Read KO E TOH TAPU KATOA TONGA KO TĀNIELA 4 Bible Online

KO TĀNIELA 4 - KO E TOH TAPU KATOA TONGA bible

KO TĀNIELA 4

¹KO AU KINGI NEPUKANESA ki he ngaahi kakai, matakali, mo fa‘ahinga lea ‘oku nofo ‘i māmani; ‘ofa ke lahi ho‘omou fiemālie!

²Kuo hā kiate au ‘oku lelei ke fakahā atu ‘a e ngaahi faka‘ilonga mo e ngaahi me‘a fakaofo kuo fai ‘e he ‘Otua Taupotu kiate au.

³Ko ‘ene ngaahi faka‘ilonga, hono ‘ikai fakamanavahē! pea ko ‘ene ngaahi me‘a fakaofo, hono ‘ikai faka‘ulia! ko hono pule‘anga ko e pule‘anga ta‘engata, pea ko hono hau ‘oku mei he to‘utangata ki he to‘utangata.

⁴Ko au Nepukanesa na‘a ku mālōlō ‘i hoku ‘api, pea u tu‘umālie ‘i hoku palasi.

⁵Na‘e ai ha misi na‘a ku sio ki ai, pea u manavahē; pea ko e ngaahi fifili na‘e hake ‘i he‘eku ‘i he mohenga, mo e ngaahi vīsone na‘e hā ki hoku ‘ulu, na‘a nau fakailifia‘i au.

⁶Ko ia na‘a ku tu‘utu‘uni ke ‘omi ki hoku ‘ao ‘a ha‘a poto kotoa pē ‘o Pāpilone, ke nau faka‘uhinga ‘a e misi.

⁷Pea ha‘u ai ‘a e kau sikalaipe, ‘a e kau maki, ‘a e kau Kalitia, mo e kau ‘asitalōnome: pea u fakamatala kiate kinautolu ‘a e misi, ka na‘e ‘ikai te nau mafaka‘uhinga mai,

⁸ka na‘e faifai pea hū mai, ‘a Tāniela, ‘a ia ‘oku hingoa ko Pelitisasa, ‘o tatau mo e hingoa ‘o hoku ‘otua, pea ko e toko taha ‘oku ‘iate ia ‘a e laumālie ‘o e ngaahi ‘otua toputapu:[5] pea u ‘a‘au ‘a e misi kiate ia.

⁹‘E Pelitisasa, Pule ‘o ha‘a maki, ‘oku ou ‘ilo ‘oku ‘iate koe ‘a e laumālie ‘o e ngaahi ‘otua toputapu, pea ‘oku ‘ikai ha misiteli te ke faingata‘a‘ia ai; ke ke tala mai ‘a e ngaahi vīsone, ‘a e misi kuo u mamata ki ai,[6]

¹⁰Pea ko e ngaahi vīsone na‘e hā ki hoku ‘ulu ‘i hoku mohenga: ‘oku ou mo‘usioa pē, pea ‘iloange ko e ‘akau ‘i loto māmani, pea ko hono mā‘olunga ko e me‘a kehe.

¹¹Na‘e tupu ai pē ‘a e ‘akau ke lahi, pea na‘e a‘u hono tumutumu ki he langi, mo hono holofa ki he pā‘angangalu ‘o māmani.

¹²Na‘e faka‘ofo‘ofa hono ‘ulu‘ulu, pea lahi hono fua, pea na‘e ‘i ai ha me‘akai ki he me‘a kotoa: na‘e fakamalumalu ai ‘a e fanga manu ‘o e vao, pea ‘i hono ngaahi va‘a na‘e nofo ‘a e manupuna ‘o e ‘atā, pea na‘e kai noa pē mei ai ‘a e kakano kotoa pē.

¹³Na‘a ku sio ai pē ‘i he vīsone na‘e hā ki hoku ‘ulu ‘i hoku mohenga, pea ‘iloange ‘oku hifo mei langi ha taha le‘o[7] ‘i he fa‘ahinga tapu.

¹⁴Na‘a ne kalanga le‘o lahi, ‘o pehē, Tā ‘a e ‘akau, pea tu‘usi hono ‘ulu‘ulu, ‘au‘ulu hono lau, mo fakamovetevete hono fua: ke hola ‘a e fanga manu mei hono malu, mo e manupuna mei hono ngaahi va‘a.

