Read KO E TOH TAPU KATOA TONGA KO HOSEA 12 Bible Online

KO HOSEA 12 - KO E TOH TAPU KATOA TONGA bible

KO HOSEA 12

¹‘OKU loki au ‘e ‘Ifalemi ‘aki ‘a e loi, pe ko e fale ‘o ‘Isileli ‘aki ‘a e kākā; ka ko Siuta ‘oku kei fai ‘a e pule[49] he feangai mo ‘Ela, pea ‘oku fai mo‘oni ‘ene feohi mo e Toputapu.

²‘Oku kaikai ‘a ‘Ifalemi ki he matangi, pea ‘oku ne tuli ki he matangi hahake: ‘oku ne fakalahi ma‘u ai pē ‘a e kākā mo e maumau me‘a; pea ‘oku nau fai talite mo ‘Āsilia, pea ‘oku fetuku lolo ki ‘Isipite.

³Pea ‘oku ai ha hopo ‘a Sihova ke fai mo Siuta, pea te ne tautea ‘a Sēkope, ‘o fakatatau mo hono ngaahi ‘alunga; te ne fakafoki kiate ia ‘a e tuha ‘o ‘ene ngaahi fai anga.

⁴Lolotonga na‘a ne ‘i he manava Na‘a ne puke ‘a e muiva‘e ‘o hono tokoua; Pea ‘i he‘ene tangata na‘a ne fai mo e ‘Otua:

⁵‘Io, na‘a ne fefa‘uhi mo e ‘āngelo, ‘o ne lava‘i, Na‘a ne tangi mo hū kiate ia: Na‘a ne ‘ilo ia ‘i Pēteli, Pea ‘i he potu ko ia na‘e fai ‘ene fefolofolai mo kitautolu.[50]

⁶‘Io, ‘a Sihova ko e ‘Otua Mohu hōsitē: Ko Sihova hono huafa manatua.

⁷Ko ia te ke tafoki koe, ‘o nofo ki ho ‘Otua: tauhi ‘a e ‘ofa mo e faitotonu, pea nofo‘aki tali ki ho ‘Otua.

⁸‘a e Kēnani na,[51] ‘oku ne to‘o ha fuatautau hala: ‘oku ne manako ke ma‘u me‘a ‘i he kākā.

⁹Ka ‘oku lau ‘e ‘Ifalemi, ‘Ā, fokifā pē kuo u koloa‘ia, kuo u ma‘u me‘a; ‘oku ‘ikai ha taha ‘i he ngaahi fua ‘o ‘eku ngāue ‘oku lava ke faka‘ilo ha‘aku kovi, kehe ha kovi ‘e lau ko e angahala.

¹⁰‘Osi, ko au pē ‘a Sihova ko ho ‘Otua, talu ‘a ‘Isipite ‘o fai mai; te u tuku ke ke toe nofo tēniti, hangē ko e fai lolotonga ‘a e kātoanga.

¹¹Pea kuo u lea hifo ki he kau palōfita; ‘io, ko au na‘a ku fakalahi vīsone; pea u fakafai ‘i he kau palōfita ‘eku ngaahi fakatātā.

¹²Ko e koto kovi koā ‘a Kiliati? ‘Ā, kuo nau hoko ko e nge‘esi. ‘Oku fai ma‘u pē koā ‘e Kiliati ‘a e feilaulau pulu? ‘E hoko foki ‘enau ngaahi ‘ōlita hangē ko e ngaahi fokotu‘unga maka ‘i he kauefu ‘o e ngoue.

¹³Ka ko Sēkope na‘a ne hola ki he tuku‘uta ‘o Sīlia, Pea na‘e ngāue ‘a ‘Isileli ke ma‘u ha uaifi, ‘Io, ke ma‘u ha uaifi na‘a ne fai ‘a e ngāue tauhi.

¹⁴Ka ko e palōfita na‘e ‘ohake ai ‘e Sihova ‘a ‘Isileli mei ‘Isipite, Pea ko e palōfita na‘e fai‘aki hono tauhi.

¹⁵Kuo langa‘i ‘e ‘Ifalemi ‘a e houhau kona: ko ia ‘e tuku hono toto ke tō kiate ia, pea ko ‘ene talakaa‘i ‘ene ‘Afio ‘e fakafoki ‘e hono ‘Eiki kiate ia.