Read KO E TOH TAPU KATOA TONGA KO HOSEA 11 Bible Online

KO HOSEA 11 - KO E TOH TAPU KATOA TONGA bible

KO HOSEA 11

¹‘I HE kei tamasi‘i ‘a ‘Isileli, na‘a ku ‘ofa ki ai, pea u ui hoku foha[42] mei ‘Isipite.

²Na‘e fai ha ui kiate kinautolu, ka nau hola ai pē ke puli:[43] na‘a nau feilaulau ki ha‘a Peali, pea nau tutu ‘inisēnisi ki he ngaahi ‘aitoli.

³‘Osi, ko au na‘a ku ako ‘a ‘Ifalemi ke ha‘ele — si‘ene pukepuke hake kinautolu ‘aki hono nima[44] — ka na‘e ‘ikai te nau ‘ilo ko au ‘oku faito‘o kinautolu.

⁴Na‘a ku toho ‘aki kinautolu ‘a e ngaahi afo ‘o e tangata, ‘a e ngaahi leta ko e ‘ofa; pea na‘a ku hoko kiate ia hangē ko kinautolu ‘oku hiki ‘a e ‘ioke ki he funga kou‘ahe, pea na‘a ku fai fakaalaala ki ai, na‘a ku ‘ange ‘enau kai.[45]

⁵‘E ‘ikai foki ia ki ‘Isipite; ka ko ‘Āsilia, ko ia ia hono tu‘i, koe‘uhi na‘e ‘ikai te nau fie tafoki.

⁶‘E tā takai ha heletā ‘i hono ngaahi kolo, pea te ne faka‘osi ‘ene kau launoa,[46] pea te ne keikeina koe‘uhi ko e ngaahi fale‘i na‘a nau fai.

⁷Pea ‘oku mo‘u tāupe ‘a hoku kakai ke fulitu‘a kiate au: pea neongo ‘e ui ia ki ‘olunga ‘e ha taha, ‘e ‘ikai ha fai hake.[47]

⁸Honou lava ke tukuange koe, si‘i ‘Ifalemi? honou lava ke fakatukuhāusia‘i koe, si‘i ‘Isileli? honou lava ke ngaohi koe ‘o hangē ko ‘Atima? ke ‘ai koe ke tatau mo Sipoimi? Kuo liliu hoku loto ‘iate au, ‘oku ngāue kotoa hoku fatu.

⁹‘E ‘ikai te u fakaai ‘eku ‘ita kakaha, ‘e ‘ikai te u foki ‘o faka‘auha ‘a ‘Ifalemi: he ko e ‘Otua au, ‘o ‘ikai ko e tangata; ko e Tāpuhā ‘oku lotolotoi ‘iate koe: ko ia, ‘e ‘ikai te u ha‘u mo e ‘ita.[48]

¹⁰Te nau ‘alu muimui kia Sihova, hangē ko e fai ki ha laione ‘oku kālou; seuke, te ne kālou mo‘oni, pea ‘e ha‘u tetetete ‘a e fānau mei he tahi.

¹¹Te nau ha‘u tetetete pē mei ‘Isipite hangē ko ha misi, pea mei ‘Āsilia hangē ko e lupe: pea te u tuku ke nau nofo ‘i honau ngaahi fale — ko Sihova ia mei he Ta‘ehāmai.