Read KO E TOH TAPU KATOA TONGA KO TĀNIELA 6 Bible Online

KO TĀNIELA 6 - KO E TOH TAPU KATOA TONGA bible

KO TĀNIELA 6

¹Na‘e finangalo ‘e Talaiasi ke fakanofo ke pule ‘i he pule‘anga ha ngaahi tu‘i fakale‘o ‘e teau mā uofulu, ke totofu ai ‘a e ngaahi potu kotoa pē ‘o e pule‘anga.

²Pea mo ha minisitā ‘e toko tolu ke pule kiate kinautolu, ‘a ia ko honau toko taha ‘a Tāniela; koe‘uhi ke fou ‘iate kinautolu ‘a e ngaahi tohi ‘a e kau tu‘i fakale‘o, ke ta‘ofi ‘a e maumau ‘o e koloa ‘a e tu‘i.

³Pea na‘e toki hangē ha fanāfotu ‘a e Tāniela ni ‘i he kau minisitā mo e ngaahi tu‘i fakale‘o, koe‘uhi na‘e ‘iate ia ha laumālie na‘e fungani; pea na‘e fakakaukau ‘a e tu‘i ke fokotu‘u ia ke pule ki he pule‘anga kotoa.

⁴Pea nofo ‘a e kau minisitā mo e ngaahi tu‘i fakale‘o ke kumi ha tu‘unga ke tu‘utāmaki ai ‘a Tāniela ‘i he ngāue fakapule‘anga; ka na‘e ‘ikai te nau lava ke ma‘u ha momo‘i me‘a ke talatalaaki‘i ai ia, pe ha kovi; koe‘uhi na‘a ne fai tōnunga, ko ia na‘e ‘ikai ‘ilo ha momo‘i faihala pe kovi ‘iate ia.

⁵Pea toki fealēlea‘aki ‘a e tu‘unga matāpule ko ē, ‘E ‘ikai te tau ma‘u ha me‘a ke tu‘utāmaki ai ‘a e Tāniela ni, ka ‘i he‘etau kumi ki ai ‘i he lao ‘o hono ‘Otua.

⁶Pea fe‘ohofi mai ki he tu‘i ‘a e kau minisitā ko ia, mo e ngaahi tu‘i fakale‘o, ‘o nau fakatau folofola kiate ia ‘o pehē, ‘E Kingi Talaiasi, ke ke lākoifie ‘o ta‘engata!

⁷Ko e kau minisitā ‘o e pule‘anga, ko e hou‘eiki, mo e ngaahi tu‘i fakale‘o, ko e fakataha tokoni, ko e kau kōvana, kuo mau alea kotoa pē ke fokotu‘u ha tu‘utu‘uni fakatu‘i, mo ha tapu mamafa, Ke ‘ilonga ha tangata te ne fai ha kole ki ha ‘otua pe ha tangata ‘i he tolungofulu‘i ‘aho ka hoko mai, ngata pē ki he ‘afiona, ‘e lī ia ki he ‘ana ‘o e fanga laione.

⁸Ko ia, ke fakapapau ‘e he ‘afiona ‘a e tapu, mo ‘ai ho nima ki he tohi, ke ‘oua na‘a liliu, ‘o hangē ko e ngaahi lao ‘o ha‘a Mītia mo Pēsia, ‘a ia ‘oku ta‘emaliliu.

⁹Pea ‘i he‘ene pehē ‘a e me‘a, na‘e sila‘i ‘e Talaiasi ‘a e tohi mo e tapu.

¹⁰Pea ‘i he ‘ilo leva ‘e Tāniela kuo sila‘i ‘a e tohi, na‘a ne ‘alu ki hono fale; (pea na‘e ai ‘i hono loki ‘i ‘olunga ‘a e ngaahi kātupa na‘e ava, ‘i he hāngai ki Selusalema): pea ‘i he taimi tu‘utu‘uni, tu‘o tolu ‘i he ‘aho, na‘a ne tū‘ulutui, ‘o ne lotu mo fai ‘ene fakafeta‘i ‘i he ‘ao ‘o hono ‘Otua, ‘o hangē tofu pē ko ‘ene fai ‘i he te‘eki ke hoko ‘a e me‘a.

¹¹Toki fe‘ohofi mai ‘a e tu‘unga matāpule ko ē, ‘o nau ‘ilo ‘a Tāniela ‘oku ne fai ‘ene kole mo ‘ene hūfia ki hono ‘Otua.

¹²Pea nau ‘unu‘unu atu, ‘o fakatau folofola ki he tu‘i, ‘o kau ki he tapu ne fokotu‘u ‘e he ‘afio, ‘Ikai na‘a ke sila‘i ha tapu, ‘o pehē, Ka ‘ilonga ha taha te ne fai ka kole ki ha ‘Otua, pe ha tangata, ‘i he tolungofulu‘i ‘aho ka hoko mai, ngata pē ki he ‘afiona, ‘e lī ia ki he ‘ana ‘o e fanga laione?

¹³Tali ‘e he tu‘i, ‘o ne me‘a, Kuo pau ia, ‘o hangē ko e ngaahi lao ‘o ha‘a Mītia mo Pēsia, ‘a ia ‘oku ta‘emaliliu.

¹⁴Pea nau tali, ‘o fakatau folofola ki he tu‘i, ‘o pehē, ‘Ēī, ko e Tāniela na, ko e taha ‘i he kau pōpula Siuta, ‘oku ‘ikai te ne toka‘i ‘a e ‘afiona, pe ko e tapu kuo ke sila‘i; ka ‘oku ne fai ‘ene hūfia tu‘o tolu ‘i he ‘aho.

