Read KO E TOH TAPU KATOA TONGA KO HOSEA 10 Bible Online

KO HOSEA 10 - KO E TOH TAPU KATOA TONGA bible

KO HOSEA 10

¹KO ‘Isileli ko e vaine kuo matua atu, ‘oku ne ‘ai atu hono fua: ka ko e lahi leva hono fua pea ne fakalahi hono ngaahi ‘ōlita; ko e lelei leva ‘a e fonua pea nau ngaohi ke lelei ange honau ngaahi pou tapu.

²Kuo molemole honau loto; ko e taimi ni te nau ongo‘i halaia: ko eni ia te ne fesi‘i ‘a e nifo ‘o honau ngaahi ‘ōlita, te ne maumau honau ngaahi pou tapu.

³Seuke, na‘a mo eni ‘oku nau lea, ‘o pehē, ‘Oku ‘ikai hatau tu‘i: koe‘uhi na‘e ‘ikai te tau ‘apasia kia Sihova; he ko e tu‘i ni, ko e hā te ne lava ma‘atautolu?

⁴Kuo nau lea ha koto lau pē ‘enau fuakava loi ‘enau fai talite: ko ia ‘oku fisiki mai ‘a e ngaahi hopo, ‘o hangē ko e ‘akau kona ‘i he kauefu ‘o e ngoue.

⁵‘Oku hoha‘a ‘a e nofo Samēlia telia ‘a e ta‘ahine kafi[31] ‘i Pete-‘āveni:[32] seuke, ‘e tangi koe‘uhi ko ia ‘a hono kakai, mo hono kau ngāue na‘e me‘e takatakai ki ai, koe‘uhi ko hono lāngilangi; he kuo mole mei ai.

⁶Na‘a mo e feitu‘u na, ‘e fakahā‘ele ki ‘Āsilia ko e me‘a‘ofa ki he Kingi Taukapo:[33] ko e me‘a ‘e ma‘u ‘e ‘Ifalemi ko e mā, pea tupu ‘a e fakamā ‘o ‘Isileli mei he fakakaukau ‘a‘ana.

⁷Kuo faka‘auha ‘a Samēlia, ‘a hono tu‘i, ‘o hangē ko e koa[34] ‘i he fukahi vai.

⁸Pea kuo maumau ‘a e ngaahi sia ‘o ‘Āveni,[35] ko e angahala ‘a ‘Isileli, ‘e kāsia honau ngaahi ‘ōlita ‘i he talatala mo e talatala‘āmoa: pea te nau hanga ‘o lea ki he ngaahi mo‘unga, Fufū kimautolu; pea ki he ngaahi mā‘olunga, Hinga mai kiate kimautolu.

⁹‘E ‘Isileli, talu ‘a e taimi ‘o Kipea mo ho‘o fai angahala: ko e potu ko ia ‘oku nau tu‘u ma‘u ai; ‘o ‘ikai koā a‘u kiate kinautolu ‘i Kipea[36] ‘a e tau na‘e fai ki he hako‘i pau‘u? [37]

¹⁰‘Āua, te u tautea kinautolu, ‘o taau mo ‘eku holi;[38] pea ‘e fakataha ‘a e ngaahi kakai ke fai ha me‘a kiate kinautolu, ko ‘enau ha‘i kinautolu ki ha ‘unoho ‘e toko ua.

¹¹Pea ko ‘Ifalemi ko e kau kuo ako, ‘oku ne manako ke fai ‘a e malaki; ka ko au eni te u fakatetenga ‘a e lelei ‘o hono kia:[39] te u ‘ai ha taha ke heka[40] ki ‘Ifalemi; ‘e toho palau ‘e Siuta, ka ko Sēkope te ne leeki hono kelekele.

¹²Fai ho‘omou tō ke tupu ko e mā‘oni‘oni, fai ho‘omou utu ke hoa mo e ‘ofa; keli ma‘amoutolu ha potu fo‘ou: he kuo taimi ke kumi kia Sihova, kae‘oua ke ne hoko mai, ‘o faka‘uha mā‘oni‘oni kiate kimoutolu.

¹³Kuo mou keli ‘a e pau‘u, kuo mou utu ‘a e kovi; kuo mou kai ‘a e fua ‘o e loi: he na‘a ke falala ki ho ‘alunga,[41] ki he tokolahi ‘o ho kau to‘a.

¹⁴Ko ia, ‘e ongoonga‘a mai ha me‘a ki ho ngaahi fa‘ahinga, pea ‘e maumau ho ngaahi talitau‘anga, hangē ko e maumau ‘e Salemani ‘a Peteapela ‘i he ‘aho ‘o e tau: na‘e havehave ‘a e fa‘ē ‘i he funga ‘o ‘ene fānau.

¹⁵‘E pehē ‘a e fai kiate kimoutolu ‘e Pēteli, koe‘uhi ko e kovi ‘o ho‘omou kovi: ‘i he mafoa ‘a e ata ‘e mātu‘aki tu‘usi ‘a e Tu‘i ‘Isileli,