¹⁵Kae tuku pē ‘i he kelekele ‘a hono tefito, pea ha‘i ‘aki ‘a e ‘aione mo e palasa ‘i he mohuku mui ‘o e vao; pea tuku ke viku ia ‘i he hahau mei langi, pea ke ne ma‘u ‘inasi fakataha mo e fanga manu ‘i he mohuku ‘o e kelekele:

¹⁶ke liliu hono loto‘i tangata, kae ‘ange ki ai ha loto‘i manu; pea ke ‘osi ai ha fitu‘i kuonga.

¹⁷Ko e fekau ‘oku ‘i he tu‘utu‘uni ‘a e kau Le‘o, pea ko e tala ‘oku ‘i he folofola ‘a ha‘a Tapu; koe‘uhi ke ‘ilo ‘e ha‘a mo‘ui ‘oku hau ‘a ‘Elioni ‘i he pule‘anga ‘o e tangata, pea ‘oku ne ‘atu ia kiate ia ‘oku ne finangalo ki ai; pea ‘oku ne mafakanofo ki ai ‘a e taupotu ki lalo ‘o e kakai.

¹⁸Ko e misi ko eni na‘a ku mamata ki ai ‘e au Kingi Nepukanesa; pea ko koe, Pelitisasa, ke ke ‘a‘au hono ‘uhinga; he ‘oku ‘ikai ke lava ‘e he kau poto kotoa ‘o hoku pule‘anga ke faka‘uhinga: ka ko koe te ke fe‘unga, he ko e laumālie ‘o e ngaahi ‘otua toputapu[8] ‘oku ‘iate koe.

¹⁹Pea mo‘u tāfu‘ua ai ‘a Tāniela, ‘a ia ko Pelitisasa, ‘o houa kātoa, pea na‘e fakailifia‘i ia ‘e he‘ene ngaahi fakakaukau. Folofola ‘a e tu‘i, ‘Oua ‘e manavahē, Pelitisasa, koe‘uhi ko e misi, pe koe‘uhi ko hono ‘uhinga. Tali hake ai ‘a Pelitisasa, ‘Ēī, taumaiā ke kau ‘a e misi kiate kinautolu ‘oku fehi‘a ki he ‘afiona, pea ko hono ‘uhinga ki ho ngaahi fili.

²⁰Ko e ‘akau na‘a ke mamata ki ai, ‘a ia na‘e lahi mo mālohi, na‘e tatae ‘e hono tumutumu ‘a e langi, pea mātā ‘e māmani kātoa;

²¹‘a ia na‘e faka‘ofo‘ofa hono ‘ulu‘ulu, mo lahi hono fua, pea ‘i ai ha me‘akai ki he me‘a kotoa; na‘e nofo ‘a e fanga manu ‘o e vao ‘i hono malu, pea fale ‘a e ngaahi manupuna ‘o e ‘atā ‘i hono va‘a —

²²ko e ‘afiona ia, he kuo ke tupu ke lahi mo mālohi, pea kuo tupu ho lahi ‘o a‘u ki langi, pea ‘oku a‘u ho hau ki he pā‘angangalu ‘o māmani.

²³Pea hangē na‘e vakai ‘e he ‘afiona ki ha taha le‘o, ha taha ‘i he fa‘ahinga tapu, ‘oku ne hifo mei langi, ‘o ne fekau, ‘o pehē, Tā ‘a e ‘akau, ‘o faka‘auha ia; kae tuku ‘i he kelekele ‘a hono tefito, ‘io, ‘o ha‘i ‘aki ‘a e ‘aione mo e palasa ‘i he mohuku mui ‘o e vao, pea tuku ke viku ia ‘i he hahau mei langi, pea ke ne ma‘u ‘inasi fakataha mo e fanga manu ‘o e vao, kae‘oua ke laka atu ai ha fitu‘i kuonga —

²⁴‘Ēī, ko hono ‘uhinga eni, pea ko e tu‘utu‘uni ia ‘a ‘Elioni, ‘a ia ‘e hoko ki he ‘afiona,

²⁵‘E kapusi koe mei he kakai, pea ‘e fai ho‘o nofo mo e manu ‘o e vao, pea ‘e ngaohi koe ke kai musie hangē ko e pulu, pea te ke viku ‘i he hahau mei langi, pea ‘e laka atu ‘i he ‘afiona ha fitu‘i kuonga; kae‘oua ke ke mea‘i ‘oku hau ‘a ‘Elioni ‘i he pule‘anga ‘o e tangata, ‘o ne foaki ia ko ‘ene fa‘iteliha.