¹⁵Pea ‘i he fanongo ‘e he tu‘i ki he lea ko ia, na‘e mamahi hono finangalo; ‘o ne feinga‘i ‘a Tāniela ke fakahaofi ia: pea na‘a ne fefa‘uhi ‘i hono fakamo‘ui ‘o a‘u ki he hifo ‘a e la‘ā.

¹⁶Toki fe‘ohofi mai ‘a e tu‘unga matāpule ko ē ki he tu‘i, ‘o nau fakatau folofola ki he ‘afio ‘o pehē, ‘Ēī, ke ke mea‘i ko e lao ‘o ha‘a Mītia mo Pēsia eni, Ka ‘ilonga ha tapu pe ha tu‘utu‘uni kuo fokotu‘u ‘e he tu‘i, ‘oku ta‘emaliliu ia.

¹⁷Toki folofola ‘a e tu‘i, pea nau ‘omi ‘a Tāniela, ‘o lī ki he ‘ana ‘o e fanga laione. Me‘a ‘a e tu‘i ‘o ne folofola kia Tāniela, Ko e ‘Otua ‘oku ke tauhi ta‘etūkua ki ai, te ne fakahaofi koe.

¹⁸Pea na‘e ‘omi ha fu‘u maka, ‘o ‘ai ki he ngutu ‘ana; pea sila‘i ia ‘e he tu‘i ‘aki ‘ene sila ‘a‘ana, mo e sila ‘a hono hou‘eiki, ke ‘oua na‘a liliu ‘a e me‘a ‘a Tāniela.

¹⁹Pea ‘alu ‘a e tu‘i ki hono palasi, ‘o ne ‘aukai ‘o ‘aho, pea na‘e ‘ikai ‘omi ha kau fefine ki hono ‘ao, pea na‘e ‘ikai te ne lava ke mohe.

²⁰Toki tu‘u hengihengi hake ‘a e tu‘i ‘i he ma‘a ‘a e ‘aho, ‘o ne hā‘ele fakavave ki he ‘ana laione.

²¹Pea ‘i he‘ene fakaofiofi ki he ‘ana kia Tāniela na‘a ne lea fakapetepetetangi; ‘io, na‘e me‘a ‘a e tu‘i ‘o ne folofola kia Tāniela, ‘E Tāniela, tamaio‘eiki ‘o e ‘Otua Mo‘ui, kuo mafai koā ‘e ho ‘Otua, ‘a ia ‘oku ke tauhi ta‘etūkua ki ai, ke fakahaofi koe mei he fanga laione?

²²Toki fefolofolai ‘a Tāniela mo e tu‘i. Ke lākoifie ma‘u ai pē ‘a e ‘afiona!

²³Kuo fekau ‘e hoku ‘Otua ‘ene ‘āngelo, pea kuo ne tāpuni ‘a e ngutu ‘o e fanga laione, pea kuo ‘ikai te nau momo‘i fai ha kovi kiate au: koe‘uhi na‘e ‘ilo ‘iate au ‘a e haohaoa ‘i hono ‘ao; pea ‘i he fakafeangai ki he ‘afiona foki kuo ‘ikai ha‘aku kovi kuo fai.

²⁴Toki fiefia ‘aupito ‘a e tu‘i, pea ne folofola ke ‘ohake ‘a Tāniela mei he ‘ana. Pea na‘e ‘ohake ‘a Tāniela mei he ‘ana; pea na‘e ‘ikai ‘ilo ha kovi ‘iate ia, koe‘uhi kuo ne falala ki hono ‘Otua.

²⁵Pea folofola ‘a e tu‘i, pea nau ‘omi ‘a e tu‘unga matāpule na‘a nau talakovi‘i ‘a Tāniela, pea na‘a nau lī kinautolu ki he ‘ana ‘o e fanga laione, ‘a kinautolu mo ‘enau fānau mo honau ngaahi uaifi; pea na‘e lava‘i kinautolu ‘e he fanga laione, mo laiki honau ngaahi hui, ‘i he te‘eki ke nau a‘u ki he takele ‘o e ‘ana.

²⁶Toki tohi ‘a Kingi Talaiasi ki he ngaahi kakai, matakali, mo fa‘ahinga lea ‘oku nofo ‘i māmani kātoa, ‘o pehē; ‘Ofa ke lahi ho‘omou fiemālie!

²⁷‘Oku ou ‘atu mei hoku ‘ao ha tu‘utu‘uni, ‘o pehē, Ke ilifia mo tetetete ‘a e kakai ‘i he ao ‘o e ‘Otua ‘o Tāniela, ‘i he ngaahi feitu‘u kotoa ‘o hoku pule‘anga: he ko ia ia ‘a e ‘Otua mo‘ui, mo tu‘u ma‘u ‘o ta‘engata, pea ko hono pule ‘e ‘ikai mole, pea ko hono hau ‘e a‘u ki he pā‘angangalu ‘o taimi.

²⁸‘Oku ne fai fakahaofi mo hamusi, pea ‘oku ne feia ‘a e ngaahi faka‘ilonga mo e ngaahi me‘a fakaofo ‘i langi pea ‘i māmani; he kuo ne fakahaofi ‘a Tāniela mei he pesipesi ‘o e fanga laione.

²⁹Ko ia na‘e tu‘umālie ‘a e Tāniela ni ‘i he hau ‘o Talaiasi, pea mo e hau ‘o Kōlesi ko e Pēsia.