Read KO E TOH TAPU KATOA TONGA KO TĀNIELA 7 Bible Online

KO TĀNIELA 7 - KO E TOH TAPU KATOA TONGA bible

KO TĀNIELA 7

¹‘I HE ‘uluaki ta‘u ‘o Pelisasa ko e Tu‘i Pāpilone na‘e misi ‘a Tāniela, pea hā ki hono ‘ulu ha ngaahi vīsone ‘i he‘ene toka: Toki tohi ‘e ia ‘a e misi; ko hono kakano na‘a ne fakahā.

²Lea ‘a Tāniela, ‘o ne pehē, Na‘a ku mo‘usioa pē ‘i he‘eku vīsone po‘uli, pea ‘iloange ko e matangi ena ‘e fā ‘o langi ‘oku pā mai ki he tahi lahi.

³Pea ‘alu hake ha fu‘u manu ‘e fā mei he tahi, ‘oku nau takitaha ha anga.

⁴Ko e ‘uluaki na‘e hangē ha laione, pea na‘e ‘iate ia ‘a e kapakau ‘o e ‘īkale. Na‘a ku mo‘usioa pē kae‘oua ke fusi hono kapakau, pea mahiki ia mei he kelekele, ‘o ‘ai ke tu‘u fakave‘eua, hangē ha tangata, mo ‘ange ki ai ha loto‘i tangata.

⁵Pea ‘iloange ko ha manu ‘e taha, ko hono ua, hangē ha pea, pea na‘e mahiki hono tafa‘aki ‘e taha, pea ‘oku ne ‘ūtaki ha hui palalulu ‘e tolu: pea na‘e pehē ‘enau fekau ki ai, Tu‘u, ‘o kai kakano lahi.

⁶Hili ia na‘a ku mo‘usioa pē, pea ‘iloange ko ha taha hangē ha lēpati, pea ‘i hono tu‘a ha faa‘i kapakau ‘o ha manupuna; pea na‘e ‘ulu fā foki ‘a e manu, pea na‘e tuku ‘a e pule ki ai.

⁷Hili ia na‘a ku mo‘usioa pē ‘i he vīsone po‘uli, pea ‘iloange ko ha manu ko hono fā, fakailifia mo fakalilifu, mo mālohi kehe; pea na‘e ‘iate ia ‘a e ngaahi nifo ‘aione lalahi: na‘a ne keina, mo laiki, mo ne malaki hono toe ‘aki hono va‘e: pea na‘e makehe ia mei he ngaahi manu kotoa pē na‘e mu‘omu‘a; pea na‘e ‘iate ia ha hongofulu‘i nifo.

⁸Na‘a ku mo‘u fifili he ngaahi nifo, mo e ‘iloange na‘e tupu hake ha nifo ‘i honau lotolotonga, ko e nifo si‘i; pea ‘i hono ‘ao na‘e ta‘aki fu‘u ha nifo ‘e tolu ‘i he ngaahi ‘uluaki nifo: pea uoke, ‘i he nifo ko ia na‘e ai ‘ani fo‘i fofonga hangē ko e mata ‘o e tangata, mo ha ngutu ‘oku ne ‘a‘au me‘a lalahi.

⁹Na‘a ku mo‘usioa pē, kae‘oua ke fokotu‘u[16] ‘ani ngaahi taloni, pea ‘afio mai ‘a Talumeimu‘a: ko hono kofu na‘e hangē ko e sinou, ‘o hinaekiaki, pea ko hono lou‘ulu na‘e hangē ko e fulufulu‘i sipi ma‘a; ko hono taloni koni ulo‘i afi, ko hono me‘a teka ko e afi kakaha.

¹⁰Na‘e pā mai ha vai afi ‘i hono ‘ao, ‘o tafe atu; ko e toko‘i afe laui afe na‘e fakafe‘ao kiate ia, pea ko e toko‘i mano laui mano na‘e tu‘u ‘i hono ‘ao. Na‘e fokotu‘u ‘a e fakamaau, pea na‘e folahi ‘a e ngaahi tohi.

¹¹Na‘a ku mo‘usioa pē, pea ‘āsili ko e ongoonga‘a mai ‘a e me‘a lalahi na‘e lea‘aki ‘e he Nifo. Na‘a ku mo‘usioa pē kae‘oua ke tāmate‘i ‘a e manu, mo faka‘auha hono sino, pea na‘e tuku ia ke fakamomofi ‘i he afi.

¹²Pea ko hono toe ‘o e ngaahi manu na‘e ‘ave ‘enau hau, ka na‘e fakatolonga ‘enau mo‘ui, ‘o tuku kiate kinautolu ha taimi mo ha kuonga.

¹³Na‘a ku mo‘u sioa pē ‘i he ngaahi vīsone po‘uli, pea ‘iloange ko ha Taha hangē ha hako‘i tangata na‘e hoko mai mo e ngaahi ‘ao ‘o e langi, pea ne a‘u mai kia Talumeimu‘a, ‘io, na‘a nau ‘omi ia ki hono ‘ao.

