Read KO E TOH TAPU KATOA TONGA KO HOSEA 4 Bible Online

KO HOSEA 4 - KO E TOH TAPU KATOA TONGA bible

KO HOSEA 4

¹HA‘A ‘Isileli, fanongo ki he folofola ‘a Sihova: tala atu ‘oku ai ‘a e hopo ‘a Sihova mo e nofo he fonua ni, he ‘oku ‘ikai ha mo‘oni, pea ‘oku ‘ikai ha meesi, pea ‘oku ‘ikai ha ‘ilo ‘o e ‘Otua ‘i he fonua ni.

²Ko e takuanoa pē ‘a e Huafa, mo e loi, mo e fakapō, mo e kaiha‘a, mo e tono ‘unoho; ‘oku nau pā atu, pea ‘oku felave ‘a e fakapō mo e fakapō.

³Ko ia ‘oku tangilāulau ‘a e fonua, pea ‘oku ngaluvai ‘a e me‘a kotoa pē ‘oku nofo ai, ‘a e manu ‘o e vao, mo e manupuna ‘o e ‘atā; pea na‘a mo e ika ‘i he tahi ‘oku nau mole.

⁴Ka neongo ia, kae ‘oua ‘e fai ‘e ha taha ha fakapoto, pea ‘oua ‘e fai ‘e ha taha ha valoki; he ko ho kakai ‘oku hangē ko e kau tu‘u ki he taula‘eiki.[10]

⁵Ko ia, te ke humu ‘aho; pea ‘e humu foki mo koe ‘a e palōfita, po‘uli; pea te u faka‘auha ho‘o fa‘ē.

⁶‘Oku faka‘auha hoku kakai ko e masiva poto; he ko koe kuo ke fakatale‘i ‘a e poto, ko ia te u fakatale‘i koe mei ho‘o taula‘eiki kiate au: pea kuo ke fakangalongalo‘i ‘a e lao ‘a ho ‘Otua; te u fakangalongalo‘i ‘e au foki ho‘o fānau.

⁷Ko ‘enau faka‘a‘au leva ke lahi, pea pehē mo ‘enau hia: ko honau lāngilangi te u liliu ko e mā.

⁸‘Oku nau me‘akai ‘aki ‘a e angahala ‘a hoku kakai, pea ‘oku holi ‘a e loto takitaha ke ai ha‘anau faikovi.

⁹Ko ia ‘e hoko tatau pē ki he taula‘eiki mo e kakai; pea te u ‘eke kiate ia hono ngaahi ‘alunga, pea te u fakafoki kiate ia ‘ene ngaahi fai anga.

¹⁰Pea te nau kai, kae ‘ikai mākona; te nau fe‘auaki, kae ‘ikai te nau mafola: he kuo nau tuku ‘a e tokanga kia Sihova.

¹¹Ko e fai fe‘auaki, mo e inu uaine, kae‘uma‘ā ‘a e uaine fo‘ou, ‘oku mole ai ‘a e loto.

¹²‘Oku huhū hoku kakai ki he‘enau potu‘i ‘akau, pea ‘oku tala me‘a ki ai honau va‘akau: he kuo fakahee‘i kinautolu ‘e he laumālie anga fe‘auaki, pea kuo nau fai kovi mei he fatafata ‘o honau ‘Otua.

¹³‘Oku nau feilaulau mei he ngaahi tumutumu‘i mo‘unga, pea ‘oku nau tutu ‘inisēnisi ‘i he ngaahi fo‘i mā‘olunga, ‘i he lalo ‘oke‘oke, mo e popilā, mo e ‘oke; he ‘oku sai tokua honau malumalu: ko ia ‘oku fai fe‘auaki ai ho‘omou fānau fefine, pea ‘oku tonoa ai ‘a e ngaahi uaifi ‘o ho‘omou fānau tangata.

¹⁴‘E ‘ikai te u ‘eke ki ho‘omou fānau fefine ‘enau fe‘auaki, pe ki he ngaahi uaifi ‘o ho‘omou fānau tangata ‘enau tonoa; he na‘a mo e fa‘ahinga ko ē ‘oku nau afe mo e pa‘umutu,[11] pea ‘oku nau ō mo e kau fefine tapu ki he feilaulau[12] — ‘a! ko e kakai ‘oku ‘ikai ‘ilo ‘a e taau kuo pau ke mafuli.

¹⁵Ka neongo ho‘o fai fe‘auaki, ‘a koe ‘Isileli, kae ‘oua ‘e faihala ‘e Siuta: pea ‘oua te mou omi ki Kilikali, pea ‘oua te mou ‘alu hake ki Pete-‘āveni,[13] pea ‘oua te mou fuakava, “Tangi ‘a e mo‘ui ‘a Sihova.”

¹⁶He kuo hoko ‘a ‘Isileli ‘o pau‘u, ‘o hangē ha pulu pau‘u: ko e taimi ni ‘e fafanga kinautolu ‘e Sihova hangē ha lami ‘i ha potu fu‘u ‘atā.

¹⁷Kuo pīkitai ‘a ‘Ifalemi ki he ngaahi ‘aitoli; tuku ai pē ā.

¹⁸Ko honau uaine lelei kuo kovi; ‘oku nau fe‘auaki fie fe‘auaki: ko si‘i ngaahi pā ‘o e pule‘anga ‘oku nau mātu‘aki ‘ofa ki he mā.

¹⁹Kuo kofu ‘aki ia ‘e he matangi ‘i hono kapakau; pea ‘e fakamaa‘i kinautolu koe‘uhi ko ‘enau ngaahi feilaulau.[14]