Read KO E TOH TAPU KATOA TONGA KO HOSEA 7 Bible Online

KO HOSEA 7 - KO E TOH TAPU KATOA TONGA bible

KO HOSEA 7

¹‘I HE‘EKU nofo ke faito‘o ‘a ‘Isileli, tā na‘e tatala ai ‘a e kovi ‘a ‘Ifalemi, mo e ngaahi pango ‘o Samēlia; seuke, ‘oku nau feia ‘a e kākā; pea ‘oku hū mai ki fale ‘a e kaiha‘a, ‘oku pāpani holo ‘i tu‘a ‘a e kaiha‘akau.

²Pea ‘oku ‘ikai te nau tala ki honau loto te u manatu ‘enau ngaahi kovi kotoa: ‘i he taimi ni ‘oku ‘ākilotoa kinautolu ‘e he‘enau fai anga, ‘a ia ‘oku fe‘ao mo au.

³‘Oku nau fakafiefia‘i ‘a e tu‘i ‘aki ‘enau ngaahi me‘a pango, pea mo e hou‘eiki ‘aki ‘enau ngaahi loi.

⁴Ko e kau tono ‘unoho kotoa pē; ‘oku nau hangē ha ‘ōvani kuo faka‘afu ‘e he ta‘o mā; ka ‘oku ne tuku ‘ene ue‘i mei he natu ‘o e mā, ‘o a‘u ki he‘ene tupu.

⁵— ‘I he ‘aho ‘o hoku tu‘i na‘e fakamahaki ia[21] ‘e he hou‘eiki ‘aki ‘a e māfana ‘o e uaine; na‘a ne fafale ki he kau fakata‘emālū‘ia.

⁶Seuke, ‘i he‘enau toka malumu na‘a nau ha‘u mo kinautolu honau loto hangē ko e ‘ōvani na:[22] ‘oku mohe ‘enau ta‘o mā ‘i he pō kotoa; pongipongi hake ‘oku vela ia hangē ko e afi ulo.

⁷‘Oku nau māfana kotoa hangē ko e ‘ōvani na, pea ‘oku nau keina ‘enau kau fakamaau: kuo tō honau ngaahi tu‘i kotoa; ‘oku ‘ikai hanau taha ke tautapa kiate au.

⁸Kuo hanga ‘a ‘Ifalemi ‘o fefiofi mo e ngaahi kakai: kuo hoko ‘a ‘Ifalemi ko e keke ta‘efokihi.

⁹Kuo kai hono ivi ‘e ha kau muli, ka ko si‘i me‘a ‘oku ‘ikai te ne ‘ilo ki ai, ‘Oku tōtōholo foki ‘i hono lau ha ngaahi fo‘i hina, ka ko si‘i me‘a ‘oku ‘ikai te ne ‘ilo ki ai.

¹⁰Pea kuo mātu‘aki talatalaaki‘i ia ‘e he lāngilangi ‘o ‘Isileli, Ka neongo ia kotoa kuo ‘ikai te nau foki kia Sihova ko honau ‘Otua, pea kuo ‘ikai te nau kumi ki ai.

¹¹Pea kuo hoko ‘a ‘Ifalemi ‘o hangē ha lupe vale ‘oku ‘ikai hano loto: kuo nau tautapa ki ‘Isipite, kuo nau ‘alu ki ‘Āsilia.

¹²Ha potu pē te nau ‘alu ki ai te u ‘a‘au hoku kupenga kiate kinautolu; te u ‘ohifo kinautolu hangē ko e manupuna ‘o e ‘atā; te u tautea kinautolu hangē ko e me‘a na‘e fakahā ki he‘enau fakataha.[23]

¹³‘Oiauē kinautolu! he kuo nau puna meiate au; ke tō mai hanau ‘auha! he kuo nau pau‘u kiate au: pea lolotonga na‘a ku fie huhu‘i kinautolu ‘e au, kae hanga ‘e kinautolu ‘o lau kiate au ha koto loi.

¹⁴He tala‘ehai ‘oku nau fai‘aki honau loto ‘enau tautapa mai, ka ‘oku nau tākoto ‘i honau mohenga, ‘o tangi ‘oiauē: ko e uite pē mo e uaine ‘oku nau lolofi mai ki ai; ka ai ha fai kiate au ‘oku nau afe atu pē.

¹⁵Ka ko au, neongo na‘a ku ako honau nima, ‘o ngaohi ke mālohi, ka ‘oku nau fakakaukau‘i ha kovi ke fai kiate au.

¹⁶‘Oku nau tafoki, kae ‘ikai ki ‘olunga;[24] kuo nau hoko ‘o hangē ha kaufana mangumolū: ‘e tō honau hou‘eiki ‘i he heletā ko e nunu‘a ‘o e pau‘u honau ‘elelo; ko e fakatupunga luma eni kiate kinautolu ‘i he fonua ko ‘Isipite.