²⁶Pea ko e me‘a ‘i he‘enau fekau ke tuku ‘a e tefito ‘o e ‘akau; ‘e ma‘u pē ‘a ho‘o pule‘anga ma‘au, ‘oka kuo ke mea‘i ko langi ‘oku pule.

²⁷Ko ia, ‘e tu‘i, ‘ofa ke tō lelei ‘eku tokoni ki he ‘afiona: Motuhi ho‘o ngaahi angahala ‘i he faitotonu, mo ho‘o ngaahi kovi ‘i ho‘o fai ‘ofa ki he tu‘utāmaki;[9] hei‘ilo ‘e tolonga ai ho‘o tu‘umālie.

²⁸Na‘e hoko kotoa ‘a e me‘a ko ia kia Kingi Nepukanesa.

²⁹Hili ‘a e māhina ‘e hongofulu mā ua ‘oku ne hā‘ele ‘i he funga palasi ‘i Pāpilone.

³⁰Folofola ‘a e tu‘i ‘o pehē, ‘Ikai ko fu‘u Pāpilone ena, ‘a ia kuo u langa mōku fale hau ‘aki ‘a e ivi ‘o hoku māfimafi, ke ongoongoa hoku lāngilangi?

³¹Lolotonga na‘e kei ‘i he fofonga ‘o e tu‘i ‘a e lea, na‘e tō ha le‘o mei he langi, ‘o pehē, Kingi Nepukanesa, ko e folofola eni kiate koe: kuo hiki ho‘o pule‘anga meiate koe.

³²Pea ‘e kapusi koe mei he kakai, pea ‘e fai ho‘o nofo fakataha mo e fanga manu ‘o e vao: ‘e ngaohi koe ke kai musie ‘o hangē ko e pulu, pea ‘e laka ‘iate koe ha fitu‘i kuonga; kae‘oua ke ke ‘ilo ‘oku hau ‘a ‘Elioni ‘i he pule‘anga ‘o e tangata, pea ‘oku ne foaki ia ko ‘ene fa‘iteliha.

³³‘I he houa pē ko ia na‘e fakaai ‘a e lea kia Nepukanesa; he na‘e kapusi ia mei he kakai, pea ne kai musie hangē ko e pulu, pea na‘e viku hono sino ‘i he hahau mei langi, kae‘oua ke tatau hono fulufulu mo e ‘īkale, pea mo hono nge‘esi va‘e mo e pesipesi ‘o e manupuna.

³⁴‘I he ‘osi ‘a e ngaahi ‘aho, ko au Nepukanesa na‘a ku tāngaki hoku mata ki he langi, pea na‘e foki mai hoku loto, pea u fakamālō‘ia ‘a ‘Elioni, pea u fakafeta‘ia mo fakahīkihiki‘i ‘a ia ‘oku ‘afio ‘o ta‘engata; he ko hono hau ko e hau ta‘engata, pea ko hono pule‘anga ‘oku mei he to‘utangata ki he to‘utangata.

³⁵Pea ko e kotoa ‘o e nofo ‘i māmani ‘oku lau ‘e ia ko e me‘a noa, pea ‘oku ne fai hono finangalo ‘i he tau ‘o e langi, pea ‘i he lotolotonga ‘o e nofo ‘i māmani: pea ‘oku ‘ikai ha taha te ne mata‘ofi hono nima, pe ‘eke kiate ia, Ko e hā ‘oku ke fai?

³⁶‘I he taimi ko ia na‘e foki mai ‘eku poto; pea ko e me‘a ki he lāngilangi ‘o hoku pule‘anga na‘e foki mai hoku teunga‘ia mo hoku toulekeleka; pea na‘e kumi kiate au ‘eku kau minisitā mo hoku hou‘eiki, pea na‘e fokotu‘u au ‘i he‘eku pule, pea na‘e fakalahi mai hoku lāngilangi‘ia.

³⁷Pea ko eni, ko au Nepukanesa ‘oku ou fakamālō mo fakahīkihiki‘i mo fakalāngilangi‘i ‘a e Hau ‘o langi; he ko ‘ene ngāue kotoa pē ‘oku fai tu‘unga, pea ko hono ngaahi ‘alunga ‘oku ‘osi-‘a-sivi: pea ko kinautolu ‘oku taka fielahi, ‘oku ne mafai ke fakavaivai‘i.