Read KO E TOH TAPU KATOA TONGA KO HOSEA 2 Bible Online

KO HOSEA 2 - KO E TOH TAPU KATOA TONGA bible

KO HOSEA 2

¹LEA kimoutolu ki ho‘omou fa‘ē, lea — he tala‘ehai ko hoku uaifi ia, pea tala‘ehai ko hono husepāniti au —

²ke ne hu‘i ‘a e tō‘onga ‘o e fekai mei hono mata, mo e mounu ‘o e holikovi ‘a alafia mei hono vaha‘a huhu.

³Na‘a ‘iloange te u ‘ai ia ke ne telefua, pea u tuku ia ke hangē ko e ‘aho ‘o hono fā‘ele‘i; pea u ngaohi ia ‘o hangē ko e fonua mamate, ‘o ‘ai ia ‘o hangē ko e fonua honge vai, ‘o tuku ke ne mate ‘i he fie inu.

⁴‘Āua, ‘e ‘ikai te u faka‘atu‘i ‘ene fānau; he ko e hako fe‘auaki kinautolu.

⁵He kuo fe‘auaki ‘enau fa‘eé:[4] kuo fai me‘a pango ‘e ia na‘e feitama‘i kinautolu: he na‘a ne pehē, Ka u muimui ki hoku kau ‘ofa‘anga, si‘enau ‘omi ‘eku me‘akai, mo ‘eku me‘ainu, ‘eku filo sipi mo falakesi, ‘eku lolo, mo ‘eku kava kehekehe.

⁶Ko hono ō ia, ko au eni te u felei ho hala ‘aki ‘a e talatala, te u ngaohi ha ‘ā maka ke songo ia, pea ‘e ‘ikai te ne lava ke ‘ilo hono ngaahi founga.

⁷Pea te ne mātu‘aki tuli ki hono ngaahi ‘ofa‘anga, kae ‘ikai te ne ma‘u kinautolu; ‘io, te ne kumi kiate kinautolu, kae ‘ikai te ne ‘iloa. Pea te ne toki pehē, Ka u foki mu‘a ki hoku ‘uluaki husepāniti; he na‘a ku lelei ange ‘i he taimi ko ē ‘i he fai ko eni.

⁸Ka ko si‘i fefine na ‘oku ‘ikai te ne ‘ilo ko au ia na‘a ku ‘ange ki ai ‘a e uite, mo e uaine mo e lolo, mo fakalahi ‘ene siliva mo e koula, na‘a nau ngaohi ‘aki ‘a Peali.

⁹Ko hono ō ia, te u fakafoki mai ‘eku uite ‘oka hoko hono taimi, mo ‘eku uaine ‘i he taimi ‘oku lelei ai; pea te u hamusi mai ‘eku filo sipi mo falakesi, ‘a ia na‘e mei vala ‘aki hono telefua.

¹⁰Pea te u tatala leva hono fakalielia, ke sio ki ai hono kau ‘ofa‘anga, pea ‘e ‘ikai hamusi ha taha mei hoku nima.

¹¹Pea te u ‘ai ke tuku hono ngaahi fiefia‘anga fua pē, hono kātoanga, hono fakamāhina fo‘ou, mo hono Sāpate; ‘io, hono ngaahi kātoanga tu‘utu‘uni fua pē.

¹²Pea te u maumau‘i ‘ene vaine, mo ‘ene fiki, ‘a ia na‘a ne lau ki ai, “Ko si‘eku to‘ongapō ia, ‘a ia na‘e ‘omi kiate au ‘e hoku kau ‘ofa‘anga:” ‘ā, te u ngaohi ia ko e vao, pea ‘e keina kinautolu ‘e he manu kaivao.

¹³Pea te u ‘eke kiate ia ‘a e ngaahi ‘aho na‘e tapu ki he kau Peali, ‘a ia na‘a ne tutu ‘inisēnisi ki ai, ‘o ne ‘ai ‘ene mama ihu mo e ngaahi teunga, ‘o ne muimui ki hono ngaahi ‘ofa‘anga; ka ko au na‘a ne fakangalongalo‘i — ko Sihova ia mei he Ta‘ehāmai.

¹⁴Ko hono ō ia, vakai, te u fakamuimui ia ‘e au, ‘o fakalaka ki he toafa; pea te u lea ngongohe ki ai.

¹⁵Pea te u ‘ange mei ai ‘ene ngaahi ngoue vaine, pea te u tuku ‘a Tele‘a ‘Ākoli ko e ava[5] ki ha ‘amanaki; pea te ne tali ‘i he potu ko ia, ‘o hangē ko e taimi ‘o ‘ene finemui, mo e taimi ‘o ‘ene ‘alu hake mei ‘Isipite.

¹⁶Pea ‘e hoko ‘i he taimi ko ia — ko Sihova eni mei he Ta‘ehāmai — te ke ui au ko ‘Isi (Hoku-husepāniti), ‘o ‘ikai te ke kei ui au ko Peali (Hoku-‘eiki).[6]

¹⁷‘Io, te u tatala ‘a e hingoa ‘o e ngaahi Peali mei hono ngutu, pea ‘e ‘ikai toe manatua kinautolu ‘i honau hingoa.

¹⁸Pea ‘i he taimi ko ia te u fai ma‘anautolu ha kovinānite mo e manu ‘o e vao, pea mo e manupuna ‘o e ‘atā, mo e me‘a ‘oku ngaolo ‘i he kelekele: pea te u maumau mo faka‘osi mei he fonua ‘a e kaufana, mo e heletā, mo e tau; pea te u tuku ke nau tokoto nonga.

¹⁹Pea te u polo‘i koe kiate au ke ta‘engata; pea ko ‘eku polo‘i koe kiate au, ‘e ō mo e totonu, mo e fakalao, mo e fai meesi, mo e fa‘a faka‘atu‘i.

²⁰Pea ko ‘eku polo‘i koe kiate au ko e fakamo‘omo‘oni: pea te ke ‘ilo ‘a Sihova.

²¹Pea ka hoko ‘a e taimi ko ia, te u tali — ko Sihova eni mei he Ta‘ehāmai — ‘io, te u tali ‘a e ngaahi langi, pea ‘e tali ‘e kinautolu ‘a e fonua;

²²pea ‘e tali ‘e he fonua ‘a e uite mo e uaine mo e lolo, pea ko kinautolu te nau tali ‘a Sisilili[7] (Pulopula-‘a-‘Ela).

²³Pea te u tō ia ma‘aku ‘i he fonua, pea te u faka‘atu‘i ‘a Lō-lūhama (Ta‘efaka‘atu‘i), pea te u lea kia Lō-‘amī (‘Oku ‘ikai-ko-hoku-kakai), ko hoku kakai koe, pea te ne pehē mai ‘e ia, Si‘oku ‘Otua ē!