Read KO E TOH TAPU KATOA TONGA KO TĀNIELA 5 Bible Online

KO TĀNIELA 5 - KO E TOH TAPU KATOA TONGA bible

KO TĀNIELA 5

¹KO KINGI PELISASA na‘a ne fai ha kātoanga lahi ki ha toko afe ‘o hono hou‘eiki, pea na‘a ne inu kava ‘i he ‘ao ‘o e toko afe.

²Pea lolotonga ‘ene kamata ‘a e uaine, na‘e fekau ‘e Pelisasa ke ‘omai ‘a e ngaahi ipu koula mo siliva, ‘a ia ne fetuku mai ‘e he‘ene ‘eiki ko Nepukanesa[10] mei he Temipale ‘i Selusalema; koe‘uhi ke inu kava ‘aki ‘e he tu‘i mo hono hou‘eiki, ‘a hono ngaahi uaifi mo ‘ene kau sinifu.

³Pea nau ‘omi ‘a e ngaahi ipu koula, ‘a ia na‘e fetuku mei he temipale ‘o e fale ‘o e ‘Otua ‘i Selusalema; pea na‘e inu kava ai ‘a e tu‘i mo hono hou‘eiki, ‘a hono ngaahi uaifi mo ‘ene kau sinifu.

⁴Na‘a nau inu kava, mo nau fakahīkihiki‘i ‘a e ngaahi ‘otua koula mo siliva, ‘a e palasa, ‘aione, ‘akau mo maka.

⁵‘I he houa ko ia na‘e nga‘unu mai ‘a e louhi‘i nima ‘o ha tangata, ‘o ne fai tohi ‘i he ‘aofi palasi fe‘unga mo e tu‘unga maama: pea na‘e mamata ‘e he tu‘i ki he konga ‘o e nima na‘e fai ‘a e tohi.

⁶Pea ko e tu‘i leva — na‘e liliu hono fofonga, pea fakailifia‘i ia ‘e he‘ene ngaahi filio‘i, pea na‘e hangē kuo homo hono tenga, pea fepaki hono ongo tui.

⁷Kalanga le‘o lahi ai ‘a e tu‘i ke fakahū mai ‘a e kau maki mo e kau Kalitia mo e kau ‘asitalōnome. Fokotu‘u ‘e he tu‘i ‘ene folofola ki he ha‘a poto ‘o Pāpilone, ‘o pehē, ‘Ilonga ha tangata te ne lau ‘a e tohi ko ē, pea fakahā mai hono ‘uhinga, ‘e ‘ai ki ai ha kofu kulokula, pea kahoa ‘aki ha seini koula, pea te ne hoko ko hono tolu ‘o e pule ‘i he pule‘anga.

⁸Toki hū mai ‘a e kau poto kotoa pē ‘a e tu‘i; ka na‘e ‘ikai te nau lava ke lau ‘a e tohinima, pe fakahā hono ‘uhinga.

⁹Pea hoha‘a ‘aupito ‘a Kingi Pelisasa, pea lolou hono fofonga, pea na‘e puputu‘u hono hou‘eiki.

¹⁰Ha‘u ai ‘a e tu‘i fefine ki he fale kava, ko e me‘a ‘i he lea ‘a e tu‘i mo hono hou‘eiki; pea fakatau folofola ‘e he tu‘i fefine ‘o pehē, Ke lākoifie ma‘u ai pē ‘a e ‘afiona! ‘oua na‘a fakahoha‘a koe ‘e ho‘o ngaahi fifili, pea ‘oua ‘e lolou ho fofonga.

¹¹‘Oku ai ha tangata ‘i ho pule‘anga ‘a ia ‘oku ‘iate ia ‘a e laumālie ‘o e ngaahi ‘otua toputapu;[11] pea ‘i he kuonga ‘o ho‘o ‘eiki na‘e hā ai ha maama mo ha ‘atamai mo ha poto, hangē ko e poto ‘o ha‘a ‘otua: pea ko ho‘o ‘eiki ko Kingi Nepukanesa, ‘io, ‘a e ‘afio ko ho‘o ‘eiki,[12] na‘a ne ngaohi ia ko e pule ‘o e kau sikalaipe, maki, Kalitia, mo ‘asitalōnome;

¹²koe‘uhiā na‘e ‘ilo ‘iate ia ha laumālie fungani, mo e ‘ilo me‘a, mo e poto, mo e faka‘uhinga misi, mo e mate tupu‘a, mo e vete ‘o e ngaahi me‘a ‘oku fihi; ‘io, na‘e hā ia ‘i he toko taha ko ia, ‘a Tāniela, ‘a ia na‘e fakahingoa ‘e he tu‘i ko Pelitisasa. Ko ia ke ui mai ‘a Tāniela, pea te ne fakamatala ‘a e ‘uhinga.

¹³Toki fakahū mai ‘a Tāniela ki he ‘ao ‘o e tu‘i. Me‘a ‘a e tu‘i ‘o ne folofola kia Tāniela, ‘o pehē, Ko koe ‘a e Tāniela koā mei he kau pōpula Siuta, ‘a ia na‘e ‘omi mei Siuta ‘e he tu‘i ko ‘eku ‘eiki?

¹⁴Kuo u fanongo kiate koe, tokua ‘oku ‘iate koe ‘a e laumālie ‘o e ngaahi ‘otua,[13] pea kuo hā ‘iate koe ha maama, mo e ‘atamai, mo e poto ‘oku fungani.

