‘o hono pule‘anga kotoa, pea ‘e ha‘u mo ia ‘a e ngaahi fakamelino, pea te ne fai; pea te ne ‘ange kiate ia ‘a e ta‘ahine fakafāfine;[43] ko e ‘ātunga ai pē ia hono maumau‘i ‘o e ta‘ahine; pea ‘e ‘ikai tu‘u ‘a e fefine, pea te ne hoko ko e ta‘e‘aonga kiate ia.

¹⁸Pea ‘e toki hanga hono mata ki he ngaahi motu, pea te ne puke ha me‘a lahi; pea ‘e fakangata ‘e ha ‘eikitau ‘ene luki; ko e fai ia ma‘ana;[44] kaekehe ko e luki kuo ne fai te ne fakafoki kiate ia.[45]

¹⁹Pea ‘e toki hanga hono mata ki he ngaahi talitau‘anga ‘o hono fonua ‘o‘ona: pea te ne humu, ‘o tō, ‘o ‘ikai ‘iloa.

²⁰Pea ‘e ma‘u hono tu‘unga ‘e ha toko taha te ne fakalaka atu ‘i he lāngilangi ‘o e pule‘anga ha taha ‘eke fatongia: ka hili ha taimi si‘i ‘e maumau ia, kae ‘ikai ‘i he ‘ita, pea ‘ikai ‘i he tau.

²¹Pea ‘e ma‘u hono tu‘unga ‘o‘ona ‘e ha taha ta‘etoka‘i, ‘o ‘ikai te nau ‘ange ki ai ‘a e lāngilangi ‘o e pule‘anga; ka te ne ha‘u ‘i he‘enau nofo noa, pea te ne puke ‘a e pule‘anga ‘aki ‘ene ngaahi fakaoleole.

²²Pea ‘e ‘auhia kinautolu mei hono ‘ao ‘aki ha fu‘u ivi lōmaki, pea ‘e maumau kinautolu, ‘io, mo e ‘eiki ‘o e kovinānite foki.

²³Pea talu ‘ene fakakautaha mo ia, te ne fai kākā; he te ne ‘alu hake, ‘o hoko ‘o kaukaua, ka ‘aki ha momo‘i kakai pē.

²⁴Te ne a‘u ki he ngaahi potu ‘o e fonua ‘oku mohu koloa, ‘i he‘enau nofo noa, pea te ne feia ‘a e ngaahi me‘a na‘e ‘ikai fai ‘e he‘ene ngaahi tamai, pe ko e ngaahi tamai ‘a ‘ene ngaahi tamai; te ne tufa ki he fa‘ahinga ko ē ‘a e vete mo e pāpani mo e koloa; ‘io, te ne fa‘u ‘ene ngaahi fakakaukau ki he ngaahi talitau‘anga,

²⁵‘io, ‘o a‘u ki hono taimi, Pea te ne o‘io‘i hono ivi mo hono loto ke fai mo e tu‘i tonga ‘aki ha tau lahi; pea ‘e fai tau ‘e he tu‘i tonga ‘aki ha fu‘u tau lahi mo mālohi ‘aupito: ka ‘e ‘ikai te ne tu‘u, he te nau fa‘u ha ngaahi fakakaukau kiate ia.

²⁶‘Io, ko kinautolu ‘oku fai taumafa mo ia te nau maumau ia; pea neongo ‘e lōmaki atu ‘ene tau, ka ‘e mate tāmate‘i ha tokolahi.

²⁷Pea ko e me‘a ki he ongo tu‘i na‘e hu‘u hona loto ki he kovi, pea ‘i he‘ena keinanga taha te na tau‘aki loi: ka ‘e ‘ikai sia‘a; kae fai atu ki he ngata‘anga kuo tu‘utu‘uni.

²⁸Pea te ne foki ki hono fonua ‘o‘ona ‘aki ha koloa lahi: pea toki kovi hono loto ki he Kovinānite tapu; pea te ne fai, pea te ne foki ki hono fonua ‘o‘ona.

²⁹‘I he taimi kuo tu‘utu‘uni te ne foki, ‘o a‘u ki he tonga; ka ko ‘ene fai ki mui ‘e ‘ikai hangē ko e ‘uluaki fai.

³⁰He ‘e ha‘u kiate ia ‘a e ngaahi vaka Kītimi, pea te ne mapelu ai; pea te ne foki, pea te ne lili ki he Kovinānite tapu, pea te ne fai, pea te ne foki, pea te ne tokanga‘i ‘a kinautolu na‘e li‘aki ‘a e Kovinānite tapu.

