Read KO E TOH TAPU KATOA TONGA KO HOSEA 8 Bible Online

KO HOSEA 8 - KO E TOH TAPU KATOA TONGA bible

KO HOSEA 8

¹KO E talupite ki ho ngutu! Ko e lofa ē hangē ha ‘īkale ki he fale ‘o Sihova; koe‘uhiā na‘a nau laka kehe mo ‘eku kovinānite, pea nau maumau‘i ‘eku lao.

²Te nau tautapa kiate au, ‘E hoku ‘Otua, ‘oku mau ‘ilo koe, ‘e kimautolu ‘Isileli.

³‘Oku keu‘i ‘e ‘Isileli ‘a e lelei! tuku ke tuli ia ‘e he fili.

⁴Ko e fa‘ahinga na kuo nau fokotu‘u tu‘i, ka na‘e ‘ikai ko e me‘a meiate au: kuo nau fakanofo pilinisi, ka tala‘ehai na‘a ku ‘ilo ki ai: kuo nau ngāue‘aki ‘enau siliva mo e koula ke ngaohi ‘aki ‘enau ‘aitoli; ko hono ‘ātunga ē ‘e tu‘usi kinautolu.

⁵‘E Samēlia, ‘oku ne keu‘i ho kafi; kuo tafunaki ‘eku ‘ita kiate kinautolu: ko fotu ā mo e ‘ikai te nau lava ‘a e ta‘ehalaia?

⁶He ‘oku meia ‘Isileli mo ia foki: na‘e ngaohi ia ‘e ha tufunga, pea ‘oku ‘ikai ko e ‘Otua ‘a e me‘a na; tala atu ‘e hoko ‘a e kafi ‘o Samēlia ko e ‘ū matekitaki.

⁷He ‘oku nau tō matangi, pea te nau utu ‘a e afā. — ‘Oku ‘ikai hano ta‘u ‘e motu‘u; ko ‘ene muka ‘oku ‘ikai iku fua; ka ne ai, ‘e folofua ‘e ha kau muli.

⁸— Kuo folofua ‘a ‘Isileli: na‘a mo e taimi ni kuo nau hoko ki he ngaahi pule‘anga ko e ipu ‘oku ‘ikai fai ki ai ha manako.

⁹— Seuke, kuo ‘alu hake ‘a e fa‘ahinga ko ia ki ‘Āsilia: ko e ‘asi kaivao ‘oku fakaeia pē. — Ko ‘Ifalemi kuo nō ‘ofa‘anga.

¹⁰Ka neongo ‘enau fai nō ‘i he ngaahi pule‘anga, ka te u tānaki mai leva kinautolu; pea te nau kamata ke mingi, koe‘uhi ko e fatongia ‘o e tu‘i ‘o e hou‘eiki.[25]

¹¹He kuo fakalahi ‘ōlita ‘e ‘Ifalemi ke fai angahala ai: kuo hoko ‘a e ngaahi ‘ōlita ko hono hia‘anga.

¹²— Kuo u tohi ma‘ana ‘a e mano‘i me‘a ‘o ‘eku lao: ‘oku ongo kiate kinautolu ‘o hangē ko e me‘a ‘a ha fonua kehe.

¹³— ‘I he fai ‘o ‘eku ngaahi feilaulau tutu[26] ‘oku nau tāmate‘i kakano pē ke kai: ‘oku ‘ikai ke hōhō‘ia ai ‘a Sihova: te ne manatua leva ‘enau kovi, mo ‘eke ‘enau hia; ‘e foki ki ‘Isipite ‘a e fa‘ahinga ko ena.

¹⁴He kuo ngalo ‘ia ‘Isileli ‘a e ‘Afio na‘a ne ngaohi ia, ‘o ne langa palasi,[27] pea ko Siuta kuo ne fakalahi kolo ai: ka te u tuku atu ha afi ki he‘ene ngaahi kolo, pea te ne keina hono ngaahi taua.