¹⁴Pea na‘e tuku kiate ia ha hau, mo ha lāngilangi, mo ha pule, koe‘uhi ke tauhi kiate ia ‘e he ngaahi kakai, matakali, mo fa‘ahinga lea kehekehe: ko hono hau ko e hau ta‘engata, ‘a ia ‘e ‘ikai liua, pea ko hono pule‘anga ko e taha ‘e ‘ikai ‘auha.

¹⁵Pea mamahi ai hoku laumālie — ‘o‘oku Tāniela — ‘i hoku loto kakano, pea na‘e fakahoha‘asi au ‘e he ngaahi vīsone na‘e hā ki hoku ‘ulu.[17]

¹⁶‘Unu‘unu atu au ki ha taha ‘iate kinautolu na‘e tutu‘u mai, pea u hanga ‘o fehu‘i kiate ia ki he mo‘oni ‘o e ngaahi fu‘u me‘a ko ia. Pea ne lea mai, ‘o ne fakamahino kiate au ‘a e ‘uhinga ‘o e ngaahi me‘a.

¹⁷Ko e ngaahi fu‘u manu ko ē, ‘a ia ‘oku fā, ko e faa‘i tu‘i ia, ‘a ia ‘oku ‘alu hake mei māmani.

¹⁸Kae ma‘u ‘a e pule‘anga ‘e he kau tapu ‘a ‘Elioni, pea te nau ma‘u ai pē ‘a e pule‘anga ‘o ta‘engata, ‘io, ki he ta‘engata ‘o e ta‘engata.

¹⁹Toki kole au ke ne fakamatala ki he manu ko hono fā, ‘a ia na‘e makehe mei he ngaahi manu ko ē, ‘o fakailifia faufau; ko hono nifo ko e ‘aione, pea ko hono pesipesi ko e palasa; na‘a ne keina, mo laiki, mo malaki hono toe ‘aki hono va‘e.

²⁰Mo e ‘uhinga ‘o e hongofulu‘i nifo na‘e ‘i hono ‘ulu: mo e taha na‘e tupu hake, pea tō ‘i hono ‘ao ‘a e tolu; ‘io, ‘a e nifo na‘e ai ‘ani fo‘i fofonga, mo ha ngutu na‘e ‘a‘au me‘a lalahi, pea ko hono fotu na‘e hulu ‘i honau fa‘ahinga.

²¹Na‘a ku mo‘u sioa pē, pea fai tau ‘a e nifo ko ia mo e fa‘ahinga tapu, ‘o ne ikuna kinautolu;

²²kae‘oua ke hoko mai ‘a Talumeimu‘a, ‘o fakaai ‘a e fakamaau ‘o e me‘a ‘a e kau tapu ‘a ‘Elioni;[18] pea na‘e hoko ‘a e taimi ke ma‘u ‘a e pule‘anga ‘e he fa‘ahinga tapu.

²³Na‘e pehē ‘ene tali: Ko e manu ko hono fā ko hano fā ia ‘o e pule‘anga ‘i māmani, ‘a ia ‘e makehe mo e pule‘anga kotoa pē, pea te ne keina ‘a māmani kātoa, mo malaki mo laiki ke lailai.

²⁴Pea ko e me‘a ki he hongofulu‘i nifo, ‘e tupu mei he pule‘anga ko ia ha hongofulu‘i tu‘i: pea kimui ‘iate kinautolu ‘e tupu ha taha kehe; pea, ko e taha ko ia ‘e makehe mo kinautolu na‘e mu‘omu‘a, pea te ne tulaki ha tolu‘i tu‘i.

²⁵Pea te ne feia ha ngaahi lea ke tau ki he ‘Otua Taupotu,[19] pea te ne fai ke faka‘osi ‘a e kau tapu ‘a ‘Elioni: pea te ne ‘amanaki ke liliu ‘a e ngaahi taimi mo e lao; pea ‘e tuku kinautolu ki hono nima kae‘oua ke ‘osi ha kuonga mo ha ua‘i kuonga mo ha haafe kuonga.

²⁶Ka ‘e fokotu‘u ‘a e fakamaau, pea te nau ‘ave ‘ene hau, ke maumau‘i ia mo faka‘auha, ‘o a‘u ki he ngata‘anga.

²⁷Pea ko e pule‘anga mo e hau mo e ivi ‘o e ngaahi pule‘anga ‘i he lalo langi kātoa ‘e ‘atu ia ki he kakai tapu ‘a ‘Elioni: ko ‘ene pule‘anga ko e pule‘anga ta‘engata, pea ‘e tauhi mo fakaongo kiate ia ‘a e hau fua pē.

²⁸Ko e ngata‘anga ia ‘o e me‘a. Ko e me‘a kiate au Tāniela, na‘e fu‘u fakahoha‘asi au ‘e he‘eku ngaahi fakakaukau, pea na‘e kehe hoku mata; ka na‘a ku ta‘ofi ‘a e me‘a kiate au.