¹⁵Pea ko eni kuo ‘omi ki hoku ‘ao ‘a e kau poto, ‘a e kau maki, ke lau ‘a e tohinima ko ē, mo fakahā hono ‘uhinga: ka kuo ‘ikai te nau lava ke faka‘uhinga ‘a e me‘a.

¹⁶Ka kuo u fanongo kiate koe ‘oku ke mafai ke faka‘uhinga me‘a, pea ke vete me‘a ‘oku fihi. Ko eni, kapau te ke lava ke lau ‘a e tohi, pea ke faka‘ilo mai hono ‘uhinga, te ke kofu kulokula, mo kahoa koula, pea te ke hoko ko hono tolu ‘o e pule ‘i he pule‘anga.

¹⁷Toki tali ‘a Tāniela, ‘o ne fakatau folofola ki he tu‘i, ‘o pehē, Ma‘u pē ho‘o ngaahi me‘a‘ofa, pea ‘atu ho‘o koloa ki ha taha kehe; ka te u lau pē ‘a e tohi ki he ‘afiona, pea te u faka‘ilo hono ‘uhinga.

¹⁸‘Ēī, na‘e foaki ‘e he ‘Otua Taupotu ki ho‘o ‘eiki ko Nepukanesa ha pule‘anga, mo ha aoniu, mo ha lāngilangi, mo ha ‘a‘apa‘ia;

¹⁹pea ko e me‘a ‘i he mā‘olunga kuo foaki kiate ia na‘e manavahē mo tetetete ‘i hono ‘ao ‘a e ngaahi kakai, matakali, mo fa‘ahinga lea: ‘ilonga ha taha na‘a ne finangalo ki ai na‘a ne tāmate‘i, pea ‘ilonga ha taha na‘a ne finangalo ki ai na‘a ne tuku ke mo‘ui; pea ‘ilonga ha taha na‘a ne finangalo ki ai na‘a ne fokotu‘u, pea ‘ilonga ha taha na‘a ne finangalo ki ai, na‘a ne hifo.

²⁰Ka ‘i he hīkisia hono loto, mo fefeka hono laumālie, ‘o ne fai fielahi, na‘e hifo ia mei he taloni ‘o e pule‘anga, pea na‘e ‘ave meiate ia hono lāngilangi:

²¹pea na‘e kapusi ia mei he kakai, pea na‘e ngaohi hono loto ke hangē ko e fanga manu, pea na‘a ne nofo‘anga fakataha mo e fanga ‘asi kaivao; na‘e fafanga ia ‘aki ‘a e mohuku, hangē ko e pulu, pea na‘e viku hono sino ‘i he hahau mei langi: kae‘oua ke ne mea‘i ‘oku hau ‘a e ‘Otua Taupotu ‘i he pule‘anga ‘o e tangata, pea ‘oku ne fakanofo ‘a ia ‘oku ne finangalo ki ai.

²²Pea ko koe, Pelisasa, ko hono ‘alo, kuo ‘ikai te ke fakavaivai‘i ho loto, neongo na‘a ke mea‘i ‘a e ngaahi me‘a ko ia kotoa;

²³ka kuo ke fakafuofuolahi koe ki he ‘Eiki ‘o Langi; pea ko e ngaahi ipu ‘o hono fale kuo nau ‘omi ki ho ‘ao, pea ko koe mo ho hou‘eiki, ho ngaahi uaifi mo ho‘o kau sinifu, kuo nau inu kava ai; pea kuo ke fakahīkihiki‘i ‘a e ngaahi ‘otua siliva mo koula, ‘a e palasa, ‘aione, ‘akau mo maka, ‘a ia ‘oku ‘ikai te nau sio, pe fanongo, pe ‘ilo ha me‘a: ka ko e ‘Otua ‘oku ‘i hono nima ho‘o mānava, pea ‘a‘ana ho ngaahi ‘alunga kotoa, kuo ‘ikai te ke fakalāngilangi‘i.

²⁴(Na‘e toki tuku atu mei hono ‘ao ‘a e potu nima, pea ko eni ‘a e tohinima kuo tohi.)

²⁵Pea ko eni ‘a e me‘a kuo tohi,

²⁶[14] Ko eni ‘a e ‘uhinga ‘o e me‘a: MINE; kuo ‘osi lau ‘e he ‘Otua ho‘o pule, pea kuo ne fakalato ia. TIKELI;

²⁷kuo fua koe ‘i he me‘afua, pea ‘oku ke ma‘ama‘a.

²⁸PESI; kuo vahe ho pule‘anga, ‘o foaki ki ha‘a Mītia mo Pēsia.[15]

²⁹Toki fekau ‘e Pelisasa, pea na‘a nau fakakofu ‘a Tāniela ‘aki ‘a e kulokula, ‘o nau kahoa ‘aki ha seini koula, pea nau fanongonongo ke ne nofo ko hono toko tolu ‘i he kau pule ‘i he pule‘anga.

³⁰‘I he pō ko ia na‘e tāmate‘i ‘a Pelisasa ko e tu‘i ‘o e kau Kalitia.

³¹Pea na‘e ma‘u ‘a e pule ‘e he Mītia ko Talaiasi, kuo ne fe‘unga nai mo e onongofulu mā ua ta‘u.