³¹Pea ‘e tu‘u ma‘ana ‘a e ngaahi matatau, pea te nau maumau ‘a e tapu ‘o e potu tapu; ‘io, ‘a e mālohinga; pea te nau ‘ave ‘a e lotu tu‘u ma‘u, pea te nau fokotu‘u ‘a e me‘a fakalielia ‘oku fakalala.[46]

³²Pea ko kinautolu ‘oku hia ki he Kovinānite te ne fakatafoki ‘aki ‘ene ngaahi fakalai; ka ko e kakai ‘oku ‘ilo ‘a honau ‘Otua te nau mālohi pea fai me‘a.

³³Pea ko kinautolu ‘i he kakai ‘oku fakapotopoto te nau hīnoi‘i ha tokolahi; ka te nau tō ‘i he heletā, pe ‘i he ulo‘i afi, ‘i he taki pōpula, pe ‘i he vetea, ‘o laui ‘aho.

³⁴Pea ‘i he‘enau tō, ‘e ai ha tokoni ‘e fai; ka ko e tokoni si‘i; pea ‘e ai ha tokolahi te nau fakakau ange ki he fa‘ahinga ko ē, ka ko e koto fakalai pē.

³⁵Pea ko e ni‘ihi ‘iate kinautolu ‘oku fakapotopoto te nau tō, ke fai‘aki kinautolu ha sivi, mo ha fakama‘a, mo ha fakahinehina, ‘o a‘u atu ki he taimi fakamui: ‘e fai atu ki he me‘a kuo tu‘utu‘uni.

³⁶Pea ‘e fai ‘e he tu‘i ‘ene fa‘iteliha; pea te ne fakapupula mo fakamā‘olunga ‘i he ‘otua kotoa; ‘io, na‘a mo e ‘Otua ‘o e ngaahi ‘otua ‘e makehe atu ‘a e me‘a te ne lau ki ai: pea te ne tu‘umālie kae‘oua ke kakato ‘a e houhau; he ko e me‘a kuo tu‘utu‘uni ‘e fai.

³⁷Pea ‘e ‘ikai te ne tokanga‘i ‘a e ‘Otua ‘o ‘ene ngaahi kui, pe ko e ‘ofa ‘a fefine; ‘io, ‘e ‘ikai te ne tokanga‘i ha ‘otua ‘e taha: he te ne fakapupula ke mā‘olunga ‘i he me‘a kotoa pē.

³⁸Ka te ne fetongi ‘aki ‘a e ‘Otua ‘o e ngaahi mālohinga[47] ‘ene fakahīkihiki‘i; ‘io, ko e ‘otua na‘e ‘ikai ‘ilo ki ai ‘e he‘ene ngaahi kui te ne fakalāngilangi‘i ‘aki ‘a e koula mo e siliva mo e makakoloa mo e ngaahi me‘a mahu‘inga.

³⁹Pea te ne fai me‘a ki he ngaahi talitau‘anga mālohi ‘i he tokoni ‘a ha ‘otua muli; ‘ilonga ha taha te ne mamahi‘i ia, te ne fakalahi hono lāngilangi,[48] pea te ne fakanofo kinautolu ke pule ki ha me‘a lahi, pea te ne tufa ‘a e fonua mōno totongi.

⁴⁰Pea ‘i he taimi fakamui ‘e fekuki mo ia ‘a e tu‘i tonga, pea ‘e ‘ohofia ia ‘e he tu‘i tokelau hangē ha afā, ‘aki ha tau sāliote, mo e tau hoosi, mo e folau lahi; pea te ne hū ki he ngaahi fonua, pea te ne lōmaki‘i ‘o ‘asi atu.

⁴¹Te ne hū foki ki he Fonua Siueli, pea lahi ‘a e ngaahi fonua ‘e fulihi: kae fakahaofi ‘a ‘eni mei hono nima, ‘a ‘Ītomi, mo Moape, mo e ‘elito ‘o ha‘a ‘Āmoni.

⁴²Te ne mafao atu hono nima foki ‘i he ngaahi fonua; pea na‘a mo ‘Isipite ‘e ‘ikai hano hao‘anga.

⁴³Pea te ne fa‘iteliha ki he ngaahi fokotu‘unga koula mo siliva, mo e me‘a mahu‘inga fua pē ‘o ‘Isipite: pea ko e kau Lupi mo e kau ‘Itiopea[49] ‘e muimui kiate ia.

⁴⁴Ka ‘e fakahoha‘a ia ‘eni ongoongo mei hahake, pea mei he tokelau; pea te ne ‘alu atu ‘oku lili lahi ke faka‘auha mo mōifua ‘a e tokolahi.

⁴⁵Pea te ne hunuki hono tēniti faka‘ei‘eiki ‘i he vaha‘a ‘o e ongo tahi ‘i he Siueli ko e mo‘unga tapu; ka te ne a‘u ki hono ngata‘anga, ‘o ‘ikai hano tokoni.