Read KO E TOH TAPU KATOA TONGA KO TĀNIELA 8 Bible Online

KO TĀNIELA 8 - KO E TOH TAPU KATOA TONGA bible

KO TĀNIELA 8

¹‘I HONO tolu ta‘u ‘o e pule ‘a Kingi Pelisasa na‘e hā ha vīsone kiate au, ‘a au Tāniela, hili ‘a e hā ‘a e me‘a na‘e hā kiate au mu‘a.[20]

²Pea ko e me‘a na‘a ku sio ki ai ‘i he vīsone: ‘iloange ‘i he‘eku sio, tā ‘oku ou ‘i Sūsani Lotokolo, ‘a ia ‘oku ‘i he vahefonua ko ‘Īlami, pea u vakai ‘i he‘eku vīsone ‘oku ou ‘i he ve‘e vaitafe ko ‘Ulai.

³Pea u tāngaki hake hoku mata, ‘o fakasio, pea tā ko e taha‘i sipi tangata ena ‘oku tu‘u ‘i he mata ‘o e vaitafe, pea na‘e ‘iate ia ha nifo ‘e ua: pea ko e ongo nifo na‘e loloa, ka na‘e lōloa ‘a e taha ‘i he taha, pea ko e lōloa taha na‘e tupu fakamuimui,

⁴Na‘a ku sio ki he sipi tangata ‘oku ne tui‘i atu ki lulunga mo e tokelau mo e tonga; pea na‘e ‘ikai lava ‘e he fanga manu ke tu‘u ‘i hono ‘ao, pea na‘e ‘ikai ha taha ‘e mafakahaofi mei hono nima; ko ia na‘a ne fai ‘ene fa‘iteliha, ‘o ne hoko ko e lahi.

⁵Pea lolotonga ‘oku ou fifili ki ai, tā ko e kosi tangata ena ‘oku ha‘u mei hihifo; ‘oku ne a‘a mai ‘i he ngaahi funga fonua, ka ‘oku ‘ikai te ne lave ki he kelekele: pea na‘e ma‘u ‘e he kosi tangata ha nifo na‘e fatu, ‘i he vaha‘a ‘o hono ongo mata.

⁶Pea ne a‘u ki he sipi tangata na‘e nifo ua, ‘a ia na‘a ku sio ki ai ‘oku ne tu‘u ‘i he mata ‘o e vaitafe, pea ne ‘oho fua ki ai ‘aki hono ivi kuo māfana.

⁷‘Io, na‘a ku sio ki ai ‘oku ne mātu‘aki pā atu ki he sipi tangata, ‘o ne lili ki ai, ‘o ne taa‘i ‘a e sipi tangata, ‘o ne maumau‘i hono ongo nifo; pea na‘e ‘ikai ha mālohi ‘i he sipi tangata ke matu‘uaki ia: pea ne humaki ia, ‘o ne malaki, pea na‘e ‘ikai ha taha ‘e mafakahaofi ‘a e sipi tangata mei hono nima.

⁸Pea faifai pea fotu ‘aupito ‘a e kosi tangata: pea ‘i he‘ene mālohi na‘e maumau ‘a e nifo lahi, pea tupu ke fetongi ia ha nifo ‘e fā na‘e ‘ilonga, ‘o hanga ki he matangi ‘e fā ‘o e langi,

⁹pea huli mei hanau taha ha taha‘i nifo, ‘a ia na‘e kamata mei he si‘i ‘aupito, ka ne hoko ko e me‘a lahi ange fau, ‘i he fai ki he tonga mo hahake, pea ki he Fonua Siueli.

¹⁰Pea ne tupu ai pē ‘o lahi, ‘o a‘u ki he hōsitē ‘o langi; pea ne lī hifo ki he fonua ha ni‘ihi ‘o e hōsitē ko ia, ‘io, ha ni‘ihi ‘o e ngaahi fetu‘u, ‘o ne malakekina kinautolu.

¹¹‘Io, na‘a ne fakapupula ia ‘o a‘u ki he ‘eiki ‘o e hōsitē, ‘o ne ‘ave meiate ia ‘a e lotu tu‘u ma‘u, pea na‘e tuku li‘aki ‘a e me‘a kuo langa mōno potu tapu.

¹²Pea ‘e kanoni ‘aki ‘a e me‘a ‘oku fai ki he lotu tu‘u ma‘u ‘a e tukuange ‘a e hōsitē koe‘uhi ko e fai talangata‘a;[21] pea te ne lī hifo ki he kelekele ‘a e mo‘oni, pea ne fai me‘a, ‘o tu‘umālie.

