Read KO E TOH TAPU KATOA TONGA KO HOSEA 5 Bible Online

KO HOSEA 5 - KO E TOH TAPU KATOA TONGA bible

KO HOSEA 5

¹FANONGO ki he me‘a ni, ‘a e kau taula‘eiki; pea mou tokanga, ‘a e fale ‘o ‘Isileli, pea mou fokotu‘u telinga mai, ‘a e fale ‘o e tu‘i; he ko homou fakamaau ‘oku tala; he kuo mou hoko ko e helepuna ‘i Mīsipa, mo e kupenga kuo ‘a‘au ‘i funga Tepoa.

²Pea ‘i he fakamafola angahala kuo nau keli mama‘o;[15] ka ko e tautea au kiate kinautolu kotoa.

³‘Oku ou ‘ilo ‘e au ‘a ‘Ifalemi, pea ‘oku ‘ikai puli ‘a ‘Isileli meiate au: he ko koe ena, ‘Ifalemi, kuo ke taukave ‘a e fe‘auaki; ko ‘Isileli kuo ‘uli‘i.

⁴‘Oku ‘ikai tuku ‘e he‘enau ngaahi fai anga ke nau tafoki ki he ‘Otua; he ‘oku ‘i honau loto ha laumālie anga fe‘auaki, pea ‘oku ‘ikai te nau ‘ilo ‘a Sihova.

⁵Ko ia, ‘e mātu‘aki talatalaaki‘i ia ‘e he lāngilangi ‘o ‘Isileli: pea ko ‘Isileli mo ‘Ifalemi te na humu ‘i he‘ena fai kovi; ‘e humu foki ‘i Siuta fakataha mo kinaua.

⁶Neongo ‘enau ‘alu ‘aki ‘enau fanga sipi mo kosi, mo ‘enau fanga pulu, ‘enau kumi kia Sihova, ka ‘e ‘ikai te nau ‘ilo ia: kuo ne motu meiate kinautolu.

⁷Kuo nau fai kākā kia Sihova; he kuo nau fanau‘i ha fānau muli: ko e taimi ni ‘e keina kinautolu mo honau ngaahi tofi‘a ‘e he fakamāhina fo‘ou.

⁸Ifi koaneti ‘i Kipea, ifi talupite ‘i Lama; fākaulu ‘i Pete-‘āveni[16] “Penisi-mani, kilo ki tu‘a.”

⁹‘E hoko ‘a ‘Ifalemi ko e fonua ‘auha ‘i he ‘aho ‘o e tautea: kuo u fakahā ‘i he ngaahi matakali ‘o ‘Isileli ‘a e me‘a kuo pau.

¹⁰Kuo hoko ‘a e hou‘eiki Siuta ‘o hangē ko e fa‘ahinga hiki kau‘ā: te u huhua ‘eku ‘ita kiate kinautolu ‘o hangē ko e vai.

¹¹Ko e fakamālohia ‘a ‘Ifalemi, ko e laikina ‘i he fakamaau; koe‘uhi na‘a ne loto ke muimui ki he tu‘utu‘uni.[17]

¹²Ko ia, ‘oku ou hangē ko ha mū ki ‘Ifalemi, pea hangē ko ha tunga ki he fale ‘o Siuta.

¹³Pea ‘i he vakai ‘e ‘Ifalemi hono mahaki, pea mo Siuta hono pala, na‘e ‘alu ‘a ‘Ifalemi ki ‘Āsilia, ‘o ‘alu ‘ene fekau ki he Tu‘i Taukapo:[18] ka ‘oku ‘ikai te ne lava ‘e ia ke faito‘o kimoua, pea ‘oku ‘ikai te ne mateka‘i atu ‘a e pala.

¹⁴He te u hoko hangē ha laione ki ‘Ifalemi, pea hangē ko e manu hau ki he fale ‘o Siuta: ko au, ‘io, ko au te u hae ‘o ‘alu; te u ‘ave, pea ‘oku ‘ikai ha hamusi.

¹⁵Te u ‘alu, ‘o fou ki hoku potu, kae‘oua ke nau ongo‘i halaia, ‘o kumi ki hoku mata: ka hoko ha mamahi kiate kinautolu, te nau kumi vave kiate au.