¹³Pea na‘a ku fanongo ki ha taha ‘i he fa‘ahinga tapu ‘oku lea; pea tali ki he toko taha ko ia na‘e lea ha taha kehe ‘o e fa‘ahinga tapu, ‘E a‘u ki he taimi fē ‘a e vīsone ‘oku kau ki he lotu tu‘u ma‘u, mo e talangata‘a ‘oku fakangaongao, ‘a e tuku ‘a e potu tapu mo e hōsitē ke malakekina fakatou‘osi?

¹⁴Pea ne pehē mai: ‘O a‘u ki hono ua afe mā tolungeau ‘o e efiafi-pongipongi; pea toki fakama‘a ‘a e potu tapu.

¹⁵Pea ‘i he‘eku mamata leva, ‘a au Tāniela, ki he vīsone, na‘a ku feinga ke ‘ilo ki hono ‘uhinga; pea ‘iloange na‘e tu‘u ‘i hoku ‘ao ha taha na‘e ngali ko ha fu‘u tangata.

¹⁶Pea u ongo‘i ‘a e le‘o ‘o ha tangata mei he vaha‘a ‘o e ongo kauvai ‘o ‘Ulai, ‘a ia na‘e ui ange, ‘o ne pehē, ‘E Kepaleli, fakahinohino ki he taha ko ē ‘a e me‘a kuo hā.

¹⁷Ko ia, na‘a ne ‘unu‘unu mai ki he potu na‘a ku tu‘u ai; pea ‘i he‘ene a‘u mai, ne u manavahē, ‘o tō fo‘ohifo: ka ka pehē mai ‘e ia, Hako‘itangata, tokanga,[22] he ‘oku kau ‘a e vīsone ki he kuonga fakamui.

¹⁸Pea ‘i he‘ene talanoa mo au, na‘a ku mo‘u matea ‘o fo‘ohifo ai pē; ka ka ala ‘e ia kiate au, ‘o ne fokotu‘u au ke u tu‘u.

¹⁹Pea ne pehē mai, Sī ni, ko ‘eku faka‘ilo ē kiate koe ‘a e me‘a ‘e hoko ‘i he houhau fakamui: he ‘oku kau ‘a e vīsone ki he taimi fakamui kuo tu‘utu‘uni.

²⁰Ko e sipi tangata na‘a ke sio ki ai na‘e nifo ua, ko e ngaahi tu‘i ia ‘o Mītia mo Pēsia.

²¹Pea ko e kosi tangata fulufulua, ko e Tu‘i Kalisi[23] ia; pea ko e fu‘u nifo na‘e tu‘u ‘i he vaha‘a ‘o hono ongo mata ko hono ‘uluaki tu‘i ia.

²²Pea ko e me‘a ki he maumau ‘a ē, mo e tupu hake ha fā ke fetongi ia, ‘e tupu hake ha faa‘i pule‘anga ‘i he kakai ko ia, kae ‘ikai ma‘u ‘a e ivi ‘o ē.

²³Pea ‘i he taimi fakamui ‘o honau pule‘anga, ‘oka fakalato ‘e he kau pau‘u ‘enau kovi, ‘e tu‘u mai ha tu‘i mata feta‘o, pea poto ‘i he lea kofukofu.

²⁴Pea te ne ivi lahi, kae ‘ikai fai‘aki hono ivi ‘o‘ona; pea ‘e fakaofo ‘ene maumau me‘a, pea te ne tu‘umālie ‘o fai atu; pea te ne maumau ha kau mālohi, pea mo e fa‘ahinga tapu.

²⁵Pea ko e me‘a ‘i he‘ene ‘ilo‘ilo, ‘e tu‘umālie ai ‘a e kākā ‘i he‘ene fai ko ia; te ne fakapupula hono loto, pea te ne maumau ha tokolahi ko ‘enau nofo noa; ‘io, te ne fakauke tau ki he pule ‘o e ngaahi pule; kae maumau ia ta‘ekau ai ha nima.

²⁶Pea ko e ma‘ali ‘o e ngaahi efiafi pongipongi, ‘a ia na‘e fakamatala, ko e koto mo‘oni ia: ka ko koe te ke tāpuni ‘a e vīsone; he ko e me‘a ki ha taimi mama‘o.

²⁷Pea ko au Tāniela ne u pongia, pea na‘a ku mahaki ‘i he ‘aho ni‘ihi; pea u toki tu‘u, ‘o fai ‘a e ngāue ‘a e tu‘i: pea na‘a ku puputu‘u ‘i he me‘a na‘e hā mai, pea na‘e ‘ikai ha taha ‘e mafaka‘uhinga.